Tšwelang Pele le Tsoma “Toko ya Gagwe” Pele

“Ka gona, tšwelang pele le tsoma mmušo pele le toko ya gagwe, gomme dilo tše tše dingwe ka moka le tla di okeletšwa.”—MAT. 6:33.

1, 2. Toko ya Modimo ke’ng, gona e theilwe go eng?

“KA GONA, tšwelang pele le tsoma mmušo pele.” (Mat. 6:33) Keletšo ye yeo e neilwego ke Jesu Kriste Thutong ya gagwe ya Thabeng e tumile kudu go Dihlatse tša Jehofa lehono. Dikarolong ka moka tša maphelo a rena, re katanela go bontšha gore re rata pušo ya Mmušo gomme re nyaka go e botegela. Eupša gape re swanetše go dula re nagana ka karolo ya bobedi ya taelo ye, e lego, “le toko ya gagwe.” Toko ya Modimo ke’ng, gona go bolela’ng go e tsoma pele?

² Mantšu a leleme la mathomo bakeng sa “toko” a ka fetolelwa gape e le “toka” goba “go loka.” Ka gona, toka ya Modimo e lokile go ya ka ditekanyetšo tša gagwe. Ka ge e le Mmopi, Jehofa o na le tshwanelo ya go bea ditekanyetšo tša se sebotse le se sebe, se se lokilego le se se fošagetšego. (Kut. 4:11) Lega go le bjalo, toko ya Modimo ga se ya boithati, ya go bea dithibelo tše dintši tša melao goba lenaneo le letelele la melao. Go e na le moo, e theilwe mohuteng wa motho yoo Jehofa a lego yena le sekeng sa gagwe se segolo sa toka, go akaretša  le lerato, bohlale le matla a gagwe. Ka gona, toko ya Modimo e tswalanywa le thato ya gagwe le morero. E akaretša seo a se letetšego go bao ba ratago go mo hlankela.

3. (a) Go tsoma toko ya Modimo pele go bolela’ng? (b) Ke ka baka la’ng re kgomarela ditekanyetšo tša Jehofa tša go loka?

³ Go tsoma toko ya Modimo pele go bolela’ng? Ge e bewa gabonolo, go bolela go dira thato ya Modimo gore re mo kgahle. Go tsoma toko ya gagwe go akaretša go leka go phela ka go dumelelana le ditekanyetšo tša gagwe tše di phethagetšego e sego tša rena. (Bala Baroma 12:2.) Tsela ye ya bophelo e akaretša tswalano ya rena le Jehofa. Ga se feela taba ya go kwa melao ya gagwe ka gobane re tšhaba go otlwa. Go e na le moo, go rata Modimo go re tutueletša go katanela go mo kgahla ka go kgomarela ditekanyetšo tša gagwe, re sa itirele tša rena. Re a lemoga gore se ke selo se sekaone seo re swanetšego go se dira, selo seo re bopetšwego go se dira. Go swana le Jesu Kriste, Kgoši ya Mmušo wa Modimo, re swanetše go rata toko.—Baheb. 1:8, 9.

4. Ke ka baka la’ng go le bohlokwa go tsoma toko ya Modimo?

⁴ Go tsoma toko ya Jehofa go bohlokwa gakaaka’ng? Ela hloko taba ye: Teko ya mathomo yeo e dirilwego tšhemong ya Edene e be e theilwe tabeng ya ge e ba Adama le Efa ba tla amogela tokelo ya Jehofa ya go bea ditekanyetšo goba aowa. (Gen. 2:17; 3:5) Go palelwa ga bona ke go dira bjalo go re baketše tlaišego le lehu bjalo ka ditlogolo tša bona. (Baroma 5:12) Ka lehlakoreng le lengwe, Lentšu la Modimo le re: “Mo-phêxêlêla-tokô-le-leratô ó hwetša bophelô le tokô le thêtô. (Die. 21:21, mongwalo o sekamego ke wa rena.) Ee, go tsoma toko ya Modimo pele go feleletša ka tswalano e botse le Jehofa yeo mafelelong e dirago gore re phološwe.—Baroma 3:23, 24.

Kotsi ya go Itira Baloki

5. Ke kotsi efe yeo re swanetšego go e phema?

⁵ Ge moapostola Paulo a be a ngwalela Bakriste ba kua Roma, o ile a bontšha kotsi yeo ka moka ga rena re swanetšego go e phema ge e ba re nyaka go atlega go tsomeng toko ya Modimo. Ge Paulo a be a bolela ka Bajuda ba gabo, o itše: “Ke ba hlatsela gore ba fišegela Modimo; eupša e sego go ya ka tsebo e nepagetšego; gobane, ka baka la go se tsebe toko ya Modimo eupša ba nyaka go thea ya bona, ga ba ka ba ikokobeletša toko ya Modimo.” (Baroma 10:2, 3) Go ya ka Paulo, barapedi bao ba be ba sa kwešiše toko ya Modimo ka gobane ba be ba swaregile kudu ka go leka go itlhamela toko ya bona ka noši. *

6. Ke mokgwa ofe woo re swanetšego go o phema, gona ka baka la’ng?

⁶ Tsela e nngwe yeo re ka welago molabeng wo ke ka go lebelela tirelo ya rena go Modimo e le phadišano, re ipapetša le ba bangwe. Go bonolo gore mokgwa wo o dire gore re ikholofele ka mo go feteletšego ka baka la bokgoni bja rena. Eupša, ge e le gabotse, ge re ka itshwara ka tsela yeo, re tla ba re lebala toko ya Jehofa. (Bagal. 6:3, 4) Re dira dilo tše di nepagetšego ka ge re rata Jehofa. Maiteko le ge e le afe a go ipontšha re le baloki a ka bontšha gore re bolela maaka ge re re re a mo rata.—Bala Luka 16:15.

7. Jesu o ile a re’ng ka bothata bja go itira baloki?

⁷ Jesu o be a tshwenyegile ka batho “bao ba bego ba ipotile gore ba lokile gomme ba tšea ba bangwe ka moka e se selo.” O ile a bolela ka bothata bja go itira baloki ka go anega papišo ye: “Banna ba babedi ba ile ba rotogela tempeleng go yo rapela, yo mongwe e le Mofarisei gomme yo mongwe e le molekgetho. Mofarisei a ema gomme a thoma go rapela ka dilo tše mo pelong a re, ‘Modimo, ke a go leboga gobane ga ke bjalo ka batho ba bangwe ka moka, bao e lego bahlakodi, ba sa lokago, dihlotlolo goba gaešita le bjalo ka molekgetho yo. Ke ikona dijo gabedi ka beke, ke ntšha sa lesome sa dilo ka moka tšeo ke di hwetšago.’ Eupša molekgetho  a eme kgole, o be a sa rate gaešita le go emišetša mahlo a gagwe legodimong, eupša a duletše go itshetla sehuba a re, ‘Modimo, ntšhokele, nna modiradibe.’” Jesu o phethile ka gore: “Ke a le botša, Monna yo o ile a theogela ntlong ya gagwe a hlatsetšwe e le yo a lokilego kudu go feta monna yola yo mongwe; gobane yo mongwe le yo mongwe yo a ikgodišago o tla kokobetšwa, eupša yo a ikokobetšago o tla godišwa.”—Luka 18:9-14.

Kotsi e Nngwe —Go “Itira Moloki wa Paala”

8, 9. Go itira “moloki wa paala” go bolela’ng, gona se se ka re lebiša kae?

⁸ Kotsi e nngwe yeo re swanetšego go e phema e bolelwa go Mmoledi 7:16, e rego: “O se ké wa itira moloki wa paala; O se kê wa itira mohlalefi wa bopadi. O tlo ba O ithsenyetša’ng?” (Mongwalo o sekamego ke wa rena.) Ge mongwadi yo a buduletšwego wa Beibele a re nea lebaka la go phema mokgwa o bjalo, o bolela mantšu a ao a lego go temana ya 20 gore: “Ruri mo ’faseng xa xo motho-moloki mo-dira-tše-boló e a sa direxo sebe.” Motho yo a itirago “moloki wa paala” o ipeela ditekanyetšo tša gagwe mabapi le toko gomme o ahlola ba bangwe ka tšona. Lega go le bjalo, o palelwa ke go lemoga gore ka go dira bjalo, o nagana gore ditekanyetšo tša gagwe di phagametše tša Modimo gomme ka go rialo a ipontšha a se a loka mahlong a Modimo.

⁹ Ka go itira ‘baloki ba paala,’ goba go etša ge diphetolelo tše dingwe tša Beibele di e hlalosa, “go ipona o le moloki ka mo go feteletšego” goba “go loka kudu,” go ka ba gwa re dira gore re belaele ditsela tša Jehofa tša go swaragana le dilo. Lega go le bjalo, re swanetše go gopola gore ge e ba re belaela go se leka-lekane goba toka ya diphetho tša Jehofa, ge e le gabotse re thoma go nagana gore ditekanyetšo tša rena tša go loka di phagametše tša Jehofa. Go swana le ge eka re leka Jehofa le go mo ahlola ka ditekanyetšo tša rena tša mabapi le se se lokilego le se se fošagetšego. Eupša Jehofa ke yena a nago le tshwanelo ya go bea ditekanyetšo tša go loka, e sego rena!—Baroma 14:10.

10. Go etša boemong bja Jobo, ke’ng seo se ka dirago gore re ahlole Modimo?

¹⁰ Gaešita le ge go se le o tee wa rena yoo a ka ahlolago Modimo ka boomo, go se phethagale ga rena go ka dira gore re mo ahlole. Go ka ba bonolo gore se se direge ge re bona selo seo re naganago gore ga se na teka-tekano goba ge e ba re tlaišega. Gaešita le monna yo a botegago Jobo o ile a dira phošo yeo. Mathomong Jobo o be a hlaloswa e le “monna e a se naxo bosodi, wa xo loka le xo boifa Modimo, mo-ila-bobe.” (Jobo 1:1) Eupša Jobo o ile a welwa ke mathata ka go latelana moo a ilego a bona seo e le go hloka toka. Se se ile sa dira gore Jobo a ipone a “lokile, ’me a bea Modimo molato.” (Jobo 32:1, 2) Jobo o be a swanetše go phošolla pono ya gagwe. Ka gona ga se ra swanela go makala ge ka dinako tše dingwe re ka ikhwetša re le boemong bjo bo swanago. Ge e ba seo se ka direga, re tla thušwa ke’ng go fetoša pono ya rena?

Ga se ka Mehla re Tsebago Ditaba ka Botlalo

11, 12. (a) Ge e ba re nagana gore selo se sengwe se hloka teka-tekano, re swanetše go gopola’ng? (b) Ke ka baka la’ng yo mongwe a ka nagana gore papišo ya Jesu ya balemi ba merara e bontšha go hloka teka-tekano?

¹¹ Selo sa mathomo seo re swanetšego go se  gopola ke gore ga se ka mehla re tsebago ditaba ka botlalo. Go be go le bjalo boemong bja Jobo. O be a sa tsebe ka seboka sa bana ba Modimo ba barongwa kua legodimong moo Sathane a ilego a mo latofatša ka maaka. (Jobo 1:7-12; 2:1-6) Jobo o be a sa lemoge gore ge e le gabotse mathata a gagwe a be a bakwa ke Sathane. Ge e le gabotse, ga re tsebe ge e ba Jobo a be a kwešiša ka botlalo gore Sathane ke mang! Ka gona o ile a dira phošo ya go nagana gore mathata a gagwe a bakwa ke Modimo. Ee, go bonolo go fihlelela phetho e fošagetšego ka baka la go se tsebe ditaba ka botlalo.

¹² Ka mohlala, ela hloko papišo ya Jesu ya balemi ba merara. (Bala Mateo 20:8-16.) Mo Jesu o bolela ka mong wa ntlo yoo a lefago bašomi ba gagwe tšhelete ya go lekana, go sa šetšwe gore ba šomile letšatši ka moka goba iri e tee feela. Ba ikwa bjang ka seo? Na seo se bonagala se se na teka-tekano? Mohlomongwe bahlanka bao ba šomilego letšatši ka moka phišong ya letšatši ba go kweša bohloko. Ga go pelaelo gore ba be ba swanetše go lefša tšhelete e ntšinyana! Motheong wa phetho yeo, mong wa ntlo o be a ka bonala a se na lerato e bile a hloka teka-tekano. Gaešita le tsela yeo a ilego a araba bašomi bao ba ilego ba ngongorega e ka bonala e le tirišo e mpe ya matla. Eupša na re tseba ditaba ka botlalo?

13. Re ka ba le pono efe e nngwe ka papišo ya Jesu ya balemi ba merara?

¹³ Anke re hlahlobeng papišo ye ka leihlo le lengwe. Ga go pelaelo gore mong wa ntlo wa mo papišong o be a tseba gore banna ba ka moka ba swanetše go fepa malapa a bona. Mehleng ya Jesu, balemi ba be ba lefša ka letšatši. Malapa a bona a be a ithekgile ka mogolo wa letšatši le letšatši. Re dutše re naganne ka se, nagana ka boemo bja banna bao mong wa ntlo a ilego a ba thwala ka morago letšatšing leo goba bao ba šomilego iri e tee feela. Mohlomongwe ba be ba ka se kgone go fepa malapa a bona ka mogolo wa iri e tee feela; lega go le bjalo, ba be ba ikemišeditše go šoma gomme ba ile ba leta letšatši ka moka gore ba thwalwe. (Mat. 20:1-7) E be e se bothata bja bona gore ga se ba dumelelwa go šoma letšatši ka moka. Ga go moo re botšwago gore ba ile ba ikemišetša go phema go šoma. Akanya o swanetše go leta letšatši ka moka, o tseba gore ba bangwe ba ithekgile ka seo o tlago go se gola lona letšatšing leo. Ruri o be o tla thabela go hwetša mošomo—gomme go be go tla makatša gakaakang go hwetša mogolo o lekanego go ka fepa lapa la gago!

14. Ke selo sefe se bohlokwa seo re ithutago sona papišong ya balemi ba merara?

¹⁴ Ga bjale anke re ahla-ahleng lefsa mediro ya mong wa ntlo. Ga go yo a hweditšego mogolo wa tlasana. Go e na le moo, o ile a swara bašomi ka moka e le bao ba swanelwago ke go hwetša sa go iphediša. Gaešita le ge a be a ka hwetšwa bašomi ba bangwe ba bantši, ga se a ka a bapala ka bao a bego a ba thwetše. Bašomi ba gagwe ka moka ba ile ba boela gae ba e-na le tšhelete e lekanego go ka fepa malapa a bona. Go naganišiša ka ditaba tše tšeo di utegilego go ka re thuša go fetoša pono ya rena ka seo a se dirilego. Phetho ya gagwe e be e bontšha lerato e sego moya wa go diriša matla gampe. Ke’ng seo  re ka ithutago sona? Gore go fo lebelela karolwana e tee ya ditaba go ka dira gore re dire phetho e fošagetšego. Ke therešo gore papišo ye e bontšha go phagama ga toko ya Modimo, yeo e sego ya thewa feela ditekanyetšong tša molao le tabeng ya ge e ba batho ba dumelelana le yona.

Pono ya Rena e ka Fapošwa Goba ya Lekanyetšwa

15. Ke ka baka la’ng pono ya rena mabapi le go hloka toka e ka ba yeo e fapogilego goba e lekanyeditšwego?

¹⁵ Selo sa bobedi seo re swanetšego go se gopola ge re lebeletšana le boemo bjo bo bonagalago bo se na teka-tekano ke gore pono ya rena e ka fapošwa goba ya lekanyetšwa. E ka fapošwa ke go se phethagale, kgethollo goba setšo seo re goletšego go sona. E bile e lekanyeditšwe ke gore ga re kgone go lemoga seo ruri se lego ka dipelong tša batho. Go fapana le moo, pono ya Jehofa le Jesu ga se tša lekanyetšwa.—Die. 24:12; Mat. 9:4; Luka 5:22.

16, 17. Ke ka baka la’ng Jehofa a sa ka a dira gore molao wo a o beilego wa mabapi le bohlotlolo o latelwe nakong ya ge Dafida a dira sebe le Batseba?

¹⁶ Anke re hlahlobeng pego ya bohlotlolo bja Dafida le Batseba. (2 Sam. 11:2-5) Go ya ka Molao wa Moše, ba be ba swanetše go bolawa. (Lef. 20:10; Doit. 22:22) Gaešita le ge Jehofa a ile a ba otla, ga se a ka a dira gore molao wo a o beilego o latelwe. Na se se be se bontšha gore Jehofa ga a na teka-tekano? Na o ile a bontšha gore o rata Dafida go feta ba bangwe gomme a tshela ditekanyetšo tša Gagwe tša go loka? Babadi ba bangwe ba Beibele ba ile ba ikwa ka tsela yeo.

¹⁷ Lega go le bjalo, molao wa mabapi le bohlotlolo o be o e-tšwa go Jehofa o e-ya go baahlodi bao ba sa phethagalago, bao ba sa kgonego go bona seo se lego ka dipelong. Go sa šetšwe mafokodi a bona, molao wo o be o ba thuša gore ba ahlole ka go swana. Ka lehlakoreng le lengwe, Jehofa o kgona go bala dipelo. (Gen. 18:25; 1 Kor. 29:17) Ka gona ga se ra swanela go letela gore Jehofa a kgomarele molao wo o tšwago go yena go ya go baahlodi bao ba sa phethagalago. Ge e ba a be a ka dira bjalo, na seo se be se ka se swane le go gapeletša motho yo a bonago gabotse gore a rwale digalase tša mahlo tšeo di hlametšwego go thuša batho bao ba sa bonego gabotse? Jehofa o ile a kgona go bona seo se lego ka pelong ya Dafida le Batseba gomme a bona gore ruri ba a itshola. Motheong wa seo, o ile a ba ahlola gabotse, ka kgaugelo le ka lerato.

Tšwela Pele o Tsoma Toko ya Jehofa

18, 19. Ke’ng seo se tlago go re thuša gore le ka mohla re se ahlole Jehofa ka ditekanyetšo tša rena tša go loka?

¹⁸ Ge e ba ka dinako tše dingwe re bona eka Jehofa ga a dire dilo ka teka-tekano—go sa šetšwe gore re bala seo pegong ya Beibele goba se a re diragalela bophelong—le ka mohla anke re se keng ra ahlola Modimo ka ditekanyetšo tša rena mabapi le se se lokilego. Gopola gore ga se ka mehla re tsebago ditaba ka botlalo gomme pono ya rena e ka fapošwa goba ya lekanyetšwa. O se ke wa lebala gore “kgalefo ya motho ga e tšweletše toko ya Modimo.” (Jak. 1:19, 20) Ka tsela ye, dipelo tša rena di ka se ke tša “galefela Jehofa.”—Die. 19:3, NW.

¹⁹ Go swana le Jesu, anke ka mehla re lemoge gore ke Jehofa feela yo a nago le tshwanelo ya go bea ditekanyetšo tša se se lokilego le se se fošagetšego. (Mar. 10:17, 18) Katanela go hwetša “tsebo e nepagetšego” goba “tsebô ya therešô” mabapi le ditekanyetšo tša gagwe. (Baroma 10:2; 2 Tim. 3:7, Beibele ya Sepedi) Ka go di amogela le go dumelelanya maphelo a rena le thato ya Jehofa, re bontšha gore re tsoma “toko ya gagwe” pele.—Mat. 6:33.

[Mongwalo wa tlase]

Na o a Gopola?

• Ke ka baka la’ng go le bohlokwa go tsoma toko ya Jehofa?

• Ke dikotsi dife tše pedi tšeo re swanetšego go di phema?

• Re ka tsoma bjang toko ya Modimo pele?

[Dipotšišo tša Thuto]

[Seswantšho go letlakala 9]

Re ithuta’ng papišong ya Jesu ya banna ba babedi bao ba ilego ba rapela tempeleng?

[Seswantšho go letlakala 10]

Na go lefa mošomi yo a šomilego diiri tše 11 go lekana le yo a šomilego letšatši ka moka go be go sa bontšhe teka-tekano?