Pousehlahte Rapahki Mahs “Sapwellime Irair Pwung”

“Eri, kumwail rapahki mahs Wehin Koht oh dahme e kin ketin kupwurki [“sapwellime irair pwung,” NW], a soahng teikan koaros e ahpw pahn ketikihong kumwail.”​—MAD. 6:33.

1, 2. Dahkot sapwellimen Koht irair pwung? Dahme met kin poahsoankihda?

 “KUMWAIL rapahki mahs Wehin Koht.” (Mad. 6:33) Sounkadehdehn Siohwa kan rahnwet kin ese kehkehlik wet me Sises Krais ketikihda nan sapwellime Kapahrek en Pohn Dohlo. Kitail men nantihong wia soahng koaros nan atail mour pwe en kasalehda me kitail kin kesempwalki Wehi wet oh men loalopwoatohng. Ahpw kitail pil men tamataman ire keriau nan iretikitiko me mahsanih “oh sapwellime irair pwung.” Dahkot sapwellimen Koht irair pwung? Oh ia wehwehn atail rapahki mahs met?

² Sapwellimen Koht irair pwung iei irair pwung me kin pahrekiong sapwellime koasoandi kan oh dahme e ketin kesempwalki. Nin duwen Sounkapikadao, Siohwa sapwellimanki pwuhng en ketin koasoanehdi dahme mwahu oh dahme suwed, oh pil dahme pwung oh dahme sapwung. (Kaud. 4:11) Sapwellimen Koht irair pwung sohte kin wiahte diren kosonned kei. Ahpw e kin poahsoankihda soangen Koht dah men Siohwa oh sapwellime irair kesempwal en pwung pahrek iangahki limpoak, erpit oh manaman. Kahrehda, e kin dokedoke kupwure oh pil iangahki dahme e kin ketin kasik sang irail akan me inengieng papah ih.

3. (a) Ia wehwehn atail kin rapahki mahs sapwellimen Koht irair pwung? (b) Dahme kahrehda kitail kin kolokol sapwellimen Siohwa koasoandi pwung kan?

 ³ Ia wehwehn atail pahn rapahki mahs sapwellimen Koht irair pwung? Met kin wehwehki kitail en wia kupwuren Koht pwe en kaperenda ih. Atail kin rapahki sapwellime irair pwung kin pidada atail songosong en mour pahrekiong dahme e kin ketin kesempwalki oh sapwellime koasoandi unsek kan, a kaidehn atail. (Wadek Rom 12:2.) Atail nanpwungmwahu rehn Siohwa kin pidada soangen mour wet. E sohte wehwehki me kitail en peikiongete sapwellime kosonned kan pwehki atail masak kalokolok. Ahpw, atail limpoak ong Koht me kin kamwakid kitail en nantihong kaperenda ih sang ni atail kin kolokol sapwellime koasoandi kan ahpw kaidehn pein atail. Kitail pohnese me met pwung oh ihme Koht ketin kapikada kitail en wia. Duwehte Sises Krais, Nanmwarki en Wehin Koht, kitail anahne poakohng dahme pwung.​—Ipru 1:9.

4. Dahme kahrehda e inenen kesempwal en rapahki mahs sapwellimen Koht irair pwung?

⁴ Ia uwen kesempwal en rapahki mahs sapwellimen Siohwa irair pwung? Nna medewehla ire mehlel wet: Keieun kasongosong nan mwetuwel en Ihden iei ma Adam oh Ihp pahn pwungki de soh sapwellimen Siohwa pwuhng en ketikihda koasoandi kan. (Sen. 2:17; 3:5) Ara sohte pwungki met kahredahr kahpwal oh mehla ong kadaudokara kan. (Rom 5:12) Ahpw ni pali teio, Paipel mahsanih: “Mehmen me ngoangki en wia me pwung pahn mourla.” (Lep. Pad. 11:19) Ei, atail kin rapahki mahs sapwellimen Koht irair pwung kin imwikihla atail ahneki nanpwungmwahu rehn Siohwa oh e kin komourkitailla.​—Rom 3:23, 24.

Keperpen Medewe me Kowe Aramas Pwung Men

5. Keper dahieu kitail en soikala?

⁵ Ni ahnsou me wahnpoaron Pohl ntinglahng Kristian kan nan Rom, e kasalehda keper ehu me kitail koaros en soikala ma kitail pahn pweida ni atail rapahki mahs sapwellimen Koht irair pwung. Pohl kin koasoiahki ienge mehn Suhs kan: “I kak kadehde duwen arail inenen poadidiong Koht, ahpw sohte kekeid ni pwungen marain mehlel. Pwe irail sohte ese ahl me aramas kin pwungkihla rehn Koht, re ahpw kin songosong weweidki pein arail elen pwungla reh; eri, re ahpw sohte kin mweidohng Koht en pein ketin kapwungirailla mwohn silangi.” (Rom 10:2, 3) Pohl kin medewe me irail sounkaudok pwuko sohte wehwehki sapwellimen Koht irair pwung pwehki arail kin nohk kedirepwkihla dahme re kin pein medewe me pwung.

6. Soangen madamadau dahieu me kitail anahne soikala? Dahme kahrehda?

⁶ Ehu ahl kitail kakete wia sapwung wet iei atail pahn wiahki me papah Koht iei mehn siai ehu, de kin kapahrekiong kitail meteikan. Madamadau wet kakete kahrehda kitail en kin nohn koapworopworki pein atail erpit oh tiahk pwung. Ma kitail kin ahneki soangen madamadau wet, kitail pahn manokehla sapwellimen Siohwa irair pwung. (Kal. 6:3, 4) Kahrepe mwahu en wia me pwung iei atail limpoak ong Siohwa. Limpoak wet sohte pahn mehlel ma kitail kin songosong en kadehdehda me atail koasoandi kan me pwung.​—Wadek Luk 16:15.

7. Dahme Sises kin mahsanih duwen keper en medewe me kowe aramas pwung men?

⁷ Sises kin ketin pwunodki irail akan me “kin akupwungki pein ihr oh pohnmwahsoiong meteikan.” E mahsanih duwen keper en medewe me kowe aramas pwung men ni eh ketin wia karasaras wet: “Aramas riemen kohdalahng kapakap nan Tehnpas Sarawio; emen ira Parisi men, a emen sounrik daksis. Parisio kesihnenda oh wia eh kapakap nin duwe met: ‘Maing Koht, I kapingkalahngankihong komwi ei sohte kin noahrok, ei sohte kin mwersuwed, ei sohte kin kamwahl duwehte aramas teikan. I kapingkalahngankihong komwi ei pil sohte duwehte sounrik daksis menet. I kin kaisihsol pak riau nan wihk ehu, oh I kin meirongki eisek kis ehu sang ni mehkoaros me I ahneki.’ A sounrik daksiso kesihnen ekis dohlahsang, e  ahpw sohte men saradalahng nanleng, pwe ihte me e wiewia, pikipikir nan mwaremware, ndinda, ‘Maing Koht, komw ketin kupwurei ie, pwe aramas dipan emen ngehi!’” Sises eri mahsanih: “Kumwail en ese pwe ohl menet pwungla rehn Koht ahpw pwurala ni imweo; a meteio, soh. Pwe me kin aklapalapki pein ih, pahn tikitikla; a me kin aktikitingki pein ih, pahn lapalapala.”​—Luk 18:9-14.

“Nohn Kin Men Wiahla Aramas Pwung Men” Pil Keper

8, 9. Ia wehwehn en “nohn kin men wiahla aramas pwung” men? Dahme met kak kahrehiong kitail en wia?

⁸ Pil ehu keper me kitail anahne soikala iei me kileldi nan Eklesiasdes 7:16: “Ke dehr nohn kin men wiahla aramas pwung de kupwurokong​—dah, ke men pein kemeiukala?” Soun nting en Paipel menet pil doula pwe en kihong kitail kahrepe ehu me kitail en soikala soangen madamadau wet. Nan iretikitik 20 mahsanih: “Sohte aramas emen nin sampah me kin wia me pwung ahnsou koaros oh sohte sapwungala pak ehu.” Meno me “nohn kin men wiahla aramas pwung” kin koasoanehdi pein eh koasoandi kan duwen dahme pwung oh kin kadeik meteikan nin duwen koasoandi wet. Ahpw e sohte pohnese me sang ni eh wia met, e kin kihda eh koasoandi kan en ileile sang sapwellimen Koht, oh met kin kadehdehda me kaidehn ih aramas pwung men mwohn silangin Koht.

⁹ En “nohn kin men wiahla aramas pwung” kak kahrehiong kitail en peidengki duwen Siohwa eh kin ketin apwalihala mehkan. Kitail anahne tamataman me ma kitail kin peidengki duwen pahrek en sapwellimen Siohwa pilipil kan, kitail kakete kihda atail koasoandi ong dahme pwung oh sapwung en ileile sang sapwellime koasoandi. Kitail sohte pahn men mwomwen me kitail kihong Siohwa nan kopwung oh kadeik ih nin duwen pein atail koasoandi kan duwen dahme pwung oh sapwung. Ahpw Siohwa me sapwellimanki pwuhng en koasoanehdi duwen dahme pwung, kaidehn kitail.​—Rom 14:10.

10. Duwehte Sohp, dahme ele kin kahrehiong kitail en kadeik Koht?

¹⁰ Atail soh unsek kak kahrehiong kitail en kadeik Koht, mehnda ma kitail sohte men wia met. Met kak wiawi ni ahnsou me kitail kin kilang mehkot me sohte pahrek de ma kitail kin lelohng kahpwal. Ohl lelepek Sohp pil wiahda sapwung wet. Nin tapio, Paipel mahsanih me Sohp “kin pwongih Koht oh kin poadidiong mehlel. Pil ih aramas mwahu men, oh e kin sohpeisang me suwed.” (Sohp 1:1) Ahpw mwuhr, kahpwal kei lelohng Sohp. Ong ih, kahpwal pwukat mwomwen sohte pwung. Met kahrehda Sohp eh “akupwungki pein ih oh kapwukoahneki Koht mehkoaros.” (Sohp 32:1, 2) Sohp anahne kapwungala eh madamadau. Eri, kitail sohte anahne pwuriamweikihla ma ekei pak kitail pil kin mihla nan soangen irair wet. Ma met wiawi, dahme kak sewese kitail en kapwungala atail madamadau?

Kaidehn Ahnsou Koaros Kitail Kin Ese Ire Mehlel Koaros

11, 12. (a) Ma kitail pehm me mehkot sohte pahrek, dahme kitail anahne tamataman? (b) Dahme kahrehda emen ele kin pehm me sapwellimen Sises karasaras en tohndoadoahk kan en nan mwetin wain mwomwen sapahrek?

¹¹ Kitail en keieu tamataman me kaidehn ahnsou koaros kitail kin ese ire mehlel  koaros. Met mehlel rehn Sohp. E sohte ese duwen tuhpenehn sapwellimen Koht tohnleng kan nanleng ni Sehdan eh karaun likamwih Koht. (Sohp 1:7-12; 2:1-6) Sohp sehse me Sehdan me kahrehda eh kahpwal ko. Ni mehlel, kitail sohte kak nda me Sohp ese ihs Sehdan. Eri, Sohp sapwungala oh leme me Koht me ketin kahrehda eh kahpwal kan. Ei, e mengei en ahnekihda madamadau sapwung ni ahnsou me kitail sohte kin ese ire mehlel koaros.

¹² Medewehla sapwellimen Sises karasaras en tohndoadoahk kan en nan mwetin wain. (Wadek Madiu 20:8-16.) Wasaht Sises mahsanih duwen soumwet en waino me pwainkihla pweipwei ehute nah tohndoadoahk ko koaros, mendahki ekei doadoahk rahn ehu pwon de ekei awa ehute. Ia omw pepehm ong met? E mwomwen sapahrek? Ele nin tapio, ke kak poakehla tohndoadoahk ko me doadoahk rahn ehu pwon pahn ketipino. Ele ke medewe me re konehng ale pweipwei laud. Ma ih duwen, ke kakete kilangwohng soumweto nin duwen emen me mwomwen sempoak oh sohte pahrek. Eh sapengla nah tohndoadoahk ko me kaulim ele kak mwomwen me e doadoahngki eh manaman ni ahl sapwung. Ahpw ia duwe, kitail ese ire mehlel koaros?

13. Ia pil ehu madamadau me kitail kak alehdi sang sapwellimen Sises karasaras duwen tohndoadoahk kan en nan mwetin wain?

¹³ Kitail en kasawih karasaras wet ni ehu ahl tohrohr. E sansal me soumwet en waino kin pohnese me tohndoadoahk pwukat koaros anahne kamwenge arail peneinei kan. Ni mwehin Sises, tohndoadoahk kan en mwaht akan kin ale pweinerail ehuehu rahn. Arail peneinei kan kin koapworopworki pweinen rahno. Ni atail tamataman met, medewehla duwen irair en irail ko me soumweto diar ni soutiko oh me kak doadoahk awa ehute. Mwein re sohte kak kamwengekihla arail peneinei kan uwen pweipwei en awa ehute, ahpw re men doadoahk oh kin awiawih rahno pwon pwe ren alehdi doadoahk. (Mad. 20:1-7) Kaidehn arail sapwung me re sohte ale mweimwei en doadoahk rahn ehu pwon. Paipel sohte kasalehda me re sohte kin men doadoahk. Medewehla ma ke anahne awih rahn ehu pwon oh ke ese me meteikan kin koapworopworki pweinen omw doadoahk rahno. Ia uwen omw pahn kalahnganki omw alehdi doadoahko, oh ia uwen omw pahn pwuriamweikihla me ke alehdi uwen pweipwei ehu me kak kamwengehla omw peneineio!

14. Ia mehn kasukuhl mwahu me kitail sukuhlki sang karasaras en mwetin wain?

¹⁴ Met kitail en pwurehng medewehla dahme soumweto wia. E sohte kin pwain mwohni me sohte itar ong arail doadoahk. Ahpw e kin wiahki tohndoadoahk koaros me re ahneki pwuhng en ale mwohni pwe ren apwalih pein irail oh arail peneinei. Pwehki mie diren tohndoadoahk, soumweto kak isanekihla oh alehda tohndoadoahk kan ni pwei tikitik, ahpw e sohte wia met. Nah tohndoadoahk koaros alehdi mwohni me itar en kamwengehla arail peneinei oh pwurala ni imwarail. Atail medemedewe oaritik pwukat kakete wekidala atail madamadau ong eh wiewia kan. Eh pilipil kin wia elen limpoak ehu oh e sohte doadoahngki eh manaman ni sapwung. Dahme  kitail kak sukuhlki? Atail medemedewe ekeite ire mehlel kan kak kahrehiong kitail en ahneki madamadau sapwung. Mehlel, karasaras wet kin kasalehda kesempwalpen sapwellimen Koht irair pwung me ileile oh me sohte kin poahsoankihdahte kosonned kan oh mehkan me warohng aramas.

Atail Madamadau Kakete Sapwungala

15. Dahme kahrehda atail madamadau ong dahme pahrek kakete sapwungala?

¹⁵ Ire keriau en tamataman ni ahnsou me kitail lelohng irair ehu me kitail medewe me mwomwen sapahrek iei me atail madamadau kakete sapwungala. Atail madamadau kak sapwungkihla atail soh unsek, lipilipilki aramas, oh pil mwomwen atail tikida. Kitail pil sohte kak dehdehki nsenen aramas oh sehse dahme mi nan mohngiongirail. Weksang kitail, Siohwa oh Sises sohte kin sapwellimaniki soangen kahpwal pwukat.​—Lep. Pad. 24:12; Mad. 9:4; Luk 5:22.

16, 17. Dahme kahrehda Siohwa sohte ketin doadoahngki kosonned duwen kamwahl ni eh ketin kadeik Depit eh dipen kamwahl rehn Padsipa?

¹⁶ Kitail en kasawih duwen Depit eh kamwahl rehn Padsipa. (2 Sam. 11:2-5) Nin duwen Kosonned en Moses, ira anahne kamakamala. (Lip. 20:10; Deud. 22:22) Siohwa ketin kaloke ira, ahpw e sohte ketin doadoahngki sapwellime kosonned. Ia duwe, Siohwa ketin sapahrek? E ketin lipilipilki Depit oh kauwehla sapwellime koasoandi pwung kan? Ekei sounwadawad kan en Paipel kin pehm duwehte met.

¹⁷ Ahpw, kosonned wet duwen kamwahl, Siohwa ketikihong sounkopwung soh unsek kan me sohte kak ese mohngiong kan. Kosonned wet kahrehiong irail en kadeik ni pahrek mendahki arail soh unsek. Ni pali teio, Siohwa kak mwahngih mohngiong kan. (Sen. 18:25; 1 Kron. 29:17) Eri, kitail en dehr medewe me kosonned me Siohwa ketin koasoanehdi ong sounkopwung soh unsek kan pahn anahne kaunda ih. Ma ih duwen, met sou duwehte atail idingkihong emen me kak kilang mwahu en doadoahngki kilahs me wiawihda ong irail me masarail kan edied? Siohwa kak mwahngih mohngiong en Depit oh Padsipa oh ara koluhla mehlel. Ni eh ketin medewe ire mehlel pwukat, e ketin kadeikada ira ni elen limpoak oh mahk-kalahngan.

Pousehlahte Rapahki Sapwellimen Siohwa Irair Pwung

18, 19. Dahme pahn sewese kitail en dehr kadeik Siohwa sang ni pein atail koasoandi kan ong duwen dahme pwung?

¹⁸ Eri, ma mie ahnsou sohte lipilipil me kitail wadek iren Paipel kan de mehkot lelohng kitail oh pehm me Siohwa ketin sapahrek, kitail en dehr kadeik Koht sang ni pein atail koasoandi ong duwen dahme pwung. Kitail en tamataman me kaidehn ahnsou koaros kitail ese ire mehlel koaros oh atail madamadau kakete sapwungala. Dehr manokehla me “lingeringer en aramas sohte kin sewese kapwaiada sapwellimen Koht kupwur pwung.” (Seims 1:19, 20) Ni atail kapwaiada met, mohngiongitail sohte mwahn pahn “kaulimehki KAUN-O.”​—Lep. Pad. 19:3.

¹⁹ Duwehte Sises, kitail kin ahnsou koaros pohnese me Siohwa kelehpw sapwellimaniki pwuhng en ketin koasoanehdi dahme pwung oh dahme mwahu. (Mark 10:17, 18) Kitail en nantihong ale “marain mehlel [“loalokong pwung,” NW]” en sapwellime koasoandi kan. (Rom 10:2; 2 Tim. 3:7) Sang ni atail pwungki ire pwukat oh kapwaiada kupwur en Siohwa nan atail mour, kitail kin kasalehda me kitail kin rapahki mahs “sapwellime irair pwung.”​—Mad. 6:33, NW.

Ke Tamataman?

• Dahme kahrehda e kesempwal en rapahki sapwellimen Siohwa irair pwung?

• Ire keper riau dah me kitail anahne soikala?

• Ia duwen atail kak rapahki mahs sapwellimen Koht irair pwung?

[Peidek en Onop]

[Kilel nan pali 17]

Dahme kitail sukuhlki sang karasaras en ohl riemen me kapakap nan tehnpaso?

[Kilel nan pali 18]

E sapwung en pwain tohndoadoahk kan me doadoahk awa ehute duwehte me doadoahk rahn ehu pwon?