OI LALOA ita be edena Basileia ita herevalaia?​— * Ia be Iesu ese ita ia hadibaia do ita gurigurilaia gauna. Ita ia hadibaia Dirava ita noia: “Oiemu Basileia do ia mai.” (Mataio 6:​9, 10) Kahirakahira lagani 2,000 gunanai, Iesu ena murinai idia raka taudia be Dirava idia guriguri henia iena Basileia ia mai totona. Oi be unai Basileia oi gurigurilaia, a?​—

Basileia oi lalopararalaia totona, ena king oi diba be namo. King be lohia tauna ta. Ia be tano ta ia lohiaia. Dirava ena Basileia ese tanobada ibounai do ia lohiaia. Dirava ena Basileia ia mai neganai, taunimanima ibounai be Iena lohia henunai hahenamo idauidau do idia moalelaia.

Dirava ena Basileia be guba gavamanina ta. Isaia 9:6 ai, Baibel ese unai gavamani ena Lohia Tauna ia herevalaia. Ia gwau: “Ita totona natuna ta ia vara! . . . Bona ia be iseda gunalaia tauna do ia lao, bona iena ladana do idia gwauraia, . . . ‘Maino ena Lohia.’ ”

Unai lohia tauna oi diba, a?​—⁠ Oibe, ia be king ta ena natuna. Guba dekenai King badana be daika?​—⁠ Bema emu haere be Iehova, unai be maoro. Baibel ese ia gwauraia “Ataiai Momokani Diravana.” (Salamo 83:18) Baibel ai, nega momo Iesu idia gwauraia “Dirava ena Natuna.” Ena badina ta be Iehova ese Iesu dekenai mauri ia henia. Iehova be Iesu ena Tamana korikorina.​—⁠Luka 1:​34, 35; Ioane 1:​34, 49; 3:​17; 11:27; 20:31; Kara 9:​20.

Dirava ena Basileia, Iesu ese ita ia hadibaia do ita gurigurilaia gauna, be gavamani idau hereana ta. Iehova ese iena Natuna, Iesu, be unai Basileia ena Lohia Tauna o King ai ia halaoa. To, oi diba ma haida be Iesu Keriso ida iena Tamana ena Basileia lalonai do idia lohia, a?​—⁠ Mani unai ita herevalaia.

Iesu ia do mase lasi neganai, iena aposetolo taudia ia hamaoroa, ia be guba ai ena Tamana ena “ruma dekenai” do ia lao. Ia gwau: “Lau be do lau lao, gabu ta do lau karaia hegaegae umui emui . . . vadaeni lau noho gabuna dekenai be umui danu unuseni do umui noho.” (Ioane 14:​1-3) Aposetolo taudia bona ma haida be Iesu ida guba dekenai dahaka do idia karaia?​—⁠ Idia be “Keriso danu do idia lohia.” Danu, Baibel ese ita ia hadibaia taunimanima  hida be Iesu ida do idia lohia. Idia ibounai be 144,000.​—Apokalupo 14:​1, 3; 20:⁠6.

Oi laloa, Maino ena Lohia bona iena abia hidi taudia 144,000 idia lohia neganai, tanobada ena toana be edena bamona?​—⁠ Tanobada ena toana do ia namo herea! Tuari do ia ore. Animal bona taunimanima be maino ai do idia noho. Ta do ia gorere o mase lasi. Matakepulu taudia be do idia itaia diba, taia kudima taudia be hereva do idia kamonai, aena dika taudia be do idia heau bona roho dia bamona. Tanobada ai aniani namodia momo do idia tubu. Bona taunimanima ibounai be do idia lalokau heheni, Iesu ese ena hahediba taudia ia hadibaia hegeregerena. (Ioane 13:​34, 35) Isaia bukana ita kehoa bona do idia vara gau namodia haida edia sivarai ita duahia.​—⁠Isaia 2:4; 11:​6-11; 25:8; 33:24; 35: 5, 6; 65:​21-24.

Iesu ese taunimanima ia hadibaia “Basileia do ia mai” idia gurigurilaia negana amo taunimanima milioni momo be unai Basileia idia dibaia. Unai diba ese edia mauri ia haidaua. Kahirakahira, unai Basileia do ia mai bona tanobada ena gavamani ibounai edia gabu do ia abia neganai, Iehova Dirava bona ia abia hidi Lohia Tauna, Iesu Keriso, idia hesiai henia taudia ibounai be maino, noho namona bona moale do idia davaria.​—⁠Ioane 17:⁠3.