Dekena Tauna ida Herevahereva Lauma Helaga be Dahaka?

IEHOVA ENA WITNES taudia be mai moale ida edia dekena taudia ida Baibel idia herevalaia. Oi be Baibel henanadaina ta oi laloa momo, a? Eiava Iehova ena Witnes taudia idia abia dae gaudia o edia tomadiho karadia oi ura diba, a? Bema oibe, vadaeni Iehova ena Witnes tauna ta oi davaria neganai, ia dekenai oi ura dibaia gauna oi gwauraia be namo. Ia be mai moale ida oi do ia durua.

Henunai be Iehova ena Witnes tauna ta bona ena dekena tauna idia herevahereva karana ia hahedinaraia. Mani inai ita laloa, Witnes tauna ladana Peter be ena dekena tauna Tom ida ia herevahereva.

“Lauma Helaga” Ena Anina be Dahaka?

Tom: Lau kamonai umui Iehova ena Witnes taudia be Keristani taudia lasi, badina umui be lauma helaga umui abia dae lasi.

Peter: Lau ura oi lau hadibaia guna ai be Keristani taudia. Lau be Iesu lau abidadama henia dainai, hari dabai emu ruma dekenai lau mai. Iesu be ena murinai idia raka taudia ia hagania idia haroro totona. To lau ura henanadai, “lauma helaga” be edena bamona oi laloa?

Tom: Lauma helaga be Toi Tamona ena dirava ihatoina, Iesu ia gwauhamata do ia siaia ita ia durua totona. Lau dekenai unai durua tauna be mai anina bada. Lau ura mamia lauma helaga be egu mauri lalonai ia noho.

Peter: Taunimanima momo ese lauma helaga be unai bamona idia laloa. Guna, lau be lauma helaga dibaia totona, Baibel ena hadibaia herevadia lau tahua. Bema oi dekenai nega sisina ia noho, lau ura lau dibaia gauna lau hahedinaraia.

Tom: Ia namo.

Peter: Lauegu ladana be Peter. Oiemu ladana be daika?

Tom: Lauegu ladana be Tom, bona oi lau hedavari henia dainai lau moale.

Peter: Lau danu lau moale oi lau hedavari henia. Nega sisina lalonai, lau ura gau ta do lau herevalaia. Oi gwau bamona, Iesu be ia gwauhamata lauma helaga be ita do ia durua, bona unai lau abia dae. To, oi abia dae lauma helaga be taunimanima ta bona Dirava danu ia hegeregere, a?

Tom: Oibe, egu dubu taudia ese lau be unai bamona idia hadibaia.

Lauma Helaga be Taunimanima ta, A?

Peter: Namona be Baibel ena siri ta ita itaia, unai amo do ita diba lauma helaga be taunimanima ta o lasi. Reana oi be inai siri haida oi diba. Kara 2:​1-4 ia gwau: “Pentekoste ena dina ia ginidae neganai, Iesu idia abidadama henia taudia ibounai gabu tamona dekenai idia haboua. Vadaeni, guba dekena amo karaharaga regena ta ia diho mai, lai bada ena regena hegeregere, idia helai hebou noho ruma  ena kahana ibounai ia hahonua. Bona lahi ena malana hegeregere idia hedinarai. Inai malana be idia makohia kahana ta ta, bona unai taudia ta ta edia kwarana latanai idia diho mai. Vadaeni unai abidadama taudia ibounai be Lauma Helaga dekenai idia honu, bona gado idauidau dekenai idia hereva, Lauma Helaga ese idia dekenai ia henia hegeregere.”

Tom: Unai sivarai lau diba.

Peter: Tom, oi laloa taunimanima ta be ma ta ena lalona dekenai ia vareai diba, a?

Tom: Lasi.

Peter: Namona be Kara karoa 2 siri 17 ita itaia. Inai siri ena matamana kahana ia gwau: “Dirava ia gwau: Inai nega do kahirakahira ia doko neganai, lauegu laumana dohore lau bubua diho, taunimanima ibounai dekenai.” Mani lau henanadai, oi laloa Dirava be ia hegeregerena tauna ta ia bubua diho, a?

Tom: Lasi.

Peter: Ioane Bapatiso ese taunimanima be lauma helaga amo do idia honu herevana be dala ma ta amo ia gwauraia. Unai be Mataio 3:11 ai ia noho. Mani emu kara inai siri oi duahia.

Tom: “Lau be ranu dekenai lau bapatisoa umui, lalona giroa ena toana. To lauegu murina dekenai do ia mai tauna be lauegu siahu do ia hanaia. Lau be namo lasi iena tamaka do lau abia loaloa. Ia ese Lauma Helaga bona lahi dekenai do ia bapatisoa umui.”

Peter: Tanikiu. Inai siri ai, Ioane Bapatiso ia gwau lauma helaga amo taunimanima be dahaka do idia karaia?

Tom: Ia gwau lauma helaga amo do idia bapatiso.

Peter: Unai be maoro. Danu unai siri ia gwau lahi amo do idia bapatiso. Momokani, lahi be taunimanima ta lasi. Oi laloa unai siri ia gwau lauma helaga be taunimanima ta, a?

Tom: Lasi.

Peter: Unai dainai, ita herevalaia vadaeni siridia ese idia hahedinaraia lauma helaga be taunimanima ta lasi.

Tom: Reana emu hereva be maoro.

Edena Dala ai Lauma Helaga be “Durua Tauna”?

Peter: Matamanai, oi gwau lauma helaga be “Durua Tauna.” Ioane 14:26 ai, Iesu ia gwau lauma helaga be “Durua Tauna.” Do lau duahia: “Durua Tauna, Lauma Helaga be unai, Tamana ese lauegu gabuna abia totona do ia siaia. Ia ese gau ibounai do ia hadibaia umui dekenai. Hereva ibounai lau henia vadaeni umui dekenai, be ia ese umui emui lalona dekenai do ia hedinaraia lou.” Haida idia laloa inai siri ese ia hamomokani lauma helaga be taunimanima ta, bona ia ese ita ia durua bona hadibaia.

Tom: Oibe, nega momo lau be unai bamona lau laloa.

Peter: To, oi laloa Iesu be laulau herevana ta ia gaukaralaia, a? Haheitalai ma ta mani ita laloa. Roma 5:14 (NW ) ia gwau: “Mase be king ta bamona ia lohia.” Oi gwau diba mase be taunimanima ta, king ai do ia lao bona ita ia lohiaia, a?

Tom: Lasi. Unai be laulau herevana ta.

Peter: Oibe. Unai siri ena anina be, ita ibounai be mase ena siahu henunai ita noho. Baibel ese nega momo laulau herevadia ia gaukaralaia​—⁠hegeregere mauri lasi gauna ta be mauri gauna ta bamona ia herevalaia. Nega momo ita be eda herevahereva lalonai unai laulau herevadia ita gaukaralaia. Hegeregere, hari daba ena diari dainai ta do ia gwau, “Keten oi kehoa bona dina ia vareai.”

Tom: Lau be unai bamona do lau hereva.

Peter: Oi laloa dina be taunimanima ta bamona emu ruma lalonai do ia vareai, a?

Tom: Lasi. Unai be laulau herevana ta.

Peter: Unai dainai Iesu ese lauma helaga ia gwauraia durua o hadibaia tauna neganai, oi laloa ia be laulau herevana ta ia gaukaralaia, a?

 Tom: Reana. Unai be matamanai oi duahia siridia ia hamomokania, lauma helaga be do ia bubua diho taunimanima dekenai bona ia amo bapatiso do idia abia. To, bema lauma helaga be taunimanima ta lasi, vadaeni ia be dahaka?

Lauma Helaga be Dahaka?

Peter: Kara 1:8 ai, Iesu ese lauma helga ia herevalaia. Mani emu kara inai siri oi duahia.

Tom: “Umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.”

Peter: Mani oi laloa, Iesu ese lauma helaga be siahu ida ia gwauraia hebou. Bona Kara bukana lalonai ita duahia vadaeni siridia dekenai, oi laloa unai siahu be edeseni amo ia mai?

Tom: Unai siahu be Dirava amo ia mai.

Peter: Emu haere be maoro. Lauma helaga be siahu ta, Dirava ese ia gaukaralaia guba bona tanobada ia karaia totona. Genese 1:2 ese unai ia herevalaia, ia gwau: “Dirava ena Lauma be davara ena kopina latanai ia marere noho.” Heberu gado ai inai hereva “lauma” idia hahanaia neganai, ena anina be gaukara siahuna. Ia be ita itaia diba lasi siahuna bona unai siahu amo Dirava ese ena ura o palani ia hagugurua. Lau ura inai siri tamona ita itaia. Ia be Luka 11:13. Mani emu kara inai siri oi duahia.

Tom: “Umui laloa, umui be dika taudia, gau namodia emui natuna dekenai henia be umui diba, to emui Tamana guba dekenai ia noho ese Lauma Helaga be idia noinoi taudia dekenai do ia henidia lasi, a?”

Peter: Bema Tamana guba dekenai ia noho ese lauma helaga ia biagua, bona idia noia taudia dekenai ia henia, oi laloa lauma helaga be Tamana ida ia hegeregere, a?

Tom: Lasi. Emu hereva ena anina lau lalopararalaia.

Peter: Do lau hereva daudau lasi, badina lau gwau nega sisina sibona. To hereva badadia ita laloa totona, lau ura oi dekenai henanadai ta lau henia. Ita herevalaia siridia amo, lauma helaga be edena bamona oi laloa?

Tom: Ia be Dirava ena gaukara siahuna.

Peter: Emu haere be maoro. Bona Ioane 14:26 ai Iesu ese lauma helaga ia gwauraia durua o hadibaia tauna neganai, unai be laulau herevana ta.

Tom: Unai lau diba lasi.

Peter: Iesu ena hereva amo gau ta ita dibaia.

Tom: Unai be dahaka?

Peter: Hekwakwanai negadiai, Dirava ena lauma helaga ita noia diba ita ia durua totona. Danu, iena lauma helaga ita noia ita ia durua Dirava ita dibaia totona.

Tom: Lau ura unai bamona lau karaia.

Peter: Lau do lao lasi neganai, lau ura gau ta lau herevalaia oi laloa totona. Lauma helaga be Dirava ena gaukara siahuna dainai, ita abia dae Dirava ese ia gaukaralaia diba iena ura ibounai ia hagugurua totona.

Tom: Oibe, unai lau abia dae.

Peter: To dahaka dainai unai siahu badana ia do gaukaralaia lasi, inai tanobada ai ita itaia dika idauidau ia haorea totona? Nega ta unai oi laloa, a? *

Tom: Oibe, unai lau laloa.

Peter: Wiki vaira lau giroa mai bona unai do ita herevalaia, dahaka oi laloa?

Tom: Ia namo, lau ura oi giroa mai.

[Futnout]