Vande Keren Nen “Perapera na”

“Vande keren nen tartor Na man perapera Na, man akaa ne cii á seer ne a ye.”—MAT. 6:33.

1, 2. Kanyi i lu perapera u Aôndoo, man perapera shon har sha nyi?

 “VANDE keren nen tartor Na.” (Mat. 6:33) Mbashiada mba Yehova fa kwaghwan u Yesu Kristu wa ken Ityesen na i sha Uwo ne tsembelee nyian. Akaa a se eren ken uma wase cii, se mba nôngon ser se tese er hemen u Tartor la u doo se ishima shi se soo u suur sha u kpaa yô. Kpa shi gba u se umbur vegher u sha uhar u ivur ne, u a kaa ér “man perapera Na” la kpaa. Kanyi i lu perapera u Aôndoo, man inja i u vanden keren perapera shon ér nyi?

² Perapera u Aôndo ka perapera u a zough sha atindiakaa a na kua aeren a na a dedoo yô. Er Yehova a lu Orgbanakaa yô, una fatyô u wan tindi sha kwagh u a lu u dedoo man u bo yô, kua kwagh u a lu u shami man u a lu u shami ga kpaa. (Mpa. 4:11) Nahan kpa, u ngu wer perapera u Aôndo gema ka atindi a taver se u kuran shin a sendelee, shin a ngeen karen ikyaa inya ga. Kpa a gema a har sha imba Aôndo u Yehova a lu la, kua aeren a na a vesen, a a lu ijirôron i sha mimi, kua dooshima na man kwaghfan na man tahav nav la. Sha nahan yô, perapera u Aôndo wa zua a awashima na. Shi a kua kwagh u a soo ér mba i sar ve u civir un cii ve er la kpaa.

3. (a) Inja i u vanden keren perapera u Aôndo la ér nyi? (b) Se mba suur sha atindiakaa a Yehova a perapera la sha ci u nyi?

³ Inja i u vanden keren perapera u Aôndo la  ér nyi? Jighilii yô, ka u eren ishima i Aôndo sha er a saan un iyol yô. U keren perapera u Aôndo la kua u se nôngon ser se dondon atindiakaa a na a vough la, ka u dondon atindiakaa a ase ga. (Ôr Mbaromanu 12:2.) Ieren ne wa ikyar i se ye a Yehova la kpa ker. Ka di u gban dondon atindiakaa a na tsô sha ci u se mba cian tsaha ga. Kpa, mdoo u Aôndo a doo se ishima la ngu a mgbegha se se nôngo ser se er ishima na sha u kuran atindiakaa a na, nahan kera dughun a ase ga. Se fa ser ka kwagh u a doo u se er je ne, shi ka kwagh u i gbe se ér se̱ er kpôô kpôô je ne. Gba u perapera una doo se ishima, er Yesu Kristu, u a lu Tor u Tartor u Aôndo la nahan.—Heb. 1:8, 9.

4. U keren perapera u Yehova la ka kwagh u hange hange sha ci u nyi?

⁴ U keren perapera u Yehova la ka kwagh u hange hange sha ci u nyi? Hen ase sha ikyaa ne: Ikyaren i hiihii i ken sule u Eden la yange i har sha u Adam vea Ifa lumun ér Yehova ngu a ian i wan ve atindi shin ngu a mi ga. (Gen. 2:17; 3:5) Er ve lumun ér Yehova ngu a ian i wan ve atindi ga yô, ican man ku gema va sha se mba se dugh ken a ve ne. (Rom. 5:12) Nahan cii kpa, Mkaanem ma Aôndo kaa ér: ‘Or u nan dondo sha perapera kua erdoo yô, nana zua a uma man perapera kua icivir.’ (Anz. 21:21) Sha kpôô yô, aluer se vande keren perapera u Aôndo yô, kwagh la una wase se u yan ikyar a na kôôsôô, man ikyar ne ia gema a va se a myom.—Rom. 3:23, 24.

Kwaghbo u Or Nengen Ér Nan Hemba Perapera Cii La

5. Ka kwaghbo u nyi i gbe u se palegha?

⁵ Shighe u apostoli Paulu lu ngeren washika hen Mbakristu mba ken Roma la, a tese kwaghbo u i gbe u se palegh ve se kôrcio u vanden keren perapera u Aôndo yô. Paulu ôr kwagh u ityô na Mbayuda kaa ér: ‘M ngu eren ve shiada mer, mba a ishima i tseen sha kwagh u Aôndo kpa ka sha gbenda u kwaghfan ga. Gadia ve fa perapera u a dugh her Aôndo la ga, mba keren u veren u ve ayol a ve. Perapera u Aôndo la yô, ve lumun un ga.’ (Rom. 10:2, 3) Paulu kaa ér mbacivir Aôndo mbara yange ve fa perapera u Aôndo ga sha ci u ve tume ityough u keren perapera ve ayol a ve yum. *

6. Ka ieren i nyi i doo u se palegha, man ka sha ci u nyi?

⁶ Gbenda môm u se fatyô u gban ken hôn ne yô, ka u nengen tom u se eren Aôndo la er ka gesa nahan, geman tôôn ayol a ase karen sha mbagenev la. Ieren ne ia na se hingir u suur sha mfe u se lu a mi sha akaa la karen ikyaa inya. Kpa, sha mimi yô, aluer se mba eren kwagh sha imba gbenda la yô, se lu hungur a perapera u Yehova la. (Gal. 6:3, 4) Ka mdoo u Yehova a doo se ishima la jim je a mgbeghan se u eren kwagh u shami ye. Nyityô gbenda i se ker u tesen perapera wase ayol a ase cii, ia na mdoo u Aôndo a doo se ishima la una hingir gbilinkwagh.—Ôr Luka 16:15.

7. Yesu yange pase kwaghbo u or nengen ér nan hemba perapera cii la nena?

⁷ Kwagh u ior ‘mba ve fa ken asema a ve ér, ve mba mbaperapera, man ve geman ve nengen ior mbagenev dang’ la yange za Yesu iyol. A ôr injakwagh ne sha u pasen kwaghbo u or nengen ér nan hemba perapera cii la, ér: “Ior uhar za ken tempel sha u za eren msen; u môm lu Orfarishi; u môm yô, lu orngoholkpandegh. Orfarishi la tile sha, gba eren msen sha ci na iyol na sha akaa ne nahan er: Aôndo, m sugh U sha ci u m lu er ior mbagenev nahan ga yô: anza er uityusenmbaiorov man mbalun a mimi ga man mbadyarev man orngoholkpandegh ne nahan kpaa. Lahadi môm ka m hôr kwaghyan kwa har; m ne môm-ken-upue sha akaa a m zough a mi cii. Kpa orngoholkpandegh la yô, tile ken ica je,  lumun u kenden ashe sha tsô kpaa ga, kpa a ta uwegh sha vanger, a gba kaan er: Aôndo, zungwem mhôônom, mo, orsholibo ne! Me kaa ne, ka or ne a yem ken ya na a ishô ye, lu ugen la ga, gadia anti or u nana kende iyol i nan sha yô, á hide a nan ijime; kpa u nana hide a iyol i nan ijime yô, á kende nan sha.”—Luka 18:9-14.

U Eren ‘Perapera Karen Ikyaa Inya’ la Kpa Ka Kwaghbo

8, 9. Inja i u eren ‘perapera karen ikyaa inyaa’ la ér nyi, man kwagh la una na se er nyi?

⁸ I pase kwaghbo ugen u i gbe u se palegh yô ken Orpasenkwagh 7:16 ér: ‘De eren perapera a̱ karen ikyaa inya ga, man shi de luun a kwaghfan a̱ karen ikyaa inya ga; inja na nan man ú va tim iyol youwe?’ Orgeren Bibilo u jijingi mgbegha un ne maa seer pasen ityôkyaa i í doo u se palegh imba ieren la, er ivur i sha 20 la i tese nahan, ér: “Gadia ma orperapera môm u shin tar u nan eren kwagh u dedoo nan eren isholibo ga, nan ngu ga.” Or u eren ‘perapera karen ikyaa inya’ ka nan wa atindi a nan sha kwagh u perapera shi nan ôron mbagenev ijiir sha atindi shon. Nahan kpa, ka nan fa er u eren nahan la nan lu kenden a atindi a nan sha hemban aa Aôndo, man er ieren ne i ne nan kera lu orperapera sha ishigh ki Aôndo ga la ga.

⁹ U eren ‘perapera karen ikyaa inya’ la una na se nenge a mshi sha gbenda u Yehova a eren akaa la. Nahan kpa, gba u se umbur ser, aluer se mba hunan akaa a Yehova a er shami shin a er sha perapera la yô, kwagh la una na se lu nengen ser atindi a perapera wase la hemba a Yehova la. Ka inja er se mba karen Yehova shi se ôron un ijir sha atindi a se we ayol a ase sha kwagh u a lu u shami man u shami ga la nahan. Kpa ka Yehova a lu a ian i wan tindi sha kwagh u perapera ye, ka se ga.—Rom. 14:10.

10. Kanyi ia na ve se ôr Aôndo ijir er Yobu nahana?

¹⁰ Shin er mô wase môm kpa nan soo u ôron Yehova ijiir ga nahan kpa, mlu wase u isholibo la una fatyô u nan se eren kwagh nahan. Kwagh a fatyô u lun nahan zum u se nenge ser i kwagh shami ga yô, shin zum u se ayol a ase se lu yan ican yô. Orjighjigh Yobu je kpa yange tsume nahan. Sha hiihii la i pase kwagh u Yobu ér “lu or u mimi, u perapera, u cian Aôndo, palegh kwaghbo.” (Yobu 1:1) Kpa, er Yobu va tagher a atsan ciligh ciligh yô, lu un inja er Aôndo er a na shami ga nahan. Kwagh ne na yô, Yobu “na ishô iyol na sha ishigh ki Aôndo.” (Yobu 32:1, 2) Yange gba u Yobu una kôôm mnenge na la. Nahan, aluer ashighe agen se nyôr ken imba mlu la kpa, i̱ de kpiligh se iyol ga. Aluer kwagh er se nahan yô, kanyi ia wase se se kôôm mhen wase?

Ka Hanma Shighe Se Fe Akaa Cii Ga

11, 12. (a) Aluer se nenge ser i er kwagh shami ga yô, kanyi i doo u se umburu? (b) Kanyi ia na ve alaghga orgen nana nenge ér injakwagh i Yesu ôr sha kwagh u mbatomov mba ve yar sule la tese kwagh u i er shami ga yôô?

¹¹ Kwagh u hiihii u se umbur yô, ka hanma shighe se fe akaa cii ga. Lu kwagh u er Yobu je ne. Yange fa kwagh u mbamkombo mba mbatyomov mba ve lu ônov mba Aôndo la eren sha, ape Satan za wa un aie iyol la ga. (Yobu 1:7-12; 2:1-6) Yobu yange fa er lu Satan  jighilii va un a mbamzeyol ga. Sha kpôô yô, se fatyô u kaan jighilii ser Yobu yange fa injaor i Satan lu jim je kpaa ga! Nahan a gba tôôn sha lan tsô ér lu Aôndo va un a mbamzeyol ye. Sha mimi yô, ka sea fa ma kwagh vindi vindi ga yô, i lu se ican ga u kuren ikyaa sha lan.

¹² Ikyav i tesen yô, hen ase sha injakwagh i Yesu ôr sha kwagh u mbatomov mba ve yar sule la. (Ôr Mateu 20:8-16.) Ken injakwagh ne Yesu pase kwagh u orya ugen u kimbi mbatomov nav mba ve er tom iyange jimin kua mba ve er u ihwa i môm tseegh la injar i môm yô. U nenge nena sha kwagh la? Tese ér ka kwagh u shamii? Alaghga kunya a hii kôron we a mba yange oo ta ve ken tom iyange jimin la. Mimi je, yange ve kuma u a hemba kimbin ve injar! Aluer se kure ikyaa nahan yô, se nenge ser orya la er kwagh shami ga shi lu a dooshima kpaa ga. Alaghga mlumun u a na mbatomov mba ve gba ahom la je kpa, una lu se inja er yange lu a tahav yô, gbaa di eren kwagh sha ishima na tsô nahan. Kpa se fa hanma kwagh sha kwagh nee?

13. Ka gbenda ugen u nyi se fatyô u timen sha injakwagh i Yesu ôr sha kwagh u mbatomov mba ve yar sule laa?

¹³ De se time sha injakwagh ne sha gbenda ugen. Se fatyô u kuren ikyaa ser orya u ken injakwagh la yange fa er gba u mbatomov mbara cii vea koso icombor ve yô. Sha ayange a Yesu la, i kimbin mbatomov injar sha hanma iyange. Lu injar i í kimbin ve hanma iyange la icombor ve suur sha mi ye. Er u fe kwagh ne nahan yô, hen ase sha mlu u mbatomov mba orya la zua a ve fele ga ve ve er tom ihwa i môm tseegh la. Alaghga yange vea fatyô u koson icombor ve sha injar i tom u ve shire ihwa i môm tseegh la ga; nahan cii kpa, ve kegh iyol u shiren tom shi ve kegh iyange jimin sha u i tôô ve tom yô. (Mat. 20:1-7) Ian i ve zua a mi i shiren tom iyange jimin ga la lu ibo ve ga. Ikyav ngi i tesen ér yange ve palegh tom sha apera ga. Tôô ase wer yange gba u ú kegh iyange jimin, man u fa er mbagenev gema lu veren ashe a kwagh u ú kur a mi sha iyange la yô. Nenge er yange ma doo u kpishi er ú zough a tom yô, shi nenge er yange ma kpiligh we iyol er u zough a injar i i kom u ú koso tsombor wou sha wono!

14. Ka kwagh u injaa u nyi se hen ken injakwagh i sule laa?

¹⁴ De se hide se nenge nen vighe vighe sha kwagh u orya la er la hegen. Yange kimbi ormôm injar yina sha tom u nan ga. Kpa yange er kwagh a mbatomov mbara cii er ka ior mba ve kom u zuan a inyaregh ki vea kure mbamgbe vev kua mba tsombor ve yô. Er mbatomov de ishar yô, mase shin ishima i orya la u tôôn ve tom sha ishe ga, nahan kpa, a er nahan ga. Mbatomov nav cii kur a kwagh kuma u koson icombor ve a mi. Aluer se kav akaa agen ne cii yô, alaghga mnenge wase sha kwagh u orya la er la una gema. Kwagh u orya la er la tese dooshima, lu eren kwagh sha ishima na sha ci u un ngu a tahav yum ga. Kwagh ne tese se nyi? Aluer se tôv sha akaa agen vighe vighe ga yô, se fatyô u kuren ikyaa sha  mi sha inja ga. Sha kpôô yô, injakwagh ne tese tseer tseer ér perapera u Aôndo hemba cii, man perapera ne har sha atindi tsô ga, shi Yehova eren kwagh a uumace sha perapera sha ci u ve kuma u una er a ve nahan yum ga.

Mnenge Wase Una Fatyô u Lun Kpe Shin Yinan

15. Er nan ve mnenge wase sha kwagh u a lu shami man u a lu shami ga la una fatyô u lun kpe shin yinana?

¹⁵ Kwagh u sha uhar u se umbur zum u se tagher a ma kwagh u i lu inja er i er shami ga yô, mnenge wase una fatyô u lun kpe shin yinan. Una fatyô u lun kpe sha ci u isholibo shin ihyom shin msange shin aeren a ityô yase la. Shi una fatyô u yinan sha ci u se mba a tahav mbu fan mbaawashima mba iorov kua kwagh u a lu ior ken ishima jighilii ga. Kpa Yehova man Yesu cii mba a mbamyen mban nahan ga.—Anz. 24:12; Mat. 9:4; Luka 5:22.

16, 17. Alaghga Yehova yange dondo tindi u wa sha kwagh u idya, shighe u Davidi er kwaghbo a Batesheba la ga sha ci u nyi?

¹⁶ De se time nen sha kwagh u idya i Davidi er a Batesheba la. (2 Sam. 11:2-5) Sha Tindi u Mose yô, ve kuma u a wua ve. (Lev. 20:10; Dut. 22:22) Shin er Yehova tsaha ve nahan kpa, a kera na ve mtsaha er tindi na tese la ga. Kwagh u Yehova er la lu shami gaa? Yange per atindiakaa a na a perapera la sha ci u Kwagh u Davidi doo un yum shinii? Mbaôron Bibilo mbagenev nenge nahan.

¹⁷ Nahan kpa, Yehova yange wa tindi u sha kwagh u idya ne sha ikyev i mbaajiriv mba ve lu mba asorabo, mba ve lu a tahav mbu fan asema a ior ga yô. Shin er mbaajiriv mban lu a mbamyen vev nahan kpa, tindi ne wase ve u ôron ajir sha mimi jighilii. Kpa Yehova yô, una fatyô u karen asema a ior. (Gen 18:25; 1 Kron. 29:17) Nahan doo u se nenge ser tindi u Yehova wa sha ci u mbaajiriv mba yinan la una hide a kange un ga. Yange tindi la una kange un yô, ma lu inja er ka u kighir or u nan nengen kera wang ér nana wa ajingi a i er sha ci u wasen mba nengen cing nahan ga he? Yehova yange kar ishima i Davidi man i Batesheba, nahan a nenge er ve gema ishima sha mimi yô. Yehova nengen nahan yô, a ôr ve ijir sha mlu u ken ishima ve la vough, sha mhôôn man sha dooshima.

Za Hemen u Keren Perapera u Yehova

18, 19. Kanyi ia wase se ve mayange se ôr Aôndo ijir sha atindi a se ayol a ase se we sha kwagh u perapera ga?

¹⁸ Nahan yô, aluer ashighe agen se nenge ser Yehova er kwagh shami ga, a lu kwagh u i nger ken Bibilo shin u a er se ken uma wase kpa, se ôr nen Yehova ijir sha atindi a se ayol a ase se we sha kwagh u perapera la ga. Umbur wer ka hanma shighe se fe akaa cii ga, shi mnenge wase una fatyô u lun kpe shin yinan je kpaa. Mayange i de hungur we er ‘iyugh i or i ve a perapera sha ishigh ki Aôndo ga’ la ga. (Yak. 1:19, 20) Aluer se fa nahan yô, mayange ishima yase ia “hingir iyongo a TER” ga.—Anz. 19:3.

¹⁹ Se dondon nen Yesu hanma shighe sha u lumun ser ka Yehova tswen a lu a ian i wan tindi u tesen kwagh u a lu u perapera man u dedoo ye. (Mar. 10:17, 18) Nôngo sha afatyô wou cii ‘fa mimi’ u atindiakaa a na. (Rom. 10:2; 2 Tim. 3:7) Aluer se lumun atindiakaa ne shi se mba eren ishima i Aôndo yô, se lu tesen ser ka “perapera na” se lu vanden keren ye.—Mat. 6:33.

[Ngeren u shin kpe]

Ú Umbur Kpa?

• Ka hange hange u keren perapera u Yehova sha ci u nyi?

• Ka akaabo a ahar a nyi i gbe u se palegha?

• Se fatyô u vanden keren perapera u Aôndo nena?

[Mbampin mba ngeren u henen]

[Foto u sha peeji 9]

Injakwagh i Yesu ôr sha kwagh u iorov uhar mba ve za er msen ken tempel la tese se nyi?

[Foto u sha peeji 10]

Orya u a kimbi mbatomov mba ve er tom iyange jimin injar i môm vea mba ve yar shighe u kuma u kurun la yange er kwagh u shami gaa?