Wha Kake Gwọlọ ‘Ẹrẹreokie Riẹ’
Wha Kake Gwọlọ ‘Ẹrẹreokie Riẹ’
“Wha kake guọlọ uvie riẹ gbe [ẹrẹreokie] riẹ, eware enana kpobi a reti fi ai họ kẹ owhai.”—MAT. 6:33.
1, 2. Eme họ ẹrẹreokie Ọghẹnẹ, kọ eme o rọwo kugbe?
“WHA kake guọlọ uvie riẹ.” (Mat. 6:33) Isẹri Jihova nẹnẹ a riẹ ohrẹ nana ziezi onọ Jesu Kristi ọ jọ ovuẹ obọ ugbehru kẹ na. Evaọ kabọ kabọ uzuazọ mai, ma rẹ daoma dhesẹ inọ esuo Uvie na ọ were omai gbe nnọ ma gwọlọ roma kpotọ kẹe. Rekọ ma rẹ jẹ kareghẹhọ abọ avivẹ ọrọ ohrẹ yena, koyehọ, ‘gbe ẹrẹreokie riẹ.’ Eme họ ẹrẹreokie Ọghẹnẹ, kọ eme u dhesẹ re ma kake gwọlọ iẹe?
2 A rẹ sae jẹ fa ẹme Griki nọ a jọ etenẹ fa “ẹrẹreokie” na “uvi-ẹdhoguo” hayo “ekiete.” Fikiere, ẹrẹreokie Ọghẹnẹ yọ oware nọ u kiete evaọ eriwo riẹ. Fikinọ Jihova họ Ọmemama, o wo udu nọ o re ro fi uzi oware nọ u woma gbe onọ u yoma họ. (Evia. 4:11) Rekọ ẹrẹreokie Ọghẹnẹ orọnikọ izi buobu jọ gheghe nọ a ro zere omai hi. Ukpoye, ẹrẹreokie Jihova o rọwo kugbe uvi-ẹdhoguo riẹ, uyoyou riẹ, areghẹ, gbe ogaga riẹ. Ẹrẹreokie Ọghẹnẹ o wo obọ kugbe oreva gbe ẹjiroro riẹ. U kugbe oware nọ o rẹro riẹ mi enọ e gwọlọ gọe.
3. (a) Eme u dhesẹ re a kake gwọlọ ẹrẹreokie Ọghẹnẹ? (b) Fikieme ma re ro koko izi ikiẹrẹe Jihova?
3 Eme u dhesẹ re a kake gwọlọ ẹrẹreokie Ọghẹnẹ? Re a ru Ọghẹnẹ eva were ẹkwoma ekoko izi riẹ. Re ma gwọlọ ẹrẹreokie riẹ o kẹre te izi ikiẹrẹe riẹ nọ ma re koko, orọnikọ erọ obọ mai hi. (Se Ahwo Rom 12:2.) Uzuazọ utionana u w’obọ kpahe usu mai kugbe Jihova. Orọnikọ thakpinọ ma koko izi riẹ hẹ fikinọ ọ te kẹ omai uye nọ ma gbe ru ere he. Ukpoye, fikinọ ma you Ọghẹnẹ, oma o be wọ omai koko izi riẹ orọnikọ erọ obọ mai hi. Ma riẹ inọ onana họ oware nọ u fo eruo, gbe nnọ fiki onana Ọghẹnẹ ọ rọ ma omai. Ma re you ẹrẹreokie, wọhọ epanọ Jesu Kristi, Ovie Uvie Ọghẹnẹ, o ru.—Hib. 1:8, 9.
4. Fikieme u ro wuzou re ma gwọlọ ẹrẹreokie Ọghẹnẹ?
4 Ẹvẹ u wuzou te re ma gwọlọ ẹrẹreokie Jihova? Roro onana: Odawọ ọsosuọ nọ Adamu avọ Ivi a rẹriẹ ovao ku evaọ ọgbọ Idẹn họ sọ a te rọwo re Jihova o fi izi họ kẹ ae. (Emu. 2:17; 3:5) Fikinọ a rọwo ho, o wha okpẹtu gbe uwhu se omai emọ rai no. (Rom 5:12) Evaọ abọdekọ riẹ, Ebaibol e ta nọ: ‘Ohwo nọ o bi kielele ẹrẹreokie avọ uwowou o reti wo uzuazọ gbe adhẹẹ.’ (Itẹ 21:21) Ẹhẹ, ẹrẹreokie Ọghẹnẹ nọ ma rẹ kake gwọlọ o rẹ lẹliẹ omai wo emamọ usu kugbe Jihova, onana o vẹ wha esiwo se omai.—Rom 3:23, 24.
Re Who Kiẹrẹe Evaọ Aro Obọra Yọ Ẹta
5. Ẹta vẹ ma rẹ whaha?
5 Okenọ Pọl ukọ na o je kere ileta se Ileleikristi nọ e jọ obọ Rom, ọ fodẹ ẹta jọ nọ ma rẹ whaha re ma sae kake gwọlọ ẹrẹreokie Ọghẹnẹ. Pọl ọ ta kpahe ibe ahwo Ju riẹ nọ: ‘Mẹ rọ isẹri ese nọ a gine wo ajọwha Ọghẹnẹ, rekọ u ri vẹ te he. Keme, epanọ a rọ igbori ẹrẹreokie nọ o no obọ Ọghẹnẹ ze, a tẹ jẹ be gwọlọ epanọ a rẹ rọ rehọ orọ obọ rai muẹ, a gbẹ be rọ omakpotọ kẹ ẹrẹreokie Ọghẹnẹ hẹ.’ (Rom 10:2, 3) Wọhọ epanọ Pọl o kere, ahwo Ju yena a wo otoriẹ ẹrẹreokie Ọghẹnẹ hẹ keme a jẹ daoma rehọ ẹrẹreokie obọ rai mu. *
6. Uruemu vẹ ma rẹ whaha, kọ fikieme?
6 Oware jọ nọ o rẹ sai ru omai kie ruọ ẹta nana họ ma te bi wo ẹzi oma-hrowo evaọ ukoko na, rọ oma mai wawo amọfa. Onana u re ru omai rri oma mai inọ ma wo areghẹ, onaa, gbe emamọ uruemu vi amọfa. Ma te wo eriwo otiọye na, kiyọ ma be kareghẹhọ ẹrẹreokie Ọghẹnẹ hẹ. (Gal. 6:3, 4) Oware nọ u fo nọ o rẹ wọ omai ru ewoma họ uyoyou nọ ma wo kẹ Jihova. Nọ ma te bi dhesẹ nọ ma kiẹrẹe evaọ aro obọ mai yọ ma wo uyoyou kẹ Ọghẹnẹ hẹ.—Se Luk 16:15.
7. Ẹvẹ Jesu o dhesẹ ẹbẹbẹ ahwo nọ a re rri omobọ rai kiẹrẹe?
7 Jesu ọ ta kpahe enọ “e rẹroso oma-obọrai nọ ae akiẹrẹe, a ve ri edekọ kakao.” O dhesẹ ẹbẹbẹ ahwo nọ a re rri omobọ rai kiẹrẹe nọ ọ kẹ ọtadhesẹ inọ: “Imava i kpo obọ uwou egagọ-ode re a lẹ; ọ jọ ohwo otu Farisi, ọdekọ omiazọhọ. Ohwo otu Farisi na o te dikihẹ, ọ tẹ lẹ enẹ kẹ oma riẹ, nọ, ‘Ọghẹnẹ, me yere owhẹ epanọ mẹ wọhọ ahwo ọdekọ họ, ifruriọ, e nọ ikiẹrẹe he, ibruẹnwae, hayo tubọ wọhọ omiazọhọ ọnana. Mẹ rẹ siọ emuọriọ ba isiava ẹkpoka ọvo, mẹ be jẹ ẹkẹ eware nọ me bi wo kpobi’. Rekọ omiazọhọ na, o dikihẹ ugbo thabọ, ọ sai bi ru re ọ kpare aro riẹ kpo ehru hu, rekọ ọ tẹ tehe igbama riẹ, anọ ‘Ọghẹnẹ, ohrọ mẹ ọ rahaizi na, o re ohwẹ.’” Jesu o ku ọtadhesẹ na họ inọ: “Mẹ ta kẹ owhai nọ, ohwo ọnana ọnya kpo obọ uwou riẹ, o kiẹrẹe vi ohwo ọdekọ; keme kohwo kohwo nọ o re ti ruẹ oma ororo a re ti hrẹ i kpo otọ, rekọ ohwo nọ ọ rọ oma kpo otọ a re ti ru ei rua.”—Luk 18:9-14.
Re “Who Kiẹrẹe Hrọ” Yọ Ẹta Ọfa
8, 9. Eme u dhesẹ re ohwo o “kiẹrẹe hrọ,” kọ eme onana o rẹ sai su omai kpohọ?
8 Ọtausiuwoma Na 7:16 o dhesẹ ẹta ọfa nọ ma rẹ whaha, inọ: ‘Who kiẹrẹe hrọ họ, who ru oma ra wo areghẹ hrọ gbe he; eme jabọ who je kpe oma ra?’ Ọnọ o kere oria Ebaibol nana ọ jọ owọ avọ 20 vuẹ omai oware nọ u ro fo nọ ma whaha uruemu utioye, inọ: “Uzẹme ohwo okiẹrẹe ọvo nọ ọ rọ evaọ akpọ na nọ o re ru uwoma nọ ọ te raha uzi hi ọ rọ họ.” Ohwo nọ o “kiẹrẹe hrọ” o re fi itee omobọ riẹ họ kpahe oware nọ u kiẹrẹe, ọ vẹ rọ amọfa nọ i ru te itee riẹ na ha gu ẹdhọ. Rekọ ọ riẹ hẹ inọ ọ be rọ ere kpare itee riẹ kpehru vi erọ Ọghẹnẹ, jẹ be rọ ere dhesẹ nọ o kiẹrẹe he evaọ aro Ọghẹnẹ.
9 Nọ ma te “kiẹrẹe hrọ,” o rẹ sai tube ru omai roro inọ eware jọ nọ Jihova o ru i fo ho. Rekọ o gwọlọ nọ ma rẹ kareghẹhọ inọ ma te wo oghẹrẹ iroro itieye na yọ ma be kpare itee ẹrẹreokie mai kpehru vi erọ Jihova. O wọhọ ẹsenọ ma be rehọ itee obọ mai gu Jihova ẹdhọ kpahe oware nọ u fo nọ ọ hai ru gbe onọ ọ hai ru hu. Rekọ Jihova họ ọnọ o wo udu nọ o re ro fi itee họ kpahe oware nọ u woma gbe onọ u yoma, orọnikọ mai hi.—Rom 14:10.
10. Eme ọ rẹ sai ru omai gu Ọghẹnẹ ẹdhọ, wọhọ epanọ o via kẹ Job na?
10 Dede nọ ma rẹ sai keke aro fihọ gu Ọghẹnẹ ẹdhọ họ, oma o rẹ sae wọ omai ru ere fiki sebaẹgba mai. Onana o rẹ sae via lọlọhọ nọ ma tẹ ruẹ ohwo owoma nọ eware iyoma e be via kẹ hayo nọ ma tẹ be ruẹ uye. Makọ Job ọzae ẹrọwọ na o wo eriwo ọthọthọ nana. Evaọ oke ọsosuọ, a dhesẹ Job nọ “ọ kare [afuẹwẹ], ọ tẹ jẹ rọ uvi ohwo, ohwo nọ ọ jẹ dhozọ Ọghẹnẹ, o te je si oma no oware uyoma.” (Job 1:1) Rekọ iye buobu i te Job, yọ evaọ eriwo riẹ ọ be ruẹ uye gheghe. Onana o wha riẹ ze nọ Job o ro rri “omariẹ kiẹrẹe vi Ọghẹnẹ.” (Job 32:1, 2) U fo re Job ọ kpọ eriwo riẹ vi. Fikiere u re gbe omai unu hu nọ ma te wo ọkpọ eriwo Job na ẹsejọ. O tẹ via ere, eme ọ rẹ sai fi obọ họ kẹ omai kpọ eriwo mai vi?
Ẹsejọ Ma re Wo Otoriẹ Eware Jọ nọ E Via Ha
11, 12. (a) Ma te roro inọ oware jọ nọ o via u kiehọ họ, eme u fo inọ ma rẹ kareghẹhọ? (b) Fikieme ohwo ọ sai ro roro inọ ọzae nọ o wo udhu na o kienyẹ enọ i ru iruo okpẹdoke soso na?
11 Oware ọsosuọ nọ ma rẹ kareghẹhọ họ ẹsejọ ma re wo otoriẹ eware jọ nọ e via ha. Nwanọ ere o via kẹ Job. Ọ riẹ kpahe okenọ ijẹle Ọghẹnẹ a ro kokohọ evaọ obọ odhiwu hu, oria nọ Setan ọ jọ ta eme iyoma kpahe iẹe. (Job 1:7-12; 2:1-6) Job ọ riẹ hẹ inọ Setan họ ọnọ ọ be wha uye riẹ ze. Ma sae ta ha sọ Job ọ ginẹ riẹ ohwo nọ Setan ọ rrọ. Fikiere o te roro thọthọ inọ Ọghẹnẹ họ ọnọ ọ be wha uye riẹ ze. Ẹhẹ, ma rẹ sai roro thọthọ nọ ma gbe wo otoriẹ eware jọ nọ e via ha.
12 Wọhọ oriruo, roro kpahe ọtadhesẹ Jesu ọrọ iruiruo nọ e jọ ọgbọ evaene na. (Se Matiu 20:8-16.) Jesu ọ ta inọ ọnọ o wo udhu na ọ hwa unuigho ovona kẹ enọ i ru iruo okpẹdoke soso gbe enọ i ru iruo auwa ọvo. Ẹvẹ who rri onana? Kọ ọnọ o wo udhu na ọ riẹ ru? Ẹsejọhọ o d’owhẹ kẹ enọ i ru iruo okpẹdoke soso na evaọ otọ uvo ogaga na. O hai gine fo re ugho rai u bu vi orọ enọ i ru iruo auwa ọvo na. A sai rri ọnọ o wo udhu na inọ ọ rrọ eva gaga. Ma rẹ sae rehọ ẹme nọ ọ tubẹ kpahe kẹ iruiruo nọ i gu unoma kẹe na wọhọ nnọ o bi kienyẹ ae. Kọ ma ginẹ riẹ oware nọ ọ lẹliẹ ọnọ o wo udhu na ru ere?
13. Oghẹrẹ ofa vẹ ma rẹ sai je riwi ọtadhesẹ Jesu na?
13 Joma rri ọtadhesẹ nana no ofẹ ọfa ze. Ababọ avro, ọnọ o wo udhu na ọ riẹ inọ ezae nana kpobi a gwọlọ ugho nọ a rẹ rọ rẹrote iviuwou rai. Evaọ oke Jesu, osa okpẹdẹ a jẹ hae hwa iruiruo. Iviuwou rai a rẹroso ugho yena. Whaọ, dai roro kpahe enọ a zizie iruo evaọ ubrobọ owọwọ na, nọ i ru iruo auwa ọvuọvo na. Ẹsejọhọ ugho auwa ọvo u ti te ai ko uviuwou rai hi; ghele na, u no rai eva ze inọ a re ru iruo, fikiere anwọ ohiohiẹ a be hẹrẹ re ohwo jọ ọ rehọ ae iruo. (Mat. 20:1-7) Ae a soriẹ ze he nọ a gbẹ rọ rehọ ae iruo okpẹdoke na soso ho. Orọnikọ a jẹ dhozọ iruo ho. Dae rehọ iẹe nọ whẹ họ ohwo nọ ọ hẹrẹ okpẹdoke na kpobi na, yọ whọ riẹ inọ ahwo a b’akọ h’otọ be hẹrẹ ugho nọ whọ te wha kpozi. Dai roro epanọ eva e te were owhẹ te otẹrọnọ ohwo jọ ọ rehọ owhẹ iruo, ọ tẹ hwa owhẹ osa okpẹdoke ososo nọ whọ sae rọ ko uviuwou ra!
14. Eme ma wuhrẹ no ọtadhesẹ ọgbọ evaene na ze?
14 Joma je roro kpahe oware nọ ọnọ o wo udhu na o ru na. O si ugho no osa uvumọ ohwo ho. Ukpoye, ọ hwosa kẹ iruiruo na kpobi keme ọ riẹ inọ a wo iviuwou nọ a be ko. Ọnọ o wo udhu na ọ hai roro inọ fikinọ iruiruo e rrọ buobu, unuigho nọ u je rie ọ rẹ hwa kẹ ae, rekọ o ru ere he. Iruiruo na kpobi a wha ugho nọ a rẹ rọ ko iviuwou rai t’uwou. Who te roro eware nana kpobi who re tube jiri ọnọ o wo udhu na. Oware nọ o ru na u dhesẹ uyoyou orọnikọ okienyẹ hẹ. Eme ma rẹ sai wuhrẹ no onana ze? Inọ ma gbe rri oware nọ o via kokodo ho, ma rẹ sai wo eriwo ọthọthọ. Ọtadhesẹ nana o dhesẹ epanọ ẹrẹreokie Ọghẹnẹ o kpehru te, inọ orọnikọ oghẹrẹ nọ ahwo-akpọ a re roro ere Ọghẹnẹ ọ rrọ họ.
Eware Jọ E rẹ Sai Kpomahọ Eriwo Mai
15. Eware vẹ e rẹ sai kpomahọ eriwo mai?
15 Oware avivẹ nọ ma rẹ kareghẹhọ nọ ma te roro inọ a bi kienyẹ ahwo jọ je rri ahwo jọ aro họ eware jọ e rẹ sai kpomahọ eriwo mai. Eware enana jọ họ sebaẹgba, okienyẹ, hayo oria nọ a jọ yọrọ omai. Oware ofa nọ o rẹ sai kpomahọ eriwo mai họ ma wo ẹgba nọ ma rẹ rọ riẹ oware nọ o rrọ ohwo udu hu. Wo ohẹriẹ, eware nana kpobi i re kpomahọ Jihova avọ Jesu hu.—Itẹ 24:12; Mat. 9:4; Luk 5:22.
16, 17. Fikieme Jihova o gbe ro bruoziẹ uwhu kpe Devidi avọ Batshẹba ha?
16 Joma ta kpahe ẹnwae-obro Devidi avọ Batshẹba. (2 Sam. 11:2-5) Wọhọ epanọ uzi nọ Jihova ọ rọ kẹ Mosis o ta, aimava na a fo uwhu. (Izerẹ 20:10; Izie. 22:22) Dede nọ Jihova ọ kẹ rai uye, o kpe rai hi. Kọ Jihova ọ riẹ ru nọ o ro vu ai wa? Kọ Jihova o dhesẹ ọriẹwẹ nọ o ro vu Devidi wa jẹ la uzi nọ ọyọvo o fihọ vrẹ? Ere ahwo jọ a roro.
17 Kareghẹhọ inọ Jihova ọ rehọ uzi ẹnwae-obro na rọ kẹ iguẹdhọ evaọ oke Izrẹl, enọ e rẹ sae riẹ oware nọ o rrọ ohwo udu hu. Dede nọ a gba ha, uzi nana u je fi obọ họ kẹ ae guẹdhọ nọ ọ kare ọriẹwẹ. Evaọ abọdekọ riẹ, Jihova ọ rẹ sae riẹ oware nọ o rrọ ohwo udu. (Emu. 18:25; 1 Irv. 29:17) Fikiere epanọ iguẹdhọ na a rẹ rehọ izi nọ Jihova o fihọ na ro gu amọfa ẹdhọ, ma re rẹro inọ ere Jihova o re ru hu. Jihova o te ru ere, kọ o gbẹ wọhọ ẹsenọ a be gba ohwo nọ ọ be ruẹ ude ziezi họ re ọ wha ẹno nọ a ru kẹ ohwo nọ o wo ẹbẹbẹ ibiaro? Jihova ọ kiẹ Devidi avọ Batshẹba riwi, ọ tẹ ruẹ inọ a kurẹriẹ no eva ze. Fiki onana, Jihova ọ tẹ rehọ ohrọ gbe uyoyou gu ai ẹdhọ.
Gbẹ Hae Gwọlọ Ẹrẹreokie Jihova
18, 19. Eme o re fi obọ họ kẹ omai nọ ma gbẹ rọ rehọ itee obọ mai gu Jihova ẹdhọ họ?
18 Fikiere ma tẹ jọ Ebaibol se ku oware jọ nọ ma roro nọ Jihova ọ riẹ ru hu, hayo ma te roro inọ ọ kuvẹ re oware uyoma jọ o via kẹ omai, ma rẹ rehọ itee obọ mai gu Ọghẹnẹ ẹdhọ vievie he. Kareghẹhọ inọ ẹsejọ ma re wo otoriẹ eware jọ nọ e via ha, yọ eware jọ e rẹ sai kpomahọ eriwo mai. Jọ o thọrọ omai ẹro ho inọ ohwo ọ rẹ sae rọ ẹkwoma ofu nyate ẹrẹreokie Ọghẹnẹ hẹ. (Jem. 1:19, 20) Ma tẹ kareghẹhọ onana, u re ru nọ ma gbe “muofu kpahe ỌNOWO na” ha.—Itẹ 19:3.
19 Wọhọ Jesu, joma rọwo ẹsikpobi inọ Jihova ọvo o wo udu nọ o re ro fi utee oware nọ u kiẹrẹe je woma họ. (Mak 10:17, 18) Daoma wo ‘eriariẹ uzẹme’ kpahe itee riẹ. (2 Tim. 3:7) Ma tẹ rọwo itee nana je bi yeri uzuazọ nọ o rọwo kugbe oreva Jihova, yọ ma bi dhesẹ inọ ma be ‘kake gwọlọ ẹrẹreokie riẹ.’—Mat. 6:33.
[Oruvẹ-obotọ]
^ edhe-ẹme 5 Wọhọ epanọ ọgba-eriariẹ jọ ọ ta, ẹme Griki nọ a fa ‘ro muẹ’ na a rẹ sae jẹ fae ‘re a rehọ oware vi.’ Fikiere, o wọhọ ẹsenọ ahwo yena a be rehọ ujiro obọ rai vi, orọnikọ orọ Ọghẹnẹ hẹ.
Kọ Whọ Kareghẹhọ?
• Fikieme u ro wuzou re a gwọlọ ẹrẹreokie Jihova?
• Eta ivẹ vẹ u fo inọ ma rẹ whaha?
• Ẹvẹ ma rẹ rọ kake gwọlọ ẹrẹreokie Ọghẹnẹ?
[Enọ Uwuhrẹ]
[Uwoho nọ o rrọ ẹwẹ-obe avọ 9]
Eme ma rẹ sae jọ ọtadhesẹ Jesu ọrọ ezae ivẹ nọ e jẹ lẹ evaọ etẹmpol na wuhrẹ?
[Uwoho nọ o rrọ ẹwẹ-obe avọ 10]
Kọ o thọ inọ a hwa unuigho ovona kẹ enọ i ru iruo auwa ọvo gbe enọ i ru iruo okpẹdoke soso na?