Se Talanoaga Faale-Tusi Paia—O le ā le Agaga Paia?

E FIAFIA Molimau a Ieova e talanoa ma tagata i le Tusi Paia. Pe e iai se fesili faale-Tusi Paia o loo e mafaufau i ai? Po o e fia iloa talitonuga po o faiga faaletapuaʻiga a Molimau a Ieova? Pe afai o lea, talanoa atu i se Molimau a Ieova i se taimi e te toe feiloaʻi i ai. O le a fiafia o ia e te lua talanoa i lenā mataupu.

O le talanoaga o loo mulimuli mai, o se talanoaga e masani ona fai e se Molimau a Ieova ma se tagata i le talaʻiga. Seʻi faapea ua alu atu le Molimau e igoa iā Ioane i le fale o se tamāloa e igoa iā Tavita.

O le ā le Uiga o Lau Tala “Agaga Paia”?

Tavita: Ua ou faalogo o Molimau a Ieova e lē o ni Kerisiano, auā e tou te lē talitonu i le agaga paia.

Ioane: Muamua, ou te taʻu saʻo atu, o matou o Kerisiano. Ua māfua ona ou oo mai i lou fale i lenei taeao, ona ou te talitonu iā Iesu Keriso. Auā o Ia na faatonuina ona soo e ō e talaʻi. Ae seʻi oʻu fesili atu, o le ā le uiga o lau tala “agaga paia”?

Tavita: O lona uiga, o le agaga paia o le peresona lona tolu o le Tasitolu, o le fesoasoani lea na folafola e Iesu o le a auina mai iā i tatou. E tāua tele iā te aʻu lenā fesoasoani. Ou te fia lagona le faatasi mai o le agaga paia iā te aʻu.

Ioane: O le manatu lenā o le toʻatele e uiga i le agaga paia. Talu ai nei lava na ou suʻesuʻeina ai le Tusi Paia e uiga i lenei mataupu. Pe a maua sina avanoa puupuu, ou te fiafia e faailoa atu le mea na ou aʻoaʻoina.

Tavita: Lē afāina, e mafai ona ta talanoa puupuu.

Ioane: O loʻu igoa o Ioane. O ai foʻi lou suafa faamolemole?

Tavita: O Tavita. Mālō le soifua.

Ioane: Mālō foʻi le soifua Tavita. Ina ia faapuupuu le mataupu, e tasi se vala o lenei mataupu ou te fia talanoa i ai. Na e taʻua o le agaga paia o le fesoasoani lea na folafola e Iesu o le a auina mai iā i tatou. Ou te ioe faatasi ma oe. Ae po o lou talitonuga o le agaga paia o se peresona, ma e tutusa ma le Atua?

Tavita: Ioe, o loʻu talitonuga lenā.

Po o se Peresona le Agaga Paia?

Ioane: Seʻi o ta vāai i ni mau o le Tusi Paia o le a fesoasoani mai, e ta te iloa ai po o se peresona le agaga paia pe leai. Atonu ua e masani i nei mau. Ua taʻua i le Galuega 2:1-4 e faapea: “A o faagasolo le aso o le tausamiga o le Penetekoso, ua faatasitasi i latou uma i le nofoaga e tasi. Ona faafuaseʻi mai lea ona taalili mai i le lagi e pei o le agi o se matagi  malosi, ma ua tumu ai le fale atoa lea o loo latou nonofo ai. Ona latou iloa ai lea o ni laulaufaiva e pei o le afi, ua salalau atu ma nofo i luga o i latou taʻitoʻatasi, ona faatutumuina ai lea o i latou uma i le agaga paia, ma amata ai ona tautatala i gagana eseese, e pei ona foaʻiina mai e le agaga o le gagana iā i latou.”

Tavita: Ua ou iloa lelei lenā tala.

Ioane: A Tavita, e mafai ona faatumu se tagata i se isi tagata?

Tavita: E leai.

Ioane: Seʻi o ta tilofaʻia se isi fuaiupu o le mataupu lava lenā, o le fuaiupu e 17. Ua faapea mai le vaega muamua o le mau: “Ua fetalai mai le Atua: ‘O aso e gata ai, ou te liligi ifo ai loʻu agaga i luga o ituaiga uma o tagata.’” O le fesili, pe e mafai e le Atua ona ia liligiina mai se vaega o se Atua e la te tino faatasi?

Tavita: E leai.

Ioane: Na faaaogā e Ioane le Papatiso se isi faaupuga mo le faatutumuina i le agaga paia. O loo taʻua i le Mataio 3:11. E mafai ona e fofogaina mai faamolemole?

Tavita: “O aʻu nei, ou te papatiso atu iā te outou i le vai, auā ua outou salamō; a o lē e mulimuli mai, e sili atu ona malosi o ia iā te aʻu, e lē aogā iā te aʻu ona ou tatala i ona seevae. O ia lenā na te papatiso atu iā te outou i le agaga paia ma le afi.”

Ioane: Faafetai. Pe na e mātauina le mea na taʻua e Ioane le Papatiso o le a fai i le agaga paia?

Tavita: Sa ia taʻua le papatisoina i le agaga paia.

Ioane: Ioe, e saʻo. Ae mātau, na ia taʻua foʻi le papatisoina i le afi. O le mea moni e lē o se peresona le afi. Pe e te manatu la ua faapea mai lenei mau o le agaga paia o se peresona?

Tavita: E leai.

Ioane: Pe a fua la i mau na ta talanoaina, e lē o se peresona le agaga paia.

Tavita: O le saʻo ea lenā.

E Faapefea Ona Avea ma “Fesoasoani”?

Ioane: Ae i le amataga, na e taʻua ai le faaupuga o le “fesoasoani.” Na taʻua e Iesu i le Ioane 14:26 le agaga paia o se “fesoasoani.” Seʻi o ta faitau i ai: “O le fesoasoani, o le agaga paia lea e auina mai e le Tamā i loʻu igoa, e aʻoaʻo iā te outou i mea uma, ma faamanatu atu i o outou mafaufau mea uma na ou taʻu atu.” E manatu nisi e foliga mai o lenei mau e lagolagoina ai le manatu e faapea, o le agaga paia o se peresona, o se tasi o le a fesoasoani ma aʻoaʻo mai.

Tavita: Ioe, o loʻu manatu lenā.

Ioane: Ae pe na faaaogā e Iesu se faaupuga faafaatusa? Seʻi mātau mai le fetalaiga a Iesu e uiga i le atamai, i le Luka 7:35: “Ae peitaʻi, e taʻuamiotonuina le atamai i ana tama uma.” Pe e te manatu o se tagata le atamai, e iai moni sana fanau?

Tavita: E leai. Ua na o se faaupuga faafaatusa.

Ioane: Saʻo lelei. O le uiga o le fetalaiga a Iesu, e iloa le atamai i iʻuga e maua mai ai. E masani ona faaaogā i le Tusi Paia se faaupuga faafaatusa e faamatala ai se mea e leai se ola, ae e pei o loo ola. E tatou te faaaogā soo faaupuga faapena i a tatou talanoaga. O se faataʻitaʻiga, pe a malama aʻe le taeao, e masani ona fai atu se tasi, “Tatala le faitotoʻa e sau ai le lā.”

Tavita: O laʻu tala lenā e fai.

Ioane: Ae po o le uiga o lau tala o se tagata le lā, e pei o se mālō ua sau i totonu o lou fale?

Tavita: E leai. O se tala faafaatusa.

Ioane: Ina ua taʻua la e Iesu le agaga paia o se fesoasoani po o se aʻoaʻo, pe sa ia faaaogā se faaupuga faafaatusa?

Tavita: Atonu. E talafeagai lelei lenā ma mau ia na e faitauina, e faatatau i le liligiina ifo o le agaga paia ma le papatisoina o tagata i le agaga paia. Pe afai la e lē o se peresona le agaga paia, ae o le ā la?

 O le ā le Agaga Paia?

Ioane: I le Galuega 1:8, ua faamatala mai ai e Iesu iā i tatou le agaga paia. E te fiafia e fofoga mai le ta mau faamolemole?

Tavita: “E maua e outou le mana, pe a oo ifo iā te outou le agaga paia, ona fai lea o outou ma molimau iā te aʻu i Ierusalema, i Iutaia uma ma Samaria, ma tuluʻiga uma o le lalolagi.”

Ioane: Mātau o lenā e faafesootaʻi e Iesu le agaga paia i le mana. Ma i mau na ta faitauina muamua, o le ā sou manatu, o fea e maua mai ai lenā mana?

Tavita: Mai i le Atua le Tamā.

Ioane: Ioe, e saʻo. O le agaga paia o le mana lava foʻi lenā na faaaogā e le Atua e faia ai mea uma. O loo taʻua lenā mea i le fuaiupu lona lua o le Tusi Paia. Ua taʻua i le Kenese 1:2: “Na fegaoioiaʻi foʻi le mana o le Atua i luga o vai loloto.” O le upu Eperu ua faaliliuina i inei i le “mana,” ua faaliliuina foʻi i le “agaga.” O le mana galue lē vaaia ua faaaogā e le Atua e faataunuu ma faailoa mai ai lona finagalo. Seʻi oʻu taʻu atu se isi mau e te mafaufau i ai. O le Luka 11:13. E mafai ona e fofoga mai lenei mau faamolemole?

Tavita: “O outou o ē e leaga, afai tou te avatu i a outou fanau meaalofa lelei, e sili atu la ona foaʻi mai e le Tamā o i le lagi le agaga paia iā i latou o ē e ōle atu iā te ia!”

Ioane: Pe afai o le Tamā i le lagi e na te pulea le agaga paia, ma foaʻi mai i ē e ōle atu iā te ia, pe mafai la ona tutusa le agaga paia ma le Tamā?

Tavita: E leai. O lea la ua ou maua atu lou manatu.

Ioane: Ou te lē manaʻo e fao uma lou taimi. Na e taʻua e maua lou avanoa puupuu. Ae seʻi oʻu fai atu se fesili e aotele ai le ta talanoaga. I mau na ta talanoaina, o le ā sou silafia, o le ā le agaga paia?

Tavita: O le mana galue o le Atua.

Ioane: Saʻo lelei. E tusa ai ma le Ioane 14:26, ina ua fetalai Iesu o le agaga paia o se fesoasoani po o se aʻoaʻo, sa ia faaaogā se faaupuga faafaatusa e faamatala ai se mea e leai se ola, ae e pei o loo ola.

Tavita: Ou te leʻi faalogo muamua i lenā manatu.

Ioane: E iai se isi mea e sili ona faalaeiau e aʻoaʻoina mai i fetalaiga a Iesu.

Tavita: O le ā lenā mea?

Ioane: E mafai ona tatou ōle atu i le Atua mo lona agaga paia, ina ia fesoasoani iā i tatou i taimi o faigatā. E mafai foʻi ona tatou tatalo atu mo lona agaga, ina ia fesoasoani iā i tatou e aʻoaʻoina le upu moni e uiga iā te ia.

Tavita: Manaia tele lenā manatu. O le a ou mafaufau i lenā mea.

Ioane: A o leʻi oʻu tuumuli, e iai se isi mea ou te fia taʻu atu e te mafaufau i ai. Talu ai o le agaga paia o le mana galue o le Atua, e ta te ioe la e mafai ona faaaogā e le Atua e faataunuu ai so o se mea e finagalo i ai.

Tavita: E moni lenā manatu.

Ioane: Ae aiseā la ua ia lē faaaogā ai lenā mana e lē gata mai, e faamuta ai puapuaga uma ma mea leaga lea e tatou te vaaia i le lalolagi? Pe sa e mafaufau i lenā fesili? *

Tavita: Ioe na ou mafaufau i ai.

Ioane: Ae ā pe a ou toe sau i le vaiaso fou i le taimi lava lenei, ona ta talanoa lea i lenā mataupu ?

Tavita: Manaia tele lenā tonu. Ta feiloaʻi i le vaiaso fou.

[Faaopoopoga i lalo]