Padayon sa Pagpangita Pag-una sa “Iyang Pagkamatarong”
Padayon sa Pagpangita Pag-una sa “Iyang Pagkamatarong”
“Magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.”—MAT. 6:33.
1, 2. Unsa ang pagkamatarong sa Diyos, ug sa unsa kini gipasukad?
“NAN, magpadayon sa pagpangita pag-una sa gingharian.” (Mat. 6:33) Ang mga Saksi ni Jehova nahibalo nianang tambaga nga gihatag ni Jesu-Kristo sa iyang Wali sa Bukid. Sa tanang bahin sa atong kinabuhi, kita naningkamot sa pagpakita sa atong gugma ug pagkamaunongon sa maong Gingharian. Apan kinahanglan usab natong hinumdoman ang ikaduhang bahin sa maong ekspresyon—“ug sa iyang pagkamatarong.” Unsa ang pagkamatarong sa Diyos, ug unsay kahulogan sa pagpangita niana pag-una?
2 Ang orihinal nga pulong alang sa “pagkamatarong” mahimong hubaron usab nga “hustisya” o “pagkatul-id.” Busa, ang pagkamatarong sa Diyos maoy pagkatul-id sumala sa iyang mga sukdanan ug prinsipyo. Ingong Maglalalang, si Jehova adunay katungod sa paghatag ug sukdanan kon unsay maayo ug daotan, kon unsay husto ug sayop. (Pin. 4:11) Apan, ang pagkamatarong sa Diyos wala ipasukad sa dili-makitawhanon ug higpit nga mga balaod o sa daghan kaayong lagda ug tulumanon. Hinunoa, gipasukad kini sa personalidad ni Jehova ug sa iyang pangunang hiyas nga hustisya, nga inubanan sa laing pa niyang pangunang mga hiyas nga gugma, kaalam, ug gahom. Nan, ang pagkamatarong sa Diyos nalangkit sa iyang kabubut-on ug katuyoan. Naglakip kini sa iyang gidahom niadtong nagtinguha sa pag-alagad kaniya.
3. (a) Unsay kahulogan sa pagpangita pag-una sa pagkamatarong sa Diyos? (b) Nganong nagsunod kita sa matarong nga mga sukdanan ni Jehova?
3 Unsay kahulogan sa pagpangita pag-una sa pagkamatarong sa Diyos? Sa yanong pagkasulti, kini nagpasabot sa pagbuhat sa kabubut-on sa Diyos aron pahimut-an siya. Ang pagpangita sa iyang pagkamatarong naglakip sa pagpaningkamot sa pagkinabuhi uyon sa iyang mga prinsipyo ug hingpit nga mga sukdanan, dili sa atoa. (Basaha ang Roma 12:2.) Nalangkit niini ang ato mismong relasyon kang Jehova. Dili kini pagsunod sa iyang mga balaod tungod sa kahadlok nga silotan. Hinunoa, ang atong gugma sa Diyos nagtukmod kanato sa pagpaningkamot nga pahimut-an siya pinaagi sa pagsunod sa iyang mga sukdanan, dili sa paghimog atong kaugalingong mga sukdanan. Atong giila nga kini maoy angayng buhaton ug nga kita gilalang sa paghimo niana. Sama kang Jesu-Kristo, ang Hari sa Gingharian sa Diyos, angay natong higugmaon ang pagkamatarong.—Heb. 1:8, 9.
4. Nganong hinungdanon ang pagpangita sa pagkamatarong sa Diyos?
4 Unsa ka hinungdanon ang pagpangita sa pagkamatarong ni Jehova? Tagda kini: Ang pagsulay didto sa tanaman sa Eden magpakita kon si Adan ug Eva moila ba o dili sa katungod ni Jehova nga mohatag ug mga sukdanan. (Gen. 2:17; 3:5) Sanglit napakyas man sila sa pagsunod kang Jehova, kita nga ilang mga kaliwat nakaagom sa pag-antos ug kamatayon. (Roma 5:12) Sa laing bahin, ang Pulong sa Diyos nag-ingon: “Siya nga nagatinguha sa pagkamatarong ug sa mahigugmaong-kalulot makakaplag ug kinabuhi, pagkamatarong ug himaya.” (Prov. 21:21) Oo, kon atong unahon pagpangita ang pagkamatarong sa Diyos, atong mabatonan ang maayong relasyon kang Jehova nga motultol sa atong kaluwasan.—Roma 3:23, 24.
Kapeligrohan sa Pagpakamatarong-sa-Kaugalingon
5. Unsang kapeligrohan ang angay natong likayan?
5 Sa sulat ni apostol Pablo sa mga Kristohanon sa Roma, iyang gipasiugda ang kapeligrohan nga angay natong likayan aron molampos kita sa pagpangita pag-una sa pagkamatarong sa Diyos. Si Pablo miingon bahin sa iyang mga isigka-Hudiyo: “Ako nagpamatuod mahitungod kanila nga sila may kasibot sa Diyos; apan dili sumala sa tukmang kahibalo; kay, tungod sa pagkawala-mahibalo sa pagkamatarong sa Diyos apan nagtinguha sa pagtukod sa ilang kaugalingong pagkamatarong, wala nila ipasakop ang ilang kaugalingon sa pagkamatarong sa Diyos.” (Roma 10:2, 3) Sumala kang Pablo, ang maong mga magsisimba wala makasabot sa pagkamatarong sa Diyos tungod kay puliki kaayo sila sa pagtukod sa ilang kaugalingong pagkamatarong. a
6. Unsang tinamdan ang angay natong likayan, ug ngano?
6 Mahimo kitang malit-agan niini kon atong isipon ang atong pag-alagad sa Diyos ingong kompetisyon, nga magtandi sa atong kaugalingon sa uban. Kon ingon niini ang atong tinamdan, mahimong mosalig kita pag-ayo sa atong mga katakos. Apan, ang maong tinamdan magpakita nga atong gikalimtan ang pagkamatarong ni Jehova. (Gal. 6:3, 4) Ang atong gugma kang Jehova mao ang hustong motibo sa pagbuhat ug matarong. Kon mosulay kita sa pagpakamatarong sa atong kaugalingon, mahimong walay pulos ang atong pangangkon nga kita nahigugma kaniya.—Basaha ang Lucas 16:15.
7. Giunsa pagtul-id ni Jesus ang problema sa pagpakamatarong-sa-kaugalingon?
7 Si Jesus wala mahimuot niadtong “nagsalig sa ilang kaugalingon nga sila mga matarong ug nag-isip sa uban ingon nga walay pulos.” Iyang gitul-id ang maong problema pinaagi sa pag-asoy niini nga ilustrasyon: “Duha ka tawo miadto sa templo aron sa pag-ampo, ang usa Pariseo ug ang lain usa ka maniningil ug buhis. Ang Pariseo mitindog ug nag-ampo niining mga butanga sa iyang kaugalingon, ‘Oh Diyos, nagapasalamat ako kanimo nga dili ako sama sa ubang mga tawo, mga mangingilkil, mga dili-matarong, mga mananapaw, o gani sama niining maniningil ug buhis. Nagpuasa ako makaduha sa usa ka semana, nagahatag akog ikapulo sa tanang butang nga akong nabatonan.’ Apan ang maniningil ug buhis nga nagtindog sa halayo dili gani buot moyahat sa iyang mga mata sa langit, apan nagpamukpok sa iyang dughan, nga nag-ingon, ‘Oh Diyos, magmapuangoron ka kanako nga usa ka makasasala.’” Si Jesus mihinapos pinaagi sa pag-ingon: “Sultihan ko kamo, Kining tawhana mipauli sa iyang puloy-anan nga napamatud-ang mas matarong kay niadtong tawhana; tungod kay ang matag usa nga magabayaw sa iyang kaugalingon igapaubos, apan siya nga magapaubos sa iyang kaugalingon igabayaw.”—Luc. 18:9-14.
Laing Kapeligrohan—“Pagpalabi sa Pagkamatarong”
8, 9. Unsay buot ipasabot sa “pagpalabi sa pagkamatarong,” ug magtukmod kini kanato sa pagbuhat sa unsa?
8 Ang laing kapeligrohan nga angay natong likayan gihubit sa Ecclesiastes 7:16: “Ayaw pagpalabi sa pagkamatarong, ni magpakita nga ikaw hilabihan ka maalamon. Nganong laglagon mo ang imong kaugalingon?” Sa bersikulo 20, ang magsusulat naghatag ug rason kon nganong likayan nato ang maong tinamdan: “Kay walay tawong matarong sa yuta nga nagpadayon sa pagbuhat sa maayo ug dili makasala.” Ang usa nga ‘nagpalabi sa pagpakamatarong’ nagtakdag kaugalingong mga sukdanan sa pagkamatarong ug naghukom sa uban pinaagi niana. Apan, wala siya mahibalo nga sa pagbuhat niana, gituboy niya ang iyang kaugalingong mga sukdanan inay ang iya sa Diyos ug sa ingon nahimo siyang dili matarong sa panan-aw sa Diyos.
9 Ang “pagpalabi sa pagkamatarong,” o “sobrang pagpakamatarong” sumala sa pipila ka hubad sa Bibliya, mahimo pa ganing magtukmod kanato sa pagkuwestiyon sa paagi sa pagdumala ni Jehova sa mga butang. Apan, angay natong hinumdoman nga kon atong kuwestiyonon ang pagkamakiangayon o pagkamatarong sa mga desisyon ni Jehova, sama ra nga atong gituboy ang atong sukdanan sa pagkamatarong imbes ang iya ni Jehova. Morag atong gihusay si Jehova diha sa korte ug gihukman siya sumala sa atong mga sukdanan sa kon unsay husto ug sayop. Apan si Jehova ang dunay katungod sa pagtakdag sukdanan alang sa pagkamatarong, dili kita!—Roma 14:10.
10. Sama sa kahimtang ni Job, unsay mahimong magtukmod kanato nga hukman ang Diyos?
10 Bisan tuod walay usa kanato ang nagtinguha nga hukman ang Diyos, ang atong pagkadili-hingpit magtukmod kanato sa pagbuhat niana. Dali ra kining mahitabo kon duna kitay makita nga daw dili-makataronganon o kon kita mismo ang nakaagom ug kalisdanan. Bisan ang matinumanong si Job nakahimo sa maong sayop. Sa sinugdan, si Job gihubit ingong “walay-ikasaway ug matul-id, ug mahadlokon sa Diyos ug naglikay sa daotan.” (Job 1:1) Apan si Job nakaagom ug sunodsunod nga kalisdanan nga para kaniya, dili-makataronganon. Kini nagtukmod kang Job sa pagpahayag sa “iyang kalag nga matarong inay sa Diyos.” (Job 32:1, 2) Kinahanglang tul-iron ni Job ang iyang panglantaw. Busa, dili kita angayng matingala kon usahay mobati kitag sama sa gibati ni Job. Kon mahitabo kana, unsay makatabang kanato sa pag-usab sa atong panghunahuna?
Dili sa Tanang Panahon nga Nahibalo Kita sa Tanang Impormasyon
11, 12. (a) Kon duna kitay makita nga daw dili-makiangayon, unsay angay natong hinumdoman? (b) Nganong lagmit bation sa usa nga ang ilustrasyon bahin sa mga mamumuo nagpakitag pagkadili-makiangayon?
11 Una, angay natong hinumdoman nga dili sa tanang panahon nga nahibalo kita sa tanang impormasyon. Tinuod kana sa kahimtang ni Job. Wala siya mahibalo nga sa dihang nagtigom ang mga manulonda sa Diyos didto sa langit, bakak siyang giakusahan ni Satanas. (Job 1:7-12; 2:1-6) Wala mahibalo si Job nga si Satanas ang hinungdan sa iyang kalisdanan. Basin ganig wala mahibalo si Job kon kinsa gayod si Satanas! Busa nagtuo siya nga ang Diyos maoy nagpahinabo sa iyang kalisdanan. Oo, dali ra kitang makahimog sayop nga konklusyon kon wala kita mahibalo sa tanang impormasyon.
12 Pananglitan, tagda ang ilustrasyon ni Jesus bahin sa mga mamumuo sa parasan. (Basaha ang Mateo 20:8-16.) Dinhi gihubit ni Jesus ang usa ka agalon nga nagsuhol ug samang kantidad sa tanan niyang mamumuo, mitrabaho man silag tibuok adlaw o usa ra ka oras. Unsay imong hunahuna niini? Makiangayon ba kini? Tingali maluoy ka sa mga mamumuo nga nagtrabaho sa tibuok adlaw nga init kaayo. Lagmit bation nimo nga angay silang suholan ug labaw pa. Kon mao, ang agalon mahimong isipon nga dili-mahigugmaon ug dili-makiangayon. Bisan ang iyang tubag sa mga mamumuo nga nagreklamo mahimong magpakitag pag-abuso sa awtoridad. Apan nahibalo ba kita sa tanang impormasyon?
13. Sa unsa pang punto-de-bista nga mahimo natong lantawon ang ilustrasyon ni Jesus bahin sa mga mamumuo sa parasan?
13 Atong analisahon kining ilustrasyona sa laing punto-de-bista. Sa walay duhaduha, ang agalon nahibalo nga kinahanglang pakan-on niining mga tawhana ang ilang pamilya. Sa panahon ni Jesus, ang mga trabahador sa uma suholag inadlaw. Ang ilang pamilya nagsalig sa suhol nga madawat matag adlaw. Karon, hunahunaa ang situwasyon niadtong ulahi nang napalgan sa agalon ug nakatrabaho na lag usa ka oras. Tingali, dili igong ikapakaon sa ilang pamilya ang suhol sa usa lang ka oras nga trabaho; apan andam silang motrabaho, ug tibuok adlaw na silang nagpaabot aron makatrabaho. (Mat. 20:1-7) Dili nila sala nga wala sila makatrabahog tibuok adlaw. Walay gipakita nga naglikay sila sa pagtrabaho. Handurawa nga ikaw naghulat ug tibuok adlaw, nga nahibalo nga ang imong pamilya nagsalig sa imong kitaon nianang adlawa. Malipay ka gayod nga gitagaan kag trabaho—ug dili ka makatuo nga makadawat kag suhol nga igong ikapakaon sa imong pamilya!
14. Unsang hinungdanong leksiyon ang atong makat-onan sa ilustrasyon bahin sa mga mamumuo?
14 Karon, atong timbangtimbangon pag-usab ang gibuhat sa agalon. Dili kulang ang gisuhol niya sa mga mamumuo. Hinunoa, gihatagan niyag kahigayonan ang tanan nga makasuportar sa ilang kaugalingon ug sa ilang pamilya. Kay daghan man ang nangitag trabaho, mahimong pahimuslan sa agalon ang higayon ug gamay ray isuhol nila. Apan wala niya kana buhata. Ang tanan namauli nga may igong salapi nga ikasuportar sa ilang pamilya. Ang pagkonsiderar niining dugang mga detalye mahimong mag-usab sa atong panglantaw sa gihimo sa agalon. Ang iyang desisyon maoy mahigugmaon ug dili pag-abuso sa awtoridad. Unsay leksiyon niini? Atong makat-onan nga kon pipila lang ka impormasyon ang atong konsiderahon, lagmit makahimo kitag sayop nga konklusyon. Sa pagkatinuod, ang maong sambingay nagpasiugda sa pagkalabaw sa pagkamatarong sa Diyos, nga wala lamang ibase sa legalidad ug sa pagkatakos sa usa nga modawat niana.
Ang Atong Panglantaw Mahimong Masayop o Limitado
15. Nganong ang atong panglantaw sa pagkamakiangayon mahimong masayop o limitado?
15 Ikaduha, sa dihang mag-atubang kitag situwasyon nga daw dili-makiangayon, angay natong hinumdoman nga ang atong panglantaw mahimong masayop o limitado. Mahimo kining masayop tungod sa pagkadili-hingpit, pagpihigpihig, o kalainan sa kultura. Kini limitado usab tungod kay wala kitay katakos sa pag-ila sa mga motibo ug sa pagkahibalo kon unsa gayoy anaa sa kasingkasing sa mga tawo. Sa kasukwahi, si Jehova ug Jesus wala niana nga mga limitasyon.—Prov. 24:12; Mat. 9:4; Luc. 5:22.
16, 17. Nganong wala ipugos ni Jehova ang iyang balaod bahin sa pagpanapaw sa dihang nakasala si David ug Batseba?
16 Atong analisahon ang asoy bahin sa pagpanapaw ni David uban kang Batseba. (2 Sam. 11:2-5) Sumala sa Moisesnong Balaod, silang duha angayng patyon. (Lev. 20:10; Deut. 22:22) Bisan tuod gisilotan sila ni Jehova, wala niya ipugos pagpatuman ang iyang balaod. Nagpakita ba si Jehova ug pagkadili-makiangayon? Iya bang gipaboran si David ug gilapas ang Iyang matarong nga mga sukdanan? Ang pipila mibati niana.
17 Apan, ang balaod bahin sa pagpanapaw gihatag ni Jehova sa dili-hingpit nga mga maghuhukom, kinsa dili makabasa sa kasingkasing. Bisan pa sa ilang mga limitasyon, makahimo silag managsamang paghukom tungod sa maong balaod. Sa laing bahin, si Jehova makabasa sa kasingkasing. (Gen. 18:25; 1 Cron. 29:17) Busa dili nato dahomon nga malimitahan si Jehova sa balaod nga iyang gihatag sa dili-hingpit nga mga maghuhukom. Kon maohon, sama ra nga atong gipugos ang usa nga walay diperensiya sa mata sa pagsul-ob ug antiyohos nga gidisenyo alang sa depektosog mata. Nabasa ni Jehova ang kasingkasing ni David ug Batseba ug nakita ang ilang tim-os nga paghinulsol. Tungod niini, gihukman niya sila sa maluluy-on ug mahigugmaong paagi.
Padayong Pangitaa ang Pagkamatarong ni Jehova
18, 19. Unsay motabang kanato aron dili gayod mahukman si Jehova sumala sa atong mga sukdanan sa pagkamatarong?
18 Busa kon dunay panahon nga atong bation nga dili-makiangayon si Jehova maylabot sa usa ka butang—ato man kining nabasa sa Bibliya o nasinati mismo—dili gayod nato hukman ang Diyos sumala sa atong mga sukdanan sa pagkamatarong. Hinumdomi nga dili sa tanang panahon nga nahibalo kita sa tanang impormasyon ug nga ang atong panglantaw mahimong masayop o limitado. Ayaw kalimti nga “ang kapungot sa tawo dili mosangpot ug pagkamatarong nga iya sa Diyos.” (Sant. 1:19, 20) Niining paagiha, ang atong kasingkasing dili gayod “maaligutgot batok kang Jehova.”—Prov. 19:3.
19 Sama kang Jesus, kanunay natong ilhon nga si Jehova lamang ang may katungod nga motakdag sukdanan kon unsay matarong ug maayo. (Mar. 10:17, 18) Maningkamot sa pagbaton ug “tukmang kahibalo” o “tinuod nga kahibalo” sa iyang mga sukdanan. (Roma 10:2; 2 Tim. 3:7, The Twentieth Century New Testament) Kon ato kanang dawaton ug ipahiuyon ang atong kinabuhi sa kabubut-on ni Jehova, atong gipakita nga atong gipangita pag-una ang “iyang pagkamatarong.”—Mat. 6:33.
[Footnote]
a Sumala sa usa ka eskolar, ang orihinal nga pulong nga gihubad ug “pagtukod” mahimong magpasabot usab ug ‘pagpatindog ug usa ka monumento.’ Busa, ang maong mga Hudiyo sama rag nagpatindog ug simbolikong monumento alang sa ilang kadayeganan, dili sa Diyos.
Nahinumdom Ka Ba?
• Nganong hinungdanon nga pangitaon ang pagkamatarong ni Jehova?
• Unsa ang duha ka kapeligrohan nga angay natong likayan?
• Sa unsang paagi kita makapangita pag-una sa pagkamatarong sa Diyos?
[Mga Pangutana sa Pagtuon]
[Hulagway sa panid 9]
Unsang leksiyon ang atong makat-onan sa ilustrasyon ni Jesus bahin sa duha ka tawo nga nag-ampo sa templo?
[Hulagway sa panid 10]
Makiangayon ba ang pagsuhol ug samang kantidad niadtong nagtrabahog usa ka oras ug niadtong nagtrabahog tibuok adlaw?