Fundeni Abana Benu

Ubufumu Ubukawamya Ifintu Pano Calo

BUSHE walishiba Ubufumu ubukawamya ifintu pano calo?— * Bufumu Yesu atusambilishe ukuti tulepepela. Atusambilishe ukulomba Lesa ukuti: “Ubufumu bwenu bwise.” (Mateo 6:9, 10) Mupepi ne myaka 2,000, abasambi ba kwa Yesu balitwalilila ukupepa kuli Lesa ukuti Ubufumu bwakwe bwise. Bushe na iwe ulapepa ukuti bwise?—

Pa kuti wishibe ifyo ishiwi lya kuti ubufumu lipilibula, intanshi ufwile ukwishiba ifyo ishiwi lya kuti imfumu lipilibula. Imfumu muntu uuteka. Icalo ico ateka e bufumu bwakwe. Ubufumu bwa kwa Lesa bukateka isonde lyonse. Ilyo Ubufumu bwa kwa Lesa bukesa, abantu bonse pe sonde bakaipakisha amapaalo bukaleta.

Ubufumu bwa kwa Lesa buteko bwa mu muulu. Pali Esaya 9:6, Baibolo ilanda pali Kateka wa ubu Bufumu ukuti: “Umwana natufyalilwa, . . . kabili bukateka bukaba pa kubeya kwakwe. Kabili akenikwa . . . Cilolo wa mutende.”

Bushe cilolo walimwishiba?—Ee, mwana wa mfumu. Bushe ni Mfumu nshi iikalamba mu muulu?—Nga wayasuka ukuti ni Yehova ninshi walungika. Baibolo imwita ukuti ‘Uwapulamo pano isonde ponse.’ (Amalumbo 83:18) Mu Baibolo, Yesu ilingi line bamwita ukuti, “Umwana wa kwa Lesa.” Umulandu umo uo bamwitila ifi mulandu wa kuti Yehova e wabumbile Yesu. Yehova ni Wishi wa cine cine uwa kwa Yesu.—Luka 1:34, 35; Yohane 1:34, 49; 3:17; 11:27; 20:31; Imilimo 9:20.

Ubufumu bwa kwa Lesa ubo Yesu atusambilishe ukupepela bwali-ibela nga nshi pantu Yehova e wasala Umwana wakwe, Cilolo, ukuba Imfumu ya Bufumu bwakwe. Nomba bushe walishiba ukuti na bambi balisalwa ukuti bakalateka pamo na Yesu mu Bufumu bwa kwa Wishi?—Natulande pali aba bantu.

Ilyo Yesu talafwa, aebele abasambi bakwe aba cishinka ukuti aleya ku “ng’anda” ya kwa Wishi mu muulu. Atile: “Ndeya ku kumupekanishisha apa kwikala, ukuti uko nkaba e ko na imwe mukabe.” (Yohane 14:1-3) Bushe walishiba ifyo abatumwa na bambi abasalwa bakalacita ku muulu?—‘Bakalateka pamo  nankwe.’ Baibolo yalilanda fye ne mpendwa ya bakateka pamo na Yesu. Bakaba 144,000.—Ukusokolola 14:1, 3; 20:6.

Bushe uletontonkanya ukuti pe sonde pakaba shani ilyo Cilolo wa Mutende na ba 144,000 bakalateka?—Ala pakawama! Tapakabe inkondo. Inama tashakalelya inama shibiye kabili tashakalelya na bantu. Takuli uukalalwala nangu ukufwa. Amenso ya mpofu yakalamona, amatwi ya bankomamatwi yakalaumfwa, abalemana bakabutuka no kucilauka nge nsebula. Mu calo mukaba ifya kulya ifisuma ifikakumana abantu bonse. Kabili abantu bonse bakatemwana nga filya Yesu asambilishe abasambi bakwe ukuti e fyo bafwile ukuba. (Yohane 13:34, 35) Leka tubelenge na kabili ifikomo fya mwi buuku lya kwa Esaya tumfwe ifintu ifisuma ifikacitika.—Esaya 2:4; 11:6-11; 25:8; 33:24; 35:5, 6; 65:21-24.

Ukutula apo Yesu asambilishishe abantu ukupepa ukuti “ubufumu bwenu bwise,” abantu abengi nga nshi balisambilila pali ubu Bufumu. Ifyo basambilila pa Bufumu fyalilenga ba-aluka. Nomba line fye, ilyo ubu Bufumu bukesa no kupyana amabufumu yonse aya bantunse, bonse ababombela Yehova Lesa na Yesu Kristu uo asonta ukuba Imfumu, bakaipakisha umutende, ubumi ubusuma, e lyo ne nsansa.—Yohane 17:3.

[Futunoti]

AMEPUSHO:

▪ Bushe Imfumu ya Bufumu bwa kwa Lesa nani, kabili mulandu nshi Baibolo imwitila ukuti “Cilolo”?

▪ Ni bani bakalateka na Yesu mu Bufumu bwa kwa Wishi?

▪ Bushe icalo cikaba shani ilyo Yesu akalateka?