Gado Idauidau ai Hereva Karana Dirava amo Eiava?

DEVON ia gwau: “Lau laloparara lasi, wiki ta ta ai egu dubu dekenai toana be momo be lauma helaga idia abia bona hoa dalanai gado idauidau ai idia hereva. Haida be matabodaga karadia idia karaia. Lau ura Baibel ena hakaua herevadia lau badinaia. To, gado idauidau ai hereva totona lau guriguri neganai, lauma helaga amo unai harihari gauna lau abia lasi. Dahaka dainai?”

Gabriel ena dubu dekenai danu taunimanima be lauma helaga idia abia bona gado idauidau ai idia hereva. Gabriel ia gwau: “Lau ia hahekwakwanaia gauna be, lau guriguri lalonai, haida be idia boiboi badabada bona edia hereva lau lalopararalaia lasi. Edia hereva ese ta ia durua lasi. Dirava ena lauma helaga ena harihari gauna ta ese namo ia havaraia, a?”

Devon bona Gabriel dekenai idia vara gaudia ese henanadai badana ta ia havaraia, hari inai negai dubu haida dekenai gado idauidau ai hereva karana be Dirava amo eiava? Unai henanadai haerelaia totona, namona be aposetolo edia negai hoa dalanai gado idauidau ai idia hereva karana ita laloa.

“Gado Idauidau Dekenai Idia Hereva”

Baibel ai, tatau bona hahine haida be lauma helaga ena siahu idia abia bona gado idauidau ai idia hereva ena sivarai ita duahia. Pentekoste 33 C.E. ai, Iesu Keriso ia mase bona wiki haida murinai unai ia vara. Unai dina dekenai Ierusalema ai, Iesu ena hahediba taudia 120 be “Lauma Helaga dekenai idia honu, bona gado idauidau dekenai idia hereva.” Gabu idauidau amo idia mai taudia be “idia hoa bada, badina be idia ta ta edia gado ta ta dekenai idia kamonai.”​—⁠Kara 1:15; 2:​1-6.

Baibel ese Iesu ena hahediba taudia ma haida ia herevalaia, idia danu be lauma helaga idia abia bona gado idauidau ai idia hereva. Hegeregere, aposetolo Paulo be lauma helaga ia abia dainai, hoa dalanai gado idauidau ai ia hereva diba. (Kara 19:6; 1 Korinto 12:​10, 28; 14:18) To, badina namona ta dainai, Dirava ena lauma helaga ese unai bamona harihari gauna ia henia. Vadaeni, dahaka dainai Baibel negadiai haida be gado idauidau ai idia hereva?

Dirava Ena Heduru Ia Hahedinaraia Toa Ta

Korinto dekenai Keristani taudia haida be gado idauidau ai idia hereva, bona Paulo ese ia tore henidia neganai, ia gwau: “Idau momokani gadodia hereva kara be toa ta, . . . Iesu idia abidadama henia lasi taudia ia durua diba.” (1 Korinto 14:22) Unai dainai, gado idauidau ai hereva karana bona hoa karadia ma haida be  toa ta, unai amo abidadama lasi taudia do idia itaia Dirava be Keristani kongrigeisen matamatana ia lalonamo henia bona durua. Lauma helaga ena harihari gaudia be sainbod ta bamona, hereva momokani idia tahua taudia dekenai dala maorona ia hahedinaraia, unai amo idia be Dirava ena abia hidi taudia idia davaria diba.

Iesu bona peroveta taudia be hoa dalanai gado idauidau ai idia hereva karana be Baibel ese ia gwauraia lasi. Unai dainai, Iesu ena hahediba taudia be badina haida dainai gado idauidau ai idia hereva.

Sivarai Namona Harorolaia Dalana

Iesu be ena hesiai gaukara ena matamanai, ena hahediba taudia ia hamaoroa, Dirava ena Basileia ena sivarai namona be Iuda taudia sibona dekenai do idia harorolaia. (Mataio 10:6; 15:24) Unai dainai, hahediba taudia be Iuda taudia sibona idia haroro henia. To, kahirakahira unai do ia idau.

Iesu be lagani 33 C.E. ai ia mase bena nega sisina murinai ia toreisi lou neganai, ena hahediba taudia ia hagania ‘bese ibounai be diba tahua taudia do idia halaoa.’ Danu, idia ia hamaoroa iena sivarai be “tanobada ena kahana ibounai” dekenai do idia harorolaia. (Mataio 28:19; Kara 1:⁠8) Unai bamona idia karaia totona, idia be Heberu gado sibona lasi, to gado idauidau ai sivarai namona idia harorolaia be namo.

To, unai hahediba taudia ginigunadia momo be “sikuli bada lasi bona aonega bada lasi taudia.” (Kara 4:13) Edena dala ai idia do kamonai lasi o herevalaia lasi gadodia ai taunimanima idia haroro henia? Lauma helaga ese unai haroro goadagoada taudia dekenai siahu ia henia, unai amo idia diba lasi gadodia ai idia haroro namonamo diba.

Unai dainai, gado idauidau ai hereva karana ena badina badadia be rua. Ginigunana be, ia hamomokania Dirava be hahediba taudia ginigunadia ia durua. Iharuana be, idia ia durua gado idauidau ai taunimanima idia haroro henia haheganina idia hagugurua totona. Hari inai negai, dubu momo lalodiai gado idauidau ai hereva karana ese unai badina rua idia hagugurua, a?

Hari, Gado Idauidau ai Hereva Karana​—⁠Dirava Ena Heduru Ia Hahedinaraia Toa ta, A?

Sainbod be edeseniai do oi atoa, unai amo emu gabu ai idia noho taudia ese idia itaia diba? Ruma lalonai do oi atoa, a? Lasi! Pentekoste dinana ai ia vara sivaraina ese ita ia hadibaia, “taunimanima momo” be idia raka hanaia neganai idia itaia hahediba taudia be hoa dalanai gado idauidau ai idia hereva. Unai dainai, unai dina dekenai “taunimanima 3000 bamona” be Keristani kongrigeisen lalonai idia vareai. (Kara 2:​5, 6, 41) Bema hari taunimanima idia gwau idia be gado idauidau ai idia hereva, to edia dubu lalonai sibona unai idia karaia, vadaeni abidadama lasi taudia be edena dala ai unai toa do idia itaia?

Baibel ia gwau matabodaga bona “tauanina ena kara” dikadia ese lauma helaga ena gaukara dalana ia koua, danu “unai bamona idia karaia taudia ese Dirava ena Basileia dekenai do idia vareai diba lasi.” (Galatia 5:​17-21) Bema oi itaia kara dika idauidau idia karaia taudia be gado idauidau ai idia hereva, reana do oi laloa, ‘Baibel ese ia taravatua karadia idia karaia​—⁠ma haida idia hakaua kerere​—⁠taudia ese Dirava ena lauma helaga idia abia be maoro, a?’ Unai be hegeregere sainbod be gabu kererena ai idia atoa dainai, taunimanima ia hakaua kerere.

Hari, Gado Idauidau ai Hereva Karana​—⁠Sivarai Namona Harorolaia Dalana ta, A?

Aposetolo edia negai, gado idauidau ai idia hereva karana ena badina ma haida be dahaka? Dubu lalodiai gado idauidau ai hereva karana be taunimanima idauidau dekenai sivarai namona harorolaia dalana ta, a? Pentekoste 33 C.E. dinana ai, Ierusalema dekenai idia lao taudia ita laloa. Idia be tano idauidau amo idia mai, bona idia ese hahediba taudia idia herevalaia gadodia idia lalopararalaia. To, hari inai negai  gado idauidau ai idia hereva taudia edia hereva be kamonai tauna ese ia lalopararalaia lasi.

Ia hedinarai goevagoeva, Iesu ena hahediba taudia ese lauma helaga ena harihari gauna idia abia karana be hari inai negai gado idauidau ai idia hereva taudia amo ia idau. Momokani, aposetolo taudia idia mase negana amo ema bona hari, sivarai ta ese ia hamomokania lasi taunimanima be hoa dalanai gado idauidau ai idia hereva. Baibel duahia taudia ese unai idia hoalaia lasi. Aposetolo Paulo ia gwau lauma helaga ena harihari gaudia idauidau, gado idauidau ai hereva karana danu, be “do idia doko.” (1 Korinto 13:⁠8) Vadaeni, hari inai negai edena dala ai ita diba ta be lauma helaga ia abia?

Dahaka ese Ia Hamomokania Ta be Lauma Helaga Ia Abia?

Iesu ia diba Keristani kongrigeisen ia gini murinai, gado idauidau ai hereva karana be do ia doko. Iesu ena mase negana ia kahirakahira neganai, iena murinai idia raka taudia momokanidia edia toana ia herevalaia. Ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Momokani, Baibel ia peroveta bamona lauma helaga ena harihari gaudia idauidau be do idia doko, to “lalokau be do ia noho hanaihanai doko lasi.”​—⁠1 Korinto 13:⁠8.

Dirava ena “lauma helaga ena huahua” nain amo lalokau be ginigunana. (Galatia 5:​22, 23, NW ) Unai dainai, Dirava ena lauma helaga bona iena heduru idia abia taudia be ta ta dekenai lalokau korikori idia hahedinaraia. Danu, lauma helaga ena huahua ihatoina be maino. Unai dainai, hari inai negai lauma helaga idia abia taudia be maino ai idia noho, taunimanima idia doria lasi idia sibona edia lalohadai idia dogoatao auka, kopi idauidau taudia idia inai henia lasi, bona dagedage karadia idia dadaraia.

Danu, Iesu ena peroveta herevana Kara 1:8 ai ita laloa. Ia gwau iena hahediba taudia be lauma helaga do idia abia bona iena sivarai be “tanobada ena kahana ibounai” dekenai do idia harorolaia. Danu, Iesu ia gwau unai gaukara do idia karaia “ela bona tanobada dokona.” (Mataio 28:20) Unai dainai, tanobada hegegemadai idia karaia noho haroro gaukarana be lauma helaga ena siahu idia abia taudia edia toana ta.

Dahaka oi laloa? Hari inai negai daidia be lauma helaga idia abia? Daidia be tuari lalonai idia vareai lasi dainai gavamani ese idia hahisia, to lauma helaga ena huahua, lalokau bona maino idia hahedinaraia noho? (Isaia 2:⁠4) Daidia ese tauanina ena kara, hegeregere matabodaga bona kara dikadia ma haida amo idia helalo-kerehai lasi taudia be edia orea amo idia atoa siri? (1 Korinto 5:​11-13) Daidia be tanobada hegegemadai Dirava ena Basileia ese taunimanima edia noho do ia hanamoa ena sivarai namona idia harorolaia?​—⁠Mataio 24:⁠14.

Inai magasin idia karaia taudia idia diba momokani Iehova ena Witnes taudia be Baibel ese ia gwauraia lauma helaga idia abia taudia. Namona be idia oi diba namonamo bona oi sibona ese oi itaia idia be momokani Dirava ena heduru idia abia eiava lasi.