Kporom Hen Aôndo

U A “Ongo Msen” La

1 KRONIKU 4:9, 10

YEHOVA Aôndo ongo mbamsen mba ior mba civir un sha mimi ve eren a ishima ve i môm la mimi kpa? Bibilo ôr se kwagh u orgen u se fe kwagh na kpishi ga yô, iti i or ne ér Yabeshi. Kwagh u or ne, u Bibilo i er se la tese ér mimi je Yehova “ongo msen.” (Pasalmi 65:2) Bibilo ôr kwagh na tiônôô, hen ijiir i alaghga a taver se kpishi u kaven er i hii ve i er kwagh na heela nahan yô. I ôr kwagh u or ne hen atô u ati a icombor i Mbayuda, a i nger ken mtom ma hiihii ma takerada u Kroniku u Hiihii la. De se time ase sha kwagh u i nger ken 1 Kroniku 4:9, 10 la.

Hanma kwagh u se fe sha kwagh u Yabeshi cii yô, i nger un ken avur a ahar ne. Ivur i sha 9 la kaa ér ngô na “yila un iti er Yabeshi, a kaa er: Gadia m mar un sha ican.” * Er nan ve ya un iti nahana? Yange toor mar hemba er kwase uya ka nan toor mar nahan shinii? Shin alaghga tsô hingir kwasecôghol, nahan lu vaan nom na ér á nenge mve u wan ve shin tar ne ga tsô a saa ku? Bibilo pase se ga. Nahan kpa, lu kwagh u kper ken hemen yô, kwase ne una ta ave vanger a wan na ne. Alaghga anmgbianev mba Yabeshi lu ior mba eren kwagh sha mimi, kpa “Yabeshi hemba anmgbianev nav icivir.”

Yabeshi lu or u eren msen kpoghuloo. Yange hii msen na sha u zamber a Aôndo ér a̱ ver un doo doo. Maa a mase sônon Aôndo akaa agen atar a tesen ér lu or u lun a jighjigh u nan kpishi.

Hiihii yô, Yabeshi sôn Aôndo kaa ér: “Ma U seer tar wam.” (Ivur 10) Orcivirigh ne lu or u ngohol ior inya sha apera ga, shi tômon akaa a mbagenev ga. Alaghga msen u yange er a ishima na i môm ne lu sha kwagh u inyaagh keng ga, kpa lu sha ci u mtsera u ior mba hen tar na. Adooga lu sônon Aôndo ér a̱ seer tar na ken bem sha er mbacivir Aôndo u mimi vea hemba ngeen ken u yô. *

Kwagh u sha uhar yô, Yabeshi sôn Aôndo ér “uwegh” nagh ku lu a na. Uwegh ku Aôndo ku sha ikyav ne ka tahav mbu tomov nav, mbu a yaren tom a mi sha u wasen mbacivir un la. (1 Kroniku 29:12) Yabeshi soo ér Aôndo a̱ kure asaren a ken ishima na, nahan a ver ashe a Aôndo u uwegh nagh ku yen sha u yiman mba ve ne un jighjigh mbara ga la.—Isaiah 59:1.

Kwagh u sha utar yô, Yabeshi er msen kaa ér: “Ma U yemem, kwaghbo ma a tserem ga.” Ishember i Yabeshi ôr ken msen ér, “kwaghbo ma a tserem ga” la, alaghga lu kaan ér Aôndo a̱ war un sha ikyev i kwaghbo ga, kpa lu kaan ér a̱ wase un sha er una ure shin sha er kwaghbo una kumbur a na ga yô.

Msen u Yabeshi er la tese ér kwagh u mcivir u mimi gba un ishima, shi a na un u a ongo msen la jighjigh shi a suur sha a na kpaa. Nahan Yehova er nena? Ngeren u kpuaa ne kure nahan ér: “Tsô Aôndo er un kwagh u a sôn la.”

Aôndo u a ongo msen la ngu a gema ga. Mbamsen mba mbacivir un ve eren la doo un ishima kpishi. Mba ve ne un jighjigh shi ve suur sha na la, vea fatyô u lun a vangertiôr ne: “Ka sea sôn nyityô kwagh u a lu sha ishima Na vough yô, A ungwa se.”—1 Yohane 5:14.

[Ngeren mba shin kpe]