Nge M’on u Wan’uy e “Tin nib M’agan’” Got Ngay

“Ngam m’oneged u wan’med e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey ngomed.”​—MATT. 6:33.

1, 2. Mang e tin nib m’agan’ Got ngay, ma be tor nga daken e mang?

 “NGAM m’oneged u wan’med e gagiyeg rok Got.” (Matt. 6:33) Ri manang e Pi Mich Rok Jehovah e re fonow ney ni yog Jesus Kristus ko fare Welthin ni pi’ u daken e Burey. Gubin ngiyal’ ni gad ma athamgil ni ngad daged nib t’uf rodad e re gagiyeg rok Got nem ma gad baadag ni ngad yul’yul’gad ngay. Machane ku thingar da lemnaged e tin migid e thin ni yog ni aram e “tin nib m’agan’” Got ngay. Mang e tin nib m’agan’ Got ngay, ma mang e be yip’ fan ni ngad m’oneged u wan’dad?

² Jehovah ni ir e en ni ke sunmiydad e bay mat’awun ni nge yog ko mang e ba fel’ nge mang e ba kireb, nge ku mang e ba mat’aw nge mang e de mat’aw. (Rev. 4:11) Machane tin nib m’agan’ Got ngay e gathi ma gagiyel u daken e motochiyel ni boor ni ke ngongliy ni dariy e runguy riy. Ma be tor nga daken fel’ngin Got nib lingagil ni aram e mat’aw, nge t’ufeg, nge gonop, nge gelngin nib gel. Ere tin nib m’agan’ Got ngay e ba muun ngay e tin ni baadag Got ni nge rin’ e piin ni yad baadag ni ngar pigpiggad ngak.

3. (a) Mang e be yip’ fan ni ngad m’oneged u wan’dad e tin nib m’agan’ Got ngay? (b) Mang fan ni gad ma fol ko pi motochiyel rok Got nib mat’aw?

³ Mang e be yip’ fan ni ngan m’oneg u wan’uy e tin nib m’agan’ Got ngay? Be yip’ fan ni ngad rin’ed e tin ra felfelan’nag Jehovah. Ba muun ngay ni ngad gayed rogon ni ngad folgad ko pi motochiyel rok ma gathi tin ni gad baadag e ngaud rin’ed. (Mu beeg e Roma 12:2.)  Gad ra rin’ ni aram rogon ma ra fel’ thildad Jehovah. Gathi ngad folgad ko motochiyel rok ni bochan e gadad be rus nra gechignagdad. Ya t’ufeg rodad ngak Got e be k’aringdad ni ngad felfelan’naged ma gad fol ko pi motochiyel rok ma gathi tin ni gad baadag e ngaud rin’ed. Gad manang ni ireray e n’en nib fel’ ni ngad rin’ed, maku ireray fan ni kan sunmiydad. Thingari t’uf e tin nib mat’aw rodad ni bod Jesus Kristus ni ir e Pilung u Gil’ilungun Got.​—Heb. 1:8, 9. 

4. Uw feni ga’ fan ni ngad m’oneged u wan’dad e tin nib m’agan’ Got ngay?

⁴ Uw feni ga’ fan ni nge m’on u wan’uy e tin nib m’agan’ Got ngay? Mu lemnag e re n’ey: Fare skeng nni pi’ ngak Adam nge Efa u lan fare milay’ nu Eden e ni pi’ ni bochan e nge m’ug riy ko yow ra fol ko motochiyel rok Jehovah fa danga’. (Gen. 2:17; 3:5) Bochan ni dar folgow ma aram fan ni ma gafgow pi fakrow ma yad ma yim’. (Rom. 5:12) Machane Thin rok Got e be gaar: “Demtrug be’ ni ke dugliy u wan’ ni nge rin’ e tin nib mat’aw ma ra par nib fos, ma en ni ke dugliy ni kireb e nge ngongliy e ra yim’.” (Prov. 11:19, BT) Arrogon, faan gad ra m’oneg u wan’dad e tin nib m’agan’ Jehovah ngay ma ra fel’ thildad maku ireray e n’en nra yognag e yafas ngodad.​—Rom. 3:23, 24.

N’en nra Buch ni Faanra Lemnag Be’ ni Ir e Ba Yal’uw

5. Mang e ba t’uf ni ngad siyeged?

⁵ Nap’an ni yol Paul ngak e pi Kristiano nu Roma me yog ni faanra nge m’on u wan’dad e tin nib m’agan’ Got ngay ma bay ban’en nib t’uf ni ngad siyeged. I weliy murung’agen e piin ni yad ni Jew ni gaar: “Rayog ni gu mang mich rorad nri yad be tiyan’rad ngak Got, machane tiyan’ ni yad be tay e ke thum’ nga wuru’ e wo’, ya dar nanged e tin riyul’. Ya dar nanged e re kanawo’ ni ir e ma mat’awnag Got e girdi’ riy ngak, ma kar guyed rogon ni ngar ngongliyed e birorad e kanawo’; ma aram e dar pied yad ko birok Got e kanawo’ ni ir e ma mat’awnag Got e girdi’ riy ngak.” (Rom. 10:2, 3) Rogon ni yog Paul e pi girdi’ nem e der nanged e n’en nib m’agan’ Got ngay ni bochan e kar pared ni tin ni yad baadag e ir e yad be rin’. *

6. Mang ngongol e ngad siyeged, ma mang fan?

⁶ Reb e kanawo’ ni rayog ni ngad awgad ko re wup ney e faanra ud taareb rogonnaged e pigpig ni gad be tay ngak Got ko pigpig ni be tay boch e girdi’. Re n’ey e rayog ni nge k’aringdad ni nge pag rogon e pagan’ rodad nge tin gad be lemnag ni rayog ni ngad rin’ed. Machane bin riyul’ riy e faanra ud ngongolgad ni aram rogon ma aram e be m’ug riy ni dada nanged e tin nib m’agan’ Jehovah ngay. (Gal. 6:3, 4) Bin nib puluw i fan ni ngaud rin’ed e tin ba mat’aw e bochan e ba t’uf Jehovah rodad. Faanra tin ni gad baadag e ir e gad be rin’, ma aram e de t’uf Got rodad.​—Mu beeg e Luke 16:15.

7. Mang e yog Jesus ngak e piin ni ur lemnaged ni yad e yad ba yal’uw?

⁷ Manang Jesus nib oloboch e “piin ni yad be tay u wan’rad ni yad e ri yad ba yal’uw ma tin ni ka bay e girdi’ e dar yal’uwgad.” Ke weliy reb e fanathin nib puluw ko girdi’ ni yad be lemnag ni yad e yad ba yal’uw ni gaar: “L’agruw i pumoon e ranow nga tempel ni ngar meybilgow; bagayow e ba Farise, ma bagayow e be’ nib tamukun tax. Me sak’iy fare Farise nga lang nge meybil rok ni gaar, Gu be pining e magar ngom, i gur Got, ni bochan e gathi gag be’ ni gub chogow, fa gu ma ban, ara gu ma darngal, ni bod ma rin’ yugu boch e girdi’; gu be pining e magar ngom ni bochan e gathi gu bod e re tamukun tax nem. Gu ma pag e abich l’agruw e rran u reb e wik, ma gu ma pi’ ngom taab guruy u ragag guruy u urngin e pi n’en ni gu ma thognag. Machane faanem nib tamukun tax e par nib orel boch me mus ni nge pug owchen nga lang ma de rin’, machane me gad pa’ nga daken ngorongoren me gaar, Got mu runguyeg, i gag e re tadenen ney! Me gaar Jesus, ‘Nggog ngomed, nre tamukun tax nem ma gathi fare Farise e sul nga tafen ni ke mat’aw ngak  Got. Ya en nra tolangnag ir e yira sobut’nag, ma en nra sobut’nag ir e yira tolangnag.’”​—Luke 18:9-14.

Faanra Yigi Pag Rogon ni Lemnag Be’ ni Ir e Ba Fel’

8, 9. Mang e be yip’ fan ni nge lemnag be’ ni ir e ba fel’, ma mang e ra rin’ ngodad?

⁸ Ku ban’en nib t’uf ni ngad siyeged e be weliy e Eklesiastes 7:16 murung’agen ni gaar: “Ere dariy rogon ni nga yigum fel’ ara pag rogon e gonop rom. Mang fan ni ngam li’em ngay?” En ni yoloy e re thin nu Bible ney e ki weliy fan ni ngad siyeged e biney e ngongol ko 20 ni gaar: “Dariy be’ u fayleng ni goo tin nib mat’aw e ma ngongliy ni gubin ngiyal’ ma der ma oloboch.” Be’ ni be lemnag ni ir e ba “fel’” e ir rok e ma dugliy ko mang e ba fel’ ma ma lemnag ni urngin ban’en nde puluw nga rogon ni be lemnag e goo ba kireb. Machane ke pagtalin ni faanra rin’ ni aram rogon ma aram e be tay ni kab fel’ e tin ni be lemnag ko tin be lemnag Got ma aram e dabiyog ni nge fel’ u wan’ Got.

⁹ Faan gad ra lemnag ni gadad e gad ba “fel’” ma rayog ni nge dabki fel’ u wan’dad rogon ni ma rin’ Jehovah boch ban’en. Dab da paged talin ni faanra maruwar u wan’dad feni mat’aw rogon ni ke dugliy Jehovah ban’en ma aram e gad be dag ni kab fel’ e tin ni gad be lemnag ko tin ni be lemnag Jehovah. Maku ra yan i bod ni gad be pufthinnag Jehovah ni rogon nib puluw ko n’en ni gad be lemnag nib fel’ fa ba kireb. Machane bin riyul’ riy e Jehovah e ir e bay mat’awun ni nge yog ko mang e ba fel’ nge mang e ba kireb, ma gathi gadad!​—Rom. 14:10.

10. Mang e rayog ni nge k’aringdad ni ngad pufthinniged Got ni bod e n’en ni rin’ Job?

¹⁰ Yugu aram rogon ni dariy bagadad ni baadag ni nge pufthinnag Got ni lem rok machane rayog ni nge buch ban’en ni aram rogon ni bochan e dawor da flontgad. Ba mom ni nge buch e re n’ey u nap’an ni gad ra guy ban’en ni ke rin’ be’ nde puluw u wan’dad fa keb e magawon nib gel ngodad. Mus ngak Job ni be’ nib yul’yul’ miki buch e re n’ey rok. Job e ir be’ ni ma “liyor ngak Got ma ba yul’yul’ ngak. I par ni ir be’ nib manigil ma be ayuw ni nge dabi rin’ ban’en nib kireb.” (Job 1:1) Machane faani yib e gafgow ngak nib gel ni ban’en nde mat’aw u wan’ ma aram me yog “ni ir e ba fel’ ma be tay e kireb nga daken Got.” (Job 32:1, 2) Ba t’uf ni nge yal’uweg Job rogon e lem rok. Ere faanra ke buch ban’en rodad ni aram rogon ma dabda gingad ngay. Machane mang e ra ayuwegdad ni nge puluw e lem rodad?

Gathi Gubin Ban’en ni Ma Buch ni Gad Manang

11, 12. (a) Faanra gad be lemnag ni bay ban’en ni de mat’aw, ma mang e ba t’uf ni ngad lemnaged? (b) Mang fan nrayog ni nge yog be’ nde mat’aw e n’en ni buch u lan fare fanathin rok Jesus?

¹¹ N’en ni som’on ni ngad lemnaged e gathi gubin ban’en ni ma buch ma gad manang. Aram e n’en ni buch rok Job. De nang murung’agen e muulung ni tay e pi engel rok Got u tharmiy ni aram e ngiyal’ ni yog Satan boch ban’en nde riyul’ u murung’agen. (Job 1:7-12; 2:1-6) De nang Job ni Satan e ir e ke k’aring e magawon ngak. Maku dabiyog ni nga dogned ni manang Job ko mini’ Satan. Ere aram fan ni yog ni Got e ir e be k’aring e gafgow ngak. Arrogon, faanra dada nanged gubin ban’en ni ke buch ma rayog ni nga dogned ban’en nde puluw.

¹² Mu lemnag fare fanathin rok Jesus u murung’agen fapi girdien e maruwel u bangi  woldug ko grapes. (Mu beeg e Matthew 20:8-16.) Re fanathin nem e weliy Jesus riy murung’agen be’ nib moon ni pi’ puluwon chon e maruwel rok ni taareb rogon ni yugu aram rogon ni boch i yad e ke maruwel ni polo’ reb e rran ma boch i yad e kemus ni taareb e awa. Uw rogon e re n’em u wan’um? Ba mat’aw e n’en ni ke rin’ fare moon, fa? Dabisiy ni som’on e ra kireban’um ngak fapi cha’ nra maruwelgad u polo’ reb e rran, ya susun ni yad e boor puluwrad ni ngan pi’. Ere rayog ni nga nog ni fare moon e be’ ni der ma runguy e girdi’ ma de mat’aw e ngongol rok. Mus ko n’en ni yog ngak chon e maruwel rok e ku rayog ni ngan lemnag riy ni be fanay mat’awun ni nge gafgownag e girdi’ ni yad bay u tan pa’. Machane, gubin ban’en ni ke buch ni gad manang, fa?

13. Uw rogon ni ngad lemnaged fare fanathin rok Jesus?

¹³ Ngad sulod ngad lemnaged fare fanathin rok Jesus nga reb e kanawo’. Dariy e maruwar riy ni manang fare moon u lan fare fanathin ni fapi girdi’ ni yad be maruwel rok e yad gubin nib t’uf ni ngar yognaged e ggan nga tabinaw rorad. Girdi’ ni yad ma maruwel u milay’ u nap’an Jesus e yima pi’ puluwrad u gubin e rran. Ere chi puluwrad ni yima pi’ u reb e rran ngu reb e aram e n’en ni ma taga’ e tabinaw rorad ngay. Am lemnag fapi cha’ ni fin ra bad ra uned ko maruwel ko tomur mar maruwelgad ni kemus ni taareb e awa. Ba mudugil ni dabiyog ni ngar chuw’iyed e ggan ni fan ko tabinaw rorad nga puluwrad ko maruwel ni kar ted u taareb e awa. Ma dabisiy ni ur songad ni ngar maruwelgad, ma fin aram e ngiyal’ ni kan fekrad ko maruwel. (Matt. 20:1-7) Gathi yad e kireb rorad ni dar maruwelgad ni polo’ reb e rran. Dariy bang u Bible ni be yog ni yad e lem rorad ni dab ra maruwelgad. Am lemnag ni ngam son ni polo’ reb e rran ni ngam un nga barba’ e maruwel ma bay e tabinaw rom ni ku yad be sonnag e chuuw i salpiy ni ga ra yognag ko re rran nem. Ri ga ra felfelan’ u nap’an ni kam maruwel, ma kam gin nga puluwom ya damur lemnag ni yira pi’ nib gaman nga puluwon e ggan ni fan ko tabinaw rom.

14. Mang e gad ra fil ko fare fanathin ni murung’agen girdien e maruwel u milay’ ko grapes?

¹⁴ Chiney e ngkud sulod ngad lemnaged e n’en ni rin’ fare moon. Dariy bagayad fapi girdien e maruwel ni pi’ puluwon nib lich nga urngin puluwon ni susun e nge pi’. Ya manang ni yad gubin nib t’uf e salpiy rorad. Bochan ni boor chon e maruwel ma rayog ni nge pi’ fare moon puluwon e tin baaram e girdi’ ni fin ra bad ra uned ko maruwel ko tomur nib sobut’. Machane de rin’ ni aram rogon, ya pi’ puluwrad ni taareb rogon ma ba gaman nrayog ni ngar chuw’iyed e ggan ngay ni fan ko tabinaw rorad. Faan gad ra fal’eg i lemnag e pi n’ey ma rayog ni ngad nanged fan ni ke rin’ fare moon e n’en ni ke rin’. N’en ni ke rin’ e ke rin’ u fithik’ e t’ufeg ma gathi be fanay mat’awun ni nge gafgownag e girdi’ ni bay u tan pa’. Ere mang e gad ra fil ko re n’ey? Faanra yugu mu guy ban’en ma ga turguy fan u wan’um, ma rayog ni ngam oloboch. Re fanathin ney e be tamilangnag feni mat’aw rogon ni ma dugliy Jehovah ban’en, ni aram e gathi ke mus ni be yan u rogon nib puluw ko motochiyel nge rogon nib m’ag ko girdi’.

 Rayog ni Nge Aw nde Puluw Rogon ni Gad Be Lem Maku Bay e Gin ni Ma Mus Riy

15. Mang fan ni yu ngiyal’ e de puluw rogon ni gad ma lem ma bay e gin ni ma mus riy?

¹⁵ N’en ni migid ni ngad lemnaged u nap’an ni kad mada’naged e magawon ni aray rogon, e aram e yu ngiyal’ e rayog ni nge aw nde puluw rogon ni gad be lem maku bay e gin ni ma mus riy. Fan ni der ma puluw rogon ni gad ma lem yu ngiyal’ e bochan ni dawor da flontgad, ma gad ma laniyan’, ma kub thil e yalen rodad. Ma fan ni bay e gin ni ma mus e lem rodad riy e bochan ni dada nanged fan ni ma rin’ be’ ban’en ya dabiyog ni ngad guyed e n’en ni bay u gum’irchaen e girdi’. Machane Jehovah nge Jesus e yow ba thil ni bochan e gubin e pi n’ey nrayog rorow.​—Prov. 24:12; Matt. 9:4; Luke 5:22.

16, 17. Nap’an ni denen David nge Bathsheba, ma mang fan nde rin’ Jehovah e n’en ni bay ko motochiyel ni ngan rin’ ni faanra ke par be’ nge be’ ni gathi mabgol rok?

¹⁶ Ngad fal’eged i lemnag e denen ni rin’ David nge Bathsheba. (2 Sam. 11:2-5) Rogon ni bay ko Motochiyel Nni Pi’ Ngak Moses e susun ni ngan thang e fan rorow. (Lev. 20:10; Deut. 22:22) Yugu aram rogon ni gechignagrow Got, machane de rin’ nrogon ni bay ko motochiyel. Ere gur, de mat’aw e n’en ni rin’ Jehovah? I togopluw ko motochiyel rok nib mat’aw ni bochan e nge fol ngak David, fa? Bay boch e girdi’ ni ma lemnag ni aram rogon.

¹⁷ Re motochiyel nem ni murung’agen be’ ni kar parew be’ ni gathi mabgol rok e pi’ Jehovah ngak bogi tapuf oloboch ndawor ra flontgad ma dabiyog ni ngar guyed e n’en ni bay u gum’irchaen e girdi’. Machane dabiyog ni nge thil rogon e pufthin ni yad ma tay ni bochan e re motochiyel nem ni bay ni ke pi’ Jehovah. Me Jehovah e ba thil, ya rayog ni nge guy e n’en ni bay u gum’irchaen e girdi’. (Gen. 18:25; 1 Kron. 29:17) Ere dabda lemnaged nib t’uf ni nge fol Jehovah ko motochiyel ni ke ngongliy ni fan ngak e pi ta puf oloboch ndawor ra flontgad. Ya faanra rin’ ni aram rogon ma bod ni kan towasariy be’ ni nge fanay e teligiy ndawori kireb lanmit. Rayog ni nge guy Jehovah e n’en ni bay u gum’irchaen David nge Bathsheba ma manang nriyul’ ni kar kalgow ngan’row. Ere aram fan ni pufthinnagrow u fithik’ e runguy nge t’ufeg.

Mu Ulul Ngay Ngam M’oneg u Wan’um e Tin nib M’agan’ Jehovah Ngay

18, 19. Mang e ra ayuwegdad ni nge dabda turguyed fan e n’en ni ke rin’ Jehovah nrogon ni gad be lemnag?

¹⁸ Faanra kad beeged ban’en u Bible fa ke buch ban’en rodad ni be yan i aw ni gowa kireb rok Jehovah ma dab da turguyed e kireb nga daken Jehovah ni bod rogon ni gad be lemnag. Dab mu pagtalin ni gathi gubin ban’en ni ma buch ni gad manang, maku yu ngiyal’ e de puluw rogon ni gad ma lem, maku bay e gin ni ma mus e lem rodad riy. Maku dab mu pagtalin ni “damumuw rok e girdi’ e dar ma ayuweg e girdi’ nge yog nra ngongliyed e tin nib mat’aw ni ir e be finey Got.” (Jas. 1:19, 20) Faanra arrogon ma aram e dab ‘don’ed e kireb riy nga daken’ Jehovah.​—Prov. 19:3.

¹⁹ Thingar da nanged ni kemus ni goo Jehovah e bay mat’awun ni nge turguy e tin nib mat’aw mab fel’ ni bod rogon ni i rin’ Jesus. (Mark 10:17, 18) Mu athamgil ngam nang e “tin riyul’” u murung’agen gubin ban’en ni ma rin’ Jehovah. (Rom. 10:2; 2 Tim. 3:7) Faan gad ra rin’ e pi n’ey, ma gad ngongol nib puluw ko tin nib m’agan’ Jehovah ngay, ma aram e be m’ug riy ni gad be m’oneg u wan’dad e “tin nib m’agan’ ngay.” ​—Matt. 6:33.

[Footnote]

Ka Ga Manang?

• Mang nib ga’ fan ni ngad m’oneged u wan’dad e tin nib m’agan’ Jehovah ngay?

• Mang l’agruw ban’en nib t’uf ni ngad siyeged?

• Uw rogon ni ngad m’oneged u wan’dad e tin nib m’agan’ Got ngay?

[Study Questions]

[Picture on page 17]

Mang e gad ra fil ko fare fanathin rok Jesus ni murung’agen fagal pumoon ni ur meybilgow u lan e tempel?

[Picture on page 18]

Gur, de mat’aw ni ngan pi’ puluwon e piin nra maruwelgad ni kemus ni taareb e awa ni bod puluwon e piin nra maruwelgad ni polo’ reb e rran?