ဘာသာစကားအမျိုးမျိုးဖြင့် ပြောဆိုခြင်း ဘုရားသခင်ထံမှ ဆုကျေးဇူးလား

“ကျွန်တော် နားမလည်နိုင်တော့ဘူး။ အပတ်တိုင်း ကျွန်တော့်ချာ့ခ်ျက လူတွေအတော်များများ သန့်ရှင်းသောဝိညာဉ်တော်ရနေတဲ့ပုံပဲ။ ဘာသာစကားအမျိုးမျိုးနဲ့ ပြောဆိုနေကြတာ အံ့ဩစရာကြီး။ အဲလိုလူတွေထဲမှာ တချို့က ကိုယ်ကျင့်တရား ဖောက်ပြန်နေတယ်။ ကျွန်တော်ကတော့ ကျမ်းစာစံနှုန်းနဲ့အညီ နေထိုင်ဖို့ ကြိုးစားတယ်။ သန့်ရှင်းသောဝိညာဉ်တော်ရဖို့ ကျွန်တော် အသည်းအသန်ဆုတောင်းပေမဲ့ တစ်ခါမှ မရခဲ့ဘူး။ ဘာကြောင့်မရတာလဲ မသိဘူး” ဆိုပြီး ကိုညီညီကပြောတယ်။

အလားတူ၊ ကိုအောင်အောင်တက်နေတဲ့ ချာ့ခ်ျမှာလည်း လူတွေ သန့်ရှင်းသောဝိညာဉ်တော်ရပြီး ဘာသာစကားအမျိုးမျိုး ပြောဆိုနေကြတယ်။ “ကျွန်တော်ဆုတောင်းနေတုန်း တချို့က ကြားဖြတ်ပြီး ကျွန်တော်ရော၊ သူတို့ကိုယ်တိုင်ပါ နားမလည်တဲ့ ဘာသာစကားနဲ့ အသံအကျယ်ကြီး ဆုတောင်းနေကြတာကို တော်တော် စိတ်ပျက်မိတယ်။ ဒီလိုဆုတောင်းပုံမျိုးနဲ့တော့ ဘယ်သူမှ အကျိုးရမှာမဟုတ်ဘူး။ ဘုရားသခင့်ဝိညာဉ်တော်ဆုကျေးဇူးမှာ အကျိုးပြုတဲ့ ရည်ရွယ်ချက်တစ်ခုခု ရှိသင့်တယ်လေ” ဆိုပြီး ကိုအောင်အောင်က ပြောပြတယ်။

ကိုညီညီနဲ့ ကိုအောင်အောင်တို့ရဲ့ အတွေ့အကြုံတွေကြောင့် ကနေ့ အမည်ခံခရစ်ယာန်အသင်းတချို့မှာ ဘာသာစကားအမျိုးမျိုးပြောဆိုနေကြတာက တကယ်ပဲ ဘုရားသခင်ပေးတဲ့ ဆုကျေးဇူးလားဆိုတဲ့ စိတ်ဝင်စားဖွယ်မေးခွန်း ပေါ်လာတယ်။ ပထမရာစုခေတ်က ခရစ်ယာန်တွေရရှိခဲ့တဲ့ ဘာသာစကားအမျိုးမျိုးပြောတဲ့ အံ့ဖွယ်ဆုကျေးဇူးကို ဆန်းစစ်ကြည့်မယ်ဆိုရင် အဲဒီမေးခွန်းအတွက် အဖြေရရှိမှာပါ။

“အမျိုးမျိုးသော ဘာသာစကားအားဖြင့် ဟောပြော” ခဲ့ကြ

သမ္မာကျမ်းစာမှာ အမျိုးသား၊ အမျိုးသမီးတချို့ဟာ သူတို့ တစ်ခါမှ မသင်ခဲ့တဲ့ ဘာသာစကားတွေနဲ့ ပြောဆိုနိုင်စွမ်း ရှိခဲ့ကြတယ်လို့ ဖော်ပြထားတယ်။ ယေရှုခရစ် သေဆုံးပြီးတဲ့နောက် အပတ်အနည်းငယ်အကြာ စီအီး ၃၃ ပင်တေကုတ္တေပွဲနေ့မှာ ဦးဆုံးအနေနဲ့ ဘာသာစကားအမျိုးမျိုး ပြောဆိုခဲ့ကြတယ်။ အဲဒီနေ့က ဂျေရုဆလင်မြို့မှာ ယေရှုရဲ့တပည့် ၁၂၀ လောက်ဟာ ‘သန့်ရှင်းသောစွမ်းအားတော် * နှင့်ပြည့်လျက် အမျိုးမျိုးသောဘာသာစကားများဖြင့် ပြောဆို’ ခဲ့ကြတယ်။ တိုင်းတစ်ပါးက ရောက်လာကြတဲ့ ဧည့်သည်တွေဟာ သူတို့ “ဘာသာစကားဖြင့် ပြောဆိုသည်ကိုကြားရ၍ မိန်းမောတွေဝေကြ၏။”—တမန်တော် ၁:၁၅; ၂:၁-၆။

အဲဒီလို ဘာသာစကားအမျိုးမျိုး ပြောနိုင်စွမ်းရှိခဲ့တဲ့ ယေရှုနောက်လိုက်တချို့အကြောင်း ကျမ်းစာမှာ ဖော်ပြထားတယ်။ ဥပမာ၊ သန့်ရှင်းသောစွမ်းအားတော် ရရှိထားတဲ့ တမန်တော်ပေါလုဟာ ဘာသာစကားအမျိုးမျိုး ပြောဆိုနိုင်ခဲ့တယ်။ (တမန်တော် ၁၉:၆; ၁ ကောရိန္သု ၁၂:၁၀၊ ၂၈; ၁၄:၁၈) ဒါပေမဲ့ ဆင်ခြင်တုံတရားအရ ဘုရားသခင့်သန့်ရှင်းသောစွမ်းအားတော်ကြောင့် ရရှိတဲ့ဆုကျေးဇူးမှာ ရည်ရွယ်ချက်ကောင်း ရှိသင့်ပါတယ်။ ကျမ်းစာခေတ်တုန်းက ဘာရည်ရွယ်ချက်နဲ့ ဘာသာစကားအမျိုးမျိုးဖြင့် ပြောဆိုခဲ့ကြတာလဲ။

ဘုရားသခင်ထောက်မနေတယ်ဆိုတဲ့ အမှတ်အသားတစ်ခုဖြစ်

ကောရိန္သုခရစ်ယာန်တွေဆီ တမန်တော်ပေါလု စာရေးတဲ့အချိန်မှာ တချို့က ဘာသာစကားအမျိုးမျိုး ပြောဆိုတတ်ပုံရတယ်။  ‘ဘာသာစကားအမျိုးမျိုးဖြင့် ပြောဆိုခြင်းသည် မယုံကြည်သောသူတို့အတွက် နိမိတ်လက္ခဏာဖြစ်၏’ ဆိုပြီး ပေါလု ရှင်းပြတယ်။ (၁ ကောရိန္သု ၁၄:၂၂) ဒါကြောင့် တခြားအံ့ဖွယ်ဆုကျေးဇူးတွေအပြင် ဘာသာစကားအမျိုးမျိုးဖြင့် ပြောဆိုနိုင်တာက တည်ထောင်ခါစ ခရစ်ယာန်အသင်းတော်ဟာ ဘုရားသခင့်နှစ်သက်လက်ခံမှုနဲ့ ထောက်မမှု ရရှိနေတယ်ဆိုတဲ့ အမှတ်အသားဖြစ်တယ်။ အံ့ဖွယ်ဆုကျေးဇူးတွေဟာ ဘုရားသခင်ရွေးချယ်ထားတဲ့လူမျိုးကို အမှန်တရားရှာဖွေသူတွေ ရှာတွေ့နိုင်ဖို့ ညွှန်ပြပေးတဲ့ လမ်းညွှန်ဆိုင်းဘုတ်နဲ့တူတယ်။

ယေရှု ဒါမှမဟုတ် ခရစ်ယာန်ခေတ်မတိုင်ခင်က ပရောဖက်တွေဟာ သူတို့မသင်ယူခဲ့တဲ့ ဘာသာစကားတွေကို အံ့ဖွယ်နည်းနဲ့ ပြောဆိုခဲ့တယ်ဆိုတဲ့ မှတ်တမ်းကို ကျမ်းစာမှာ မဖော်ပြထားတာက ထူးခြားတယ်။ ဒါဆိုရင် ဘာသာစကားအမျိုးမျိုးဖြင့် ပြောဆိုခြင်းဆိုတဲ့ ဆုကျေးဇူးကို ယေရှုရဲ့ တပည့်တွေရရှိထားခြင်းက ရည်ရွယ်ချက်တချို့ ရှိသေးတယ်ဆိုတာ ထင်ရှားပါတယ်။

သတင်းကောင်းဟောပြောစေနိုင်တဲ့ နည်းလမ်းတစ်ခုဖြစ်

ခရစ်ယာန်ဓမ္မအမှုကို ယေရှု စတင်ထမ်းဆောင်ချိန်က ဂျူးတွေကိုသာ ဘုရားသခင့်နိုင်ငံတော်သတင်းကောင်း ဟောပြောဖို့ တပည့်တွေကို ညွှန်ကြားခဲ့တယ်။ (မဿဲ ၁၀:၆; ၁၅:၂၄) ရလဒ်အနေနဲ့ တပည့်တွေဟာ ဂျူးတွေနေထိုင်တဲ့ နယ်မြေတွေလောက်ကိုပဲ ဟောပြောခဲ့ကြတယ်။ ဒါပေမဲ့ အခြေအနေတွေက မကြာခင် ပြောင်းလဲတော့မယ်။

စီအီး ၃၃ မှာ သေဆုံးပြီး ရှင်ပြန်ထမြောက်လာတဲ့ ယေရှုက နောက်လိုက်တွေကို “လူမျိုးတကာမှ လူတို့ကို ငါ့တပည့်ဖြစ်စေ” ပါလို့ မိန့်မှာခဲ့တယ်။ သည့်အပြင် နောက်လိုက်တွေဟာ မိမိအကြောင်း ‘မြေကြီးစွန်းတိုင်အောင် သက်သေခံသူများ ဖြစ်ကြလိမ့်မည်’ ဆိုပြီးတော့လည်း ယေရှုပြောခဲ့တယ်။ (မဿဲ ၂၈:၁၉; တမန်တော် ၁:၈) မြေကြီးစွန်းတိုင်အောင် သတင်းကောင်းဟောပြောဖို့အတွက် ဟီဘရူးဘာသာစကားအပြင် တခြားဘာသာစကားများစွာကိုလည်း အသုံးပြုဖို့လိုတယ်။

ဒါပေမဲ့ ယေရှု့ခေတ်က တပည့်အများစုဟာ “ပညာတတ်များမဟုတ်၊ သာမန်လူများ” သာဖြစ်ကြတယ်။ (တမန်တော် ၄:၁၃) ဒါဆိုရင် တပည့်တွေဟာ သူတို့တစ်ခါမှ မကြားဖူး၊ မသင်ဖူးတဲ့ ဘာသာစကားတွေ ပြောဆိုတဲ့သူတွေဆီသွားပြီး သတင်းကောင်းဟောပြောနိုင်ပါ့မလား။ သန့်ရှင်းသောစွမ်းအားတော်က အဲဒီဇွဲထက်သန်တဲ့သူတချို့ကို သူတို့ တစ်ခါမှ မသင်ဖူးတဲ့ ဘာသာစကားတွေနဲ့ ကျွမ်းကျွမ်းကျင်ကျင် ဟောပြောနိုင်တဲ့ အံ့ဖွယ်အစွမ်းတွေ ပေးခဲ့တယ်။

ဘာသာစကားအမျိုးမျိုးဖြင့် ပြောဆိုနိုင်တဲ့ ဆုကျေးဇူးကြောင့် အရေးကြီးတဲ့ ရည်ရွယ်ချက်နှစ်ခု အထမြောက်ခဲ့ပါတယ်။ ပထမတစ်ခုက ဘုရားသခင်ရဲ့ ထောက်မမှုရရှိထားတယ်ဆိုတဲ့ အမှတ်အသားတစ်ခုကို ထင်ရှားစေတယ်။ ဒုတိယတစ်ခုက ဘာသာစကားအမျိုးမျိုး ပြောတဲ့သူတွေဆီကို ဟောပြောပါဆိုတဲ့ တာဝန်ကို ပထမရာစုခရစ်ယာန်တွေ ဆောင်ရွက်နိုင်ဖို့ ထိရောက်တဲ့နည်းလမ်းတစ်ခု ဖြစ်စေတယ်။ ကနေ့ခေတ် အမည်ခံခရစ်ယာန်အသင်းများစွာမှာ ဘာသာစကားအမျိုးမျိုးပြောဆိုခြင်းက အဲဒီရည်ရွယ်ချက်နှစ်ခုကို အထမြောက်စေသလား။

ကနေ့ ဘာသာစကားအမျိုးမျိုးဖြင့်ပြောဆိုခြင်းက ဘုရားသခင့်ထောက်မမှုရရှိနေတယ်ဆိုတဲ့ အမှတ်အသားတစ်ခုလား

သင့်ရပ်ကွက်မှာ လူများနိုင်သမျှများများ တွေ့မြင်ဖို့လိုအပ်တဲ့ လမ်းညွှန်ဆိုင်းဘုတ်ကို ဘယ်နေရာမှာ သင်စိုက်ထူမလဲ။ အိမ်ထဲမှာ မဟုတ်တာတော့ သေချာတယ်။ ယေရှုတပည့်တွေဟာ အံ့ဖွယ်နည်းနဲ့ ဘာသာစကားအမျိုးမျိုးဖြင့် ပြောဆိုနေကြတယ်ဆိုတဲ့ အမှတ်အသားကို လမ်းသွားလမ်းလာ “အများ” တွေ့ မြင်ခဲ့ကြတယ်လို့ ပင်တေကုတ္တေပွဲနေ့မှတ်တမ်းက ဖော်ပြတယ်။ အဲလိုတွေ့မြင်ပြီးတဲ့နောက် အဲဒီနေ့မှာပဲ ခရစ်ယာန်အသင်းတော်ထဲကို “လူသုံးထောင်ခန့်” ဝင်ရောက်လာခဲ့တယ်။ (တမန်တော် ၂:၅၊ ၆၊ ၄၁) ကနေ့ ဘာသာစကားအမျိုးမျိုးဖြင့် ပြောဆိုနေတဲ့သူတွေဟာ ချာ့ခ်ျအဆောက်အအုံထဲမှာပဲ ပြောဆိုနေမယ်ဆိုရင် ခရစ်ယာန်မဟုတ်တဲ့သူတွေက ဘယ်လိုလုပ် တွေ့ မြင်တော့မှာလဲ။

သန့်ရှင်းသောစွမ်းအားတော်နဲ့မဆိုင်တဲ့ မတရားမေထုန်ပြုခြင်းနဲ့ တခြား “လူ့ဇာတိနှင့်ဆိုင်သော အကျင့်များ” ကို ကျမ်းစာမှာ ဖော်ပြထားတဲ့အပြင် “ဤအရာများကို ပြုကျင့်သူတို့သည် ဘုရားသခင့်နိုင်ငံတော်ကို အမွေမခံကြရ” ဆိုပြီးတော့လည်း ဖော်ပြထားတယ်။ (ဂလာတိ ၅:၁၇-၂၁) ကိုယ်ကျင့်တရားမကောင်းတဲ့သူတွေက ဘာသာစကားအမျိုးမျိုးဖြင့် ပြောဆိုနေတာကို သင်သတိပြုမိမယ်ဆိုရင် ဒီလိုမေးမိမှာပဲ– ‘ကျမ်းစာက ပြစ်တင်ရှုတ်ချထားတဲ့ အမူအကျင့်တွေကို ဆက်ပြုကျင့်နေတဲ့သူတွေကို ဘုရားသခင့်သန့်ရှင်းသောစွမ်းအားတော် အပ်နှင်းထားတာက ရှေ့နောက်မညီတဲ့အပြင် လှည့်စားနေရာမကျဘူးလား။’ အဲဒါက ကားတွေကို လမ်းမှားဘက် ညွှန်ပြပေးနေတဲ့ လမ်းညွှန်ဆိုင်းဘုတ်ကို စိုက်ထူထားတာနဲ့ သွားတူနေတယ်။

ကနေ့ ဘာသာစကားအမျိုးမျိုးဖြင့် ပြောဆိုခြင်းက သတင်းကောင်းပျံ့နှံ့စေတဲ့ နည်းလမ်းတစ်ခုလား

ပထမရာစုအချိန်တုန်းက ဘာသာစကားအမျိုးမျိုးဖြင့် ပြောဆိုခြင်း ဆုကျေးဇူးရဲ့ ရည်ရွယ်ချက်နောက်တစ်ခုက ဘာလဲ။ အမည်ခံခရစ်ယာန်အသင်းတွေမှာ ဘာသာစကားအမျိုးမျိုးဖြင့် ပြောဆိုခြင်းက လူမျိုးအသီးသီးကို သတင်းကောင်းဟောပြောတဲ့ နည်းလမ်းတစ်ခုလား။ စီအီး ၃၃ ပင်တေကုတ္တေပွဲနေ့၊ ဂျေရုဆလင်မြို့မှာ  ရောက်ရှိနေတဲ့သူတွေက ဒေသအတော်များများကနေ ရောက်ရှိလာတာဖြစ်ပြီး တပည့်တွေ အံ့ဖွယ်နည်းနဲ့ ပြောဆိုတဲ့ ဘာသာစကားတွေကို သူတို့ ကောင်းကောင်းနားလည်ကြတယ်။ ကနေ့ ဘာသာစကားအမျိုးမျိုးဖြင့် ပြောဆိုနေသူတွေရဲ့ စကားကို ဘယ်သူကမှ နားမလည်ကြဘူး။

ကနေ့ခေတ် ဘာသာစကားအမျိုးမျိုးဖြင့် ပြောဆိုခြင်းက ယေရှုခေတ်က နောက်လိုက်တွေ ဘာသာစကားအမျိုးမျိုးဖြင့် ပြောဆိုခြင်းနဲ့ တစ်ခြားစီပဲ။ တမန်တော်တွေ သေဆုံးပြီးကတည်းက အဲလိုအံ့ဖွယ်ဆုကျေးဇူးရရှိခဲ့တယ်ဆိုတဲ့ မှတ်တမ်းမရှိတော့ဘူး။ ဒါကို ကျမ်းစာဖတ်ရှုသူတွေ အံ့သြဖို့မဟုတ်ပါဘူး။ ဘာသာစကားအမျိုးမျိုးပြောဆိုခြင်း ဆုကျေးဇူးအပြင် တခြားအံ့ဖွယ်ဆုကျေးဇူးတွေ “ရပ်စဲသွားလိမ့်မည်” လို့ တမန်တော်ပေါလု ကြိုပြောခဲ့တယ်လေ။ (၁ ကောရိန္သု ၁၃:၈) ဒါဆိုရင် ကနေ့ခေတ်မှာ သန့်ရှင်းသောစွမ်းအားတော် ရရှိထားတဲ့သူတွေကို ဘယ်လိုခွဲခြားသိမြင်နိုင်သလဲ။

သန့်ရှင်းသောစွမ်းအားတော် ရရှိထားတယ်ဆိုတဲ့ အထောက်အထားကို ဘယ်သူပြနိုင်သလဲ

ခရစ်ယာန်အသင်းတော် တည်ထောင်ပြီးနောက်ပိုင်း မကြာခင်မှာပဲ ဘာသာစကားအမျိုးမျိုးဖြင့် ပြောဆိုနိုင်တဲ့ ဆုကျေးဇူး ရပ်စဲသွားမယ်ဆိုတာ ယေရှုကောင်းကောင်း သိထားတယ်။ ယေရှုမသေဆုံးခင် မိမိရဲ့နောက်လိုက်တွေကို ခွဲခြားသိမြင်နိုင်မယ့် အမှတ်အသားတစ်ခုကို ဖော်ပြပေးခဲ့တယ်။ “သင်တို့အချင်းချင်း ချစ်ကြလျှင် ထိုချစ်ခြင်းမေတ္တာကိုထောက်၍ သင်တို့သည် ငါ၏တပည့်များဖြစ်ကြောင်း လူအပေါင်းတို့ သိရကြလိမ့်မည်” ဆိုပြီး ယေရှုပြောခဲ့တယ်။ (ယောဟန် ၁၃:၃၅) အံ့ဖွယ်ဆုကျေးဇူးတွေဟာ နောက်ဆုံးမှာ ရပ်စဲသွားပြီး “မေတ္တာသည် အစဉ်တည်၏” လို့ ကျမ်းစာက ကြိုပြောထားတယ်။—၁ ကောရိန္သု ၁၃:၈။

ဘုရားသခင့်သန့်ရှင်းသောစွမ်းအားတော်က ဖြစ်ပေါ်စေတဲ့ အရည်အသွေးကိုးခုထဲမှာ မေတ္တာက ဦးဆုံးအရည်အသွေးဖြစ်တယ်။ (ဂလာတိ ၅:၂၂၊ ၂၃) ဒါကြောင့် ဘုရားသခင့်စွမ်းအားတော်နဲ့ ဘုရားသခင့်ထောက်မမှု ရရှိထားတဲ့သူတွေဟာ တစ်ယောက်ကိုတစ်ယောက် တကယ်ချစ်ရမှာဖြစ်တယ်။ သည့်အပြင် သန့်ရှင်းသောစွမ်းအားတော်က ဖြစ်ပေါ်စေတဲ့ တတိယအရည်အသွေးက ငြိမ်သက်ခြင်းဖြစ်တယ်။ ဒါကြောင့် ကနေ့ သန့်ရှင်းသောစွမ်းအားတော် ရရှိထားတဲ့သူတွေဟာ ငြိမ်သက်ခြင်းရှိဖို့အတွက် တစ်ယူသန်သဘောထား၊ လူမျိုးကြီးဝါဒနဲ့ အကြမ်းဖက်မှုတွေကို တွန်းလှန်ရမှာဖြစ်တယ်။

သည့်အပြင် တမန်တော် ၁:၈ မှာ ဖော်ပြထားတဲ့ ယေရှုရဲ့ ကြိုပြောချက်ကိုလည်း သတိရပါ။ တပည့်တွေဟာ မိမိအကြောင်း “မြေကြီးစွန်းတိုင်အောင်” သက်သေခံနိုင်ဖို့အတွက် အစွမ်းတန်ခိုးရရှိကြမယ်လို့ ယေရှုကြိုပြောခဲ့တယ်။ အဲဒီအလုပ်ကို “ကပ်ကမ္ဘာကုန်သည်တိုင်အောင်” ဆက်လုပ်ဆောင်ရလိမ့်မယ်ဆိုပြီးတော့လည်း မိန့်မှာခဲ့တယ်။ (မဿဲ ၂၈:၂၀၊ ယုဒသန်ကျမ်း) ဒါကြောင့် ကမ္ဘာချီဟောပြောခြင်းလုပ်ငန်းက သန့်ရှင်းသောစွမ်းအားတော် အမှန်တကယ်ရရှိထားတဲ့သူတွေကို ခွဲခြားသိမြင်နိုင်စေတဲ့ အမှတ်အသားတစ်ခု ဆက်ဖြစ်နေပါလိမ့်မယ်။

သင် ဘယ်လိုထင်သလဲ။ ကနေ့ ဘယ်အုပ်စုမှာ သန့်ရှင်းသောစွမ်းအားတော်ရှိနေတယ်ဆိုတဲ့ အထောက်အထားကို သင်တွေ့နိုင်သလား။ . . .ကမ္ဘာတစ်ဝန်းမှာ စစ်မှုမထမ်းတဲ့အတွက် အာဏာပိုင်တွေရဲ့ နှိပ်စက်ညှဉ်းပန်းမှုကို ခံစားနေရတာတောင် သန့်ရှင်းသောစွမ်းအားတော်က ဖြစ်ပေါ်စေတဲ့ အရည်အသွေး၊ အထူးသဖြင့် ချစ်ခြင်းနဲ့ငြိမ်သက်ခြင်းကို ဘယ်သူတွေက အထင်အရှားဖော်ပြနေသလဲ။ (ဟေရှာယ ၂:၄) မတရားမေထုန်ပြုခြင်းစတဲ့ လူ့ဇာတိနဲ့ဆိုင်တဲ့ အကျင့်တွေကို ကြိုးစားရှောင်ကြဉ်တဲ့အပြင် အဲလိုအကျင့်တွေကို နောင်တမယူဘဲ ပြုကျင့်နေတဲ့သူတွေကို အသင်းတော်ကနေ နှင်ထုတ်တဲ့သူတွေက ဘယ်သူတွေလဲ။ (၁ ကောရိန္သု ၅:၁၁-၁၃) လူသားတွေအတွက် တစ်ခုတည်းသော မျှော်လင့်ချက်က ဘုရားသခင့်နိုင်ငံတော်ဖြစ်တယ်ဆိုတဲ့ သတင်းကောင်းကို ကမ္ဘာတစ်ဝန်း ဟောပြောနေတဲ့သူတွေက ဘယ်သူတွေလဲ။—မဿဲ ၂၄:၁၄။

သန့်ရှင်းသောစွမ်းအားတော် ရရှိထားတဲ့သူတွေအကြောင်း ကျမ်းစာဖော်ပြချက်နဲ့ကိုက်ညီတဲ့သူတွေက ယေဟောဝါသက်သေတွေပဲဆိုတာကို ဒီမဂ္ဂဇင်းထုတ်ဝေတဲ့သူတွေ ပြောဖို့ ဝန်မလေးပါဘူး။ သူတို့နဲ့ ပိုပြီးရင်းနှီးလာအောင်လုပ်ပြီး သူတို့မှာ ဘုရားသခင့်ထောက်မမှု တကယ်ရှိမရှိဆိုတာ သင်ကိုယ်တိုင် ဆန်းစစ်ကြည့်ပါလေ။

[အောက်ခြေမှတ်ချက်]