Katakin Ajiri ro Nejõm

Ailiñ eo im Enaj Kõmman Oktak ko ñan Aolepen Lal In

KWOJELÃ ke ta ailiñ eo ear ukõt mour ko an armij ro?— *Ej ailiñ eo me Jisõs ear katakin kij ñan ad jar kake. Ear katakin kij ñan ad kajitõk ibben Anij: “En itok Am ailiñ.” (Matu 6:9, 10) Iomin enañin 2,000 yiõ ko, ro im rej lor Jisõs rar jar ñan Anij bwe Ailiñ eo An en itok. Kwonañin ke jar kin men in?—

Ñan am melele kin ta in ailiñ eo, kwoj aikwij in melele kin ta in kiiñ. Juõn kiiñ ej armij eo ej iroij ilo juõn ailiñ. Ailiñ eo ej iroij ie ej bed iomin kajur eo an. Ewor an Ailiñ eo an Anij maroñ ion aolepen lal. Ñe enaj itok Ailiñ eo an Anij, armij ro otemjej ion lal renaj mõnõnõ kin jerammõn ko enaj buktok.

Ailiñ eo an Anij ej juõn kien ej bed ilañ. Baibel eo ilo Aiseia 9:6, UBS ej konono kin Iroij eo an kien in. Lale mõk ta eo ej ba kin Iroij in: “Elotak juõn niñniñ ñõn kij! . . . Im enaj ad iroij. Naj naetan . . . Iroij in Ainemmõn.”

Wõn eo eutiejtata ijoko otemjej?— Ejimwe uak eo am elañe kwar ba Jeova. Baibel eo ej naetan “Eo eutiejtata ion aolepen lõlin.” (Sam 83:18) Ekkã an Baibel eo naetan Jisõs “Nejin Anij.” Juõn ian un ko ej kinke Jeova ear lelok mour ñan Jisõs. Jeova ej jemen Jisõs.—Luk 1:34, 35; Jon 1:34, 49; 3:17; 11:27; 20:31; Jerbal 9:20.

Ailiñ eo an Anij me Jisõs ear katakin kij ñan ad jar kake ej juõn kien ejejuan. Jeova ear kõmman bwe Nejin, Jisõs, en Iroij ak Kiiñ in Ailiñ eo. Bõtab, kwar jelã ke bwe naj kãlet jet armij ñan air iroij im kiiñ ibben Jisõs ilo Ailiñ eo an Jemen?— Jen bwebwenato kin rein.

Mokta jen an kar mij, Jisõs ear jiroñ dri jilik ro an retiljek bwe enaj etal ñan ijo “jikin” Jemen ilañ. Ear ba, “Ij ilen kapojõk jikõmi . . . bwe ijo Ij ber ie, bareinwõt komin ber ie.” (Jon 14:1-3) Kwojelã ke ta eo dri jilik rein im ro jet kar kãlet ir renaj kõmmane ilañ ibben Jisõs?— Renaj iroij einwõt “kiñ iben.” Baibel eo ej bareinwõt kwalok kin oran  ro im renaj iroij im kiiñ ibben Jisõs. Oran rein ej 144,000.—Reveles̃õn 14:1, 3; 20:6.

Ilo lemnak eo am, enaj ewi wãwen lal in ñe Iroij in Ainemõn eo im 144,000 ro kar kãlet ir renaj iroij?— Enaj kanuij emmõn! Enaj ejelok bar tõrinae. Menin mour ko renaj ainemõn ibben dron im ibben armij ro. Ejelok enaj bar nañinmij ak mij. Ro rebilo renaj bar lolokjen, ro rejaroñroñ renaj roñlokjen, im ro rekirro renaj ekãke einwõt kiru deer ko. Lal enaj obrõk kin mõñã ko renno ñan aolep armij. Im armij otemjej renaj yokwe dron einwõt an kar Jisõs katakin dri kalor ro an bwe ren kõmmane men in. (Jon 13:34, 35) Jen kebellok Baibel eo ñan eon ko kar kõlajraki ijin ilo book in Aiseia im riit kin men ko remmõn renaj walok.—Aiseia 2:4; 11:6-11; 25:8; 33:24; 35:5, 6; 65:21-24.

Jen ien eo Jisõs ear katakin armij ro ñan air jar, “en itok Am ailiñ,” elõñ million armij ro rar katak kin Ailiñ in. Jelãlokjen in ear ukõt mour ko an elõñ armij ro. Ejjabto, ñe Ailiñ in enaj itok im bõk jikin aolep kien ko an lal, aolep ro im rej karejar ñan Jeova Anij im Iroij eo kar kãlete, Jisõs Kraist, renaj lõñliñ kin ainemõn, ejmour, im mõnõnõ eo emol.—Jon 17:3.

[Kamelele eo Itulal]

KAJITOK KO:

▪ Wõn eo ej iroij in Ailiñ eo an Anij?

▪ Wõn ro renaj iroij ibben Jisõs ilo Ailiñ eo an Jemen?

▪ Enaj ewi wãwen mour ijin ion lal iomin iroij eo an Jisõs?