តើអ្នករួមចំណែកក្នុងការពង្រឹងកម្លាំងចិត្តគ្នានៅឯកិច្ចប្រជុំឬទេ?
តើអ្នករួមចំណែកក្នុងការពង្រឹងកម្លាំងចិត្តគ្នានៅឯកិច្ចប្រជុំឬទេ?
«ពេលដែលអ្នករាល់គ្នាជួបជុំគ្នា . . . ចូរធ្វើអ្វីៗទាំងអស់ដើម្បីពង្រឹងកម្លាំងចិត្តគ្នាទៅវិញទៅមក»។—១កូ. ១៤:២៦
១. យោងទៅតាមកូរិនថូសទី១ ជំពូកទី១៤ តើអ្វីជាគោលដៅសំខាន់នៃកិច្ចប្រជុំគ្រិស្តសាសនិក?
គ្រិស្តសាសនិកម្នាក់បានស្រដីថា៖ ‹កិច្ចប្រជុំនេះបានពង្រឹងកម្លាំងចិត្តខ្ញុំណាស់!› តើអ្នកធ្លាប់មានអារម្មណ៍ដូចគាត់ឬទេបន្ទាប់ពីបានមកប្រជុំ? អ្នកប្រាកដជាធ្លាប់មាន! នេះគឺជាការធម្មតាទេដែលកិច្ចប្រជុំក្រុមជំនុំផ្ដល់កម្លាំងចិត្តឲ្យយើង។ យ៉ាងណាមិញ ដូចនៅសម័យពួកគ្រិស្តសាសនិកនាសតវត្សរ៍ទី១ដែរ គោលដៅដ៏សំខាន់នៃកិច្ចប្រជុំរបស់យើងសព្វថ្ងៃនេះ គឺដើម្បីពង្រឹងកម្លាំងនិងពង្រឹងជំនឿរបស់បងប្អូនទាំងអស់ដែលមានវត្តមាន។ សូមកត់សម្គាល់នូវរបៀបដែលសាវ័កប៉ូលគូសបញ្ជាក់គោលដៅជាក់លាក់នៃកិច្ចប្រជុំគ្រិស្តសាសនិក ក្នុងសំបុត្រទី១របស់គាត់ទៅបងប្អូនរួមជំនឿនៅក្រុងកូរិនថូស។ ក្នុងជំពូកទី១៤ គាត់បានពោលម្ដងហើយម្ដងទៀតថា ផ្នែកនីមួយៗនៃកិច្ចប្រជុំគួរមានគោលដៅដូចគ្នា ពោលគឺ«ដើម្បីពង្រឹងកម្លាំងចិត្តក្រុមជំនុំ»។—សូមអាន កូរិនថូសទី១ ១៤:៣, ១២, ២៦ *
២. (ក) យើងអាចមានកិច្ចប្រជុំដែលពង្រឹងកម្លាំងចិត្តបាន តើដោយសារអ្វី? (ខ) តើយើងនឹងពិចារណាសំណួរអ្វី?
២ មុនដំបូង យើងទទួលស្គាល់ថា យើងមានកិច្ចប្រជុំដែលពង្រឹងកម្លាំងចិត្តគឺដោយសារឥទ្ធិពលនៃសកម្មពលរបស់ព្រះ។ ហេតុនេះ យើងចាប់ផ្ដើមកិច្ចប្រជុំនីមួយៗដោយអធិដ្ឋានយ៉ាងស្មោះអស់ពីដួងចិត្តទៅព្រះយេហូវ៉ា ហើយសុំបិតារបស់យើងនៅស្ថានសួគ៌ឲ្យពរដល់កិច្ចប្រជុំរបស់យើង តាមរយៈសកម្មពលបរិសុទ្ធរបស់លោក។ ប៉ុន្តែ យើងដឹងថាសមាជិកទាំងឡាយនៃក្រុមជំនុំអាចរួមចំណែកដើម្បីធ្វើឲ្យកម្មវិធីនៃកិច្ចប្រជុំពង្រឹងកម្លាំងចិត្តបងប្អូនរួមជំនឿ ឲ្យបានច្រើនបំផុត។ ដូច្នេះ តើយើងម្នាក់ៗអាចធ្វើអ្វីដើម្បីប្រាកដថាកិច្ចប្រជុំប្រចាំសប្ដាហ៍របស់យើង តែងតែជាប្រភពនៃការពង្រឹងជំនឿនិងការលើកទឹកចិត្ត?
៣. តើកិច្ចប្រជុំរបស់យើងសំខាន់ប៉ុណ្ណា?
៣ ដើម្បីឆ្លើយសំណួរនេះ យើងនឹងពិចារណាលក្ខណ:ខ្លះនៃកិច្ចប្រជុំដែលអ្នកដឹកនាំកិច្ចប្រជុំគួរចាំ។ យើងក៏នឹងពិចារណានូវរបៀបដែលបងប្អូនទាំងអស់ក្នុងក្រុមជំនុំអាចរួមចំណែកក្នុងការលើកទឹកចិត្តអស់អ្នកដែលមកកិច្ចប្រជុំ។ យើងចាប់អារម្មណ៍យ៉ាងខ្លាំងនូវចំណុចនេះដោយសារកិច្ចប្រជុំរបស់យើងជាការជួបជុំគ្នាមួយដ៏ពិសិដ្ឋ។ ប្រាកដហើយ ការទៅកិច្ចប្រជុំ ថែមទាំងចូលរួមក្នុងកិច្ចប្រជុំដោយឆ្លើយចម្លើយ គឺជាលក្ខណៈសំខាន់នៃការគោរពប្រណិប័តន៍ព្រះយេហូវ៉ា។—ទំនុក. ២៦:១២; ១១១:១; អេ. ៦៦:២២, ២៣
កិច្ចប្រជុំមួយដែលបានត្រូវរៀបចំឡើងដើម្បីសិក្សាគម្ពីរ
៤, ៥. តើការសិក្សាទស្សនាវដ្ដីប៉មយាមមានគោលដៅអ្វី?
៤ យើងទាំងអស់គ្នាចង់ទទួលប្រយោជន៍យ៉ាងពេញលេញពីការសិក្សាប្រចាំសប្ដាហ៍នៃទស្សនាវដ្ដីប៉មយាម។ អាស្រ័យហេតុនេះ ដើម្បីយល់ច្បាស់នូវគោលដៅសំខាន់ចម្បងនៃកិច្ចប្រជុំនោះ សូមយើងពិនិត្យមើលពីមូលហេតុដែលយើងមានការសិក្សាទស្សនាវដ្ដីប៉មយាម ព្រមទាំងការផ្លាស់ប្ដូរខ្លះៗដែលមាននៅក្នុងអត្ថបទសិក្សា។
៥ មូលហេតុដែលយើងមានការសិក្សាទស្សនាវដ្ដីប៉មយាមគឺដើម្បីសិក្សាគម្ពីរបរិសុទ្ធ តាមរយៈទស្សនាវដ្ដីនេះ។ ត្រូវហើយ នៅការសិក្សាប្រចាំសប្ដាហ៍នៃទស្សនាវដ្ដីប៉មយាម យើង«ស្រាយន័យសេចក្ដី»នៃបណ្ដាំរបស់ព្រះ ដូចនៅសម័យនេហេមានាបុរាណកាល។—៦. (ក) តើការសិក្សាទស្សនាវដ្ដីប៉មយាមមានការផ្លាស់ប្ដូរអ្វី? (ខ) តើយើងគួរចាំអ្វីស្តីអំពីបទគម្ពីរដែលមានពាក្យ«សូមអាន»?
៦ គម្ពីរជាសៀវភៅសំខាន់បំផុតរបស់យើង ហេតុនេះហើយបានជាមានការផ្លាស់ប្ដូរនៅក្នុងការសិក្សាទស្សនាវដ្ដីប៉មយាម។ ក្នុងអត្ថបទសិក្សាមានពាក្យ«សូមអាន»នៅមុខបទគម្ពីរមួយចំនួន។ គឺជាការល្អឲ្យយើងផ្ទៀងតាមក្នុងគម្ពីររបស់យើងផ្ទាល់ កាលដែលគេអានបទគម្ពីរនោះនៅកិច្ចប្រជុំ។ (សកម្ម. ១៧:១១) ហេតុអ្វី? គឺដោយសារពេលយើងឃើញដំបូន្មានព្រះក្នុងគម្ពីររបស់យើង នោះមានឥទ្ធិពលខ្លាំងជាងមកលើយើង។ (ហេ. ៤:១២) ដូច្នេះ មុនអានបទគម្ពីរទាំងនោះ អ្នកដឹកនាំការសិក្សាគួរទុកពេលគ្រប់គ្រាន់ឲ្យបងប្អូនទាំងអស់បើកខគម្ពីរ ហើយផ្ទៀងតាម កាលដែលគេអានខនោះ។
មានពេលច្រើនជាងមុនដើម្បីបង្ហាញជំនឿរបស់យើង
៧. ក្នុងអំឡុងការសិក្សាទស្សនាវដ្ដីប៉មយាម តើយើងមានឱកាសធ្វើអ្វី?
៧ ការផ្លាស់ប្ដូរមួយទៀតដែលមានក្នុងអត្ថបទសិក្សានៃទស្សនាវដ្ដីប៉មយាម គឺប្រវែងនៃអត្ថបទសិក្សា។ នៅពេលថ្មីៗនេះ អត្ថបទសិក្សាគឺខ្លីជាងមុន។ យ៉ាងនេះ ការសិក្សាទស្សនាវដ្ដីប៉មយាមត្រូវការពេលតិចជាងមុនដើម្បីអានវគ្គ ហើយមានពេលច្រើនជាងមុនដើម្បីឆ្លើយ។ ដូច្នេះបងប្អូនច្រើនជាងមុនអាចមានឱកាសបង្ហាញជំនឿរបស់ពួកគាត់នៅមុខអ្នកឯទៀតដោយឆ្លើយសំណួរក្នុងអត្ថបទ ដោយពន្យល់ពីរបៀបដែលបទគម្ពីរនោះទាក់ទងនឹងយើង ដោយរៀបរាប់បទពិសោធន៍ដែលបញ្ជាក់អំពីប្រយោជន៍ដែលមកពីការធ្វើតាមគោលការណ៍គម្ពីរ ឬដោយវិធីផ្សេងទៀត។ ម្យ៉ាងទៀត យើងក៏គួរចំណាយពេលខ្លះដើម្បីពិភាក្សាអំពីរូបថតនិងគំនូរដែរ។—សូមអាន ទំនុកតម្កើង ២២:២២; ៣៥:១៨; ៤០:៩
៨, ៩. តើអ្នកដឹកនាំការសិក្សាទស្សនាវដ្ដីប៉មយាមមានតួនាទីអ្វី?
៨ ក៏ប៉ុន្តែ ក្នុងអំឡុងការសិក្សា បងប្អូនជាច្រើននាក់នឹងមានពេលច្រើនជាងដើម្បីឆ្លើយ លុះត្រាតែអ្នកឆ្លើយ ឆ្លើយយ៉ាងខ្លី ហើយអ្នកដឹកនាំកិច្ចប្រជុំមិននិយាយបន្ថែមញឹកញាប់ពេកក្នុងអំឡុងការសិក្សា។ បើដូច្នេះ ដើម្បីធ្វើឲ្យកិច្ចប្រជុំពង្រឹងកម្លាំងចិត្តបងប្អូនទាំងអស់ តើអ្វីអាចជួយអ្នកដឹកនាំឲ្យមានតុល្យភាពរវាងយោបល់របស់គាត់និងយោបល់របស់បងប្អូនឯទៀត?
៩ ដើម្បីឆ្លើយសំណួរនេះ សូមពិចារណាឧទាហរណ៍មួយ។ ការសិក្សាទស្សនាវដ្ដីប៉មយាមដែលបានត្រូវដឹកនាំយ៉ាងល្អគឺប្រៀបដូចជាសួនច្បារធំមួយដ៏ល្អវិចិត្រ។ ការសិក្សាទស្សនាវដ្ដីប៉មយាមមានចម្លើយផ្សេងៗជាច្រើន ដែលប្រៀបដូចជាដើមផ្កាផ្សេងៗជាច្រើនក្នុងសួនច្បារនោះ។ មួយវិញទៀត ដើមផ្កាទាំងនោះខ្លះធំខ្លះតូច ហើយមានពណ៌ចម្រុះគ្នា។ ដូចគ្នាដែរ ប្រវែងចម្លើយនិងរបៀបដែលបងប្អូនឆ្លើយនៅកិច្ចប្រជុំគឺខុសៗគ្នា។ ចុះអ្នកដឹកនាំការសិក្សា តើគាត់មានតួនាទីអ្វី? យោបល់ដែលគាត់ជូនម្ដងម្កាលគឺប្រៀបដូចជារុក្ខជាតិខៀវស្រងាត់ដែលគេដាំក្នុងសួននោះ។ រុក្ខជាតិខៀវទាំងនោះមិនលេចធ្លោជាងដើមផ្កាទេ តែវាជួយធ្វើឲ្យសួននោះមានរបៀបរៀបរយ ហើយលេចចេញជារូបរាងយ៉ាងស្រស់ស្អាត។ ស្រដៀងគ្នាដែរ អ្នកដែលដឹកនាំការសិក្សាត្រូវចាំថា តួនាទីរបស់គាត់គឺមិនមែនឲ្យនិយាយច្រើនជាងគេក្នុងការសិក្សានោះទេ តែគឺត្រូវជួយក្រុមជំនុំពេលសរសើរព្រះតាមរយៈចម្លើយរបស់ពួកគាត់។ ប្រាកដហើយ ពេលអ្នកដឹកនាំផ្គុំយ៉ាងប៉ិនប្រសប់នូវចម្លើយផ្សេងៗរបស់បងប្អូននិងសម្ដីបន្ដិចបន្តួចរបស់គាត់ នោះការសិក្សាទស្សនាវដ្ដីនឹងប្រៀបដូចជាសួនច្បារធំមួយដ៏ល្អវិចិត្រ ដែលធ្វើឲ្យអស់អ្នកមានវត្តមាននៅកិច្ចប្រជុំរីករាយចិត្ត។
«ចូរយើងជូនព្រះនូវសេចក្ដីសរសើរជាគ្រឿងបូជាជានិច្ច»
១០. តើពួកគ្រិស្តសាសនិកនៅសម័យដើមមានទស្សនៈយ៉ាងណាអំពីកិច្ចប្រជុំ?
១០ ការរៀបរាប់របស់ប៉ូលនៅសៀវភៅកូរិនថូសទី១ ១៤:២៦-៣៣ ស្តីអំពីកិច្ចប្រជុំគ្រិស្តសាសនិក ជួយយើងឲ្យយល់អំពីរបៀបដឹកនាំកិច្ចប្រជុំទាំងនោះនៅសតវត្សរ៍ទី១។ បណ្ឌិតគម្ពីរម្នាក់បានអធិប្បាយអំពីខទាំងនេះ ហើយបានសរសេរថា៖ «អ្វីមួយដែលគួរឲ្យកត់សម្គាល់អំពីកិច្ចប្រជុំនៅសម័យដើមគឺថា មនុស្សភាគច្រើនដែលទៅកិច្ចប្រជុំមានអារម្មណ៍ថា ពួកគាត់មានឯកសិទ្ធិនិងមានកាតព្វកិច្ចរួមចំណែកក្នុងកិច្ចប្រជុំទាំងនោះ។ ម្នាក់ៗមកប្រជុំមិនមែនដោយមានបំណងគ្រាន់តែស្ដាប់និងមិនគ្រាន់តែដើម្បីទទួលប៉ុណ្ណោះទេ តែ ដើម្បីឲ្យអ្នកឯទៀតវិញ»។ ច្បាស់ណាស់ គ្រិស្តសាសនិកនៅសម័យដើមមានទស្សនៈថា កិច្ចប្រជុំជាឱកាសដែលពួកគាត់អាចបង្ហាញជំនឿរបស់ពួកគាត់។—រ៉ូម ១០:១០
១១. (ក) តើអ្វីជួយច្រើនក្នុងការធ្វើឲ្យកិច្ចប្រជុំពង្រឹងកម្លាំងចិត្តបងប្អូន? ហេតុអ្វី? (ខ) តើការធ្វើតាមយោបល់អ្វីខ្លះដែលអាចជួយយើងឲ្យឆ្លើយបានកាន់តែប្រសើរជាងនៅឯកិច្ចប្រជុំ? (សូមមើលកំណត់សម្គាល់)
១១ ការបង្ហាញជំនឿរបស់យើងនៅឯកិច្ចប្រជុំជួយ«ពង្រឹងកម្លាំងចិត្តក្រុមជំនុំ»បានច្រើន។ អ្នកប្រាកដជាយល់ស្របថា ថ្វីបើយើងបានទៅកិច្ចប្រជុំច្រើនឆ្នាំហើយក៏ដោយ ក៏យើងនៅតែរីករាយស្ដាប់ចម្លើយរបស់បងប្អូនប្រុសស្រីរបស់យើងដែរ។ ពេលបងប្អូនវ័យចាស់ដែលស្មោះត្រង់ ឆ្លើយយ៉ាងស្មោះអស់ពីចិត្ត នេះមានឥទ្ធិពលខ្លាំងទៅលើចិត្តយើង។ ពេលអ្នកចាស់ទុំម្នាក់ដែលយកចិត្តទុកដាក់ ជូនយោបល់ដែលបង្ហាញពីការយល់ដឹងដ៏ច្បាស់លាស់របស់គាត់ នេះលើកទឹកចិត្តយើង ហើយយើងញញឹម ពេលកូនក្មេងឲ្យចម្លើយដោយមិនចាំបាច់គិតទុកជាមុនដែលបង្ហាញពីសេចក្ដីស្រឡាញ់ដ៏ស្មោះចំពោះព្រះយេហូវ៉ា។ ប្រាកដហើយ ដោយឆ្លើយនៅឯកិច្ចប្រជុំ យើងទាំងអស់គ្នាអាចធ្វើឲ្យកិច្ចប្រជុំពង្រឹងកម្លាំងចិត្តបងប្អូន។ *
១២. (ក) តើយើងអាចទាញមេរៀនអ្វីពីគំរូរបស់ម៉ូសេនិងយេរេមា? (ខ) តើសេចក្ដីអធិដ្ឋានមានតួនាទីអ្វីក្នុងការឆ្លើយសំណួរ?
និក្ខ. ៤:១០; យេ. ១:៦) ក៏ប៉ុន្តែ ដូចព្រះយេហូវ៉ាបានជួយពួកអ្នកបម្រើរបស់លោកនៅសម័យបុរាណឲ្យសរសើរតម្កើងលោកនៅមុខអ្នកឯទៀត លោកក៏នឹងជួយអ្នកឲ្យជូនលោកនូវសេចក្ដីសរសើរទុកជាគ្រឿងបូជាដែរ។ (សូមអាន ហេប្រឺ ១៣:១៥) តើអ្នកអាចទទួលជំនួយពីព្រះយេហូវ៉ាយ៉ាងដូចម្ដេចដើម្បីជម្នះការភ័យខ្លាចក្នុងការឆ្លើយសំណួរ? មុនដំបូង ចូររៀបចំឲ្យបានល្អសម្រាប់កិច្ចប្រជុំ។ ក្រោយមក មុនទៅសាលប្រជុំ ចូរអធិដ្ឋានទៅព្រះយេហូវ៉ា ហើយសុំលោកយ៉ាងចំៗឲ្យផ្ដល់សេចក្ដីក្លាហានដើម្បីឆ្លើយសំណួរ។ (ភី. ៤:៦) ពេលអ្នកអធិដ្ឋានដូច្នេះ អ្នកសុំអ្វីមួយដែល«សមស្របតាមបំណងប្រាថ្នារបស់ព្រះ» ហេតុនេះ អ្នកអាចមានទំនុកចិត្តថាព្រះយេហូវ៉ានឹងធ្វើតាមសំណូមពររបស់អ្នក។—១យ៉ូន. ៥:១៤; សុភ. ១៥:២៩
១២ ប៉ុន្តែ ចំពោះបងប្អូនដែលអៀនខ្មាស ការឆ្លើយប្រហែលជាពិបាកណាស់។ បើនេះជាករណីរបស់អ្នក ប្រហែលជាការល្អឲ្យអ្នកចាំថា នេះជារឿងធម្មតាទេ។ តាមពិត សូម្បីតែអ្នកបម្រើដ៏ស្មោះត្រង់របស់ព្រះដូចម៉ូសេនិងយេរេមា ក៏មិនមានទំនុកចិត្តទៅលើសមត្ថភាពរបស់ខ្លួនដើម្បីនិយាយនៅមុខអ្នកឯទៀតដែរ។ (កិច្ចប្រជុំដែល«ពង្រឹងកម្លាំងចិត្តលើកទឹកចិត្តនិងសម្រាលទុក្ខ»
១៣. (ក) តើកិច្ចប្រជុំគួរមានឥទ្ធិពលយ៉ាងណាទៅលើពួកអ្នកដែលមានវត្តមាន? (ខ) តើសំណួរណាមានសារៈសំខាន់ ជាពិសេសចំពោះពួកអ្នកចាស់ទុំ?
១៣ ប៉ូលបានស្រដីថា គោលដៅសំខាន់នៃកិច្ចប្រជុំក្រុមជំនុំគឺ«ពង្រឹងកម្លាំងចិត្ត លើកទឹកចិត្ត និងសម្រាលទុក្ខ»ពួកអ្នកដែលមានវត្តមាន។ * (១កូ. ១៤:៣) តើតាមរបៀបណាដែលពួកអ្នកចាស់ទុំអាចធ្វើឲ្យប្រាកដថាសុន្ទរកថារបស់ពួកគាត់លើកទឹកចិត្តនិងសម្រាលទុក្ខបងប្អូនប្រុសស្រីក្នុងក្រុមជំនុំ? ដើម្បីឆ្លើយសំណួរនេះ សូមពិចារណាអំពីកិច្ចប្រជុំមួយដែលលោកយេស៊ូបានដឹកនាំ មិនយូរក្រោយលោកបានត្រូវប្រោសឲ្យរស់ឡើងវិញ។
១៤. (ក) តើមានអ្វីកើតឡើងមុនមានកិច្ចប្រជុំដែលលោកយេស៊ូបានរៀបចំ? (ខ) ពេល«លោកយេស៊ូចូលទៅជិត ហើយមានប្រសាសន៍ទៅពួកគាត់» ហេតុអ្វីពួកសាវ័កប្រាកដជាធូរចិត្ត?
១៤ មុនបង្អស់ សូមកត់សម្គាល់អ្វីដែលបានកើតឡើងមុនមានកិច្ចប្រជុំនោះ។ មិនយូរមុនគេសម្លាប់លោកយេស៊ូ ពួកសាវ័ក«បានរត់ចោលលោកទាំងអស់គ្នា» ហើយដូចបានទាយទុក ពួកគាត់បាន«ខ្ចាត់ខ្ចាយទៅផ្ទះរៀងខ្លួន»។ (ម៉ាក. ១៤:៥០; យ៉ូន. ១៦:៣២) ក្រោយលោកយេស៊ូបានត្រូវប្រោសឲ្យរស់ឡើងវិញ លោកបានអញ្ជើញពួកសាវ័កដែលធ្លាក់ទឹកចិត្ត ឲ្យមកកិច្ចប្រជុំពិសេសមួយ។ * ហេតុនេះហើយបានជាពួក«អ្នកកាន់តាមលោកទាំងដប់មួយនាក់បានចូលស្រុកកាលីឡេ រួចទៅឯភ្នំដែលលោកយេស៊ូបានកំណត់ឲ្យទៅ»។ ពេលពួកគាត់ទៅដល់ទីនោះ «លោកយេស៊ូចូលទៅជិត ហើយមានប្រសាសន៍ទៅពួកគាត់»។ (ម៉ាថ. ២៨:១០, ១៦, ១៨) សូមស្រមៃគិតថាពួកសាវ័កធូរចិត្តប៉ុណ្ណាទៅហ្ន៎! ពេលលោកយេស៊ូចាត់វិធានការធ្វើដូច្នេះ។ តើលោកយេស៊ូបានពិភាក្សាអំពីអ្វីនៅកិច្ចប្រជុំនោះ?
១៥. (ក) តើលោកយេស៊ូបានពិភាក្សាអំពីអ្វីខ្លះនៅកិច្ចប្រជុំ? ប៉ុន្តែតើលោកមិនបានពិភាក្សាអំពីអ្វីខ្លះ? (ខ) តើកិច្ចប្រជុំនោះមានឥទ្ធិពលយ៉ាងណាទៅលើពួកសាវ័ក?
១៥ លោកយេស៊ូបានចាប់ផ្ដើមកិច្ចប្រជុំនោះដោយប្រកាសថា៖ «ខ្ញុំបានទទួលគ្រប់ទាំងអំណាច»។ បន្ទាប់មក លោកបានប្រគល់ភារកិច្ចឲ្យពួកគាត់ដោយមានប្រសាសន៍ថា៖ «ចូរទៅបង្រៀនមនុស្ស ម៉ាថ. ២៨:១៨-២០) ប៉ុន្តែតើអ្នកបានកត់សម្គាល់ឬទេ ថាលោកយេស៊ូមិនបានធ្វើអ្វី? លោកមិនបានស្តីបន្ទោសពួកសាវ័ករបស់លោកឡើយ។ លោកក៏មិនបានប្រើកិច្ចប្រជុំនោះដើម្បីឈ្លេចសួរអំពីបំណងចិត្តរបស់ពួកគាត់ ឬដើម្បីធ្វើឲ្យពួកគាត់ពិបាកចិត្តថែមទៀតដោយសារកំហុសរបស់ពួកគាត់ដោយលើកឡើងអំពីការចុះខ្សោយមួយរយៈពេលខ្លីនូវជំនឿរបស់ពួកគាត់។ ផ្ទុយទៅវិញ លោកយេស៊ូបានបញ្ជាក់អំពីសេចក្ដីស្រឡាញ់របស់លោកនិងរបស់បិតាលោកនៅស្ថានសួគ៌ដោយប្រគល់ភារកិច្ចមួយដ៏សំខាន់ដល់ពួកគាត់។ ដោយសារលោកយេស៊ូបានធ្វើដូច្នេះ តើនេះមានឥទ្ធិពលយ៉ាងណាលើពួកសាវ័ក? នេះបានពង្រឹងកម្លាំងចិត្ត លើកទឹកចិត្ត និងសម្រាលទុក្ខពួកគាត់ដល់ម្ល៉េះបានជាមួយរយៈពេលក្រោយពីកិច្ចប្រជុំនោះ ពួកគាត់ចាប់ផ្ដើម«បង្រៀននិងប្រកាសដំណឹងល្អ»ម្ដងទៀត។—សកម្ម. ៥:៤២
. . . ឲ្យក្លាយទៅជាអ្នកកាន់តាមខ្ញុំ»។ នៅទីបំផុត លោកបានពង្រឹងទំនុកចិត្តពួកគាត់ថា៖ «ខ្ញុំនៅជាមួយនឹងអ្នករាល់គ្នាជារៀងរាល់ថ្ងៃ»។ (១៦. សព្វថ្ងៃ តើពួកអ្នកចាស់ទុំយកតម្រាប់តាមគំរូរបស់លោកយេស៊ូយ៉ាងដូចម្ដេចក្នុងការដឹកនាំកិច្ចប្រជុំដែលជាប្រភពនៃការពង្រឹងកម្លាំងចិត្ត?
១៦ ដោយយកតម្រាប់តាមលោកយេស៊ូ សព្វថ្ងៃនេះ ពួកអ្នកចាស់ទុំចាត់ទុកកិច្ចប្រជុំជាឱកាសដើម្បីបញ្ជាក់ឲ្យបងប្អូនរួមជំនឿដឹងអំពីសេចក្ដីស្រឡាញ់ដែលមិនចេះសាបសូន្យដែលព្រះយេហូវ៉ាមានចំពោះរាស្ត្ររបស់លោក។ (រ៉ូម ៨:៣៨, ៣៩) អាស្រ័យហេតុនេះ ក្នុងសុន្ទរកថារបស់ពួកគាត់ ពួកអ្នកចាស់ទុំផ្ដោតអារម្មណ៍ទៅលើចំណុចខ្លាំងរបស់បងប្អូនប្រុសស្រី មិនមែនទៅលើចំណុចខ្សោយឡើយ។ ពួកគាត់មិនឈ្លេចសួរពីបំណងចិត្តរបស់បងប្អូនរួមជំនឿទេ។ ផ្ទុយទៅវិញ ពាក្យសម្ដីរបស់ពួកគាត់បង្ហាញថា ពួកគាត់ចាត់ទុកបងប្អូនរួមជំនឿជាបុគ្គលដែលស្រឡាញ់ព្រះយេហូវ៉ា ហើយដែលចង់ធ្វើអ្វីៗដែលត្រឹមត្រូវ។ (១ថែ. ៤:១, ៩-១២) ជួនកាលពួកអ្នកចាស់ទុំត្រូវជូនឱវាទដើម្បីកែតម្រង់បងប្អូនទូទៅក្នុងក្រុមជំនុំ តែបើមានតែបងប្អូនពីរបីនាក់ប៉ុណ្ណោះដែលត្រូវការឱវាទនោះ ជាការល្អឲ្យពួកអ្នកចាស់ទុំទៅជួប ហើយជូនឱវាទដល់បងប្អូនទាំងនោះវិញ។ (កាឡ. ៦:១; ២ធី. ២:២៤-២៦) ពេលថ្លែងសុន្ទរកថាជូនក្រុមជំនុំទាំងមូល ពួកអ្នកចាស់ទុំមានបំណងសរសើរក្រុមជំនុំពេលណាដែលសមរម្យ។ (អេ. ៣២:២) ពួកគាត់ព្យាយាមថ្លែងដោយលើកទឹកចិត្តនិងធ្វើឲ្យបងប្អូនទាំងឡាយមានកម្លាំងចិត្តឡើងវិញ ក្រោយកិច្ចប្រជុំ។—ម៉ាថ. ១១:២៨; សកម្ម. ១៥:៣២
កិច្ចប្រជុំរបស់យើងជាប្រភពនៃការសម្រាលទុក្ខ
១៧. (ក) ហេតុអ្វីសំខាន់ជាងមុនទៅទៀតដែលកិច្ចប្រជុំរបស់យើងជាប្រភពនៃការសម្រាលទុក្ខ? (ខ) តើអ្នកផ្ទាល់អាចធ្វើអ្វីដើម្បីឲ្យកិច្ចប្រជុំពង្រឹងកម្លាំងចិត្តបងប្អូន? (សូមមើលប្រអប់«វិធី១០យ៉ាងដើម្បីធ្វើឲ្យកិច្ចប្រជុំពង្រឹងកម្លាំងចិត្តអ្នកនិងអ្នកឯទៀត»)
១៧ កាលដែលពិភពលោករបស់សាថានមានការសង្កត់សង្កិនកាន់តែច្រើន យើងត្រូវធ្វើឲ្យប្រាកដថាកិច្ចប្រជុំគ្រិស្តសាសនិករបស់យើងជាប្រភពនៃការសម្រាលទុក្ខសម្រាប់អស់អ្នកដែលមានវត្តមាន។ (១ថែ. ៥:១១) ប៉ុន្មានឆ្នាំកន្លងទៅនេះ បងស្រីម្នាក់ដែលបានស៊ូទ្រាំទុក្ខលំបាកដ៏ខ្លាំងមួយជាមួយប្ដីរបស់គាត់បាននឹកចាំថា៖ «ការមានវត្តមាននៅសាលប្រជុំគឺដូចជាយើងស្ថិតនៅក្រោមការថែរក្សារបស់ព្រះយេហូវ៉ា។ ពេលដែលយើងនៅទីនោះ មានបងប្អូនប្រុសស្រីរួមជំនឿនៅជុំវិញយើង ហើយនេះនាំឲ្យយើងមានអារម្មណ៍ថា យើងអាចផ្ទេរបន្ទុករបស់យើងទៅលើព្រះយេហូវ៉ា ហើយយើងអាចមានចិត្តស្ងប់មួយកម្រិត»។ (ទំនុក. ៥៥:២២) សូមឲ្យពួកអ្នកដែលមានវត្តមាននៅកិច្ចប្រជុំទទួលការលើកទឹកចិត្តនិងការសម្រាលទុក្ខស្រដៀងគ្នាដែរ។ ដើម្បីប្រាកដថាពួកគាត់ទទួលប្រយោជន៍បែបនេះ ចូរយើងរួមចំណែកជានិច្ចក្នុងការធ្វើឲ្យកិច្ចប្រជុំពង្រឹងកម្លាំងចិត្តបងប្អូនរួមជំនឿរបស់យើង។
[កំណត់សម្គាល់]
^ វគ្គ 1 ប៉ូលបានទាយថាលក្ខណៈខ្លះនៃកិច្ចប្រជុំគ្រិស្តសាសនិកនៅសតវត្សរ៍ទី១នឹងលែងមានទៀត។ ជាឧទាហរណ៍ យើងលែង«និយាយភាសាផ្សេងៗ» ឬលែង«ប្រកាសទំនាយ»ទៀតហើយ។ (១កូ. ១៣:៨; ១៤:៥) ទោះជាយ៉ាងនេះក៏ដោយ ការណែនាំរបស់ប៉ូលជួយយើងឲ្យយល់ច្បាស់អំពីរបៀបដឹកនាំកិច្ចប្រជុំគ្រិស្តសាសនិកនៅសព្វថ្ងៃនេះ។
^ វគ្គ 11 ដើម្បីទទួលយោបល់ស្តីអំពីរបៀបដែលអ្នកអាចឆ្លើយបានកាន់តែប្រសើរជាងនៅកិច្ចប្រជុំ សូមមើលទស្សនាវដ្ដីប៉មយាម ថ្ងៃទី១ ខែធ្នូ ឆ្នាំ២០០៣ ទំព័រ២៨-៣១។
^ វគ្គ 13 ស្តីអំពីភាពខុសគ្នារវាងពាក្យភាសាក្រិចដែលបានត្រូវបកប្រែថា«លើកទឹកចិត្ត»និង«សម្រាលទុក្ខ» សៀវភៅមួយបានពន្យល់ថាពាក្យដែលបានត្រូវបកប្រែថា«សម្រាលទុក្ខ»បញ្ជាក់អំពី«មនោសញ្ចេតនាដ៏ជ្រាលជ្រៅជាងពាក្យ[លើកទឹកចិត្ត]» (Vine’s Expository Dictionary of Old and New Testament Words)។—សូមពិនិត្យបន្ថែម យ៉ូហាន ១១:១៩
^ វគ្គ 14 ប៉ូលប្រហែលជាសំដៅទៅលើពេលដែលលោកយេស៊ូបាន«លេចមកជួបបងប្អូនជាងប្រាំរយនាក់»។—១កូ. ១៥:៦
តើអ្នកនឹងឆ្លើយយ៉ាងណា?
• តើកិច្ចប្រជុំគ្រិស្តសាសនិកគឺសំខាន់យ៉ាងណា?
• ហេតុអ្វីបានជាចម្លើយរបស់បងប្អូននៅឯកិច្ចប្រជុំ ជួយ«ពង្រឹងកម្លាំងចិត្តក្រុមជំនុំ»?
• តើយើងអាចទាញមេរៀនអ្វីពីកិច្ចប្រជុំមួយជាមួយពួកអ្នកកាន់តាមលោក ដែលមានលោកយេស៊ូជាអ្នកដឹកនាំ?
[សំណួរសម្រាប់វគ្គនីមួយៗ]
[ប្រអប់/រូបភាពនៅទំព័រ៣០, ៣១]
វិធី១០យ៉ាង ដើម្បីធ្វើឲ្យកិច្ចប្រជុំពង្រឹងកម្លាំងចិត្តអ្នកនិងអ្នកឯទៀត
រៀបចំទុកជាមុន។ ពេលអ្នកសិក្សាទុកជាមុននូវព័ត៌មានដែលត្រូវពិភាក្សានៅសាលប្រជុំ នោះអ្នកនឹងមានចំណាប់អារម្មណ៍ខ្លាំងជាងទៅលើកិច្ចប្រជុំ ហើយអ្នកនឹងស្រួលចាំព័ត៌មានក្នុងកិច្ចប្រជុំនោះដែលមានឥទ្ធិពលខ្លាំងជាងមុនមកលើអ្នក។
ទៅកិច្ចប្រជុំយ៉ាងទៀងទាត់។ ពេលមានមនុស្សជាច្រើនទៅកិច្ចប្រជុំ នេះលើកទឹកចិត្តអស់អ្នកដែលមានវត្តមាន។ ហេតុនេះ វត្តមានរបស់អ្នកគឺសំខាន់ណាស់។
មកប្រជុំទាន់ពេល។ ប្រសិនបើអ្នកមកកិច្ចប្រជុំមុនកម្មវិធីចាប់ផ្ដើម អ្នកអាចច្រៀងចម្រៀងនិងអធិដ្ឋានជាមួយបងប្អូន ពេលកិច្ចប្រជុំចាប់ផ្ដើម ដែលនេះជាផ្នែកនៃការគោរពប្រណិប័តន៍របស់យើងចំពោះព្រះយេហូវ៉ា។
យកសៀវភៅទាំងអស់ដែលអ្នកត្រូវការ។ សូមយកគម្ពីររបស់អ្នក និងសៀវភៅផ្សេងៗដែលត្រូវប្រើនៅកិច្ចប្រជុំ ដើម្បីអ្នកអាចផ្ទៀងតាម ហើយយល់ចំណុចដែលបានត្រូវលើកឡើង។
ជៀសចេញពីអ្វីៗដែលបង្វែរអារម្មណ៍។ ជាឧទាហរណ៍ សូមមើលសារទូរស័ព្ទពេលប្រជុំចប់ មិនមែនក្នុងអំឡុងកិច្ចប្រជុំទេ។ ដោយធ្វើដូច្នេះ អ្នកនឹងបង្ហាញថា អ្នកចាត់ទុកកិច្ចប្រជុំថាសំខាន់ជាងរឿងផ្ទាល់ខ្លួនរបស់អ្នក។
ឆ្លើយសំណួរ។ ពេលមានបងប្អូនច្រើនជាងឆ្លើយសំណួរ នោះបងប្អូនកាន់តែច្រើនទទួលការលើកទឹកចិត្តនិងបានត្រូវពង្រឹងកម្លាំងចិត្តដោយចម្លើយផ្សេងៗដែលបញ្ជាក់អំពីជំនឿរបស់ពួកគាត់។
ឆ្លើយយ៉ាងខ្លី។ នេះបើកឱកាសឲ្យបងប្អូនច្រើនបំផុតឆ្លើយសំណួរ។
បំពេញភារកិច្ចរបស់ខ្លួន។ បើអ្នកជាសិស្សនៃសាលាកិច្ចបម្រើផ្សាយ ឬបើអ្នកមានសុន្ទរកថានៅកិច្ចប្រជុំអប់រំកិច្ចបម្រើ មានការសម្ដែងឬមានសម្ភាសន៍ សូមរៀបចំឲ្យបានល្អ ហាត់ទុកជាមុន ហើយព្យាយាមបំពេញភារកិច្ចនោះទាល់តែបាន។
សរសើរអ្នកដែលរួមចំណែកក្នុងកម្មវិធីកិច្ចប្រជុំ។ សូមប្រាប់បងប្អូនដែលបានថ្លែងសុន្ទរកថា បានធ្វើការសម្ដែង បានឆ្លើយសំណួរ ឬបានត្រូវសម្ភាស ថាអ្នកអរគុណពួកគាត់ណាស់ចំពោះការព្យាយាមរបស់ពួកគាត់។
សេពគប់គ្នា។ មុននិងក្រោយកិច្ចប្រជុំ ការជម្រាបសួរគ្នាដោយរួសរាយរាក់ទាក់ និងការសន្ទនាគ្នាដែលពង្រឹងកម្លាំងចិត្ត នាំឲ្យអ្នកដែលមានវត្តមាននៅកិច្ចប្រជុំ រីករាយចិត្ត ថែមទាំងទទួលប្រយោជន៍ច្រើនជាង។