‘Dedengelen To Ray Pikakasi’
Onapit ed Dios
‘Dedengelen To Ray Pikakasi’
TALAGA ta’n eebatan nen Jehova’n Dios iray impapuson pikakasi na saray matoor a mandadayew ed sikato? Papaneknekan na salaysay na Biblia nipaakar ed lakin say ngaran to et Jabes a talagan ‘dedengelen nen Jehova iray pikakasi.’ (Salmo 65:2) Sayan antikey a salaysay et nisalet ed saray listaan na kapolian a nirekord ed bandad gapo na libro na Unonan Awaran. Nengnengen tayo pa sirin itan ed 1 Awaran 4:9, 10.
Diad sayan duaran bersikulo labat so pakabasaan na impormasyon ed si Jabes. Unong ed bersikulo 9, sikatoy “inngaran [nen ina] to a Jabes, ya inkuan to, Lapu ed sikato so inyanak ko a sisisinagem [odino, tekep na ot-ot].” * Akin et ontan so inter ton ngaran ed anak to? Kasin sobray impanpasakit to sanen inyanak toy Jabes? Kasin abalo la, kanian maermen ta agla anengneng na asawa to iyan anak da? Anggapoy ibabaga na Biblia nipaakar ed satan. Balet ta seguradon walay rason na sayan ina pian manliket diad ibaleg na sayan anak to. Nayarin makalakal met iray agagi nen Jabes, balet ta si Jabes so “mamabli [odino, mas kagalgalang] nen saray agi to.”
Si Jabes et mapikasin too. Inggapo toy pikakasi to diad inkerew toy bendisyon na Dios. Insan wala ni taloran kerew to, a pakapatnagan ya mabiskeg so pananisia to.
Unona, akikasi si Jabes ed Dios, ya inkuan to: “Paawangen mo komon so ketegan ko.” (Bersikulo 10) Si Jabes et kagalgalang ya too, kanian aglabay ya ibaga na sayan kerew to a labay ton gamgamen so dalin na arum. Say sankanonot nen Jabes et saray totoo, aliwan say dalin. Nayarin say kekerewen to et onawang komon so dalin to pian mas dakel so makapanayam ditan a mandadayew ed tuan Dios. *
Komadua, impikasi nen Jabes a ‘say lima na Dios et wala komon ed sikato.’ Isisimbolo na lima na Dios so pakayari to ya uusaren to pian tulongan iray mandadayew ed sikato. (1 Awaran 29:12) Amta nen Jabes a pian naebatay pikakasi to, sikatoy nepeg a manmatalek a say lima na Dios et ag-antikey ed saramay walaay pananisia ed Sikato.—Isaias 59:1.
Oniay komatlon kerew nen Jabes: “Yagel mo ak komon ed mauges, pian aliwa komon a [satan] so kaermenan ko!” Nayarin samay imbaga nen Jabes ya “aliwa komon a [satan] so kaermenan ko” et mangipapanengneng ya say kekerewen to et aliwan say pakapaliis ed kaugsan, noagta nasarag to komoy epekto na satan.
Nanengneng ed pikakasi nen Jabes ya say importante’d sikato et say tuan panagdayew, tan sikatoy walaay pananisia tan talek ed Dios. Inebatan kasi nen Jehova so pikakasi to? Oniay unor iran salita ed sayan antikey a salaysay: “Say Dios inyabobon [odino, inter] to ed sikato so kerew to.”
Agmanguuman si Jehova. Sikatoy naliliketan ed saray pikakasi na lingkor to. Saramay walaay pananisia tan talek ed sikato et makapanilalo ed saya: “Antokaman so kerewen tayo unong ed linawa to, dengelen to itayo.”—1 Juan 5:14.
[Saray paimano ed leksab]
^ par. 5 Say ngaran a Jabes et nanlapud salitan say labay ton ibaga et “ot-ot.”
^ par. 7 Diad saray Targum, a bersion na saray Judio ed Sagradon Kasulatan, sarayan imbaga nen Jabes et nipatalos a: “Bendisyonan mo ak pay ananak, tan paawang mo ray ketegan ko pian napanayaman na saray disipulo.”