Speaking in Tongues​—Nanlapu Kasi ed Dios?

“S AY agko natatalosan,” kuan nen Devon, “et no akin ya dakel so singa makakaawat na masanton espiritu diad church mi tan makakapansalita iray nanduruman lenguahe, anta arum balet ed sikara et imoral. Siak balet a manpupursigin manbilay ya malinis tan impasya lay pampipikasik pian naikdan ak na espiritu, anggan aminsan et agak ni akaawat. Akin et onman?”

Si Gabriel et onaatendi met ed sakey a church a ditan et makakaawat kuno iray totoo na masanton espiritu tan makakapansalita iray nanduruman lenguahe. “Say pakakasyodotan ko,” so kuan to, “et leleg kon manpipikasi, nadisturbo ak ta walaray biglan mansalitay maksil, ya agnatalosan na anggan siopa. Kanian anggapoy gunggona met lanlamang na satan. No regalo itan na Dios, di wala komoy usar to?”

Lapud sarayan eksperiensya di Devon tan Gabriel, ompan nitepet mon, Kasin say speaking in tongues a gagawaen na arum a relihyon natan et talagan nanlapud Dios? Pian naebatan itan, makatulong no usisaen tayo imay abilidad ya pakapansalita na nanduruman lenguahe ya inter na Dios ed saray Kristiano nen inmunan siglo.

“Nansalita Ra na Nanduruman Lenguahe”

Nabasa tayo’d Biblia a walaray lalaki tan bibii ya inikdan na pakayarin mansalita na saray lenguahen agda met inaral. Ginmapo itan nen Pentecostes 33 C.E., pigaran simba kayari impatey nen Jesu-Kristo. Diad saman et walaray nantitipon ed Jerusalem ya manga 120 ya disipulo nen Jesus, et “napno ran amin na masanton espiritu tan nansalita ra na nanduruman lenguahe.” Saray dayon nanlapud nanduruman bansa et “nikelawan . . . lapud nadngel na kada sakey a say dilin lenguahe to so sasalitaen na saray disipulo.”​—Gawa 1:15; 2:1-6.

Ibabaga met na Biblia a wala ni arum ed saray inmuunan patumbok nen Jesus a naikdan na ontan ya abilidad. Alimbawa, lapud masanton espiritu et akapansalita si apostol Pablo na nanduruman lenguahe. (Gawa 19:6; 1 Corinto 12:10, 28; 14:18) Balet, no mangiter so Dios na masanton espiritu, seguradon walay gagala na satan. Anto sirin so usar na speaking in tongues nensaman?

Tanda na Suporta na Dios

Sanen sinulatan nen Pablo iray Kristiano diad syudad na Corinto, ya arum ed sikara et akapansalita na nanduruman lenguahe, imbaga ton “say pakapansalita na nanduruman lenguahe et sakey a tanda diad saray agmananisia,” odino ed saramay aliwan Kristiano. (1 Corinto 14:22) Kanian, panamegley na saray milagro, kaiba  lay pakapansalita na nanduruman lenguahe, anengneng na saray totoo a susuportaan na Dios so kakkaporma ni labat a Kristianon kongregasyon. Sarayan abilidad et aliling day karatulan mangituturo na direksion pian naamtaan na saray manaanap na katuaan no anton grupo so susuportaan na Dios.

Balet, tandaan tayon si Jesus tan saray propeta antis ya aporma so Kristianon kongregasyon et agnaikdan na ontan ya abilidad. No ontan sirin, samay abilidad a makapansalitay nanduruman lenguahe ya inter ed saray disipulo nen Jesus et wala ni arum ya usar to.

Paraan Pian Nikayat so Maong a Balita

Diad bandad gapo na ministeryo nen Jesus, ingganggan to ray disipulo to ya ipulong da so maong a balita na Panarian na Dios ed saray Judio labat. (Mateo 10:6; 15:24) Lapud satan, mataltalag ya nampulong iray disipulo diad saray lugar ya ngalngali anggapoy Judio. Balet onsabi panaon a manguman itan.

Sanen apaoli si Jesus nen 33 C.E., ingganggan to ray papatumbok to ya ‘ibangat da iray totoo ed amin a nasyones.’ Imbaga to met ed sikara ya mantasi ira nipaakar ed sikato “diad sankaarawian a pasen na dalin.” (Mateo 28:19; Gawa 1:8) Pian nagawaan da itan, kaukolan ya makapansalita ira na arum ya lenguahe, aliwan Hebreo labat.

Balet, dakel ed saray inmuunan disipulo et “abebay-aral [da] tan ordinaryo.” (Gawa 4:13) Panon sirin iran makapanpulong ed ararawin pasen a saray lenguahe diman et agda amtan salitaen o agda ni ingen anggan nadngel? Lapud masanton espiritu, arum ed saray makukulin disipulo et marundunong ya akapampulong ed nanduruman lenguahe ya agda met inaral.

Kanian, walay duaran usar na abilidad a pakapansalitay nanduruman lenguahe. Unona, ebidensya iya ya susuportaan na Dios iray Kristiano nen inmunan siglo. Komadua, paraan iya pian nasumpal da so kimey ya inter nen Jesus ed sikara, say pampulong ed totoo ed amin a nasyon. Kasin ontan met so nagagawaan na speaking in tongues na dakel ya relihyon natan?

Speaking in Tongues Natan​—Tanda na Suporta na Dios?

Iner so pangipaskilan moy karatula diad lugar yo pian dakel so makanengneng ed satan, diad ontan et napinabangan da? Diad loob kasi na melag a bilding? Siempre andi! Diad salaysay na Biblia nipaakar ed samay agew na Pentecostes, nabasa tayon atasian na “dakel a totoo” so impansalita na saray disipulo na nanduruman lenguahe, a tanda a susuportaan ira na Dios. Bilang resulta, “ngalngalin talon libo” so niarum ed Kristianon kongregasyon diad saman ya agew! (Gawa 2:5, 6, 41) No ibabaga na totoo natan ya sarag da kunoy man-speaking in tongues balet ta diad loob labat na church da, panon itan a natasian tan napinabangan na dakel?

Ibabagay Salita na Dios ya say pilalawanan (amin a klase na agmanepeg a seksual a relasyon) tan arum nin “gawa na laman” et kontra ed igana na masanton espiritu tan “saramay manggagawa ed saraya et agda natawir so panarian na Dios.” (Galacia 5:17-21) Agta mairap a panisiaan iramay mangibabagan inikdan ira na Dios na abilidad ya makapansalita na nanduruman lenguahe balet ta imoral so kabibilay da? Akin et ikdan iratan na Dios na masanton espiritu to anta say kagagawa ra et kontra ed mismon ibabaga na Salita to? Singa ira mangipapaskil na karatula ya makapalingo odino mangibalang ni ingen ed saramay manaanap na dugan direksion.

Speaking in Tongues Natan​—Paraan Pian Nikayat so Maong a Balita?

Pantongtongan tayo pa imay komaduan usar na pakapansalita na nanduruman lenguahe nen inmunan siglo. Kasin uusaren met na saray relihyon natan so speaking in tongues pian nipulong so maong a balita ed totoon nandurumay lenguahe ra? Nen Pentecostes 33 C.E., saramay totoon walad Jerusalem et nanlapud nanduruman bansa, balet ta talagan atalosan day mensahe na saray disipulo sanen nansalita ira na nanduruman lenguahe. Say speaking in tongues balet a gagawaen na saray totoo natan et agnatalosan na anggan siopa.

 Mapatpatnag sirin a say speaking in tongues a gagawaen na saray totoo natan et duman-duma ed samay abilidad ya inter ed saray inmuunan patumbok nen Jesus panamegley na masanton espiritu. Diad tua, anggapoy napanmatalkan a rekord a mamaneknek a wala ni akaawat na ontan ya abilidad kayari impatey na saray apostol. Amta itan na saray manbabasa na Biblia, ta diad 1 Corinto 13:8 et imbaga nen apostol Pablo a “mangangga” met lanlamang so abilidad a manggaway milagro, kaiba lay pakapansalitay nanduruman lenguahe. Panon tayo sirin a naamtaan no siopa ray iikdan na Dios na masanton espiritu natan?

Sioparay Talagan Walaan na Masanton Espiritu?

Amta nen Jesus ya sano naporma lay Kristianon kongregasyon, onsabi panaon et mangangga met lanlamang so abilidad a mansalitay nanduruman lenguahe. Antis na impatey nen Jesus, imbaga to no anto so permanentin tanda o pakabidbiran na saray tuan patumbok to. Imbaga ton: “Diad saya et naamtaan na amin a sikayo iray disipulok, no manaaroan kayo.” (Juan 13:35) Diad tua, diad samay mismon bersikulo a mangibabagan mangangga iray abilidad a manggaway milagro et onia ni nabasa tayo: “Say aro et agbalot mangangga.”​—1 Corinto 13:8.

Say aro so sankaunaan a nilista diad saramay siameran kabiangan na “bunga” na masanton espiritu na Dios. (Galacia 5:22, 23) Kanian saramay susuportaan na Dios​—a walad sikara so masanton espiritu to​—et talagan manaaroan ed sakey tan sakey. Ontan met, say komatlon kabiangan na bunga na espiritu et deen. Kanian saramay walad sikara so masanton espiritu et mareen a totoo, a gagawaen day anggaay nayarian da pian ag-ira naimpluensiaan na panaglabi, diskriminasyon, tan kaugsan ed mundo natan.

Pawilen tayo pa imay impropesiya nen Jesus a nabasa’d Gawa 1:8. Imbaga ton makaawat iray disipulo to na pakayari pian mantasi ira nipaakar ed sikato “diad sankaarawian a pasen na dalin.” Unong ed si Jesus, mantultuloy iyan kimey “angga ed kasampotan na mundo.” (Mateo 28:20, Say Biblia) Kanian, say panagpulong ed interon mundo et siansia nin pakabidbiran anggad natan no siopa so iikdan na Dios na masanton espiritu.

Anton grupo na totoo natan so naoobserbaan mo a talagan walad sikara so masanton espiritu? Sioparay mangipapanengneng ed bunga na espiritu, lalo la ed aro tan deen, anggano pairapen ira na gobierno lapud agda labay so miguerra? (Isaias 2:4) Sioparay talagan mansasagpot ya ompaliis ed saray gawa na laman, a singa say pilalawanan, ya ekalen da ni ingen ed kongregasyon da iramay ontan so kagagawa ra tan agmagbabawi? (1 Corinto 5:11-13) Sioparay mangipupulong diad interon mundo ed maong a balita a say Panarian na Dios labat so alenleneg ya ilalo na totoo?​—Mateo 24:14.

Saray publisher na sayan magasin et mataletalek ya mangibagan saray Tasi nen Jehova so mangipapanengneng ed amin ya ibabaga na Biblia a pakabidbiran na totoon walad sikara so masanton espiritu. Akin ta no amtaen mo so nipaakar ed sikara pian nanengneng mon mismo no talagan susuportaan ira na Dios?