Sigui Buska Dios “Su Hustisia” Promé

“Buska promé e reino di Dios i Su hustisia, i tur e kosnan akí lo wòrdu añadí na boso.”​—MAT. 6:33.

1, 2. Kiko ta e hustisia di Dios, i riba kiko e ta basá?

“BUSKA promé e reino di Dios.” (Mat. 6:33) Esaki ta un mandato ku Hesukristu a duna den su Sermon Riba Seru. I Testigunan di Yehova ta masha konsiente di e mandato ei. P’esei, den tur aspekto di nos bida nos ta hasi esfuerso pa demostrá ku nos ta stima e Reino ei i ku nos ke keda leal na dje. Pero, nos no mester lubidá e di dos parti di e teksto, esta, “i Su hustisia.” Kiko ta e hustisia di Dios? I kiko ta nifiká buska esaki promé?

² E hustisia di Dios ta un hustisia basá riba su norma- i balornan. Komo e Kreador, Yehova tin e derecho di establesé norma enkuanto loke ta bon i malu, korekto i inkorekto. (Rev. 4:11) Sinembargo, e hustisia di Dios no ta enserá un seri di lei òf un lista largu di regla estrikto. Mas bien, e ta basá riba Yehova su personalidat, inkluso su kualidatnan prinsipal, manera amor, sabiduria i poder. Ademas, Dios su hustisia ta ligá ku su boluntat i su propósito. E ta enserá tambe loke Dios ta ferwagt di hende ku ke sirbié.

3. (a) Kiko ta nifiká buska Dios su hustisia promé? (b) Dikon nos ta biba na armonia ku Dios su norma- i balornan perfekto?

³ Kiko ta nifiká buska Dios su hustisia promé? Ku poko palabra, e ta nifiká hasi Dios  su boluntat pa nos por agrad’é. E ta nifiká tambe hasi esfuerso pa biba na armonia ku Dios su norma- i balornan perfekto i no segun esnan di nos. (Lesa Romanonan 12:2.) E manera di biba akí ta reflehá e relashon íntimo ku nos tin ku Yehova. Nos ta obedesé su leinan no djis pasobra nos tin miedu di haña kastigu. Mas bien, ta nos amor pa Dios ta motivá nos pa hasi esfuerso pa agrad’é, bibando na armonia ku su normanan i no segun nos propio normanan. Nos ta rekonosé ku esaki ta e kos korekto pa hasi; i ta pa e propósito ei mes nos a ser kreá. Meskos ku Hesukristu, e Rei di e Reino di Dios, nos tin ku stima hustisia.​—Heb. 1:​8, 9.

4. Dikon ta asina importante pa buska Dios su hustisia promé?

⁴ Dikon ta importante pa buska Yehova su hustisia? Konsiderá e punto akí: Ora Adam ku Eva a wòrdu poní na prueba den hòfi di Edén, nan mester a demostrá ku nan a rekonosé Yehova su derecho di establesé norma. (Gén. 2:17; 3:5) Pero, nan no a hasi esei. I komo resultado, nan a trese sufrimentu i morto pa nos. (Rom. 5:12) Di otro banda, Dios su Palabra ta bisa: “Esun ku aspirá na hustisia i lealtat ta haña bida, hustisia i onor.” (Pro. 21:21) Sí, ora nos buska Dios su hustisia promé nos ta haña un bon relashon ku Yehova, i esei, na su turno, ta hiba na nos salbashon.​—Rom. 3:​23, 24.

E Peliger di Bira Hustu den Nos Mes Bista

5. Ki peliger nos mester evitá?

⁵ Den e karta ku apòstel Pablo a skirbí e kristiannan na Roma, el a enfatisá un peliger ku nos tur mester evitá si nos ke tin éksito den buska Dios su hustisia promé. El a bisa di su kompañeronan hudiu: “Mi ta duna testimonio di nan, ku nan tin un zelo pa Dios, ma no segun konosementu. Pasobra sin konosé e hustisia di Dios, i buskando pa establesé nan mes hustisia, nan no a someté nan mes na e hustisia di Dios.” (Rom. 10:​2, 3) Segun Pablo, e kristiannan ei no a komprondé kiko e hustisia di Dios ta enserá pasobra nan tabata muchu okupá den nan afan pa establesé nan propio hustisia. *

6. Ki aktitut nos mester evitá, i dikon?

⁶ Nos por kometé e fayo ei ora nos ta kompará nos mes ku otro hende i ta mira sirbishi na Dios komo un kompetensia. Nos por asta kuminsá sinti nos superior pa motibu di e abilidatnan ku nos tin. Pero, en realidat, si nos ta aktua di e manera ei, nos ta lubidando Yehova su hustisia. (Gal. 6:​3, 4) Kòrda, ta amor pa Yehova mester motivá nos pa hasi loke ta korekto. P’esei, kualke intento pa establesé nos propio hustisia ta demostrá ku nos no ta stima Dios manera nos ta pretendé.​—Lesa Lukas 16:15. *

7. Kon Hesus a ilustrá e peliger di ta hustu den nos mes bista?

⁷ Hesus tabata preokupá ku sierto hendenan “tabata konfia den nan mes ku nan tabata hustu, i tabata wak otronan ku menospresio.” Pa ilustrá kon peligroso e aktitut ei por ta, Hesus a konta e siguiente ilustrashon: “Dos hòmber a bai den tèmpel pa hasi orashon; esun tabata un fariseo i e otro un publikano. E fariseo a lanta para i tabata hasi orashon asin’akí den su mes: ‘Dios, mi ta gradisí bo ku mi no ta manera e otro hendenan: ladron, inhustu, adúltero, ni tampoko manera e publikano akí. Mi ta yuna dos biaha pa siman; mi ta duna e di dies parti di  tur mi entrada.’ Ma e publikano, pará na un distansia, no kier a hisa ni su wowo na shelu, ma tabata bati riba su pechu, bisando: ‘Dios, tene miserikòrdia di mi, pekadó!’” I Hesus a konkluí: “Mi ta bisa boso, e hòmber akí, kontrario di e otro, a bai su kas hustifiká; pasobra ken ku halsa su mes lo wòrdu humiá, ma esun ku humiá su mes lo wòrdu halsá.”​—Luk. 18:​9-14.

Un Otro Peliger ​—“Ser Demasiado Hustu”

8, 9. Kiko ta nifiká ser “demasiado hustu,” i na kiko esei por hiba nos?

⁸ Un otro peliger ku nos mester evitá ta loke Beibel ta menshoná na Eklesiastés 7:16. E ta bisa: “No sea demasiado hustu, i no sea sabí di mas. Pakiko lo bo ruiná bo mes?” I na versíkulo 20, e eskritor inspirá ta duna nos e motibu pakiko nos tin ku evitá e aktitut ei. El a bisa: “Di bèrdat, no tin hende hustu riba tera ku kontinuamente ta hasi bon i nunka ta peka.” Un persona ku ta “demasiado hustu” ta establesé su propio normanan di hustisia i ta husga otronan a base di esakinan. Pero, e persona ei no ta realisá ku e ta elevando su normanan riba esnan di Dios i di e manera ei ta hasi su mes inhustu den bista di Dios.

⁹ Un persona ku ta “demasiado hustu” por asta kuminsá kuestioná Yehova su manera di trata. Pero, nos tin ku kòrda ku si nos ta kuestioná Yehova su desishonnan, en realidat, nos ta poniendo nos normanan di hustisia riba esnan di Yehova. Ta komo si fuera nos ta hiba Yehova dilanti korte i ta husg’é a base di nos normanan. Sinembargo, ta Yehova tin e derecho di establesé norma di hustisia i no nos!​—Rom. 14:10.

10. Kiko por pone nos husga Dios manera Jòb a hasi?

¹⁰ Ounke ningun di nos lo no ke husga Dios, nos imperfekshon por pone nos hasi esei. Esaki por sosodé fásilmente ora nos mira un situashon ku pa nos ta un inhustisia òf ora nos ta pasa den difikultat ku ta kousa sufrimentu. Asta Jòb, un hòmber fiel, a kometé e eror ei. Kon asina? Na promé instante, Beibel ta bisa ku Jòb “tabata perfekto i rekto, un hende ku tabata teme Dios i ku tabata apartá su mes for di maldat.” (Jòb 1:1) Pero ora el a hañ’é ku hopi difikultat i a pensa ku esaki tabata un inhustisia, el “a deklará su mes alma hustu mas bien ku Dios.” (Jòb 32:​1, 2, NW) Jòb su punto di bista inkorekto mester a wòrdu korigí. Pues, no ta nada straño si, de bes en kuando, nos haña nos den un situashon similar. Si esei sosodé, kiko por yuda nos kambia nos manera di pensa?

Tin Biaha Nos No Sa Tur Detaye

11, 12. (a) Kiko nos tin ku kòrda si nos haña nos den un situashon ku segun nos ta inhustu? (b) Dikon un hende por pensa ku loke Hesus a konta den su ilustrashon di e trahadónan den kunuku di wendrùif ta un inhustisia?

¹¹ E promé kos ku nos tin ku kòrda ta: tin biaha nos no sa tur detaye. Esei tabata e problema den kaso di Jòb. E no tabata sa di e reunionnan ku Dios tabatin ku su angelnan den shelu i ku Satanas a akusá Dios inhustamente. (Jòb 1:​7-12; 2:​1-6) E no tabata sa  tampoko ku ta Satanas a kousa su problemanan. Kisas Jòb no tabata sa mes ken Satanas realmente tabata! P’esei, eróneamente el a pensa ku ta Dios a kousa su problemanan. Sí, ta fásil pa yega na un konklushon robes ora nos no sa tur detaye di un asuntu.

¹² Laga nos konsiderá, por ehèmpel, Hesus su ilustrashon di e trahadónan den kunuku di wendrùif. (Lesa Mateo 20:​8-16.) Den e ilustrashon akí, Hesus a papia di un doño di kunuku ku a paga tur su trahadónan e mesun suma di plaka, sea ku nan a traha henter dia òf ún ora so. Kiko bo ta pensa di esei? Bo ta haña ku esei tabata hustu? Kisas bo ta komprondé dikon e trahadónan ku a traha henter dia den solo kayente a ekspresá nan mal kontentu. Probablemente bo ta haña ku nan a meresé un mihó pago! Basá riba e konklushon ei, e doño di kunuku por parse un hende inhustu i sin amor. Asta e kontesta ku el a duna e trahadónan ku a reklamá por duna e impreshon ku el a hasi mal uso di su outoridat. Pero, nos tin tur detaye?

13. For di ki otro punto di bista nos por konsiderá Hesus su ilustrashon di e trahadónan den kunuku di wendrùif?

¹³ Laga nos analisá e ilustrashon akí for di un otro punto di bista. No tin duda ku e doño di kunuku den e ilustrashon a realisá ku tur e hòmbernan ei tabatin ku alimentá nan famia. Den tempu di Hesus, e trahadónan di kunuku tabata haña nan pago na fin di e dia ku nan traha. I nan famia tabata dependé di e pago ei. Ku esei na mente, pensa riba e situashon di esnan ku e doño di kunuku a kontratá atardi lat i ku a traha ún ora so. Kisas nan lo no por a alimentá nan famia ku e pago di un ora so di trabou. Pero, nan tabata dispuesto pa traha pasobra nan a para henter dia na plasa pa haña trabou. (Mat. 20:​1-7) No tabata nan falta ku nan no a haña trabou pa henter dia. No tin ningun indikashon ku nan tabata floho ni ku nan no kier a traha. Imaginá ku ta abo mester a warda henter dia pa haña trabou, sabiendo ku bo famia ta dependé di loke nan paga bo pa e dia ei. Ora bo haña trabou, lo bo keda masha kontentu, no ta bèrdat? I lo ta un grato sorpresa ora nan paga bo sufisiente plaka ku bo por alimentá bo famia.

14. Ki lès balioso nos ta siña for di e ilustrashon di e kunuku di wendrùif?

¹⁴ Awor, laga nos bolbe analisá loke e doño di kunuku a hasi. E no a paga ningun hende di ménos. Mas bien, el a trata tur e trahadónan komo hende ku tin e derecho di gana nan pan di kada dia. E doño di kunuku por a probechá di e situashon ku tabata reina—esta ku tabatin hopi hende ansioso pa traha pero poko kupo di trabou. Apesar di esei, e no a ofresé e trahadónan un salario inhustu. Tur su trahadónan a regresá kas ku sufisiente plaka pa alimentá nan famia. Ora nos tene kuenta ku e detayenan adishonal akí, nos ta haña un otro punto di  bista di e manera ku e doño a aktua. Su desishonnan a mustra ku e tabata bondadoso i ku e no a hasi mal uso di su outoridat. Ki lès nos por siña for di esaki? Ku nos por saka konklushon robes ora nos no sa tur detaye di un asuntu. Sí, e ilustrashon akí ta enfatisá ku e hustisia di Dios ta superior; su hustisia no ta basá riba lei so ni únikamente riba hende su méritonan.

Nos Punto di Bista Por Ta Robes òf Limitá

15. Dikon nos por tin un punto di bista robes òf limitá relashoná ku hustisia?

¹⁵ E di dos faktor ku nos tin ku tene na mente ora nos ta konfrontá ku un situashon ku ta parse inhustu ta ku nos punto di bista por ta robes òf limitá. E por ta robes debí na nos imperfekshon, prehuisio i kultura. Ademas, nos punto di bista ta limitá pasobra nos no tin e kapasidat pa diserní kiko ta motivá hende ni nos no por mira loke tin den nan kurason. Pero Yehova i Hesus sí no tin e limitashonnan ei.​—Pro. 24:12; Mat. 9:4; Luk. 5:22.

16, 17. Dikon Yehova no a kastigá David ku Bètsabé segun e lei ku el a duna Moisés?

¹⁶ Laga nos analisá awor e relato di David ku Bètsabé, kendenan a kometé adulterio. (2 Sam. 11:​2-5) Di akuerdo ku e Lei di Moisés, nan a meresé morto. (Lev. 20:10; Deu. 22:22) Ounke Yehova a kastigá nan, e no a hasi esei segun e lei ei ku el a duna Moisés. Yehova su proseder tabata inhustu? Akaso el a mustra parsialidat den kaso di David i violá Su normanan hustu? Algun lesadó di Beibel ta pensa asina.

¹⁷ Sinembargo, Yehova a duna e lei tokante adulterio na huesnan imperfekto, kendenan no por a wak den kurason di hende. Apesar di nan limitashonnan, e lei akí a yuda nan keda konsistente den nan manera di husga. Di otro banda, Yehova sí por skudriñá kurason. (Gén. 18:25; 1 Kró. 29:17) P’esei, Yehova no tin nodi tene su mes na lei ku el a diseñá pa huesnan imperfekto. Si e tabata obligá di hasi esei, lo tabata komo si fuera ta obligá un hende ku ta mira bon bon bisti un brel pa korigí su bista. Yehova por a skudriñá kurason di David i Bètsabé i mira ku nan a repentí sinseramente. I teniendo kuenta ku e faktor ei, el a husga nan na un manera bondadoso i miserikòrdioso.

Sigui Buska Yehova Su Hustisia

18, 19. Kiko lo yuda nos pa nunka husga Yehova a base di nos propio normanan di hustisia?

¹⁸ Pues, si sosodé ku nos haña ku Yehova a aktua na un manera inhustu—sea den nos kaso òf den un relato di Beibel—laga nos nunka husga Dios a base di nos propio normanan. Kòrda ku no ta semper nos sa tur detaye di un asuntu i ku nos punto di bista por ta robes òf limitá. I nunka lubidá ku “rabia di hende no ta produsí hustisia di Dios.” (Sant. 1:​19, 20) Di e manera ei, hamas nos kurason lo bira ‘razu kontra Yehova.’​—Pro. 19:3.

¹⁹ Meskos ku Hesus, laga nos semper rekonosé ku ta Yehova so tin e derecho di establesé norma di loke ta hustu i bon. (Mar. 10:​17, 18) I laga nos hasi esfuerso pa gana “konosementu” eksakto òf “konosementu real” di Dios su normanan. (Rom. 10:2; 2 Tim. 3:7, BPK) Ora nos ta aseptá e normanan ei i ta biba na armonia ku Yehova su boluntat, nos ta mustra ku nos ta buska “Su hustisia” promé.​—Mat. 6:33.

[Nota]

Bo Ta Kòrda?

• Dikon ta importante pa buska Yehova su hustisia?

• Menshoná dos peliger ku nos tin ku evitá.

• Kon nos por buska Dios su hustisia promé?

[Preguntanan di Estudio]

[Plachi na página 21]

Ki lès nos ta saka for di Hesus su ilustrashon di e dos hòmbernan ku tabata hasi orashon den tèmpel?

[Plachi na página 22]

Tabata inhustu pa paga e personanan ku a traha ún ora so mes tantu ku esnan ku a traha henter dia?