O BAU kila na Matanitu cava ena veisautaka na bula ni tamata?​— * Qo na Matanitu a vakavulica o Jisu meda masuta. A vakavulica meda kerea vua na Kalou: “Me yaco mai na nomuni matanitu.” (Maciu 6:​9, 10) Sa voleka ni 2,000 na yabaki na nodra kerea tiko vua na Kalou na imuri i Jisu me yaco mai na nona Matanitu. O dau masulaka tale ga oya?​—

Ena vinaka mo kila na nona itavi e dua na tui mo rawa ni kila kina se cava na matanitu. Na tui e tu vua na lewa, era na vakarorogo ena nona veiliutaki na vanua kece e lewa. Ia na vanua e lewa na Matanitu ni Kalou e oka kina na vuravura taucoko. Ni sa na liutaka na vuravura na Matanitu ni Kalou, era na marautaka na kena veivakalougatataki na vakarurugi kina.

E tiko mai lomalagi na Matanitu ni Kalou. E vakamacalataka na iLiuliu ni Matanitu qo na Aisea 9:6. Raica mada na ka e tukuni me baleti koya: “Sa sucu mai e dua na gone, . . . ena vakatau kivei koya na lewa; ena vakatokai na yacana ko . . . Tui ni Sautu.”

O bau kila se o cei na Tui cecere vakalomalagi?​— E donu ke o tukuna ni o Jiova. Na iVolatabu e kaya ni o koya “sa Cecere sara duaduaga e vuravura taucoko.” (Same 83:18) Ia o cei na “gone” e vakatokai na “Tui ni Sautu” e soli tale ga vua na “lewa”? E dau vakatokai Jisu na iVolatabu me “Luve ni Kalou.” Dua na vuna ni o Jiova e solia vei Jisu na bula, o koya tale ga na Tamana dina.​—Luke 1:​34, 35; Joni 1:​34, 49; 3:17; 11:27; 20:31; Cakacaka 9:20.

E duatani duadua na Matanitu ni Kalou a vakavulica o Jisu meda masulaka. Baleta o Jiova ga e digitaki Luvena me kena Tui. Ia o kila ni so tale era digitaki mera na veiliutaki vakatui kei Jisu ena Matanitu nei Tamana?​— Meda veivosakitaka mada.

A tukuna o Jisu vei ira na nona imuri yalodina ni bera ni mate, ni sa lako “ena vale” nei Tamana i lomalagi. E kaya: “Au sa lako tiko qo meu lai vakarautaka e dua na tikina me nomudou. . . . , mo dou tiko tale ga ena vanua au tiko kina.” (Joni 14:​1-3) O kila na ka era na cakava na yapositolo kei ira tale eso era digitaki mera  lai bula kei Jisu e lomalagi?​— Era “na veiliutaki vakatui vata kei koya.” E tukuni sara ga ena iVolatabu na kedra iwiliwili. Era le 144,000.​—Vakatakila 14:​1, 3; 20:6.

Ena vakacava mada na bula e vuravura ni sa na veiliutaki na Tui ni Sautu kei ira na 144,000 era digitaki?​— Ena totoka dina! Sa na sega na ivalu. Era sa na bula vata na manumanu kece ra qai lasami keda. Ena sega ni dua e tauvimate se mate. Era na rai na mataboko, era na rogo na didivara, o ira na lokiloki era na cici ra qai lade me vaka na me kila. E sega ni dua ena vakuai ena kakana totoka era tubu e delaivuravura. Era na veilomani na tamata kece me vaka a vakavulica o Jisu mera cakava na nona tisaipeli. (Joni 13:​34, 35) Cega mada na ivola i Aisea meda wilika na tikina e volai toka qo me baleta na veika totoka ena yaco.​—Aisea 2:4; 11:​6-11; 25:8; 33:24; 35:​5, 6; 65:​21-24.

Me tekivu mai na gauna a vakavulica kina o Jisu me masuti, “me yaco mai na nomuni matanitu,” era sa vulica e le milioni na veika me baleta na Matanitu qo. Na veika era vulica e veisautaka na nodra bula. Sa voleka me lewa mai na vuravura na Matanitu ni Kalou, qai sosomitaka na matanitu era tu e vuravura. Ia o ira kece era qaravi Jiova kei Jisu Karisito na iLiuliu e digitaka, era na bula vakacegu, bula uasivi, era na marau tale ga.​—Joni 17:3.