Twalekenuhu Kusambila Kukeña ‘Kuloña Kwindi’

“Ilaña sambilenu kukeña wanta windi nikuloña kwindi, niyuma yejimiyi akayishilaku.”—MAT. 6:33.

1, 2. Indi kuloña kwaNzambi hichumanyi nawa kwashindamena hayumanyi?

 “ILAÑA sambilenu kukeña wanta.” (Mat. 6:33) Awa mazu ahosheli Yesu Kristu muMpanji yindi yaHampindi ayiluka chikupu kudi aYinsahu jaYehova makonu. Muchihandilu chetu chejima, twafwilaña kumwekesha netu twakeña nfulumendi yaniwu Wanta nikwikala ashinshika. Ilaña twatela kwiluka cheñi mazu adi muchibalu chamuchiyedi akwila nawu, “nikuloña kwindi.” Indi kuloña kwaNzambi hichumanyi, nawa kusambila kukeña kuloña kwatalisha mudihi?

² Mwidimi datachi mazu azatishawu akutena nawu “kuloña,” anateli kuyibalumuna cheñi nawu “wuñanji” hela “kwoloka.” Dichi, kuloña kwaNzambi diku kwoloka kwesekeja nanshimbi niyidika yindi. Hakwikala Nleñi, Yehova wukweti ñovu yakwimika nshimbi yakwambula yayiwahi nayatama, yaloña niyaheña. (Chim. 4:11) Hela chochu, kuloña kwaNzambi bayi neyi hinshimbi yakala hela nshimbi jasweja kuvula niyidikaku. Ilaña, jashindamena hayililu yaYehova nawa chililu chindi chabadika chawuñanji, hamu nayililu yindi yikwawu yabadika yakukeña, maana  niñovu. Komana kuloña kwaNzambi kwendelaña hamu nakukeña nikufuukula kwindi. Kuloña kwindi kwekala hayuma yakeñañayi kudi antu afwilaña kumukalakela.

3. (a) Indi kusambila kukeña kuloña kwaNzambi kwatalisha mudihi? (b) Muloñadi chitwovwahilaña nshimbi jaYehova jaloña?

³ Kusambila kukeña kuloña kwaNzambi kwatalisha mudihi? Kwatalisha mukwila kukeña kwaNzambi kulonda tumuzañalesheña. Kukeña kuloña kwindi kwabombelamu kufwilaña kulondela yidika yindi ninshimbi jindi jaloña muchihandilu chetu bayi nshimbi jetuku. (Tañenu Aroma 12:2.) Chihandilu chamuchidiwu chakeñekaña kwikala nawubwambu wakola naYehova. Hitwatela kwovwahila nshimbi jindi hamuloña wakuchina kutubabeshaku. Ilaña, kumukeña Nzambi dikwatuleñelaña kufwila kumuzañalesha kuhitila mukwovwahila nshimbi jindi, bayi jetuku. Tweluka netu, ichi dichuma chaloña chitwatela kwila, chatuleñeleluwu nawu twileña. Kufwana Yesu Kristu, Mwanta waWanta waNzambi, twatela kukeña kuloña.—Heb. 1:8, 9.

4. Muloñadi chichalemena nankashi kukeña kuloña kwaNzambi?

⁴ Indi kukeña kuloña kwaYehova kwalema ñahi? Talenu hanichi chikuma: Kweseka kwatachi kwamwitempa daEdeni kwashindameneni hadi Adama naEvu neyi atela kwiteja nawu Yehova wukweti ñovu yakwimika nshimbi jatela kulondelawu hela nehi. (Kutach. 2:17; 3:5) Chakañenyuwu kwila mwenimu, aleta ihuñu nikufwa hadi etu anyanawu. (Rom. 5:12) Ilaña, Izu daNzambi dahosha nawu: ‘Muntu walondaña kuloña naluwi wawanaña wumi, f nikuloña nikulema.’ (Yish. 21:21) Eñañi, kusambila kukeña kuloña kwaNzambi kwatuleñela kwikala nawubwambu wawuwahi naYehova nawa kwatulombolaña kukupuluka.—Rom. 3:23, 24.

Wubanji Wekala Mukudimona Kuloña

5. Wubanjinyi wutwatela kutondolwela?

⁵ Hakuyisonekela akwaKristu muRoma, kapostolu Pawulu walumbulwili wubanji wutwatela kutondolwela wejima wetu hakwila nawu tutweshi kusambila kukeña kuloña kwaNzambi. Hakuhosha hadi akwawu aYudeya, Pawulu wahosheli nindi: ‘Ami nichinsahu chawu nami asweja iyena hansañu yaNzambi, ilaña abulaña kushinshikamu. Muloña wena chayambaña kuloña kwaNzambi, hiyakukeña nawu akoleshi kuloña kwawu aweni, kwovwahila kuloña kwaNzambi nehi.’ (Rom. 10:2, 3) Kwesekeja namazu ahosheliyi Pawulu, awa akwakudifukula hiyelukili kuloña kwaNzambuku muloña ashili maana hakumwekesha kuloña kwawu aweni. *

6. Yililu yamuchidinyi yitwatela kutondolwela, nawa muloñadi?

⁶ Tunateli kuluwañesha neyi tutachika kumona mudimu wutwamukalakelaña Nzambi netu wakudibecha, nikudesekeja nawakwetu. Yililu yamuchidiwu yikutuleñela tuswejeña kutoñojokaña hamaana nihayililu yetu yayiwahi. Ilaña, neyi twila mwenimu, tukukañanya kwiluka kuloña kwaYehova. (Ŋal. 6:3, 4) Kumukeña Yehova dikwatela kutuleñela kwila mwaloña. Neyi tufwilaña kudimona netu twaloña hitunateli kumwekesha mutwahoshaña netu twamukeñaku.—Tañenu Luka 16:15.

7. Indi Yesu walumbulwili ñahi hakukala kwakudimona kuloña?

⁷ Yesu washili muchima hadi antu “adikuhwelelaña awenawu nawu twaloña, hiyakudiwula akwawu ejima.” Wahosheli hakukala kwakudimona kuloña kuhitila mukushimuna ichi chishimu nindi: “Antu ayedi akandukili mutembeli akalombi, iwu kaFwarisi, iwu nsonkeshi. KaFwarisi hakwimana nakudilombela mumuchima windi nindi, Eyi Nzambi, nakusakilili chinabuli kwikala neyi antu acheñi, akwanyilami, aheña, ayivumbi, hela tuhu neyi iwu nsonkeshi iwu. Najiñaña nanzala yakuleka kudya hamulungu kayedi, hamulungu kayedi; nalambulaña yamwikumi yayuma yinahetaña  yejima. Ilaña nsonkeshi hakwimana kwakulehi, kumona jakufumbulamesu indi atala kwiwulu nehi; ilaña hakudetola hantulu yindi nindi, Eyi Nzambi, antiyili luwi, ami mukwanshidi.” Hakukunkulula Yesu wahosha nindi: “Nukuyileja nami, yeniwu muntu diyi wakunkumukili kwitala dindi nakuyiña, bayi iwu mukwawuku; muloña muntu wukuditohesha akamukehesha, ilaña muntu wukudikehesha akamutohesha.”—Luka 18:9-14.

Wubanji Wukwawu Wekala ‘Mukuswejesha Nankashi Kuloña’

8, 9. Indi kwikala “waswejesha nankashi kuloña,” kwatalisha mudihi, nawa kwatela kutuleñela kwiladi?

⁸ Wubanji wukwawu wutwatela kutondolwela awulumbulula haMukwakutaŋisha 7:16 nawu: ‘Bayi wuswejesha nankashi kuloñaku. bayi nawa wuswejesha nankashi kwikala namaanaku; wudikisañani tuhu kweyi?’ Nsoneki waBayibolu wonenenuwu watwalekeluhu, neyi chitunamoni muvasi 20, natuleji chitwatelela kutondolwela yililu yamuchidiwu nindi: “Muloña hamaseki hihekala muntu waloña welaña chachiwahi, wabulaña kuvulumunaku.” Muntu “waswejesha nankashi kuloña” walondelaña nshimbi jamonañayi kuloña nawa wasompeshaña akwawu nanshimbi jindi. Kubombelahu, wakañanyaña kwiluka nindi kuhitila mukwila mwenimu, nakulemesha nshimbi jindi kubadika nshimbi jaNzambi nawa nakudimwekesha kumesu aNzambi nindi haloñaku.

⁹ Kwikala “waswejesha nankashi kuloña,” kunateli kutuleñela kutachika kujinooka njila yazatilañamu Yehova yuma. Twatela kwanuka netu, neyi tutachika kujinooka kuloña kwayuma yafuukulañayi Yehova, dikwila nawu, tunakumona kuloña kwetu neyi kwabadika kwaYehova. Chidi neyi tunakumweseka Yehova nikumusompesha nanshimbi jetu hayuma yaloña nayaheña. Ilaña Yehova diyi wukweti ñovu yakwimika nshimbi jakulondela hayuma yaloña, bayi etuku!—Rom. 14:10.

10. Neyi chamwekeni kudi Yoba, chumanyi chinateli kutuleñela kumusompesha Nzambi?

¹⁰ Hela chakwila kwosi wukukeña kumusompesha Nzambi mumushikila, kubula kuwanina kunateli kutuleñela kumusompesha. Chinateli kuzatika neyi tumona chuma chabula kushikilamu hela neyi tuholokela mukukala. Yoba muntu washinshika niyena waluwañesheli. Hatachi Yoba amuteneni nawu “walala woloka, muntu waakamini Nzambi, waambukili kuyuma yatama.” (Yoba 1:1) Ilaña Yoba waholokeleli mukukala kwashiyashana, kwamweniyi nindi Nzambi wamwilili katama. Chamuleñeleli kudiyiñisha “yomweni abuli kuyiñisha Nzambi.” (Yoba 32:1, 2) Yoba amukwashili hayitoñojoka yaheña yadiñayi nayu. Ninetu nawa bayi tuhayamaku, neyi mpinji yikwawu tutachika kudimona neyi chadimweniyi Yoba. Neyi chumichi chitumwekena, chumanyi chinateli kutukwasha kuhimpa yitoñojoka yetu?

Kakavulu Hitwelukaña Wunsahu Wejimaku

11, 12. (a) Neyi tumona netu anatwili katama, chumanyi chitwatela kwanuka? (b) Muloñadi muntu chinateli kutoñojokayi nindi chakutalilahu chaYesu chawakwakukalakala mwitempa danyivinyu chamwekeshaña chuma chaheña?

¹¹ Chuma chatachi, twatela kwanuka netu hitwelukaña wunsahu wejimaku. Ichi dichuma chamumwekeneni Yoba. Yoba helukili nindi  añelu anyana kaNzambi apompeli mwiwulu mwamutwikiluwu muloña kudi Satanaku. (Yoba 1:7-12; 2:1-6) Yoba helukili nindi Satana diyi wamuleteleli kukalaku. Hitunateli kwiluka neyi Yoba wamwilukili chikupu Satanaku! Dichi watoñojokeli mwaluwa nindi Nzambi diyi wamuleteleli kukala. Eñañi, chaswayi kukunkulula mwaluwa neyi hituneluki wunsahu wejimaku.

¹² Chakutalilahu, shinshikenu chakutalilahu chaYesu chawakwakukalakala mwitempa danyivinyu. (Tañenu Matewu 20:8-16.) Yesu walumbulwili mwiniitala wenkeli akwakukalakala indi nfwetu yoyimu, hela chakwila azatili ifuku dejima hela ora yimu. Indi enu munatoñojoki ñahi haniyi nsañu? Komana dimu? Indi kwiji mukunyakala kuhakwilaku akwakukalakala ajikumwini ifuku dejima munkanza. Munateli kutoñojoka nenu diwu ateleleli kutambula nfwetu yeneni! Neyi mukunkulula mwenimu, munateli kumumona iwu mwiniitala nenu hakweti kukeñaku nawa watama muchima. Chayakwiliyi akwakukalakala adineñeli, tunateli kutoñojoka netu waluwañesheli. Hanu dinu tuneluki wunsahu wejima?

13. Yikumanyi yikwawu yitwatela kwiluka kutalisha hachishimu chaYesu chawakwakukalakala mwitempa danyivinyu?

¹³ Tushinshikenu hanichi chishimu munjila yikwawu. Chakadi kujina, mwiniitala wamunichi chishimu welukili nindi awa akwakukalakala ejima akeñeleña kudyisha yisaka yawu. Mumpinji yaYesu, akwakukalakala mumatempa ayifweteleña hefuku hefuku. Yisaka yawu yahandilileña hawufwetu watambwileñawu hefuku hefuku. Chituneluki ichi chikuma, toñojokenu hachihandilu chawantu awaniniyi mwiniitala chelili mpinji yinamani dehi nawa azatili hohu hadi ora yimu. Hadaha hiyadi kutwesha kudyisha yisaka yawu munfwetu yazatililuwu hadi ora yimuku; ilaña akeñeleña kuzata nawa ifuku dejima adiña nakutalila nawu ayiñiji mudimu. (Mat. 20:1-7) Bayi neyi adikeñeleli aweni nawu abuli kuzata ifuku damukumaku. Kwosi wunsahu wunakumwekesha nawu mumushikila hiyakeñeleña kuzataku. Fwikijenu neyi mushakama ifuku damukuma nakutalila, iku muneluki nenu amakwawu anakinki manuñu hanfwetu yimukutambula hanodu ifuku. Mukuzañalala chikupu neyi muwana mudimu, nawa mukutiya kuwaha nankashi neyi ayinka nfwetu yikuyikwasha kudyisha chisaka chenu!

14. Chumanyi chalema chitwadizilaña kuchishimu chetempa danyivinyu?

¹⁴ Ichi dinu tushinshikenu hayuma yelili mwiniitala. Kwosi wenkeliyi nfwetu yanyanya. Ilaña, akwakukalakala ejima wayinkeli chochimu muloña wayimweni nindi akeñeleña mali akudikwasha nachu. Chineli wadiña nawakwakukalakala amavulu, mwiniitala wadi kuyidyila hamutu kuhitila mukuyinka nfwetu yantesha. Ilaña helili mwenimuku. Akwakukalakala indi ejima afuntileña kumatala nanfwetu yashikila yakudyisha yisaka yawu. Kwiluka iwu wunsahu wukwawu kukutuleñela kuhameka mweliliyi. Chuma cheliliyi chamwekesheli kukeña bayi neyi haluwañesheluku. Chumanyi chitukudizilaku? Kushinshika hohu hawunsahu  wantesha kunateli kutuleñela kushikena dakukunkulula mwaheña. Mwalala, ichi chishimu chamwekeshaña nawu kuloña kwaNzambi kwabadika, hikwashindamena hakulondela nshimbi niyuma yinayiteleli antuku.

Yitoñojoka Yetu Yinateli Kwikala Yaheña Hela Yakuminamu

15. Muloñadi yitoñojoka yetu yakwila mwaloña chiyinateli kwikala yaheña hela kukuminamu?

¹⁵ Chikuma chamuchiyedi chitwatela kwanukaña neyi tuholokela mukukala chidi chakwila nawu yitoñojoka yetu yinateli kwikala yaheña hela yakuminamu. Yinateli kwikala yaheña hamuloña wakubula kuwanina, chaambu, hela nkulilu. Cheñi yitoñojoka yetu yinateli kwikala yakuminamu hamuloña wakukañanya kwiluka chinakutoñojokawu antu niyuma yidi munyichima yawu. Kwambukaku, Yehova niYesu yitoñojoka yawu hiyekala yaheña hela yakuminamuku.—Yish. 24:12; Mat. 9:4; Luka 5:22.

16, 17. Muloñadi Yehova chabuliliyi kukolela kulushimbi lwindi lwahosheleña hawuvumbi hampinji yavulumwiniyi Davidi naBatisheba?

¹⁶ Ichi dinu tushinshikenu hansañu yaDavidi yeliliyi wuvumbi naBatisheba. (2 Sam. 11:2-5) Kwesekeja naNshimbi yamulejeluwu Mosi, wejima wawu ateleleli kuyijaha. (Lev. 20:10; Kuhit. 22:22) Hela chakwila Yehova wayibabesheli, hazatishili nshimbi yindi munjila yaheñaku. Komana Yehova waluwañesheli? Komana wamwakamini Davidi kumesu nakufumpa nshimbi jindi jaloña? Antañi aBayibolu amakwawu dichatoñojokañawu.

¹⁷ Hela chochu, lushimbi lwahosheleña hawuvumbi Yehova waluheni kudi ansompeshi abula kuwanina, hiyatwesheleña kwiluka jidi munyichima yawantuku. Hela chakwila adiña abula kuwanina, ilu lushimbi lwayikwashileña kusompesha mwatelela. Cheñi nawa, Yehova nateli kwiluka jidi munyichima yawantu. (Kutach. 18:25; 1 Kushi. 29:17) Dichi bayi tutoñojokaña netu Yehova nateli kulondelaña hohu lushimbi lwahaniniyi kudi ansompeshi abula kuwaninaku. Neyi yela mwenimu, komana hichikwikala neyi kukanjikija muntu wamonaña chiwahi nawu yavwali makalashi akwashaña antu afwa mesu kulonda amoneña chachiwahuku? Yehova wamweni mumuchima waDavidi niBatisheba nawa wamweni nindi abalumukili chikupu. Kwesekeja nachayimweniyi, wayisompesheli munjila yatelela, yaluwi nawa yakukeña.

Twalekenuhu Kukeña Kuloña kwaYehova

18, 19. Yumanyi yatela kutukwasha hakwila tubuleña kumusompesha Yehova nayililu yetu yakudimona kuloña?

¹⁸ Dichi neyi tumona chuma chidi chejima chikutuleñela tutoñojoki netu Yehova neli mwaheña, chili tutaña nsañu yamuBayibolu hela tumona chuma chamuchidiwu muchihandilu chetu, bayi tumusompesha Nzambi nayililu yetu yakudimona kuloñaku. Anukenu nenu hitwelukaña wunsahu wejimaku nawa yitoñojoka yetu yinateli kwikala yaheña hela yakuminamu. Ilukenu nenu “kuzuwa kwawantu hikwakoñaña kuloña kwaNzambuku.” (Yak. 1:19, 20) Neyi tutoñojokaña mwenimu, nyichima yetu hiyinateli ‘kumuzuwilaña Yehovaku.’—Yish. 19:3.

¹⁹ Kufwana Yesu, mpinji yejima twatela kwiluka netu Yehova kankawindi diyi wukweti wuswa wakwimika nshimbi yaloña nawa yayiwahi. (Maku 10:17, 18) Fwilenu “kwiluka nsañu yalala chikupu.” (Rom. 10:2; 2 Tim. 3:7) Kuhitila mukwiteja yumiyi nikukolela mukwila kukeña kwaYehova, tukumwekeshaña netu tunakusambila kukeña ‘kuloña kwindi.’—Mat. 6:33.

[Tumazu twaheshina]

Munakwanuka?

• Muloñadi chichalemena kukeña kuloña kwaYehova?

• Yumanyi yiyedi yafwana yitwatela kutondolwela?

• Tunateli kusambila ñahi kukeña kuloña kwaNzambi?

[Malwihu aKuzatisha haKudiza]

[Mwevulu wudi hefu 9]

Chumanyi chitwadizilaña kuchishimu chaYesu chawamayala ayedi akandukili nakulomba hatembeli?

[Mwevulu wudi hefu 10]

Komana chadiña chatama kufweta akwakukalakala azatili maora ikumi nayimu nfwetu yoyimu nawakwakukalakala azatili ifuku damukuma?