INOGNE o Fanjakàgne iohoe naho fanta’o?... * Io ty nampangatahe i Jesosy antikagne amy i vavake tihoey: “Ho avy abey i fanjakà’oy!” (Matio 6:9, 10) Fa ho 2000 taogne ty nivavaha ze mpanonjohy ty lia i Jesosy, mba hiavia ty Fanjakàn’Andrianagnahare. Fa nivavake miomba izay ka vao rehe?...

Ho azo’o ty dika tihoe fanjakagne, naho fanta’o ty atao tihoe mpanjaka. Ty mpanjaka le ndaty mifehe i vahoakey, le ty faritane ipetraha i vahoa’ey ro faritse feheze’e. O taneo iaby ro faritse feheze ty Fanjakàn’Andrianagnahare. Naho fa avy io, le handrambe fitahiagne maro ze kila ndaty.

An-dagnitse agne o Fanjakàn’Andrianagnahare iohoe. Mirehake miomba ty Mpitondra io ty Isaia 9:6. Izao ty rehafe’e ao: ‘Misy ajaja naterake ho antikagne, anak’ajaja lahilahy ro homeigne antikagne, ho antsoro’eo ty fahefan-droandriagne. Ty agnara’e hatao tihoe Roandria ty Fiadanagne.’

Fanta’o vao ty atao tihoe roandriagne?... Ndaty ambone io, faie ambane noho ty mpanjaka. Ia ty Mpanjaka fara’e ambone an-dagnitse agne?... I Jehovah, satria rehafe ty Baiboly fa ireke ro “Ambone Bey ambone tane etoy!” (Salamo 83:18) Mateteke ty Jesosy ro tokave ty Baiboly tihoe “Anak’Andrianagnahare”, satria i Jehovah ty namorogne aze. I Jehovah raike avao ro tena Rae i Jesosy.​—Lioka 1:34, 35; Jaona 1:34, 49; 3:17; 11:27; 20:31; Asan’ny Apostoly 9:20.

Misy fiambaha’e kede i Fanjakàn’Andrianagnaharey. I Jesosy Ana’e ro atao i Jehovah ho Mpanjaka naho ho Mpitondra io. Fanta’o vao fa hisy ndaty hafa ho filiegne hiarake manjaka amy i Jesosy?... Andao horehafentikagne ty miomba iareo.

Taloha ty nimateza’e, le nirehake tamy i apostoli’e tsy nivalike rey ty Jesosy fa ho “agn’anjomban-dRae’e” an-dagnitse agne reke. “Handeha hagnomagne toeragne ho anareo raho”, hoe reke “le ty misy ahy ty hisy anareo.” (Jaona 14:1-3) Fanta’o vao tie ino ty hatao i apostoly rey naho ze voafily hagnorike i Jesosy an-dagnitse agne?... “Hiara-manjaka ama’e” iareo. Rehafe ty Baiboly aza ty isa iareo fa 144 000.​—Apokalypsy 14:1, 3; 20:6.

Naho ty heve’o, hanao akore ty ho fiaignagne naho fa hinday ty tane toy i Roandria ty Fiadanagney naho i 144 000 rey?... Tena ho soa! Tsy hisy sasa ty aly. Tsy hifamono sasa ka o bibio, sady tsy hihinagne antikagne. Tsy hisy sasa ty harare ndra ho mate. Hahatrea ze goa, haharey ze karegnegne naho hivoamboagne manahake o serfao ty maleme. Hahavokatse soa ty tane toy, le ho maro o hanegneo. Hifankatea ka o ndatio arake ty fa nampanoe i Jesosy o mpiana’eo. (Jaona 13:34, 35) Andao hovakientikagne ty andinin-teny amy ty boke Isaia ao retoagne, le ho treantikagne o raha mahafinaritse hiseho ambone tane etoy rehoe.​—Isaia 2:4; 11:6-11; 25:8; 33:24; 35:5, 6; 65:21-24.

Ndaty an-tapetrisa’e ty fa nianatse miomba i Fanjakagney, nanomboke tamy ty fotoagne nampianara i Jesosy o mpiana’eo mba hivavake tihoe: “Ho avy abey i fanjakà’oy!” Nagnova ty fiaigna iareo zay. Tsy ho ela le ho avy o Fanjakagne iohoe sady hisolo ze fitondram-panjakagne an-tane etoy. Hiadagne naho ho salama vaho ho sambatse ze manompo i Jehovah Andrianagnahare naho i Jesosy Kristy, i Mpitondra finili’ey.​—Jaona 17:3.