Nga Okasakesanga Ampangi Muna Tukutakanu Tw’akristu?

“Vava nulungwa, . . . Mbula mambu mawonso mavangilwa muna luvangameso.”—1 KOR. 14:26.

1. Mun’owu wa 1 Korinto kapu kia 14, adieyi i kani diantete dia tukutakanu tw’Akristu?

‘LUKUTAKANU lwalu lunkasakese kikilu!’ Nga wavova kala e mvovo miami kuna mfoko a lukutakanu kun’Eseka dia Kintinu? Ka lukatikisu ko vo wavova mio kala. Kieleka, tukutakanu i nto a lukasakeso. Kansi, ediadi ke diasivi ko. Kadi, nze muna lumbu y’Akristu a tandu kiantete, ekani diantete dia tukutakanu tweto o unu i kasakesa mpangi zawonso muna mwanda. Tala una Paulu wa ntumwa kasongela ekani dia tukutakanu tw’Akristu muna nkand’andi antete kasonekena esi Korinto. Muna kapu kia 14, nkumbu miayingi Paulu kasonga vo mawonso mevovwa muna tukutakanu mafwete kala  y’ekani dimosi, i sia vo, “vangamesa dibundu.”—Tanga 1 Korinto 14:3, 12, 26. *

2. (a) Nki kikitulanga lukutakanu se lwa lukasakeso? (b) Nkia kiuvu tubadika?

² Tuzeye wo vo, muna kasakesa ampangi, lukutakanu lufwete filwa kwa mwand’a Nzambi. Muna kuma kiaki, tuyantikanga konso lukutakanu lw’Akristu muna samba kwa Yave wa S’eto ezulu kimana kasambula lukutakanu lweto muna mwand’andi avelela. Kana una vo i wau, tuzeye wo vo konso muntu muna nkutakani olenda sia ngolo mu kitula lukutakanu se lwa lukasakeso. Kansi, adieyi konso muntu mu yeto kalenda vanga mu kala ye ziku vo tukutakanu twawonso tuvangama kun’Eseka dia Kintinu konso lumingu tukasakesa ampangi muna mwanda?

3. Tukutakanu tw’Akristu nkia mfunu twina?

³ Muna zaya e mvutu, tubadika maka mambu mu kuma kia tukutakanu tweto, mana bafwete sungamenanga awana befilanga lukutakanu. Tubadika mpe dina awonso muna nkutakani balenda vanga kimana tukutakanu twakasakesa awonso bena mo. Diambu diadi diamfunu kikilu kwa yeto, kadi tukutakanu tweto i nto a lukasakeso. Kieleka, o kalanga muna tukutakanu yo vanang’e mvutu i mambu mamfunu muna nsambil’eto kwa Yave.—Nku. 26:12; 111:1; Yes. 66:22, 23.

Lukutakanu Lwakubikwa Muna Longoka Nkand’a Nzambi

4, 5. Adieyi i kani tukadilanga y’elongi di’Eyingidilu?

⁴ Yeto awonso tuzolanga baka nluta mun’elongi di’Eyingidilu divangamanga konso lumingu. Muna kuma kiaki, muna toma bakula ekani diantete dia lukutakanu lwalu, yambula twabadika emaka mambu masobwa mun’Eyingidilu ye muna malongi ma longoka.

⁵ Tuka mun’Eyingidilu diantete dia longoka, dia 15 Yanuali, 2008, mambu mayingi mamfunu masiwa muna fukwa. Nga wamwene mo? Toma tala e fukwa ki’Eyingidilu osimbidi. Vena ye nzo yandá kumosi yo Nkand’a Nzambi waziuka. E fwaniswa kiaki kisonganga o mfunu twinina y’elongi dia Eyingidilu. Eyingidilu diadi dikutusadisanga mu longoka Nkand’a Nzambi. Elo, mun’elongi di’Eyingidilu dia konso lumingu, e Diambu dia Nzambi ditoma ‘tangwanga’ yo ‘toma sasilwa’ nze muna lumbu ya Nekemiya kuna nz’ankulu.—Nek. 8:8; Yes. 54:13.

6. (a) Nkia diambu diasobwa mun’Eyingidilu dia Longoka? (b) Adieyi tufwete sungamenanga mu kuma kia sono yasonama vo “tanga”?

⁶ Wau vo Nkand’a Nzambi i nkanda tutoma sadilanga, vavangwa nsobani mun’Eyingidilu dia Longoka. Sono yayingi ina muna malongi malongoka yasonekwa vo “tanga.” Yeto awonso tukasakeswanga mu landa e ntangilu a sono yayi muna Nkand’a Nzambi wa yeto kibeni. (Mav. 17:11) Ekuma? E kuma kadi, vava tutanganga luludiku lwa Nzambi muna Nkand’eto a Nzambi, lutoma kotanga muna ntim’eto. (Ayib. 4:12) Muna kuma kiaki, ekolo sono yayi ke yatangilu ko, o mfidi Eyingidilu kafwete vana ntangwa yafwana kw’ampangi mu vava e sono yayi yo landa e ntangilu.

Ntangwa Yayingi mu Songa Lukwikilu Lweto

7. Nki’elau tuna diau vava tukalanga y’elongi dia Eyingidilu?

⁷ Diambu diakaka mpe diasobwa muna malongi malongoka mun’Eyingidilu. Owau, e malongi makufikwa. Muna kuma kiaki, vava tulongokanga Eyingidilu, ntangwa yafioti kaka isadilwanga mu tanga e tini, ediadi disadisanga mu kala ye ntangwa yayingi ya  vana e mvutu. Owau, ndonga mu nkutakani bekalanga y’elau dia songa lukwikilu lwau muna vanang’e mvutu za kiuvu kiasonama mun’Eyingidilu, muna sasilang’e sono kia Nkand’a Nzambi, muna yik’e nona kisonganga e nluta mia sadila luludiku lwa Nkand’a Nzambi yovo mu mpila yakaka. Ezak’e ntangwa divavanga mpe vo twasasila e fwaniswa.—Tanga Nkunga 22:22; 35:18; 40:9.

8, 9. O mfidi w’elongi di’Eyingidilu nkia mbebe kena yau?

⁸ Kansi, tutoma sadila kaka e ntangwa yayi avo ampangi bavene mvutu zankufi. O mfidi w’elongi di’Eyingidilu kafwete mpe venga e fu kia vovanga kwayingi. Adieyi dilenda sadisa mfidi mu zaya tezo vana vena nkomena zandi ye zina zivana ampangi kimana awonso muna nkutakani bakasakeswa?

⁹ Muna zay’e mvutu, badika nona kiaki. Elongi di’Eyingidilu avo ditomene filwa dilenda tezaniswa ye saki kia mvuma zambote (buquê de flores) ziyangidikanga meso. Nze una saki kia mvuma kinina ye mvuma zayingi, elongi di’Eyingidilu dikalanga mpe ye mvutu zayingi. Vana ntandu,  muna saki kia mvuma mukalanga ye mvuma zaswaswana, diau adimosi mpe e mvutu zivanwanga muna lukutakanu zaswaswana zikalanga, akaka bevananga zandá, akaka zankufi. O mfidi Eyingidilu nkia mbebe kena yau? E nkomena zankufi kevananga zilenda tezaneswa ye mvuma zakete-kete zikudikilwanga muna saki kia mvuma. E mvuma zazi ke zikalanga zayingi ko, kansi zikudikilwanga mu tomesa saki kiawonso. Diau adimosi mpe, ndiona ofila elongi di’Eyingidilu kafwete sungamena vo e salu kiandi ke vova kwayingi ko, kansi i tomesa e mvovo mia lusanisinu mi’ampangi muna nkutakani. Elo, avo tubundakese e mvutu z’ampangi ye nkomena za ndiona ofilanga elongi, awonso muna lukutakanu beyangalela elongi diadi.

“Mbula Twakwama Tambik’o Lutambiku lua Lusanisinu kwa Nzambi”

10. Akristu a tandu kiantete, aweyi babadikilanga tukutakanu tw’Akristu?

¹⁰ E mvovo mia Paulu mu kuma kia tukutakanu tw’Akristu miasonama muna 1 Korinto 14:26-33 misonganga una wavangamenanga tukutakanu muna tandu kiantete. Mu kuma kia sono yayi, nkwa ngangu mosi ofimpanga Nkand’a Nzambi wasoneka vo: “Diambu diamfunu diavangamanga muna masambilu ma tandu kiantete i dia sia vo, konso muntu wamonanga vo wakala y’elau ye mbebe ya vanga diambu muna dibundu. O muntu kayendanga kaka mu wá ye tambula ko kansi mu vana mpe.” Kieleka, Akristu a tandu kiantete babadikilanga tukutakanu tw’Akristu s’elau diampwena mu songa lukwikilu lwau.—Roma 10:10.

11. (a) Nki kisadisanga kimana tukutakanu twakasakesa ampangi? Ekuma? (b) Nkia mambu malenda kutusadisa mu tomesa e nkomena zeto muna tukutakanu? (Tala e mvovo vana yanda a lukaya.)

¹¹ O vanang’e mvutu muna tukutakanu mu songa lukwikilu lweto disadisanga muna “vangamesa dibundu.” Kieleka, kana nkutu vo se mvu miayingi tulungananga mu tukutakanu, tukalanga ye kiese kia wá e mvutu za mpangi zeto z’akala ye z’akento. E mvutu za mpangi zeto zakwikizi bena vo anunu zisimbang’e ntima mieto. Tukasakeswanga mpe mu mona mpila o nkuluntu kevaninang’e mvutu zatoma kiá yo seva vava mwan’akete kevanang’e mvutu zisonganga o zola kwandi muna Yave. Kieleka, yeto awonso tukasakeswanga muna mvutu zivewanga muna tukutakanu tw’Akristu. *

12. (a) Adieyi tulenda longoka muna nona kia Mose ye Yeremiya? (b) E sambu, nkia mfunu kina muna vana e mvutu mu tukutakanu?

¹² Kansi, kw’awana bemonanga wonga, dilenda kala diampasi mu van’e mvutu. Kele vo i diau divangamanga kwa ngeye, zaya wo vo kuna ngeye mosi ko. Kieleka, kana nkutu selo yakwikizi ya Nzambi nze Mose ye Yeremiya bakala ye wonga mu vova vana va ndonga. (Luv. 4:10; Yer. 1:6) Kansi, nze una Yave kasadisila selo yayi kuna nz’ankulu mu kunsanisina vana va ndonga, Nzambi okusadisa mpe mu tambika lukau lwa lusanisinu. (Tanga Ayibere 13:15.) Aweyi olenda vwila lusadisu lwa Yave mu sunda wonga wa vana e mvutu? Entete, toma kubika malongi ma lukutakanu.  I bosi, una kwayele ko kun’Eseka dia Kintinu, samba kwa Yave yo kunlomba vo kavana unkabu mu vana e mvutu. (Fili. 4:6) Dina olombanga ngwizani dina ye “luzolo luandi.” Muna kuma kiaki, kala ye vuvu vo Yave owá sambu kiaku.—1 Yoa. 5:14; Nga. 15:29.

Tukutakanu Tusadisanga mu ‘Vangamesa, Kasakesa yo Fiaulwisa’

13. (a) O tukutakanu tweto adieyi tufwete vanga kw’awana belungananga? (b) Nkia kiuvu kiamfunu akuluntu bafwete kiyuvulanga?

¹³ Paulu wavova vo ekani disundidi divangamenanga tukutakanu i mu ‘vangamesa, yo kasakesa, yo fiaulwisa’ ampangi. * (1 Kor. 14:3) O unu, akuluntu aweyi balenda kadila ye ziku vo malongi befilanga muna tukutakanu mekasakesanga yo fiaulwisa mpangi zau z’akala ye z’akento? Muna zaya e mvutu za kiuvu kiaki, yambula twabadika lukutakanu kafila Yesu vava kafuluka.

14. (a) Nkia diambu diavangama vitila lukutakanu kafila o Yesu? (b) Ekuma antumwa bamwena e kiese vava ‘Yesu kayiza kwa yau, yo kubavovesa’?

¹⁴ Entete, tala dina diavangama vitila lukutakanu lwalu. Una Yesu kavondelo ko, ntumwa zandi “bansisidi, batinini kwau,” nze una wasakulwa, bayenda ‘konso muntu kuna nzo andi.’ (Maku 14:50; Yoa. 16:32) I bosi, vava kafuluka, Yesu wabokela ntumwa zandi ana bakala bakendalala mu kwiza lungana mu lukutakanu lwamfunu. * Yau “ekumi ye mosi, bele kuna Ngalili, kuna mongo kabasidìdi o Yesu.” Vava balwaka, “o Yesu wizidi kwa yau, ubavovese.” (Mat. 28:10, 16, 18) Se yindula e kiese bamona antumwa vava Yesu kayantika e moko. Yesu nkia mambu kavovela?

15. (a) Yesu nkia mambu kavovela? Adieyi kavanga ko? (b) Lukutakanu lwalu, nkia nluta lwatwasa kw’antumwa?

¹⁵ Yesu wabavovesa vo: ‘E wisa kiawonso kiaveno kwa mono.’ I bosi, wabavana e salu: “Dianu vo nwenda, nwakitula wantu s’alongoki.” Kuna mfoko, wabasikidisa vo: “Ngina yeno e lumbu yawonso.” (Mat. 28:18-20) Kansi, nga obakwidi dina o Yesu kavanga ko? Katumba ntumwa zandi ko. Kasadila lukutakanu lwalu mu katikisa makani mau ko ngatu sakisa lukendalalu lwau muna yika e fu kia kondwa lukwikilu basonga mu fikolo. Kansi, Yesu wabasonga o zola kwandi ye kwa S’andi muna kubavana e salu kiampwena. E mpila Yesu kavovesela antumwa, nkia nluta diatwasa? Batoma kasakeswa yo fiaulwiswa. Ke vavioka kolo ko, bayantika diaka ‘longa yo samun’e nsangu zambote.’—Mav. 5:42.

16. O unu, akuluntu Akristu aweyi betangininanga mbandu a Yesu muna fila tukutakanu tukasakesanga?

¹⁶ Muna tanginina Yesu, akuluntu o unu bebadikilanga tukutakanu nz’elau dia fiaulwisa ampangi muna zola kesonganga Yave kwa nkangu andi. (Roma 8:38, 39) Muna kuma kiaki, vava befilanga malongi mau muna lukutakanu, akuluntu besianga sungididi muna ngolo bevanganga ampangi, ke mu lutovoko lwau ko. Ke bekatikisanga makani ma mpangi zau ko. Kansi, e mvovo miau misonganga una bebadikilanga mpangi zau, nze wantu bezolanga Yave ye bazolele vanga oma mansongi. (1 Tes. 4:1, 9-12) Dialudi vo, ezak’e ntangwa divavanga vo akuluntu bavana elongi diasikididi kwa nkutakani awonso, kansi kele vo muntu mosi yovo wole bevana elongi, dikala diambote mu vanina dio vana va yau kaka. (Ngal. 6:1; 2 Tim. 2:24-26) Vava bevovanga kwa nkutakani awonso, akuluntu bevavanga elau dia  sanisina ampangi. (Yes. 32:2) Besianga ngolo za vovela mu mpila ina vo kuna mfoko a lukutakanu, awonso bakasakeswa.—Mat. 11:28; Mav. 15:32.

Tukutakanu Tufiaulwisanga

17. (a) Ekuma dinin’o mfunu ke mu kolo kiakaka ko vo tukutakanu tweto twakala se fulu kia lufiaulwisu? (b) Adieyi olenda vanga kimana tukutakanu twakala twa lukasakeso? (Tala e babu, “Mpila Kumi Tulenda Kuyikasakesa yo Kasakesa Akaka Muna Tukutakanu.”)

¹⁷ Wau vo e mambu mambi mu wokela kaka mena mu nza ya Satana, tufwete sia ngolo kimana tukutakanu tweto twakala se fulu kia lufiaulwisu kwa wantu awonso. (1 Tes. 5:11) Mpangi mosi ankento yo nkaz’andi ana banwana ye mambu mampasi mu mvu miayingi besungamenanga vo: “Vava twakalanga mun’Eseka dia Kintinu twamonanga nze yeto tuna va moko ma Yave. Ekolo twakalanga mo, twazungwanga kw’ampangi z’akala ye z’akento, twamonanga vo twafwana yekeka ezitu dieto kwa Yave yo kala ye luvuvamu lwa ntima.” (Nku. 55:22) Yambula vo awonso bekwizanga muna tukutakanu batambula lukasakeso ye lufiaulwisu lwa mpila yayi. Muna kala ye ziku vo ediadi divangama, yambula twasia ngolo za kasakesanga ampangi muna tukutakanu tw’Akristu.

[Mvovo Vana Yand’a lukaya]

Nkia Mvutu Ovana?

• Tukutakanu tw’Akristu ekuma twinina o mfunu?

• E mvutu zivewanga muna tukutakanu ekuma zilenda ‘vangamesa nkutakani’?

• Adieyi tulenda longoka muna lukutakanu lwa Yesu ye ntumwa zandi?

[Yuvu ya Longoka]

[Babu/​Mafoto zina muna lukaya lwa 22, 23]

MPILA KUMI TULENDA KUYIKASAKESA YO KASAKESA AKAKA MUNA TUKUTAKANU

Teka kubamanga. Vava oteka kubikanga mana melongokwa kun’Eseka dia Kintinu, otoma yangalela tukutakanu.

Lungananga ntangwa zawonso. Wau vo tutoma kasakeswanga vava tukalanga ayingi mu tukutakanu, kukondwanga ko.

Lwakanga mu ola yambote. Avo olweke una lukutakanu ke lwayantikidi ko, olenda yimbila nkunga yo kala muna sambu kiantete, mena vo mambu mamfunu muna nsambil’a Yave.

Natanga nkanda mivwil’o mfunu. Natanga Nkand’a Nzambi aku ye nkanda misadilwa muna lukutakanu, ediadi dikusadisa mu toma landa yo bakula mana melongwa.

Venga e fu kia vunzanesa e ngindu. Kasikil’owu, tanga e nsangu batwikidi muna telefone kuna mfoko a lukutakanu, kansi ke vava kifilwanga malongi ko. Muna mpila yayi osonga vo kusianga mambu ma ngeye kibeni vana fulu kiantete ko.

Vanang’e mvutu. Vava wantu ayingi bevanang’e mvutu, wantu ayingi mpe bekasakeswanga kwa mvovo miaswaswana mia lukwikilu.

Vanang’e mvutu zankufi. Ediadi divana akaka elau dia vana e mvutu.

Toma lungisa kiyekwa oveno. Kele vo mu Sikola ya Salu kia Kimfumu wina yovo malongi ma Lukutakanu lwa Salu ofilanga, toma kubamanga, vutukilanga elongi diaku, kutini kiyekwa kiaku ko.

Sanisina ana baven’e mvutu. Sanisina awonso bafididi malongi yovo van’e mvutu muna lukutakanu muna ngolo bavangidi.

Vanga yikundi. Kayisanga ampangi ye kiese kiawonso ye kalanga ye mbokena za lukasakeso kuna lubantiku ye kuna mfoko a lukutakanu, diwokesanga kiese yo twasa nluta kw’awonso bezidi mu lukutakanu.