Magnarinea An’Andrianagnahare

I “Mpijanjigne Vavakey”

1 TANTARA 4:9, 10

TENA valea i Jehovah Andrianagnahare vao ty vavake amy ty fo atao ty mpanompo’e mahafoe tegna? “Mpijanjigne vavake” vata’e ty Jehovah, naho fa dinehegne ty tantara i Jabeza, lahilahy raike tsy le rehafe ty Baiboly. (Salamo 65:2) Fohe ty tantara’e sady tsy mahazatse ty toeragne misy aze, satria amy ty tantaran-drazagne voalohan-doha’e amy i Tantara Voaloha’ey. Andao hodinehentikagne ty 1 Tantara 4:9, 10.

O andine’e roe reo avao ty mirehake ty miomba i Jabeza. Hoe ty andine’e 9: “I rene’e ty nagnomey aze ty agnaragne tihoe Jabeza, satria hoe reke: ‘Narare raho naho fa niterake aze.’” * Narare vata’e vao ty rene’e naho fa niterake aze, le izay ty nifilia’e o agnaragne iohoe? Sa fa mate ty vali’e, le nitaraigne reke satria tsy teo ty vali’e tamy i reke niterakey? Tsy mirehake izay ty Baiboly. Faie ho reharehan-drene’e o ajaja iohoe. Va’e nanao ze mahity i troke raike tamy i Jabeza rey, faie “nahazo voninahitse noho i rahalahi’e” rey reke.

Tea nivavake ty Jabeza. Nangatake ty fitahian’Andrianagnahare hey reke. Naho fa niavy eo, le nisy raha telo nangatahe’e, sady trea boake amy izay fa tena nanam-pinoagne reke.

Voaloha’e, nangatake taman’Andrianagnahare ty Jabeza mba ‘hagnitatse ty faritane’e.’ (Andine’e 10) Tsy mpihaboke tane o ndaty ndra magniry fanagna o ndaty o lahilahy nihajaegne iohoe. Tsy le tane loatse varagne ty tan-tsai’e ao. Va’e ho nangatake ty hagnitaragne ty faritane’e reke, faie tsy hialy mba ho maro ty mpanompo i tena Andrianagnaharey hitoboke ao. *

Faharoe, nangatake ty Jabeza, mba ‘hanohagne aze ty fitàn’Andrianagnahare.’ Ty hery ampiasaen’Andrianagnahare hagnampeagne ty mpivavake ama’e, o fità’e nangatahe’e iohoe. (1 Tantara 29:12) Niantehetse taman’Andrianagnahare ty Jabeza mba hahazoagne ze raha nirie ty fo’e, satria tsy fohe ty fitàn’Andrianagnahare naho mino aze ty mpanompo’e.​—Isaia 59:1.

Fahatelo, nivavake ty Jabeza mba ‘harovagne tsy ho azon-doza.’ Hoe te hirehake reke fa tsy ty hagnafahagne ty loza manjò aze ro nangatahe’e fa mba tsy hanahelo ndra ho kivy noho o haratiagneo.

Trea boake amy ty vavake natao i Jabeza fa nieretseretse lognandro miomba ty fivavahagne maregne reke, sady nino naho natoky i Mpijanjigne vavakey. Akore ty natao i Jehovah? Izao ty fifaragna i tantara fohey: “Nimein’Andrianagnahare aze ze raha nangatahe’e.”

Tsy miova i Mpijanjigne vavakey. Mahafinaritse aze ty vavake atao ty mpanompo’e. Afake matoky ty saontsi’e toy ze mino naho ze matoky aze: “Ndra inogn’inogne angatahentikagne naho fa mifanandrife amy ty zoton’arofo’e, le mijanjigne antikagne reke.”​—1 Jaona 5:14.

[Fagnamarehagne ambane peje]