“Ke Mang a Tsebilego Monagano wa Jehofa?”

“‘Ke mang a tsebilego monagano wa Jehofa, gore a mo rute?’ Eupša rena re na le monagano wa Kriste.”—1 BAKOR. 2:16.

1, 2. (a) Batho ba bantši ba thatafalelwa ke’ng? (b) Ke’ng seo re swanetšego go se gopola ka tsela ya rena ya go nagana le ya Jehofa?

NA O kile wa thatafalelwa ke go kwešiša tsela yeo motho yo mongwe a naganago ka yona? Mohlomongwe o sa tšwa go tsena lenyalong gomme o nagana gore o ka se tsoge o kwešišitše tsela yeo molekane wa gago a naganago ka yona. Ke therešo gore banna le basadi ba nagana le go bolela ka ditsela tše di sa swanego. Ke ka baka leo ditšong tše dingwe banna le basadi ba bolelago ka ditsela tše di sa swanego le ge ba bolela le leleme le tee. Go oketša moo, go se swane ga ditšo le maleme go ka feleletša ka gore batho ba nagane le go itshwara ka ditsela tše di sa swanego. Lega go le bjalo, ge o dutše o fetša nako e ntši le ba bangwe, ke gona o bago le dibaka tše dintši tša go kwešiša tsela ya bona ya go nagana.

² Lega go le bjalo, ga se ra swanela go makatšwa ke gore tsela ya rena ya go nagana e fapana kgole le ya Jehofa. Jehofa o dirišitše moporofeta wa gagwe Jesaya go botša Baisiraele gore: “Tša-ka dikêlêlô xa se ’kêlêlô tša lena; ’me tša lena ditsela xa se ditsela tša-ka!” Ke moka, ge a bapiša se, Jehofa o ile a tšwela pele ka gore: “Bo-ka maxodimo à le kwa xodimo kxolê le lefase, le ditsela tša-ka di xodimo kxolê le ditsela tša lena; le kêlêlô tša-ka di xodimo kxolê le tša lena.”—Jes. 55:8, 9.

3. Ke ditsela dife tše pedi tšeo ka tšona re ka katanelago go hwetša “tswalano ya kgaufsi le Jehofa”?

³ Lega go le bjalo, na se se bolela gore ga se ra swanela go leka go kwešiša tsela ya Jehofa ya go nagana? Aowa. Gaešita le ge re ka se kwešiše ka botlalo dikgopolo ka moka tša Jehofa, Beibele e sa dutše e re kgothaletša go hwetša “tswalano ya kgaufsi le Jehofa.” (Bala Psalme 25:14, NW; Diema 3:32.) Tsela e nngwe yeo re ka batamelago kgaufsi le Jehofa ke ka go tšeela godimo le go šetša mediro ya gagwe yeo e begilwego ka Lentšung la gagwe, Beibele. (Ps. 28:5) Tsela e nngwe gape ke ka go tseba “monagano wa Kriste,” yoo a lego “seswantšho sa Modimo yo a sa bonagalego.” (1 Bakor. 2:16; Bakol. 1:15) Ka go ipha nako ya go ithuta dipego tša Beibele le go naganišiša ka tšona, re ka thoma go kwešiša dika tša Jehofa le tsela ya gagwe ya go nagana.

Phafogela Mokgwa o Fošagetšego

4, 5. (a) Ke mokgwa ofe o fošagetšego woo re swanetšego go o phema? Hlalosa. (b) Baisiraele ba ile ba wela mokgweng ofe o fošagetšego wa go nagana?

⁴ Ge re dutše re naganišiša ka mediro ya Jehofa, re swanetše go phema mokgwa wa go ahlola Modimo go ya ka pono ya batho. Lentšu la Jehofa le re lemoša ka mokgwa wo go Psalme 50:21, le re: “Wa re, ke swana le wêna.” Go bjalo ka ge seithuti se sengwe sa Beibele se boletše nywaga e 175 e fetilego, ge se re: “Batho ba tlwaetše go ahlola Modimo ka ditekanyetšo tša bona, ba nagana gore le yena o beetšwe melao e swanago le ya rena.”

⁵ Re swanetše go ba šedi gore re se ke ra ipopela seswantšho-kgopolo ka Jehofa gomme ra se dumelelanya le ditekanyetšo le dikganyogo tša rena. Ke ka baka la’ng se se le bohlokwa? Ge e le gabotse, ge re dutše re ithuta Mangwalo, re ka bona tše dingwe tša ditiro tša Jehofa di sa swanela go ya ka pono ya rena e lekanyeditšwego, pono e sa phethagalago. Baisiraele ba  bagologolo ba ile ba ba le pono e bjalo gomme ba itirela phetho e fošagetšego ka tsela yeo Jehofa a bego a dirišana le bona. Ela hloko seo Jehofa a ilego a ba botša sona, o itše: “Lena Le re: Tsela ya Morêna xa e a’ loka! Kwang-xê lena ba moloko wa Isiraele. Ka kxonthe, Le re tsela ya-ka xa e a’ loka? A xa ke re ’tsela tše di sa lokaxo ké tša lena?”—Hesek. 18:25.

6. Ke’ng seo Jobo a ilego a ithuta sona, gona re ka holwa bjang ke phihlelo ya gagwe?

⁶ Selo seo se ka re thušago go phema molaba wo wa go ahlola Jehofa ka ditekanyetšo tša rena, ke go lemoga gore pono ya rena e lekanyeditšwe gomme ka dinako tše dingwe e fošagetše e le ruri. Jobo o ile a swanela ke go ithuta thuto ye. Nakong ya ge a tlaišega, Jobo o ile a nyama gomme a thoma go ikgopola kudu. O ile a lebala kgang ya bohlokwa. Eupša Jehofa ka lerato o ile a mo thuša go kaonefatša pono ya gagwe. Ka go botšiša Jobo dipotšišo tše di fetago tše 70, tšeo go sego le e tee yeo Jobo a bego a ka e araba, Jehofa o ile a bontšha gabotse gore kwešišo ya Jobo e lekanyeditšwe. Jobo o ile a ikokobetša, a fetoša pono ya gagwe.—Bala Jobo 42:1-6.

Go ba le “Monagano wa Kriste”

7. Ke ka baka la’ng go hlahloba mediro ya Jesu go re thuša go kwešiša tsela ya Jehofa ya go nagana?

⁷ Jesu o ile a ekiša Tatagwe ka mo go phethagetšego dilong ka moka tšeo a bego a di bolela le go di dira. (Joh. 14:9) Ka gona, go hlahloba mediro ya Jesu go re thuša go kwešiša tsela ya Jehofa ya go nagana. (Baroma 15:5; Bafil. 2:5) Ka gona, anke re hlahlobeng dipego tše pedi tša Ebangedi.

8, 9. Ka ge go begilwe go Johane 6:1-5, ke boemo bofe bjoo bo ilego bja dira gore Jesu a botšiše Filipi potšišo, gona ke ka baka la’ng Jesu a ile a dira bjalo?

⁸ Akanya ka tiragalo ye. E be e le nakwana pele ga Paseka ya 32 C.E. Baapostola ba Jesu ba sa tšwa go boa leetong le le kgahlišago la modiro wa boboledi go dikologa Galilea. Ka ge ba be ba lapišitšwe ke modiro wo, Jesu o ile a ba iša lefelong la ka thoko lebopong la ka leboa-bohlabela bja Lewatle la Galilea. Lega go le bjalo, batho ba dikete ba ile ba ba šala morago. Ka morago ga gore Jesu a fodiše batho ba bantši le go ba ruta dilo tše dintši, go ile gwa tsoga bothata. Batho ba ba bantši ba be ba tla hwetša kae dijo lefelong leo le lego lekatana? A bona gore go na le seo se swanetšego go dirwa, Jesu o ile a botšiša Filipi, yoo a bego a e-tšwa tikologong yeo, gore: “Re tla reka kae dinkgwa gore ba ba je?”—Joh. 6:1-5.

⁹ Ke ka baka la’ng Jesu a ile a botšiša Filipi potšišo ye? Na Jesu o be a sa tsebe seo a swanetšego go se dira? Aowa. Ke’ng seo ge e le gabotse a bego a se nagana? Moapostola Johane, yoo le yena a bego a le gona, o hlalosa ka gore: “[Jesu] o be a bolela se gore a mo leke, gobane yena ka noši o be a tseba seo a bego a tla tloga a se dira.” (Joh. 6:6) Jesu mo o be a nyaka go bona kgolo ya moya ya barutiwa ba gagwe. Ka go botšiša potšišo ye, o ile a tanya šedi ya bona gomme a ba nea sebaka sa gore ba bontšhe tumelo go seo a ka se dirago. Eupša ba ile ba lahlegelwa ke sebaka se gomme ba bontšha gore ruri pono ya bona e be e lekanyeditšwe. (Bala Johane 6:7-9.) Ke moka Jesu o ile a dira selo seo ba sa kago ba se nagana. Ka mohlolo o ile a fepa batho bao ba dikete bao ba bego ba swerwe ke tlala.—Joh. 6:10-13.

10-12. (a) Ke ka baka la’ng Jesu a se a thuša mosadi wa Mogerika di tloga fase? Hlalosa. (b) Ke’ng seo re tlago go se ahla-ahla?

¹⁰ Pego ye e ka re thuša go kwešiša tsela yeo Jesu a bego a nagana ka yona tiragalong e nngwe. Nakwana ka morago ga go fepa lešaba le, Jesu le baapostola ba gagwe ba ile ba leba leboa, ka mošola wa mellwane ya Isiraele, kgaufsi le Tiro le Sidone. Ge ba le moo, ba ile ba kopana le mosadi wa Mogerika yoo a ilego a kgopela Jesu gore a fodiše morwedi wa gagwe. Mathomong, Jesu o ile a hlokomologa mosadi yoo. Eupša ge a tšwela pele a mo kgopela, Jesu o itše go yena: “Lesa bana ba khore pele, gobane ga go a swanela go tšea senkgwa sa bana wa se lahlela dimpšanyana.”—Mar. 7:24-27.

 ¹¹ Ke ka baka la’ng mathomong Jesu a ile a gana go thuša mosadi yo? Na Jesu o be a mo leka, go etša ge a dirile Filipi, go bona kamoo a tlago go arabela ka gona, a mo nea sebaka sa go bontšha tumelo ya gagwe? Segalo sa lentšu la gagwe, gaešita le ge se ka se bonwe mangwalong, ga se sa ka sa nyamiša mosadi yo. Go diriša ga gagwe lentšu “dimpšanyana” go be go bebofatša papišo ye. Mohlomongwe tsela yeo Jesu a ilego a arabela ka yona e be e swana le ya motswadi yoo a nyakago go thuša ngwana wa gagwe eupša mathomong a dika-dikago go bontšha gore o nyaka go mo thuša e le go bona gore ruri ngwana yo o nyaka selo seo. Go sa šetšwe gore boemo e be e le bofe, gatee-tee ka morago ga gore mosadi a bontšhe tumelo, Jesu o ile a ikemišetša go mo thuša.—Bala Mareka 7:28-30.

¹² Dipego tše tše pedi tša Ebangedi di re nea tsebišo e kgahlišago ka “monagano wa Kriste.” Ga bjale anke re boneng gore dipego tše di ka re thuša bjang go kwešiša gakaone monagano wa Jehofa.

Ditirišano tša Jehofa le Moše

13. Go lemoga tsela ya Jesu ya go nagana go re thuša bjang?

¹³ Go lemoga tsela ya Jesu ya go nagana go re thuša go kwešiša ditemana tša Beibele tšeo go lego thata go di kwešiša. Ka mohlala, ela hloko seo Jehofa a se boditšego Moše ka morago ga gore Baisiraele ba dire namane ya gauta gore ba e rapele. Modimo o itše: “Sethšaba sé ke se bone; se-se, ké sethšaba sa melala e methata. Byalo ntesê, boxale bya-ka bo ba tukêlê, ke ba fetšê; xomme wêna ke Xo dirê sethšaba se sexolo.”—Ek. 32:9, 10.

14. Moše o ile a arabela bjang mantšung a Jehofa?

¹⁴ Pego ye e tšwela pele ka gore: “Mošê a phophotha, a bolêla le Morêna Modimo wa xaxwe a re: Morêna, xo tlo tšwa’ng xe boxale bya xaxo bò tukèla sethšaba sa xaxo se O se nthšitšexo naxeng ya Egipita ka matla a maxolo le ka seatla se sethata? Xo tlo tšwa’ng xe Ba-Egipita ba tlo bolêla ba re: O ba khudušeditše tše mpe, xore O ba bolayê dithabeng, xore O ba fedišê mo lefaseng. Boa boxaleng bya pefêlô ya xaxo, O šexamê, O se dirê bošula byoo byo O bo beetšexo sethšaba sa xaxo. O se lebalê Aborahama le Isaka le Isiraele, bahlanka ba xaxo ba O ba enetšexo ka leina la xaxo wa re: Bana ba lena ke tlo ba atiša byalo ka dinaledi tša lexodimong! wa re: Naxa yé ka moka ye ke e boletšexo, ke tlo e fa bana ba lena, xore e bê ya bôná neng le neng. Xomme Morêna a šexama, a lesa xo dira bošula byo a bexo a re: ó tlo bo dirêla sethšaba sa xaxwe.”—Ek. 32:11-14. *

15, 16. (a) Moše o ile a bulegelwa ke sebaka sefe ka baka la seo Jehofa a se boletšego? (b) Ke ka kgopolo efe Jehofa a ilego “a šexama”?

¹⁵ Na ruri Moše o be a swanetše go phošolla  Jehofa? Le gatee! Gaešita le ge Jehofa a ile a bolela seo a bego a ikemišeditše go se dira, ye e be e se kahlolo ya gagwe ya mafelelo. Ge e le gabotse, mo Jehofa o be a leka Moše, go etša ge pejana Jesu a ile a leka Filipi le mosadi wa Mogerika. Moše o be a neilwe sebaka sa go ntšha sa mafahleng. * Jehofa o be a beile Moše gore a boelanye Yena le Baisiraele, e bile Jehofa o be a hlompha gore O neile Moše kabelo yeo. Na Moše o be a tla dumelela kgakanego e kgoma ditiro tša gagwe? Na o be a tla diriša sebaka se go kgothaletša Jehofa gore a lebale ka Baisiraele gomme a dire ditlogolo tša Moše setšhaba se segolo?

¹⁶ Tsela yeo Moše a ilego a arabela ka yona e bontšhitše gore o na le tumelo e bile o bota toka ya Jehofa. Tsela yeo a ilego a arabela ka yona ga se ya bontšha boithati, eupša e bontšhitše gore o tshwenyega ka leina la Jehofa. O be a sa nyake gore le gobošwe. Ka go rialo, Moše o ile a bontšha gore o kwešiša “monagano wa Jehofa” tabeng ye. (1 Bakor. 2:16) Mafelelo e bile afe? Ka ge Jehofa a be a se a napa a dira phetho ya gore o tla dira eng, pego e buduletšwego e re o ile “a šexama.” Ka Seheberu, polelwana ye e ka bolela gore Jehofa ga se a tliša masetlapelo ao a boletšego gore o ikemišeditše go a tlišetša setšhaba ka moka.

Ditirišano tša Jehofa le Aborahama

17. Jehofa o ile a bontšha bjang go se fele pelo mo gogolo ge a be a dirišana le Aborahama yo a tshwenyegilego?

¹⁷ Mohlala o mongwe wo o bontšhago gore Jehofa o nea bahlanka ba gagwe sebaka sa go bontšha tumelo le potego ya bona o hwetša kgopelong ya Aborahama ya mabapi le Sodoma. Pegong yeo, Jehofa o ile a bontšha go se fele pelo mo gogolo ka go dumelela gore Aborahama a kgopele dilo tše seswai. Ge ba sa boledišana, Aborahama o ile a dira kgopelo e tšwago pelong a re: “Xo dira byalo a di bê kxolê le wêna; xa O bolaye wa hlakanya moloki le yo mobe, moloki a dirwa se se dirwaxo yo mobe. Tšeo di kxolê le wêna. Naa Moahlodi wa lefase ka moka a ka se dirê se se swanetšexo naa!”—Gen. 18:22-33.

18. Re ithuta’ng ditirišanong tša Jehofa le Aborahama?

¹⁸ Pego ye e re ruta’ng ka tsela ya Jehofa ya go nagana? Na Jehofa o be a tloga a hloka gore Aborahama a mo nee mabaka gore a tle a dire phetho e botse? Aowa. Ke therešo gore Jehofa a ka ba a ile a fo bolela le go tloga mathomong lebaka la phetho ya gagwe. Eupša ka baka la dipotšišo tše, Jehofa o neile Aborahama sebaka sa gore a dumelelane le phetho ye gomme a kwešiše tsela ya Gagwe ya go nagana. Seo gape se neile Aborahama sebaka sa go kwešiša kwelobohloko e kgolo ya Jehofa le toka. Ee, Jehofa o ile a dirišana le Aborahama bjalo ka mogwera.—Jes. 41:8; Jak. 2:23.

Seo re Ithutago Sona

19. Re ka ekiša Jobo bjang?

¹⁹ Re ithutile’ng ka “monagano wa Jehofa”? Re swanetše go dumelela Lentšu la Modimo le re nea kwešišo e botse ka monagano wa Jehofa. Ga se ra swanela go beela Jehofa ditekanyetšo gomme ra mo ahlola go ya ka ditekanyetšo le menagano ya rena. Jobo o itše: “[Modimo]  xa se motho mo-ka-nna ra fetolana, yo nkaxo išana le yêna thsekong.” (Jobo 9:32) Go swana le Jobo, ge re thoma go kwešiša monagano wa Jehofa, re gapeletšega gore re re: “Ši-dio, ké yôna merumô ya ’tsela tša xaxwe, ’me tše rena re di kwaxo ke tša xo sêba-sêbya fêla. Modumô wa matla a xaxwe, wôna ké mang a kaxo o kwa?”—Jobo 26:14.

20. Re swanetše go dira’ng ge re kopana le Lengwalo leo go lego thata go le kwešiša?

²⁰ Ge re dutše re bala Mangwalo, re swanetše go dira’ng ge re kopana le temana yeo go lego thata go e kwešiša, kudu-kudu yeo e bolelago ka tsela ya Jehofa ya go nagana? Ge e ba ka morago ga go nyakišiša ka taba ye re sa dutše re sa e kwešiše, re ka lebelela se e le seo se lekago potego ya rena go Jehofa. Gopola gore ka dinako tše dingwe ditaba tše dingwe di re nea sebaka sa go bontšha tumelo go dika tša Jehofa. Anke ka boikokobetšo re dumele gore ga re kwešiše dilo ka moka tšeo a di dirago. (Mmo. 11:5) Re tla tutueletšega go dumelelana le mantšu a moapostola Paulo a rego: “A bodiba bja mahumo a Modimo le bohlale le tsebo! Dikahlolo tša gagwe ke tšeo di sa nyakišišegego gomme ditsela tša gagwe ke tše di sa latišegego gakaakang! Gobane ‘ke mang yo a tsebilego monagano wa Jehofa goba yo a bilego moeletši wa gagwe?’ Goba ‘Ke mang yo a mo neilego pele, mo a swanetšego go bušetšwa?’ Gobane dilo tšohle di tšwa go yena gomme di gona ka yena le bakeng sa gagwe. A go išwe letago go yena ka mo go sa felego. Amene.”—Baroma 11:33-36.

[Mengwalo ya tlase]

Na o a Gopola?

• Ke’ng seo se tlago go re thuša go phema mokgwa wa go ahlola Jehofa ka ditekanyetšo tša rena?

• Go kwešiša ditiro tša Jesu go re thuša bjang go hwetša “tswalano ya kgaufsi le Jehofa”?

• O ithutile’ng poledišanong ya Jehofa le Moše le Aborahama?

[Dipotšišo tša Thuto]

[Diswantšho go letlakala 5]

Re ithuta’ng ka tsela ya Jehofa ya go nagana tseleng yeo a ilego a dirišana le Moše le Aborahama?