Itultuloy ya Anapen Nin Unona so “Inkatunong To”

“Itultuloy yo sirin ya anapen nin unona so panarian tan say inkatunong to, tan sarayan amin a bengatla so niarum ed sikayo.”​—MAT. 6:33.

1, 2. Anto so inkatunong na Dios, tan base itan ed anto?

“ITULTULOY yo sirin ya anapen nin unona so panarian.” (Mat. 6:33) Sayan bilin nen Jesu-Kristo diad Sermon to ed Palandey et kabkabat na saray Tasi nen Jehova natan. Diad amin ya aspekto na bilay tayo, panggugunaetan tayon ipanengneng so apresasyon ed satan a Panarian tan labay tayoy manmatoor ed satan. Balet, kaukolan tayo met a tandaan so komaduan kabiangan na teksto, salanti, “tan say inkatunong to.” Anto so inkatunong na Dios, tan antoy kabaliksan na anapen nin unona itan?

² Diad orihinal a lenguahe, say salitan “inkatunong” et nayari met ya ipatalos ya “hustisya” odino “kaptekan.” Kanian, say inkatunong na Dios et kaptekan unong ed saray estandarte tan prinsipyo to. Lapud si Jehova so Manamalsa, kanepegan toy mangiletneg na estandarte ed no antoy maong tan mauges, duga tan aliwa. (Apo. 4:11) Balet, say inkatunong na Dios et agtutugyopen na mairap tan istrikto iran ganggan odino dakerakel a ley. Noagta, akabase itan ed personalidad nen Jehova tan ed manunan kualidad ton inkahustisya, kaibay arum ni ran manunan kualidad to ya aro, kakabatan, tan  pakayari. Walay pikonektaan sirin na inkatunong na Dios ed linawa tan gagala to. Kaiba met ed satan so iilaloan to ed saray manpipilalek a manlingkor ed sikato.

3. (a) Antoy kabaliksan na anapen nin unona so inkatunong na Dios? (b) Akin et uunoren tayo iray matunong ya estandarte nen Jehova?

³ Antoy kabaliksan na anapen nin unona so inkatunong na Dios? Say simplin kabaliksan na satan et gawaen tayoy linawa na Dios pian sikatoy napaliket. No aanapen tayoy inkatunong to, panggunaetan tayoy manbilay base ed ayadyarin estandarte to imbes a diad saray estandarte tayo. (Basaen so Roma 12:2.) Sayan paraan na kabibilay et lalanoren toy mismon relasyon tayo ed si Jehova. Aliwa iyan katutulok lapud takot a nadusa. Noagta, papakiwasen itayo na panangaro ed Dios pian pansagpotan a sikatoy paliketen diad pangunor ed saray estandarte to, imbes a mangiletneg na dili tayon estandarte. Amta tayo a saya so dugan gawaen, saya so mismon rason na impamalsa ed sikatayo. Singa si Jesu-Kristo, say Ari na Panarian na Dios, kaukolan tayon aroen so inkatunong.​—Heb. 1:8, 9.

4. Akin et importantin tuloy so pananap ed inkatunong na Dios?

⁴ Panon kaimportante so pananap ed inkatunong nen Jehova? Imanoen pa iya: Samay sankaunaan a subok diad hardin na Eden et nipaakar ed no kasin awaten di Adan tan Eva so kanepegan nen Jehova a mangiletneg na saray estandarte. (Gen. 2:17; 3:5) Lapud impulisay da itan, asagmak tayoran anak da so kairapan tan ipapatey. (Roma 5:12) Balet, oniay inkuan na Salita na Dios: “Say ontumbok ed kaptekan tan kaabigan makaromog na bilay, kaptekan, tan dayew.” (Uli. 21:21) On, no anapen tayo nin unona so inkatunong nen Jehova, nawalaan itayo na maabig a relasyon ed sikato, tan satan so manresulta ed mismon kiliktar tayo.​—Roma 3:23, 24.

Say Peligro na Pantunongtunongan

5. Anton peligro so kaukolan tayon paliisan?

⁵ Sanen sinulat nen apostol Pablo iray Kristiano ed Roma, impaimano to so peligron kaukolan a paliisan tayon amin pian naanap nin unona so inkatunong na Dios. Oniay inkuan to nipaakar ed saray kapara ton Judio: “Tatasian ko a maseseg ira parad Dios; balet aliwan unong ed suston pikakabat; ta ag-ira nampasakop ed inkatunong na Dios, lapud agda aamtaen so inkatunong na Dios noagta labay dan iletneg so inkatunong dan dili.” (Roma 10:2, 3) Unong ed si Pablo, agnatatalosan na saraman a Judio so inkatunong na Dios lapud say iimanoen da et say pangiletneg na inkatunong dan dili. *

6. Anton ugali so panalwaran tayo, tan akin?

⁶ Say sakey a patit et no moriaen tayon say panlilingkor tayo’d Dios et singa kompetisyon, ya ikokomparay inkasikatayo ed arum. Lapud sayan ugali, mainomay tayoy magmaliw ya alablabas a makompiyansa ed saray abilidad tayo. Diad tua, no onia tayo, nalilingwanan tayoy inkatunong nen Jehova. (Gal. 6:3, 4) Say dugan motibo no akin a gagawaen tayoy duga et say panangaro ed si Jehova. No ipapanengneng tayon matunotunong itayo, naandiay kana so ibabaga tayon panangaro ed sikato.​—Basaen so Lucas 16:15.

7. Antoy insalaysay nen Jesus pian natalonaan na arum so kakapuyan da a pantunongtunongan?

⁷ Nampagaan nen Jesus so nipaakar ed “saramay matalek ed dili ra a matunong ira tan ipapasen dan anggapoy kakanaan na arum.” Pian natulongan to ra ed kakapuyan a pantunongtunongan, insalaysay to iyan ilustrasyon: “Duaran lalaki so sinmegep ed templo pian manpikasi, say sakey et Fariseo tan samay sakey et managsingil na buis. Akaalagey so Fariseo tan onia iray impikasi to diad inkasikaton  dili, ‘O Dios, misalamat ak ed sika ta aliwa ak a singa saray arum a totoo, a matatakew, agmatunong, managkalugoran, odino anggan singa sayan managsingil na buis. Mamidua ak a manaayunal ed sakey simba, iiter koy kakaplo na amin a nanaalmoan ko.’ Balet say managsingil na buis ya akaalagey ed arawi et agto labay so anggan ontangay ed tawen, balet tatapoktapoken toy pagew to, ya ibabaga ton, ‘O Dios, kasian mo ak a sakey a managkasalanan.’” Insan, inkuan nen Jesus: “Ibagak ed sikayo, Sayan laki et sinmempet ed abung to ya apaneknekan a mas matunong nen samay sakey; lapud balang too a mangiyaatagey ed inkasikato et niyabeba, balet say mangiyaabeba ed inkasikato et niyatagey.”​—Luc. 18:9-14.

Sakey nin Peligro so Pagmaliw ya ‘Alabas a Matunong’

8, 9. Anto so kabaliksan na pagmaliw ya ‘alabas a matunong,’ tan antoy nayarin pansumpalan na saya?

⁸ Nia ni sakey a peligro a kaukolan tayon paliisan: “Agmo lalabasey inkatunong mo odino say inkakabat mo​—akin et pateyen moy sikan dili?” (Ecl. 7:16, Maung a Balita) Onia ni inkuan na pinuyanan a nansulat ed Biblia no akin a kaukolan tayon paliisan iyan ugali: “Petepeteg anggapo so maptek [odino matunong] a too ed tapew na dalin a manggawa na maong tan agmankasalanan.” (Ecl. 7:20) Say sakey a toon ‘alabas a matunong’ et walaray dili ton estandarte ed inkatunong tan uukomen to ray arum base ed saratan. Balet ta agto namomoria a no ontay gagawaen to et ipapasen to lan mas atagey ni iray estandarte to nen say estandarte na Dios tan sirin et napapaneknekan a sikatoy aliwan matunong diad imaton na Dios.

⁹ Nayarin say pagmaliw ya ‘alabas a matunong’ et pansengegan ni ingen a kuestionen tayoy paraan nen Jehova ed saray bengabengatla. Kaukolan tayon tandaan balet a no kuestionen tayoy kaptekan na saray desisyon nen Jehova, singa tayo ipapasen a mas atagey ni ray estandarte tayo nen saray estandarte to. Singa tayo susuboken tan uukomen si Jehova base’d saray dilin estandarte tayo ed no antoy duga tan aliwa. Balet, si Jehova so walaan na kanepegan a mangiletneg na estandarte ed inkatunong, aliwan sikatayo!​—Roma 14:10.

10. Singa si Job, akin a no maminsan et husgaan tayo so Dios?

¹⁰ Siempre, anggapo’d sikatayo ‘tay gagalaen ton husgaan so Dios, balet lapud aliwa itayon perpekto, walay ontan a tendensia tayo. Magmainomay itan a nagawa sano walay situasyon ya ipasen tayon agmakatunongan odino sano sikatayon mismo so akasagmak na kairapan. Anggan say matoor a toon si Job et ontan so lingon panmoria to. Diad gapo et sikatoy deneskribe a “naskey tan matunong, tan sakey a walaay takot ed Dios, tan pinmaliis a nanlapu ed mauges.” (Job 1:1) Balet, sanen nantutumbokan la ray trahedyan adalan to, parad sikato et aliwan makatunongan itan. Kanian impasen nen Job so inkasikato a ‘mas matunong nen say Dios.’ (Job 32:1, 2) Kaukolan ya ipetek so panmoria nen Job. Sirin, agtayo la pankelawan a no maminsan et ontan met so panmoria tayo. No nagawa itan, antoy ontulong pian nipetek tayoy panmoria tayo?

 Agtayo Amta so Amin a Detalye

11, 12. (a) No walay situasyon ya ipasen tayon agmakatunongan, antoy kaukolan tayon tandaan? (b) Parad arum, akin et singa walay aliwan makatunongan ed ilustrasyon nen Jesus?

¹¹ Say unonan tandaan tayo et agtayo lawas amta so amin a detalye. Ontan so agawa’d si Job. Agto amta iramay impantitipon na ananak na Dios diad tawen, a ditan et sikatoy inakusaan nen Satanas. (Job 1:7-12; 2:1-6) Ag-amoria nen Job a say nanlapuan na saray problema to et si Satanas. Diad tua, agtayo ingen segurado no amta nen Job iray sarag a gawaen nen Satanas! Kanian abaloan to et nanlapud Dios iray problema to. On, no agtayo amta so amin a detalye, nayarin bengatbengat tayon mankonklusyon.

¹² Alimbawa, imanoen tayo pa imay ilustrasyon nen Jesus nipaakar ed saray komikimey ed kaubasan. (Basaen so Mateo 20:8-16.) Diad satan et walay tinukoy nen Jesus ya akankayarian na kaubasan a parehoy inyupa to ed amin a komikimey, balang lan sanagew odino sakey oras labat so impankimey da. Antoy nibagam ed saya? Kasin makatunongan so ginawa to? Nayarin nakasian mo iramay sanagew a nankimey ed pataktak. Tan liknaen mon kanepegan day naupaan na mas baleg! Lapud satan, nayarin mankonklusyon ka ya agmangiyaansakit tan masaol imay akankayarian na kaubasan. Anggan samay ebat to ed saray manrereklamon komikimey et singa agmakatunongan. Balet, amta tayo ta so amin a detalye?

13. Diad sayan ilustrasyon nen Jesus, anto so imanoen tayo?

¹³ Nengnengen tayo pay duman anggulo na sayan ilustrasyon. Seguradon namomoria na akankayarian a walay pamilyan kaukolan a legpeten na saraman a komikimey. Nen panaon nen Jesus, agewan so panguupa ed saray komikimey ed uma. Maniilalo so pamilya ra ed inagew-agew ya anap da. Nonot yo pa natan sirin so kipapasen na saramay unor lan komikimey a nalmo na akankayarian na kaubasan tan sakey oras labat a nankimey. Nayarin say upa ra’d sakey oras et agmagenap parad pamilya ra. Balet, mabulos iran nankimey tan sanagew ira kalamor a nanalagar na napantrabahoan. (Mat. 20:1-7) Agda kasalanan ya ag-ira akapankimey a sanagew. Anggapoy pakapatnagan a ginagala ray agmantrabaho. Isip mo pay manalagar na sanagew, lalo la no antam ya mandedepende so arum ed naalmom. Talagan misalsalamat ka no walay naalam a trabaho, tan seguradon nasurprisa ka no say iyupa da et magenap parad pamilyam!

14. Anto so makanakanan naaralan tayo ed ilustrasyon nipaakar ed kaubasan?

¹⁴ Usisaen tayo pa lamet imay ginawa na akankayarian na kaubasan. Anggapoy inupaan toy kulang. Noagta, impasen to ya amin a nankimey et kanepegan day naupaan pian nalegpet so pamilya ra. Anggaman dakel so naalan komikimey, agto inanamot so situasyon pian abebay iyupa to. Magenap so inyupa to’d amin a nankimey ed kaubasan to. Natan ta nausisa tayo irayan detalye, nayarin manguman so panmoria tayo ed ginawa to. Maaro ton inkonsideray kipapasen da sanen  nandesisyon. Tan anggapoy sinaol to. Antoy naaralan tayo ed saya? Lingon konklusyon so naisip tayo no pigaran detalye labat so imanoen tayo. On, ipapabitar na sayan parabolo a nikadkadumay inkatunong na Dios, aliwa labat lan saray legal a totontonen tan kanepegan na too so ikokonsidera to.

Nayarin Pikewet Odino Nalilimitaan so Panmoria Tayo

15. Akin a nayarin napikewet odino nalimitaan so panmoria tayo ed no antoy makatunongan?

¹⁵ Say komaduan kaukolan tayon tandaan sano walay situasyon a singa agmakatunongan et, nayarin pikewet odino nalilimitaan so panmoria tayo. Napikewet itan na ag-inkayadyari, panaglabi, odino kultura. Nalimitaan met itan lapud anggapoy pakayari tayon natebek so motibo tan nabasa so walad puso na totoo. Si Jehova tan si Jesus so makabasa na puso.​—Uli. 24:12; Mat. 9:4; Luc. 5:22.

16, 17. Akin et ag-impaakseb nen Jehova so ganggan to nipaakar ed impikalugoran nen David tan Bat-sheba?

¹⁶ Usisaen tayo pa imay salaysay nipaakar ed impikalugoran di David tan Bat-sheba. (2 Sam. 11:2-5) Base ed Mosaikon Ganggan, kanepegan day napapatey. (Lev. 20:10; Deu. 22:22) Anggaman dinusa ira nen Jehova, agto impaakseb so dili ton ganggan. Kasin agmakatunongan si Jehova? Kasin paborito toy David kanian sinumlang Toy matunong iran estandarte To? Ontan so abaloan na arum a manbabasa na Biblia.

¹⁷ Balet, sayan ganggan nipaakar ed pikakalugoran et inter nen Jehova ed saray aliwan perpekton ukom ya agmakabasay puso. Anggaman walaray limitasyon da, akatulong iyan ganggan pian agmanguman-uman so panangukom da. Diad biek a dapag, nabasa nen Jehova so kapusoan. (Gen. 18:25; 1 Awa. 29:17) Kanian, agtayo nepeg ya ilaloan ya nalimitaan si Jehova ed saray ganggan ya ginawa to parad saray ag-ayadyarin ukom. Ta no ontan, aliling to et singa tayo ipapasoot ed sakey ya toon isulong so de-gradon salming anta anggapoy deral na mata to. Nabasa nen Jehova so puso di David tan Bat-sheba, tan anengneng toy masimoon a panagbabawi ra. Lapud inkonsidera to irayan aspekto, mapangasi tan maad-aro to ran inukom.

Itultuloy ya Anapen so Inkatunong nen Jehova

18, 19. Antoy makatulong pian agtayon balot ukomen si Jehova base ed saray dilin estandarte tayo ed inkatunong?

¹⁸ Kanian no walay nabasa tayo’d Biblia odino naeksperiensya tayo no maminsan a parad sikatayo et agmakatunongan si Jehova, sikatoy agtayon balot uukomen base ed saray dilin estandarte tayo ed inkatunong. Tandaan, agtayo lawas amta so amin a detalye tan nayarin pikewet odino nalilimitaan so panmoria tayo. Agtayon balot lilingwanan a “say sanok na too et agmakapangipatnag na inkatunong na Dios.” (Sant. 1:19, 20) Diad ontan, ag-itayon balot “onsanok a sumpa ed Jehova.”​—Uli. 19:3.

¹⁹ Singa si Jesus, lawas tayon bidbiren a si Jehova labat so makanepegan a mangiletneg na estandarte ed no anto so matunong tan maabig. (Mar. 10:17, 18) Pansagpotan moy nawalaan na “suston pikakabat” odino ‘tuan pikakabat’ ed saray estandarte to. (Roma 10:2; 2 Tim. 3:7, Say Biblia) No awaten tayo iraya tan manbilay unong ed linawa nen Jehova, ipapanengneng tayon aanapen tayo nin unona so “inkatunong to.”​—Mat. 6:33.

[Paimano ed leksab]

Nanonotan Mo Ni?

• Akin et importantin anapen so inkatunong nen Jehova?

• Anto so duaran peligro a kaukolan tayon paliisan?

• Panon tayon naanap nin unona so inkatunong na Dios?

[Tepetepet Parad Panagaral]

[Litrato ed pahina 9]

Anto so naaralan tayo ed ilustrasyon nen Jesus nipaakar ed duaran laki a nampikasi diad templo?

[Litrato ed pahina 10]

Makatunongan kasi so pangiter na parehon upa ed saray nankimey na sanagew tan nankimey na sakey oras?