Ibangat Yo Iray Anak Yo

Say Panarian ya Umanen Toy Interon Mundo

ANTAM no dinan iyan Panarian?​— * Saya imay imbangat nen Jesus ya ipikasi tayo. Imbangat nen Jesus ya kerewen tayo’d Dios ya: “Onsabi komon so panarian mo.” (Mateo 6:9, 10) Ngalngali 2,000 taon lan saray papatumbok nen Jesus et manpipikasi’d Dios ya onsabi la komoy Panarian To. Ipipikasim met itan?​—

Pian natalosan mo no anto so panarian, nepeg mo nin amtaen no anto so gagawaen na ari. Say ari et manuuley. Tan say sakop to et say lugar ya uuleyan to. Kaiba ed sakop na Panarian na Dios so interon mundo. Sano onsabi lay Panarian na Dios, manliket so amin a totoo diad mundo lapud saray bendisyon ya iter na satan.

Say Panarian na Dios et gobierno ed tawen. Nabasa’d Biblia so nipaakar ed Manuley ed satan a gobierno. Alimbawa, nabasa’d Isaias 9:6 (Maung a Balita) ya: “Diad sikatayo nianak so sakey ya ugaw! . . . Sikatoy magmaliw a manuley tayo. Natawag a . . . ‘Prinsipe na Kareenan.’”

Antam no anto itay prinsipe?​— On, sikatoy anak na ari. Siopa ta so sankatagyan ya Ari ed tawen a?​— Duga ka no say ebat mo et si Jehova. Ibabaga na Biblia a sikato so ‘sankatagyan a manuna nen say amin a dalin.’ (Salmo 83:18) Diad Biblia, si Jesus et aminpigapigan tinawag ya “Anak na Dios,” tan say sakey a rason et lapud si Jehova so angiter ed si Jesus na bilay to. Kanian si Jehova so talagan Ama nen Jesus.​—Lucas 1:34, 35; Juan 1:34, 49; 3:17; 11:27; 20:31; Gawa 9:20.

Say Panarian na Dios ya imbangat nen Jesus ya ipikasi tayo et espisyal a gobierno. Say pinili nen Jehova a Manuley odino Ari ed satan a Panarian et say anak to, si Jesus. Balet, antam ta a wala ni ray pinilin nakaiba nen Jesus a manari ed Panarian na Ama to?​— Pantongtongan ta met so nipaakar ed satan.

Antis ya inatey si Jesus, imbaga to’d saray matoor ya apostol to a sikatoy onla’d “abung” nen Ama to diad tawen. Imbaga to ya: “Onla ak a mangiparaan na sakey a pasen parad sikayo, . . . ta pian no iner so kawalaan ko et wadman kayo met.” (Juan 14:1-3) Anto kasi gawaen ed tawen na saray apostol tan arum nin pinili a kaiba nen Jesus?​— “Manuley ira bilang arari  a kaiba to.” Ibabaga ingen na Biblia no pigara ira, 144,000 ya amin.​—Apocalipsis 14:1, 3; 20:6.

Anto la kasi nagawa no uleyan la na Prinsipe na Kareenan tan say kaiba ton 144,000 so mundo?​— Seguradon malikeliket la’d satan! Anggapo lay guerra. Agla manlalaban iray ayayep tan agda tayo met la sakitan. Anggapo lay mansakit tan ompatey. Makanengneng la ray bulag, makarengel la ray telek, ombatik tan onlukso la ray piley a singa usa. Mabuna lay dalin kanian dakel so naakan a parad amin. Tan amin a totoo et manaaroan, a satan so imbangat nen Jesus a gawaen na saray disipulo to. (Juan 13:34, 35) Basaen ta pa’d libro na Isaias iray bersikulon akalista dia pian naamtaan mo ni ray mararakep a nagawa.​—Isaias 2:4; 11:6-11; 25:8; 33:24; 35:5, 6; 65:21-24.

Manlapu la nen imbangat nen Jesus iray totoo ya ipikasin “onsabi komon so panarian mo,” milyon-milyon la so akaamta ed satan a Panarian. Tan lapud satan et anguman so bilay da. Asingger lan onsabi itan a Panarian tan salatan toy amin a gobierno diad mundo. Diad satan a panaon, amin a manlilingkor ed si Jehova tan ed pinili ton Manuley, si Jesu-Kristo, et manbilay ed kareenan, lanang lan maksil so laman da, tan talagan malikeliket ira!​—Juan 17:3.

[Paimano ed leksab]

SARAY TEPET:

▪ Siopa so manuley ed Panarian na Dios tan akin et sikatoy tinawag na Biblia a “Prinsipe”?

▪ Sioparay nakaiba nen Jesus a manuley ed Panarian nen Ama to?

▪ Antoray nagawa sano uleyan la nen Jesus so mundo?