Makapabakod Ka Bala sa tion sang mga Miting?
Makapabakod Ka Bala sa Tion sang mga Miting?
“Kon nagatipon kamo, . . . himua ang tanan nga butang para sa pagpabakod.”—1 COR. 14:26.
1. Suno sa 1 Corinto kapitulo 14, ano ang isa ka importante nga katuyuan sang Cristianong mga miting?
‘MAKAPALIG-ON gid yadto nga miting!’ Amo man bala sina ang nabatyagan mo pagkatapos sang inyo miting sa Kingdom Hall? Wala sing duhaduha nga nabatyagan mo man ina! Huo, indi kita dapat matingala kon ngaa makapalig-on gid ang mga miting sang kongregasyon. Kaangay sang una nga mga Cristiano, ang katuyuan sang aton mga miting sa karon amo man ang pagpalig-on sa espirituwal sa tanan nga nagatambong. Talupangda kon paano ginpadaku ni apostol Pablo sa iya una nga sulat sa mga taga-Corinto ang espesipiko nga tulumuron sang Cristianong mga miting. Sa kapitulo 14 sulitsulit sia nga nagsiling nga ang kada bahin sa mga miting sang kongregasyon may pareho nga katuyuan—“agod mapabakod ang kongregasyon.”—Basaha ang 1 Corinto 14:3, 12, 26. *
2. (a) Ang makapalig-on nga mga miting resulta sang ano? (b) Ano nga pamangkot ang aton binagbinagon?
2 Una sa tanan, nahangpan naton nga ang makapabakod, ukon makapalig-on nga mga miting resulta sang panuytoy sang espiritu sang Dios. Gani, ginabuksan naton ang tagsa ka miting paagi sa tinagipusuon nga pangamuyo kay Jehova nga nagapangabay sa iya nga pakamaayuhon ang aton pagtinipon paagi sa iya balaan nga espiritu. Apang, nahibaluan naton nga ang tanan nga katapo sang kongregasyon sarang makapakigbahin agod mangin makapabakod ang aton mga miting. Kon amo, ano nga mga tikang ang puede mahimo sang kada isa sa aton agod mapat-od nga ang mga miting kada semana nga ginahiwat sa Kingdom Hall mangin tuburan sang espirituwal nga paumpaw kag pagpalig-on?
3. Daw ano ka importante ang Cristianong mga miting?
3 Agod masabat ina nga pamangkot, usisaon naton ang pila ka aspekto sang aton mga miting nga dapat dumdumon sang mga nagadumala sini. Binagbinagon man naton kon paano makapakigbahin ang bug-os nga kongregasyon agod mangin makapalig-on ang mga miting sa tanan nga nagatambong. Ini nga topiko makapainteres gid sa aton bangod sagrado ang aton mga miting. Huo, ang pagtambong kag pagpakigbahin sa mga miting importante nga mga bahin sang aton pagsimba kay Jehova.—Sal. 26:12; 111:1; Isa. 66:22, 23.
Isa ka Miting nga Gindesinyo Para sa Pagtuon sa Biblia
4, 5. Ano ang katuyuan sang Pagtinuon sa Lalantawan?
4 Luyag naton tanan nga makabenepisyo kita sing bug-os sa Pagtinuon sa Lalantawan kada semana. Agod mahangpan naton ang panguna nga katuyuan sini nga miting, repasuhon anay naton ang pila ka pagbag-o sining karon lang sa Lalantawan nga magasin kag sa tulun-an nga mga artikulo.
5 Umpisa sa una nga tulun-an nga edisyon sang Ang Lalantawan, sa Enero 15, 2008 nga gua, ginlakip ang isa ka importante nga detalye sa panghapin. Natalupangdan mo bala ini? Tan-awa ang panghapin sang magasin nga imo ginauyatan. Makita mo ang laragway sang torre kag sa ubos sini may nakabukas nga Biblia. Ginapadaku sina ang rason kon ngaa may yara kita Pagtinuon sa Lalantawan. Ini nga magasin nagabulig sa aton nga tun-an ang Biblia. Huo, sa aton Pagtinuon sa Lalantawan kada semana, ang Pulong sang Dios ‘ginapaathag kag ginahatagan sing kahulugan’ pareho sang panahon ni Nehemias.—Neh. 8:8, NW; Isa. 54:13.
6. (a) Ano nga pagbag-o ang ginhimo sa Pagtinuon sa Lalantawan? (b) Ano ang dapat naton dumdumon tuhoy sa mga teksto nga ginmarkahan sing “basaha”?
6 Bangod ang Biblia amo ang panguna naton nga ginatun-an, may pagbag-o nga ginhimo sa aton Pagtinuon sa Lalantawan. Ang pila ka teksto sa tulun-an nga mga artikulo ginmarkahan sing “basaha.” Ginapalig-on kita tanan nga sundan sa aton kaugalingon nga kopya sang Biblia ang pagbasa sining mga teksto sa tion sang pagtinuon. (Binu. 17:11) Ngaa? Kay kon makita naton ang laygay sang Dios sa aton mismo Biblia, mas madalom ang epekto sini sa aton. (Heb. 4:12) Gani, antes ipabasa sing matunog inang mga teksto, dapat hatagan sing bastante nga tion sang nagadumala ang tanan nga tumalambong nga makita ining mga teksto agod masundan nila ang pagbasa.
Mas Madamo Na ang Aton Tion sa Pagkomento
7. Ano ang aton kahigayunan sa tion sang Pagtinuon sa Lalantawan?
7 Sining karon lang, ginbag-o man ang kalabaon sang tulun-an nga mga artikulo sa Lalantawan. Ginpalip-ot na ini. Amo nga sa tion sang pagtinuon, mas malip-ot na ang tion sa pagbasa sang mga parapo kag mas malawig na ang tion para sa pagkomento. Mas madamo na karon ang may kahigayunan nga makapabutyag sang ila pagtuo paagi sa pagsabat sa naimprinta nga mga pamangkot, pagkomento kon paano iaplikar ang isa ka teksto, pagsugid sang malip-ot nga eksperiensia nga nagapakita sing maayo nga resulta sa pagsunod sa mga prinsipio sa Biblia, ukon iban pa. Dapat man hatagan sing tion ang pagbinagbinag sa mga laragway.—Basaha ang Salmo 22:22; 35:18; 40:9.
8, 9. Ano ang papel sang nagadumala sa Pagtinuon sa Lalantawan?
8 Apang, mas madamo ang makakomento kon ang kada isa magkomento sing malip-ot kag kon likawan sang nagadumala nga magkomento pirme sa tion sang Pagtinuon sa Lalantawan. Gani, ano ang makabulig sa nagadumala nga balansehon ang iya mga komento sa mga komento sang tumalambong agod mangin makapabakod ang miting para sa tanan?
9 Binagbinagon naton ang isa ka ilustrasyon. Ang Pagtinuon sa Lalantawan nga nadumalahan sing maayo mapaanggid naton sa isa ka matahom nga pungpong sang mga bulak. Subong nga ang daku nga pungpong sang mga bulak ginahuman sang madamo nga nanuhaytuhay nga bulak, ang Pagtinuon sa Lalantawan ginahuman man sang madamo nga nanuhaytuhay nga komento. Kag subong nga ang kada bulak sa pungpong nanuhaytuhay ang kadakuon kag kolor, ang mga komento sa pagtinuon nanuhaytuhay man ang kalabaon kag pamaagi. Kag ano naman ang papel sang nagadumala? Ang iya panalagsa nga komento mapaanggid naton sa mga dahon nga gindugang sa pungpong sang mga bulak. Ini nga mga dahon wala nagatabon sa mga bulak; sa baylo amo ini ang nagabulig agod mahugpong kag mangin matahom ang bilog nga pungpong. Sing kaanggid, dapat tandaan sang nagadumala nga ang iya komento indi amo ang dapat mangibabaw, sa baylo ang iya papel amo lang ang paghugpong sa komento sang tumalambong. Huo, kon tingubon ang nanuhaytuhay nga komento sang tumalambong kag ang pila ka nagakaigo nga komento sang nagadumala, kaangay ini sa matahom nga pungpong sang mga tinaga nga magapahalipay sa tanan nga tumalambong.
“Magdulot Kita Pirme sa Dios sang Halad sang Pagdayaw”
10. Paano gintamod sang mga Cristiano sang una ang mga miting sang kongregasyon?
10 Sa 1 Corinto 14:26-33 ginlaragway ni Pablo kon paano gindumalahan ang Cristianong mga miting sang unang siglo. Tuhoy sa sini nga mga bersikulo, ang isa ka iskolar sa Biblia nagkomento nga ang talalupangdon sa mga miting sang una nga mga Cristiano “amo nga ang halos tanan nagabatyag nga may yara sila pribilehiyo kag obligasyon nga magpakigbahin sa sini. Wala lamang sila nagatambong para mamati; nagatambong sila para maghatag, indi lamang para magbaton.” Huo, gintamod sang mga Cristiano sang una ang mga miting sang kongregasyon subong mga kahigayunan sa pagpabutyag sang ila pagtuo.—Roma 10:10.
11. (a) Ano ang makabulig sing daku agod mangin makapabakod ang aton mga miting, kag ngaa? (b) Ano nga mga panugda ang makabulig agod mapauswag naton ang aton mga komento sa mga miting? (Tan-awa ang footnote.)
11 Ang aton mga komento sa tion sang mga miting makabulig sing daku “agod mapabakod ang kongregasyon.” Pat-od gid nga magaugyon kamo nga bisan ano na kita kadugay nga nagatambong sa mga miting, makalilipay gihapon pamatian ang mga komento sang aton mga kauturan. Matandog gid kita kon makabati kita sang tinagipusuon nga komento sang isa ka may edad na kag matutom nga utod; mapalig-on kita sa maunod nga komento sang isa ka matinatapon nga gulang; kag makayuhum gid kita kon ang isa ka bata magsabat sa iya kaugalingon nga mga tinaga nga nagapabutyag sang iya tinagipusuon nga gugma kay Jehova. Huo, paagi sa aton mga komento, makabulig kita tanan agod mangin makapabakod ang Cristianong mga miting. *
12. (a) Ano ang matun-an naton sa halimbawa nanday Moises kag Jeremias? (b) Ano ang papel sang pangamuyo sa aton pagkomento?
12 Apang mabudlay gid ang pagkomento para sa mga mahuluy-on. Kon mahuluy-on ka, dumduma nga indi lang ikaw ang nagabatyag sini. Bisan gani ang matutom nga mga alagad sang Dios subong nanday Moises kag Jeremias wala anay sing pagsalig sa ila ikasarang sa paghambal sa publiko. (Ex. 4:10; Jer. 1:6) Apang, ginbuligan sila ni Jehova nga dayawon sia sa publiko kag makasalig ka nga buligan ka man niya. (Basaha ang Hebreo 13:15.) Paano mo mabaton ang bulig ni Jehova agod malandas ang imo kulba sa pagkomento? Una, handai sing abanse ang mga miting. Dayon, antes ka magkadto sa Kingdom Hall, mangamuyo ka kay Jehova nga hatagan ka sing kaisog sa pagkomento. (Fil. 4:6) Bangod ang imo pangabay “suno sa iya kabubut-on,” makasalig ka nga sabton ini ni Jehova.—1 Juan 5:14; Hulu. 15:29.
Mga Miting nga ‘Nagapabakod, Nagapalig-on, kag Nagalipay’
13. (a) Ano dapat ang epekto sang aton mga miting sa mga nagatambong? (b) Ano nga pamangkot ang dapat binagbinagon sang mga gulang?
13 Si Pablo nagsiling nga ang importante nga katuyuan sang mga miting amo ang ‘pagpabakod, pagpalig-on, kag paglipay’ sa mga nagatambong. * (1 Cor. 14:3) Gani, paano mapat-od sang Cristianong mga gulang sa karon nga ang ila mga bahin makapalig-on kag makapaumpaw sa mga kauturan? Agod masabat ini, binagbinagon naton ang isa ka miting nga gindumalahan ni Jesus sa tapos sia mabanhaw.
14. (a) Ano ang natabo antes nagpatawag si Jesus sang miting? (b) Ngaa naumpawan gid ang mga apostoles sang “si Jesus nagpalapit kag naghambal sa ila”?
14 Una, talupangda ang natabo antes sina nga miting. Antes ginpatay si Jesus, ang iya mga apostoles “nagbiya sa iya kag nagpalagyo,” kag subong sa gintagna, ‘nag-alaplaag ang kada isa sa ila sa iya kaugalingon nga balay.’ (Mar. 14:50; Juan 16:32) Apang, pagkatapos sang iya pagkabanhaw, gin-agda ni Jesus ang iya nasubuan nga mga apostoles para sa isa ka pinasahi nga miting. * Nian, “ang napulog-isa ka disipulo nagkadto sa Galilea sa bukid nga ginsiling ni Jesus sa ila.” Pag-abot nila didto, “si Jesus nagpalapit kag naghambal sa ila.” (Mat. 28:10, 16, 18) Handurawa kon daw ano nga kaumpawan ang nabatyagan sang mga apostoles sang si Jesus ang nag-una sa pagpakighambal sa ila! Ano ang ginhinun-anunan ni Jesus upod sa ila?
15. (a) Ano ang ginbinagbinag ni Jesus upod sa iya mga apostoles, apang ano ang wala niya ginsambit? (b) Ano ang epekto sina nga miting sa mga apostoles?
15 Nagsugod si Jesus paagi sa pagpahibalo: “Ginhatag sa akon ang bug-os nga awtoridad.” Dayon ginhatagan niya sila sing sugo: “Busa lakat kamo kag maghimo sang mga disipulo.” Pagkatapos sini, ginhatagan niya sila sing mahigugmaon nga pasalig: “Ako kaupod ninyo sa tanan nga adlaw.” (Mat. 28:18-20) Apang natalupangdan mo bala kon ano ang wala ginhimo ni Jesus? Wala niya gin-akigan ang iya mga apostoles; wala man niya gingamit ini nga miting agod duhaduhaan ang ila motibo ukon pakonsiensiahon sila paagi sa pagpahanumdom sang ila ginhimo nga pagbiya sa iya. Sa baylo, ginpasalig sila ni Jesus nga ginahigugma niya sila kag sang iya Amay paagi sa paghatag sa ila sing importante nga sugo. Ano ang epekto sini sa iya mga apostoles? Napabakod gid sila, napalig-on, kag naumpawan amo nga sa tapos sina nga miting ‘nagpanudlo sila kag nagbantala sing maayong balita.’—Binu. 5:42.
16. Paano ginailog sang mga gulang sa karon ang halimbawa ni Jesus sa pagdumala sang makapaumpaw nga mga miting?
16 Bilang pag-ilog kay Jesus, ginagamit man karon sang mga gulang ang mga miting agod pasaligon ang ila mga masigkatumuluo nga ang gugma ni Jehova sa iya katawhan wala gid nagakapaslawan. (Roma 8:38, 39) Gani, kon ang mga gulang nagahatag sing bahin, nagakonsentrar sila sa maayo nga mga kinaiya kag indi sa mga kaluyahon sang ila kauturan. Wala nila ginaduhaduhaan ang motibo sang ila kauturan. Sa baylo, ginapakita nila paagi sa ila mga pulong nga ginatamod nila ang ila mga kauturan subong mga indibiduwal nga nagahigugma kay Jehova kag nagahimo kon ano ang husto. (1 Tes. 4:1, 9-12) Huo, kon kaisa kinahanglan laygayan sang mga gulang ang bug-os nga kongregasyon, apang kon pila lang ka indibiduwal ang nagakinahanglan sing laygay, mas maayo nga himuon na lang nila ini sing pribado. (Gal. 6:1; 2 Tim. 2:24-26) Kon ang pamulongpulong sang mga gulang ginapatuhoy sa bug-os nga kongregasyon, ginatinguhaan nila nga maghatag sing komendasyon tubtob posible. (Isa. 32:2) Ginatinguhaan nila nga mangin makapalig-on ang ila mga bahin agod nga sa tapos sang miting ang tanan nga tumalambong makabatyag sing kaumpawan kag kapagsik.—Mat. 11:28; Binu. 15:32.
Isa ka Makapaumpaw nga Duog
17. (a) Ngaa mas importante karon nga ang aton mga miting mangin makapaumpaw? (b) Ano ang sarang mo mahimo agod mangin makapabakod ang mga miting? (Tan-awa ang kahon nga “Napulo ka Paagi Agod Mangin Makapabakod ang mga Miting Para sa Imo kag sa Iban.”)
17 Samtang labi nga nagabudlay ang pag-ipit sa kalibutan ni Satanas, dapat naton pat-uron nga ang aton Cristianong mga pagtinipon mangin isa ka makapaumpaw nga duog para sa tanan. (1 Tes. 5:11) Ang isa ka utod nga babayi nga naglandas sang mabudlay nga pagtilaw upod sa iya bana, naghinumdom: “Kon yara kami sa Kingdom Hall, pamatyag namon ginaalay-ay kami ni Jehova sa iya mga kamot. Sa mga oras nga didto kami, nga ginapalibutan sang amon Cristianong mga kauturan, nagabatyag kami nga mahimo namon itugyan ang amon lulan kay Jehova, kag may yara kami nasulod nga kalinong.” (Sal. 55:22) Kabay nga makabatyag man sing pagpalig-on kag kaumpawan ang tanan nga nagatambong sa aton mga miting. Agod mapat-od ini, padayon naton nga himuon ang aton bahin nga mangin makapabakod sa aton Cristianong mga miting.
[Mga Nota]
^ par. 1 Gintagna nga ang pila ka bahin sang Cristianong mga miting sang unang siglo magauntat. Halimbawa, wala na kita ‘nagahambal sing lainlain nga hambal’ ukon ‘nagapanagna.’ (1 Cor. 13:8; 14:5) Walay sapayan sina, ang mga instruksion ni Pablo makabulig sa aton nga mahangpan kon paano dumalahan ang Cristianong mga miting sa karon.
^ par. 11 Para sa mga panugda kon paano mapauswag ang aton komento sa mga miting, tan-awa ang Septiembre 1, 2003, nga Ang Lalantawan, pahina 19-22.
^ par. 13 Tuhoy sa kinatuhayan sang “pagpalig-on” kag “paglipay,” ang Vine’s Expository Dictionary of Old and New Testament Words nagapaathag nga ang Griegong tinaga nga ginbadbad “paglipay” nagapahangop sing “mas madalom nga pag-ulikid sangsa [pagpalig-on].”—Ipaanggid ang Juan 11:19.
^ par. 14 Mahimo amo ini nga miting ang ginpatuhuyan ni Pablo sang nagsiling sia nga “nagpakita [si Jesus] sa kapin sa lima ka gatos.”—1 Cor. 15:6.
Ano ang Imo Sabat?
• Daw ano ka importante ang Cristianong mga miting?
• Ngaa ang pagkomento sa tion sang mga miting makabulig sa ‘pagpabakod sang kongregasyon’?
• Ano ang aton matun-an sa miting nga gindumalahan ni Jesus upod sa iya mga sumulunod?
[Mga Pamangkot sa Pagtinuon]
[Kahon/Mga Retrato sa pahina 22, 23]
NAPULO KA PAAGI AGOD MANGIN MAKAPABAKOD ANG MGA MITING PARA SA IMO KAG SA IBAN
Maghanda sing abanse. Kon tun-an mo sing abanse ang materyal nga pagabinagbinagon sa Kingdom Hall, makakonsentrar ka sing maayo sa mga miting kag mas madumduman mo ini.
Magtambong sing regular. Bangod mas makapalig-on kon madamo ang nagatambong, importante gid ang imo presensia.
Mag-abot sa eksakto nga oras. Ang nagabukas nga ambahanon kag pangamuyo bahin sang aton pagsimba kay Jehova. Gani, mas maayo kon nakapungko ka na antes mag-umpisa ang programa para makabuylog ka sa sini.
Dal-a ang tanan nga reperensia. Dal-a ang imo Biblia kag ang publikasyon nga gamiton sa miting agod masundan mo kag mahangpan sing maayo ang ginabinagbinag.
Likawi ang mga tublag. Halimbawa, indi pagbasaha ang text sa imo cell phone samtang nagamiting. Ibutang sa nagakaigo nga lugar ang imo personal nga mga hilikuton.
Magpakigbahin. Kon madamo ang nagakomento, mas madamo ang mapalig-on kag mapabakod.
Magkomento sing malip-ot. Kon malip-ot ang imo komento, mas madamo ang makapakigbahin.
Tungdi ang imo mga bahin. Kon may bahin ka sa Teokratikong Eskwelahan Para sa Ministeryo ukon sa Miting sa Serbisyo, handai ini sing maayo, ensayuha sing abanse, kag tubtob posible indi mag-absent.
Hatagi sing komendasyon ang mga may bahin. Ipabutyag sa mga naghatag sing bahin ukon sa mga nagkomento nga ginaapresyar mo ang ila mga panikasog.
Makigsugilanon sa iban nga nagatambong. Ang mainayuhon nga pagtamyaw kag makapalig-on nga pagpakigsugilanon antes kag pagkatapos sang miting nagadugang sa kalipay kag mga benepisyo sang mga tumalambong.
