“A Felna” Chu Zawng Hmasa Zel Rawh
“A Felna” Chu Zawng Hmasa Zel Rawh
“A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia.”—MT. 6:33.
1, 2. Pathian felna chu eng nge ni a, chu chuan eng nge a ṭanchhan?
“A RAM . . . chu zawng hmasa zâwk rawh u.” (Mt. 6:33) Tûn laia Jehova Thuhretute chuan Tlâng Chunga Isua Krista Thusawia tel he fuihna hi an hre chiang hle a. Kan nun kawng engkimah chu Lalram sawrkâr kan hmangaihna leh a chunga rinawm kan duhna lantîr chu kan tum tlat a ni. Mahse, a thu hnuhnûng zâwk, “leh a felna” tih pawh hi kan rilruah kan vawng reng tûr a ni bawk. Pathian felna chu eng nge ni a, zawng hmasa zâwk tih awmzia chu eng nge ni?
2 “Felna” tia lehlin atîra ṭawngkam chu “rorêl dikna,” a nih loh leh “dikna” ti pawha lehlin theih a ni a. Chuvângin, Pathian felna chu a tehnate leh a thu bulte mil tak dikna hi a ni. Siamtu a nih angin, Pathian Jehova chuan thil ṭha leh ṭha lo, thil dik leh dik lo tehkhâwng siam tûrin thu neihna a nei a. (Thup. 4:10, 11) Mahse, Pathian felna chu dân ngainatawm lo tak a ni lo va, tih tûr leh tih loh tûr ziak chhuahna thui tak lah a ni bawk hek lo. Chu ai mah chuan, Pathian Jehova mize bul dang a hmangaihna te, a finna te, leh a thiltihtheihna te nêna ṭang kawp rorêl dikna leh a nihnate a ṭanchhan zâwk a ni. Chuti a nih chuan Pathian felna chu a duhzâwng leh a thiltum nên a inzawm tlat tihna a ni a. Chutah chuan, a rawngbâwltute laka a thil beiseite pawh a tel a ni.
3. (a) Pathian felna zawng hmasa zâwk tih awmzia chu eng nge ni? (b) Engvângin nge Pathian Jehova tehna felte chu kan zawm ang?
3 Pathian felna zawng hmasa zâwk tih awmzia chu eng nge ni? A tâwi zâwnga sawi chuan, Pathian tihlâwm nâna a duhzâwng tih hi a ni a. A felna zawnnaah chuan kan tehnate ni lovin, a tehna ṭha famkimte leh a thu bulte mila nun tumna a tel a ni. (Rom 12:2 chhiar rawh.) Chu nun kawngah chuan amah nêna kan inlaichînna a tel a. Chu chu hrem hlauh vânga a dânte zawm hi a ni lo. Pathian kan hmangaihna chuan mahnia tehna insiam lovin, a tehnate zâwma amah tihlâwm tum tlat tûrin min chêttîr zâwk a ni. Chu chu thiltih âwm a ni tih kan hria; chutianga ti tûra siam kan ni si a. Pathian Rama Lalber, Isua Krista angin felna chu kan ngaina tûr a ni.—Heb. 1:8, 9.
4. Engvângin nge Pathian felna zawn chu a pawimawh êm êm?
4 Pathian Jehova felna zawn chu eng ang taka pawimawh nge ni? Hei hi han ngaihtuah teh: Eden huana fiahna hmasa ber chu Adama leh Evi-te’n tehna siam tûra Pathian Jehova dikna neih an pawm dâwn leh dâwn lohvah a innghat a. (Gen. 2:17; 3:5) Chu mi an pawm lohna chuan keini an thlahte chungah hrehawm tawrhna leh thihna a thlen a ni. (Rom 5:12) Kawng leh lamah chuan: “Felna leh zahngaihna zuitute chuan nunna te, felna te, chawimawinate an hmu ang,” tiin Pathian Thu chuan a sawi. (Thuf. 21:21) Ni e, Pathian felna zawn hmasakna chuan Pathian nêna inlaichînna ṭha tak a thlen a, chu chuan kan chhandamna a thlen lehchhâwng a ni.—Rom 3:23, 24.
Mahni Intihfel A Hlauhawmna
5. Eng thil hlauhawm nge kan pumpelh ngai?
5 Tirhkoh Paula chuan Rom khuaa Kristiante hnêna a lehkha thawnah Pathian felna zawn hmasakna kawnga hlawhtling thei tûra kan pumpelh ṭheuh ngai thil hlauhawm chu a târ lang a. A chipui Judate chungchângah heti hian a sawi a ni: “Pathian lamah ṭhahnem an ngai tih ka hriatpui a ni, hre famkim ang erawh chuan an ngai lo. Pathian felna hre lovin, anmahni felna tihngheh tumin, Pathian felnaah an intulût si lo,” tiin. (Rom 10:2, 3) Paula sawi dân chuan, chûng mite chuan mahni felna tihngheh an tumna lama an buai êm avângin, Pathian felna an hre thiam lo a ni. *
6. Eng rilru put hmang nge kan pumpelh ang a, engvângin nge?
6 He thanga kan awh theih dân kawng khat chu Pathian rawng kan bâwlna hi inelna leh mi dangte nêna inkhaikhinna anga thlîrna hi a ni a. Chu rilru put hmang chuan awlsam takin kan thiamnate avânga a lutuka inrin tâwkna min neihtîr thei a ni. Mahse, chutianga thil kan tih chuan, Pathian Jehova felna chu kan theihnghilh ang. (Gal. 6:3, 4) Thil dik min tihtîrtu rilru put hmang chu Pathian Jehova kan hmangaihna hi a ni a. Kan felna tihngheh tumna eng pawh chuan Pathian hmangaih anga kan inchhâlna chu engmah lovah a siam thei a ni.—Luka 16:15 chhiar rawh.
7. Engtin nge Isua chuan mahni intihfelna chu a dem?
7 Isua chuan “mi fel tak nih inring a, mi dang zawng zawng hmusit ṭhîn tute” chu a ngaimawh hle a. Ani chuan mahni intihfelna chu demin, he tehkhin thu hi a sawi a ni: “Mi pahnih Pathian biak inah ṭawngṭai tûrin an han kal a; pakhat chu pharisai a ni a, pakhat chu chhiahkhawntu a ni. Pharisai chu a ding a, amah chauhvin heti hian a ṭawngṭai a: ‘Pathian, mi dang anga hlêprute, fel lote, uirête ka nih loh avâng leh, he chhiahkhawntu ang pawh hi ka nih loh avângin i chungah ka lâwm e. Chawlhkâr khat apiangah vawi hnih chaw ka nghei ṭhîn a; ka neih apiang sâwmah pakhat ka pe ṭhîn,’ a ti a. Chhiahkhawntu erawh chu hla takah a ding a, vân lam pawh a dâk ngam lo va, ‘Pathian, kei mi sual hi mi khawngaih rawh,’ tiin a âwm a inchûm a inchûm ta zâwk a,” tiin. Isua chuan: “Ka hrilh a che u, a hmasa aiin chu mi zâwk chu thiam changin a inah a kal chhuk ta a. Inngaihlu apiang an tlâwm ang a, inngaitlâwm chu chawimawiin an awm ang,” tia sawiin a tehkhin thu chu a titâwp a ni.—Lk. 18:9-14.
Hlauhawm Dang—‘A Lutuka Intihfelna’
8, 9. ‘A lutuka intihfelna’ chu eng nge ni a, chu chuan eng nge min tihtîr theih?
8 Hlauhawm dang kan pumpelh ngai chu Thuhriltu 7:16-ah târ lan a ni: “Kherkhiap lutuk [“intifel lutuk,” New World Translation] suh la, intifing lutuk hek suh: engah nge mahni i intihchhiat ang?” tiin. Thlarauva thâwk khum Bible ziaktu chuan châng 20-ah chu rilru put hmang kan pumpelh chhan tûr chu a sawi a zawm a ni: “Thil ṭha titu, thil sual ti hauh lo khawpa mi fel chu lei chungah hian an awm lo takzet a ni,” tiin. Mi “intifel lutuk” chuan mahni tân felna chungchângah tehna a insiam a, chûng chuan mi dangte chungchângah ngaih dân a siam ṭhîn a ni. Mahse, chutianga a tih chuan, a tehnate chu Pathian tehnate aiin a dah sâng zâwk a, chu chuan Pathian mithmuha mi fel lovah a siam tih rêng a hre lo a ni.
9 ‘Intihfel lutukna’ chuan Pathian Jehova thiltih dân thlengin min rinhlelhtîr thei a ni. Mahse, Pathian Jehova thu tlûkna siam a dikna kan rinhlelh chuan, felna chungchânga kan tehna siam chu Pathian Jehova tehna chungah kan dah ṭan tihna a ni tih kan hriat reng a ngai a. Thil dik leh dik lo chungchânga kan tehna siamte hmangin Pathian Jehova chu kan fiahin, a chungchângah ngaih dân siam ang mai kan ni. Mahse, keimahni ni lovin, Pathian Jehova chu a ni, felna chungchânga tehna siam tûra dikna neitu chu!—Rom 14:10.
10. Joba chunga a thlen angin engin nge Pathian chungchângah ngaih dân min siamtîr thei?
10 Mihring tehnate hmangin Pathian chungchângah ngaih dân siam lui duh awm lo mah ila, kan ṭhat famkim lohna chuan chutianga ti tûrin min chêttîr thei a. Dik lo nia kan ngaih thil engemaw a thlen hunah emaw, mahni ngeiin harsatna kan tawh hunah emaw chutiang chu awlsam takin a thleng thei a ni. Mi rinawm Joba meuh pawhin chutiang chuan a lo ti a. Joba chu atîrah chuan “mi famkim, mi ngîl tak, Pathian ṭih mi, thil ṭha lo laka insûm thei mi” anga sawi a ni. (Job. 1:1) Mahse, dik lo nia a ngaih chhiatna inzawm zat chu a tâwk a. Chu chuan Joba chu ‘Pathian ai maha amah thiam a inchantîrna,’ a nih loh leh Pathian ai maha fel zâwka inngaihna a neihtîr a ni. (Job. 32:1, 2) Joba chuan a ngaih dân a siam ṭhat a ngai a. Chuvângin, a chânga chutiang dinhmuna kan din chuan mak kan ti tûr a ni hran lo. Chutiang thil a thleng a nih chuan, engin nge kan ngaihtuahna siam ṭha tûra min ṭanpui ang?
Thil Nih Dân Kan Hre Kim Ṭhîn Lo
11, 12. (a) Thil engemaw dik lo anga a lan hian eng nge kan hriat reng ngai? (b) Engvângin nge ṭhenkhat chuan grêp huana inhlawhfate chungchâng Isua tehkhin thu-ah thil dik lo engemaw tak awm nia an ngaih theih?
11 Kan hriat hmasak ber tûr chu thil nih dân kan hre kim ṭhîn lo tih hi a ni a. Chu chu Joba harsatna pawh a ni. Ani chuan vâna Pathian fa vântirhkohte an inhmuhkhâwm leh chuta Setana’n a chungchâng dik lo taka a puhnate chu a hre lo. (Job. 1:7-12; 2:1-6) Joba chuan a harsatna tawh chu Setana awmtîr a ni tih a hre lo va. Setana nihna dik tak a hriat leh hriat loh pawh kan chiang thei lo tlat. Chuvângin, a harsatna tawh chu Pathian awmtîr niin a ngai sual a ni. Ni e, thil nih dân kan hriat kim loh hian dik lo taka thu tâwp siam mai chu a awlsam ṭhîn.
12 Entîr nân, grêp huana inhlawhfate chungchâng Isua tehkhin thu hi han ngaihtuah teh. (Matthaia 20:8-16 chhiar rawh.) Chutah chuan, Isua’n inhlawhfa ni lênga thawkte leh dârkâr khat chauh thawkte hnêna hlawh inang ṭheuh petu grêp huan neitupa chanchin a sawi a. Chu mi chungchâng chu engtin nge i ngaih? A thiltih chu a dikin i hria em? Ni sa hnuaia ni lênga thawkte chu i khawngaih nghâl mai thei a. Anni chuan hlawh pêk tam zâwk chu an phu ngei bawk si! Chu thu tâwp siamna aṭang chuan grêp huan neitupa chu hmangaihna nei lo leh dik lo tak anga ngaih theih a ni a. Lungawi lohna lantîrtu hlawhfate a chhân lêtna pawh chu thu neihna hman dik lohna niin a lang thei bawk. Mahse, thil nih dân kan hre kim em?
13. Grêp huana inhlawhfate chungchâng Isua tehkhin thu-ah eng thlîr dân dang nge kan neih theih?
13 He tehkhin thu hi thlîr dân dang aṭangin i lo en ang u. Tehkhin thua grêp huan neitupa chuan chûng hlawhfa zawng zawngte’n an chhûngkua an châwm a ngaihzia a hria tia thu tâwp siam chu a âwm hle ang. Isua hun lai chuan, lova hna thawktu hlawhfate hlawh chu tlaia pêk nghâl a ni ṭhîn a. An chhûngkua chuan an nî tin hlawh chu an ring a ni. Chu chu rilrua dahin, grêp huan neitupain tlai lama a va hmuh, dârkâr khat chauh thawk hmante dinhmun chu han ngaihtuah teh. Dârkâr khat hlawh chuan an chhûngkua an châwm thei dâwn lo va; mahse, hnathawh chu an inhuam a, ni lêngin a ruaitu tûr an nghâk a ni. (Mt. 20:1-7) Ni lênga hna an thawk thei lo chu an thiam loh a ni lo va. Hna thawh loh an tum hrim hrim tih târ lanna lah a awm hek lo. Mi dangte chu i hlawh ringin an awm tih hre reng chunga ni lênga ruaitu tûr nghâktu angah chuan han inchan chhin teh. Hna thawh tûr i hmu chu i lâwmin—i chhûngte châwmna tûr khawp pêk i ni ta mai chu mak i va ti dâwn êm!
14. Grêp huan tehkhin thu aṭangin eng thil hlu tak nge kan zir?
14 Tûnah chuan grêp huan neitupa chhân lêtna chu i lo chhût leh ang u. Hlawh pêk tlêm a nei lo va. A hlawhfate zawng zawng chu mahni leh an chhûngkaw tâna inhlawhfa tûra dikna nei angin a thlîr vek zâwk a ni. Inhlawhfa tûr tam tak an awm avângin, grêp huan neitu chuan tlâwm zâwka hlawhfa rawih dân zawng thei reng a ni a; mahse, a zawng lo. A hlawhfa rawih zawng zawngte chu chhûngkaw châwmna khawp neiin an haw ṭheuh a ni. Chûng thil dangte ngaihtuah telna chuan a chhân lêtna i thlîr dân chu a thlâk thei a. A thu tlûkna siam chu hmangaihna a neih vâng a ni a, thu neihna hman dik lohna a ni lo. Eng nge kan zir theih? Thil nih dân ṭhenkhat chauh ngaihtuahna chuan thu tlûkna dik lo min siamtîr thei, tih hi. He tehkhin thu hian Pathian felna chungnun zâwkzia a târ lan bâkah, dân leh mihringte phu leh phu lohvah chauh a innghah lohzia a târ lang bawk a ni.
Thlîr Dân Herh leh Famkim Lo Kan Nei A Ni Thei
15. Engvângin nge dikna chungchâng kan thlîr dân chu herh danglam emaw, famkim lo tak emaw a nih theih?
15 Thil dik lo anga lang dinhmun kan hmachhawn huna kan hriat reng tûr pahnihna chu thlîr dân herh leh famkim lo kan nei a ni thei, tih hi a ni. Kan thlîr dân chu ṭhat famkim lohna te, pâwng huatna te, a nih loh leh hnam dân te chuan a herh danglam thei a. Kan thlîr dân chu mite thiltum leh an thinlung chhûnga thil awm kan hriat theih loh avângin a famkim thei lo bawk a ni. In kalh takin, Pathian Jehova leh Isua thil thlîr dân chu chutiang a ni ve lo.—Thuf. 24:12; Mt. 9:4; Lk. 5:22.
16, 17. Davida leh Bat-sebi inngaihna sual chungchângah engvângin nge Pathian Jehova chuan a dân chu a kenkawh loh?
16 Davida leh Bat-sebi inngaihna sual chungchâng hi i lo bih chiang ang u. (2 Sam. 11:2-5) Mosia Dân kenkawh chu ni se, tihhlum ve ve tûr an ni a. (Lev. 20:10; Deut. 22:22) Pathian Jehova chuan anni chu hrem mah se, a dân chu a kengkawh lui lo. Chu chu Pathian Jehova a dik hlel deuh tihna a ni em? Davida chu a duhsak bîkin, felna chungchânga Ama tehna ngei chu a bawhchhia em? Bible chhiartu ṭhenkhat chuan chutiang chuan an ngai a ni.
17 Amaherawhchu, uirêna chungchânga chu dân chu Pathian Jehova’n mite thinlung hre thei lo, rorêltu ṭha famkim lote hnêna a pêk a ni a. Mi ṭha famkim an ni lo chung pawhin, chu dân hmang chuan rorêlna nghet an kengkawh thei a ni. Kawng leh lamah chuan, Pathian Jehova chuan thinlung a hre thei a ni. (Gen. 18:25; 1 Chro. 29:17) Chuvâng chuan, rorêltu ṭha famkim lote tâna Pathian Jehova dân zam chuan amah a khuahkhirh ve chu kan beisei tûr a ni lo. Chutianga a khuahkhirh ve chuan, chu chu mit ṭha tak tuemaw mit ṭha lote tâna siam tarmit bun luihtîr nên a inang dâwn lâwm ni? Pathian Jehova chuan Davida leh Bat-sebi te thinlung chu a hre thei a, an inchhîr tak zetzia chu a hmu thei a ni. Chûng thilte chu ngaihtuah chungin, ngilnei tak leh hmangaih takin an chungthu a rêl a ni.
Pathian Jehova Felna Zawng Zêl Rawh
18, 19. Felna chungchânga kan tehna hmanga Pathian chungchâng ngaih dân siam lo tûrin engin nge min ṭanpui ang?
18 Chuvângin, Bible-a kan chhiar a ni emaw, mahnia kan tawn a ni emaw pawh ni se, Pathian Jehova chu thil dik lo engemaw tak ti nia hriatna kan neih hunah chuan, felna chungchânga kan tehna hmangin Pathian chungchângah ngaih dân i siam ngai lo vang u. Thil nih dân kan hre kim vek ṭhîn lo va, thlîr dân herh emaw, famkim lo emaw kan nei a ni tih hre reng rawh. “Mihring thinurnain Pathian felna chu a siam si lo,” tih hi theihnghilh ngai suh. (Jak. 1:19, 20) Chutiang chuan, kan rilru chu “LALPA chungah a vui” ngai lo vang.—Thuf. 19:3.
19 Isua angin, Pathian Jehova chu thil fel leh ṭha atâna tehna siam tûra dikna nei awmchhun a ni tih i pawm reng ang u. (Mk. 10:17, 18) A tehna chungchânga ‘hriatna famkim,’ a nih loh leh hriatna dik tak neih tum tlat ang che. (Rom 10:2; 2 Tim. 3:7) Hêng thilte pawmin leh Pathian Jehova duhzâwng mila nungin, “a felna” kan zawng hmasa zâwk tih kan târ lang a ni.—Mt. 6:33. (w10-E 10/15)
[Footnote]
^ par. 5 Mi thiam pakhat sawi dân chuan, “tihngheh” tia lehlin atîra ziak thu mal chuan ‘lungphun phun’ tihna pawh a ni thei a. Chuvângin, chûng Judate chuan mahni inchawimawina entîr nei lungphun chu an phun tih theih a ni.
Kan Hre Chhuak Em?
• Pathian Jehova felna zawn chu engvânga pawimawh nge ni?
• Eng hlauhawm pahnih nge kan pumpelh ngai?
• Engtin nge Pathian felna kan zawn hmasak zâwk theih?
[Zirlai Atâna Zawhnate]
[Phêk 17-naa milem]
Isua sawi mi pahnih biak ina ṭawngṭai tehkhin thu aṭangin eng nge kan hriat theih?
[Phêk 18-naa milem]
Pahmei zanriah chhum huna hna thawk ṭantute leh ni lênga thawktute hnêna hlawh inang pêk chu a dik lo vem?