Edinyene Nneme ye Mbọhọidụn̄ Nso Idi Edisana Spirit?

MME NTIENSE JEHOVAH ẹsima ndineme Bible ye mme mbọhọidụn̄ mmọ. Ndi emenyene mbụme Bible ndomokiet emi mûnen̄ekede ufiọk ibọrọ? Ndi emenen̄ede oyom ndifiọk se Mme Ntiense Jehovah ẹkpepde m̀mê mme edinam ido ukpono mmọ? Ke edide ntre, kûmen̄e ndibụp n̄kpọ emi ke ini osobode ye kiet ke otu mmọ. Enye ayama ndineme n̄kpọ emi ye afo.

Se itienede emi edi nte nneme oro Mme Ntiense Jehovah ẹsinyenede ye mme mbọhọidụn̄ mmọ esitiede. Ẹyak ida ke Ntiense emi ekerede Scott aka ufọk ete kiet emi ekerede Brad.

Afo Ọdọhọ ke Nso Idi Edisana Spirit?

Brad: N̄kop ẹte ke Mme Ntiense Jehovah idịghe mme Christian. Ẹte ke mbufo inịmke ke edisana spirit odu.

Scott: Akpa kan̄a, nyom ọfiọk ke nnyịn idi mme Christian. Ntak emi nnịmde Jesus Christ ke akpanikọ anam ndi ufọk fo usenubọk emi. N̄kọ enye owụk mme anditiene enye ete ẹkwọrọ ikọ. Edi yak mbụp ise, afo ọdọhọ ke nso idi edisana spirit?

Brad: Edisana spirit edi ọyọhọ owo ita ke Abasi-Ita-ke-Kiet, kpa andin̄wam oro Jesus ọkọn̄wọn̄ọde ndinọ nnyịn. Mmenen̄ede nyom andin̄wam oro. Nyom edisana spirit anam utom ke idem mi.

Scott: Nte ediwak owo ẹdade edisana spirit edi oro. Ini kiet ko, mma ndụn̄ọde se Bible ekpepde aban̄a edisana spirit. Edieke enyenede esisịt ini, n̄kpama ndiwụt fi se n̄kekpepde mban̄a oro.

Brad: Ih, mmenyene esisịt ini.

Scott: Oh, mbọk, ami n̄kere Scott. Afo ekere didie?

Brad: N̄kere Brad. Enem mi esịt ndisobo ye afo.

Scott: Enem mi esịt ndisobo ye afo nde. Ke ntak ini fo, yak nneme ikpehe kiet kpọt mban̄a n̄kpọ emi. Afo ọkọdọhọ ke edisana spirit edi andin̄wam emi Jesus ọkọn̄wọn̄ọde ndinọ nnyịn. Ntre ke edi. Edi ndi afo ekere ke edisana spirit edi owo, onyụn̄ edi n̄ka ye Abasi?

Brad: Ih, ntre ke ẹkekpep mi.

Ndi Edisana Spirit Edi Owo?

Scott: Yak ikot itie Bible emi edin̄wamde nnyịn ikụt m̀mê edisana spirit edi owo m̀mê idịghe. Ekeme ndidi afo ọmọfiọk mme ufan̄ikọ oro. Utom 2:1-4 ọdọhọ ete: “Ekem ke adan̄aemi usen usọrọ Pentecost akakade iso, kpukpru mmọ ẹkedu ọtọkiet ke ebiet kiet, ndien kpa idaha oro uyom oto ke heaven ọwọrọ emi ebietde uyom ata ọkpọsọn̄ ofụm, ndien enye ọyọhọ  ofụri ufọk emi mmọ ẹketiede. Ndien mmọ ẹkụt mme edeme eke ẹbietde edemeikan̄ nte ẹdemede ẹdoro mmọ owo kiet kiet, ndien kpukpru mmọ ẹyọhọ ye edisana spirit ẹnyụn̄ ẹtọn̄ọ ndisem nsio nsio usem, kpa nte spirit ọnọde mmọ ukeme nditịn̄.”

Brad: Mmọfiọk mbụk oro.

Scott: Yak kan̄a ise, ndi owo ekeme ndiyọhọ owo en̄wen ke idem?

Brad: Ikemeke.

Scott: Yak ikot ufan̄ikọ 17 ke itien̄wed oro. Akpa ikpehe ufan̄ikọ oro ọdọhọ ete: “‘Ke mme akpatre usen,’ Abasi ọdọhọ, ‘nyan̄wan̄a ndusụk spirit mi ndori kpukpru obụkidem.’” Yak mbụp fi ise, ndi Abasi akpan̄wan̄a ubak Abasi emi edide n̄ka ye enye ọduọk?

Brad: Baba.

Scott: John Andinịm owo Baptism ama etịn̄ ke usụn̄ en̄wen aban̄a edin̄wan̄a edisana spirit nduọk. Ikụt emi ke Matthew 3:11. Mbọk, kot ufan̄ikọ emi.

Brad: “Ami, ke akpanikọ, nnịm mbufo baptism ke mmọn̄ ke ntak edikabade esịt mbufo; edi enye emi etienede mi ke edem enyene odudu akan mi, emi ami mmendotke ndisio enye ikpaukot ke ukot. Enye oro eyenịm mbufo baptism ke edisana spirit ye ikan̄.”

Scott: Sọsọn̄ọ-o. Ndi ama okụt se John Andinịm Owo Baptism ọkọdọhọde ke ẹdida edisana spirit inam?

Brad: Enye ọkọdọhọ ke ẹyenịm mme owo baptism ke edisana spirit.

Scott: Ntre ke edi. Ti ete ke enye ama etịn̄ n̄ko ke ẹyenịm mme owo baptism ke ikan̄. Ke akpanikọ, ikan̄ idịghe owo. Ndi afo ekere ke ufan̄ikọ emi ọdọhọ ke edisana spirit edi owo?

Brad: Ihih.

Scott: Mmọdo, mme itie N̄wed Abasi oro inemede mi ẹwụt ke edisana spirit idịghe owo.

Brad: Etie ntre.

Didie ke Edisana Spirit Edi “Andin̄wam”?

Scott: Ke ntọn̄ọ ntọn̄ọ afo ama etịn̄ aban̄a “andin̄wam.” Ke John 14:26, Jesus ọkọdọhọ ke edisana spirit edi “andin̄wam.” Yak ikot itien̄wed oro ọtọkiet: “Andin̄wam, kpa edisana spirit, emi Ete edinọde edi ke enyịn̄ mi, enye oro eyekpep mbufo kpukpru n̄kpọ onyụn̄ anam mbufo ẹti kpukpru n̄kpọ eke n̄ketịn̄de nnọ mbufo.” Ndusụk owo ẹkere ke itie N̄wed Abasi oro owụt ke edisana spirit edi owo, emi edin̄wamde onyụn̄ ekpep mme owo n̄kpọ.

Brad: Nnennen, se ami mfiọkde edi oro.

Scott: Ndi ukereke ke ekeme ndidi Jesus eketịn̄ emi ke ndamban̄a usụn̄? Kop se Jesus eketịn̄de mi aban̄a ọniọn̄ ke Luke 7:35: “Kpukpru nditọ ọniọn̄ ẹwụt ke ọniọn̄ enen.” Ndi ọkpọdọhọ ke ọniọn̄ edi owo ndien ke enye enyene nditọ?

Brad: Ihih. Ẹtịn̄ emi ke ndamban̄a usụn̄.

Scott: Ntre ke edi. Ikọ Jesus ọkọwọrọ ke ọniọn̄ esinyene nti utịp. Bible esida ndamban̄a ikọ etịn̄ aban̄a se mîdịghe owo nte n̄kpọ eke edide owo. Nnyịn imesitịn̄ ikọ ke ndamban̄a usụn̄ ke ini inemede ineme. Ke uwụtn̄kpọ, ke usenubọk emi utịn asiahade, ndi nnyịn isidọhọke ite, “Berede window man un̄wana utịn odụk ufọk”?

Brad: Ami ke idemmi mmesidọhọ.

Scott: Ndi emi esiwọrọ ke un̄wana utịn edi esen ọnọ fi?

Brad: Ihih, ikemeke-keme ndidi ntre. Ndamban̄a ikọ ke edi.

Scott: Ntre, okûdi Jesus eketịn̄ ikọ ke ndamban̄a usụn̄ ke ini enye ọkọdọhọde ke edisana spirit edi andin̄wam, m̀mê andikpep?

Brad: Etie ntre. Oro akpasan̄a ekekem ye  mme itie N̄wed Abasi oro afo okokotde aban̄a edin̄wan̄a edisana spirit nduọk ye edinịm mme owo baptism ke edisana spirit. Edi edieke edisana spirit mîdịghe owo, nso ke enye edi?

Nso ke Edisana Spirit Edi?

Scott: Jesus asian nnyịn se edisana spirit edide ke Utom 1:8. Mbọk, kot itien̄wed oro ise.

Brad: “Mbufo ẹyebọ odudu ke ini edisana spirit edide edidoro mbufo ke idem, ndien mbufo ẹyedi mme ntiense mi ke Jerusalem ye ke ofụri Judea ye Samaria tutu esịm ke ata utịt ikpehe isọn̄.”

Scott: N̄kọ omokụt ke Jesus ọkọdọhọ ke edisana spirit asan̄a ye odudu. Ndien ke ini ekerede aban̄a mme itien̄wed oro ikebemde iso ikot, afo ekere ke odudu oro oto m̀mọ̀n̄?

Brad: Oto Abasi, kpa Ete.

Scott: Nnennen. Edisana spirit edi odudu oro Abasi akadade obot ekondo. Ọyọhọ ufan̄ikọ iba ke Bible etịn̄ aban̄a oro. Genesis 1:2 ọdọhọ ete: “Spirit Abasi onyụn̄ okụbọ ke enyọn̄ mmọn̄.” Spirit Abasi m̀mê edisana spirit edi anam-utom odudu emi Abasi esidade anam uduak esie esinyụn̄ adade etịn̄ se enye aduakde. Yak ifiak ikot itie N̄wed Abasi kiet kpọt. Itien̄wed oro edi Luke 11:13. Mbọk kot itien̄wed emi ise.

Brad: “Edieke mbufo, emi ẹdiọkde, ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak edisana spirit ọnọ mbon oro ẹben̄ede enye!”

Scott: Edieke Ete ke heaven akarade edisana spirit onyụn̄ ọnọde mbon oro ẹben̄ede enye, ndi edisana spirit ekeme ndidi n̄ka ye Ete?

Brad: Baba. Mmokụt se etịn̄de.

Scott: Nyomke ndida ini fo. Afo ọkọdọhọ ke imọ inyene esisịt ini. Edi yak mbụp mbụme kiet ida itịn̄ se inemede ibio ibio. Ke ikerede iban̄a kpukpru itie N̄wed Abasi oro ikotde mi, afo ọkpọdọhọ ke edisana spirit edi nso?

Brad: Edi anam-utom odudu Abasi.

Scott: Emenen. Ndien nte John 14:26 obụkde, ke ini Jesus ọkọdọhọde ke edisana spirit edi andin̄wam, m̀mê andikpep, enye eketịn̄ emi ke ndamban̄a usụn̄.

Brad: N̄kọfiọkke oro.

Scott: Odu ata edinem n̄kpọ emi ikemede ndikpep nto ikọ Jesus oro.

Brad: Nso idi oro?

Scott: Imekeme ndiben̄e Abasi ọnọ nnyịn edisana spirit esie man an̄wam nnyịn ke ini afanikọn̄. Imekeme n̄ko ndiben̄e enye ọnọ nnyịn edisana spirit man ekpep nnyịn ifiọk enye.

Brad: Enem tutu! Nyekere mban̄a oro.

Scott: Mbemiso nnyọn̄de, mbọk yak nsian fi n̄kpọ en̄wen emi edikerede iban̄a. Sia edisana spirit edide anam-utom odudu Abasi, do iyenyịme ke Abasi ekeme ndida enye nnam se ededi eke enye emekde.

Brad: Ata nnennen.

Scott: Do, ntak emi enye mîdaha kan̄a ata ọkpọsọn̄ odudu emi itre kpukpru nnanenyịn ye idiọkido ke ofụri ererimbot? Ndi akanam emekere aban̄a oro? *

Brad: Mmesikere.

Scott: Ndi akpama mfiak ndi ini ntem urua en̄wen man ineme n̄kpọ emi?

Brad: N̄kpama etieti. Tutu urua en̄wen.

[Ikọ Idakisọn̄]