Lelo Utanwanga ku Kupwila Mwanda wa Kwitamija?

“Pa kubungakena pamo, . . . byonsololo bilongibwe pa mwanda wa kwitamija.”​—1 KOD. 14:26.

1. Mungya 1 Kodinda shapita 14, i kitungo’ka kikatampe kidi na kupwila kwa Bwine Kidishitu?

 ‘BINE kuno shako ko kupwila kukankamika!’ Lelo nobe kodi munene binenwa bya uno muswelo pa kupwa kwa kupwila ku Njibo ya Bulopwe? Na bubine kodi mwibinene! Bine kupwila kwa pa kipwilo i nsulo ya bukankamane, ne kino ke kya kutulumukapo. Ne kadi, monka mobyādi bikadile mu mafuku a Bene Kidishitu babajinji, dyalelo nadyo kitungo kikatampe kya kupwila i kwikankamika ku mushipiditu batwe bonso batanwa’ko. Tala muswelo wākomeneje Polo kino kitungo kikatampe kya kupwila mu mukanda wandi mubajinji ku Bene Kodinda. I munene misunsa mivule mu shapita wa 14 amba kipindi ne kipindi kya ku kupwila kifwaninwe kwikala na kitungo kimo kyonka​—‘kutamija kipwilo.’​—Tanga 1 Kodinda 14:3, 12, 26. *

2. (a) Le i bika bilengejanga kupwila kwikale kubaka? (b)Le i bipangujo’ka byotusa kubandaula?

² Tuyukile amba i mushipiditu sandu ulengejanga kupwila kwikale kutamija nansha kūbaka. O mwanda mwine tulombelanga kumeso kwa kushilula kupwila konso kwa pa kipwilo, amba Yehova tata wetu wa mūlu ekwesele kupityila ku mushipiditu wandi. Kadi tuyukile amba bantu bonso mu kipwilo bakokeja kulonga’po kintu amba mpangiko ya kupwila ikale itamija. Le ino, i matabula’ka amo abwanya kutabula muntu ne muntu amba kupwila kwa yenga ne yenga kwa ku Njibo ya Bulopwe kwikale nsulo ya kutūkijibwa mutyima ne bukankamane ku mushipiditu?

3.Le i kika kinenenwa amba kupwila kudi na kamweno?

³ Dibajinji dya kulondolola, tubandaulei bidi bipindi bimobimo bya ku kupwila bifwaninwe kulama mu ñeni boba bendeja’ko. Kadi tusa kubandaula muswelo ukokeja kipwilo kyonso kutuntwila ku kutamija boba bonso batanwa’ko. Uno mwanda udi na kamweno kakatampe kotudi mwanda kupwila kwetu i kubungakana kujila. Na bubine, kwenda ku kupwila ne kwisamba’ko i bipindi bikatampe bya mu butōtyi botutōta Yehova.​—Mit. 26:12; 111:1; Is. 66:22, 23.

Kupwila Kutūdīlwe’ko Kwifunda Bible

4, 5. Lelo Kifundwa kya Kiteba kya Mulami kidi na kitungo’ka?

⁴ Batwe bonso tusakanga kumwena ne pa mfulo ku Kifundwa kya Kiteba kya Mulami kya yenga ne yenga. Nanshi pa kwivwanija biyampe kitungo kinekine kya kuno kupwila, tubandaulei kushinta kumo kumo kwa mulupwilo wa Kiteba kya Mulami ne bishinte bya kwifunda.

⁵ Kitungo kine kyotwikadile na Kifundwa kya Kiteba kya Mulami i kwifunda Bible kupityila ku dino dipepala. Bine, mu Kifundwa  kyetu kya Kiteba kya Mulami kya yenga ne yenga, bekalanga “balombola” buluji bwa Kinenwa kya Leza, “mungya mwanda’wa,” monka mobyadi bilongelwa mu mafuku a Nehemia.​—Neh. 8:8; Is. 54:13.

6. (a) Le i kushinta’ka kushintyilwe mu Kifundwa kya Kiteba kya Mulami? (b) Le i bika byoketufwaninwepo kwilwa pa mwanda utala bisonekwa bilombwelwe amba “tanga”?

⁶ Bidi Bible dyo dibuku dyotwifunda, o mwanda kwadi kushinta mu Kifundwa kya Kiteba kya Mulami. Bisonekwa palapala bitelelwe mu bishinte bya kwifunda bilombwelwe amba “tanga.” Batwe bonso twibakankamikwe kulonda mu Bible wetu patangwa bino bisonekwa ku kupwila. (Bil. 17:11) Mwanda waka? Mwanda, kitatyi kyotumona madingi a Leza mu Bible wetu, tuteñwanga ku mutyima mpata. (Bah. 4:12) Nanshi, kumeso kwa kutanga bino bisonekwa na diwi ditunduke, yewa wendeja kupwila ufwaninwe kushila bonso kitatyi kifwaninwe kya kukimba bino bisonekwa ne kulonda po bitangwa.

Tudi na Kitatyi Kivule kya Kulombola Lwitabijo Lwetu

7. Le i mukenga’ka otudi nao kitatyi kipityijibwa Kifundwa kya Kiteba kya Mulami?

⁷ Kushinta kukwabo i kwa bula bwa bishinte bya kwifunda bya Kiteba kya Mulami. Mu ino myaka bishinte i bipipijibwe. O mwanda mu Kifundwa kya Kiteba kya Mulami, ke kudi kitatyi kityetye kya kutanga misango ino kitatyi kivule kya kuleta malondololo. Pano bavule mu kipwilo ke badi na mukenga wa kulombola kumeso a bantu bonso lwitabijo lwabo na kulondolola ku kipangujo kitampwe, kushintulula kisonekwa, ne na kuleta mu kīpi mwanda mumweke ulombola buya bwa kulondela misoñanya ya Bible nansha mu miswelo mikwabo. Kitatyi kikwabo nakyo kikokeja kupityijibwa na kwisambila pa bifwatulo.​—Tanga Mitōto 22:22; 35:18; 40:9.

8, 9. Lelo mwendeji wa Kiteba kya Mulami udi na kiselwa’ka?

⁸ Inoko kino kitatyi kya ntentekelo kya kuleta malondololo meshileshile kikekala’ko enka shi kitatyi kipityijibwa Kifundwa kya Kiteba kya Mulami, boba balondolola banena mu kīpi ne yewa wendeja kanenapo bivulevule. Penepa i bika bikokeja kukwasha mwendeji ekale na ndiñamano pa bukata bwa byanena ne malondololo aleta kipwilo mwanda wa kupwila kwikale kutamija bonso?

⁹ Pa kulondolola, tala kino kimfwa. Kifundwa kya Kiteba kya Mulami kidi pamo bwa kikuta kya maluba mayampe kutala’ko. Kifundwa kya Kiteba ya Mulami kiletwa’ko malondololo mavule meshileshile kidi pamo bwa kikuta kikatampe kya maluba mavule a miswelo ne miswelo. Monka mwishidile diluba na diluba dikwabo ku bukata ne musombelo, mo monka mwishidile ne malondololo aletwa ku kupwila mu bula ne muswelo oaletwa. Lelo mwendeji nandi ukokeja kuneñenya’ko namani? Binenwa byandi bidi pamo bwa tuyombo tubishi twabweja na muneñenya mu kikuta kya maluba. Tuno tuyombo ketufwaninwepo kwikala tupite bungi; ino tukwashanga ku kuneñenya ne kubambakanya kikuta. Mo monka ne yewa wendeja ufwaninwe kuvuluka amba kiselwa kyandi ke kya kunenapo bivule, ino i kya kulunga binenwa bya kipwilo bya mitendelo. Bine shi malondololo mavule meshileshile aletwa na kipwilo alungwe pamo na binenwa bityetye bibweja’ko mwendeji, nabya bikekala pamo bwa kikuta kilumbuluke kya binenwa kikaloelelwa bonso

“Twikale Kwelela Ponka Kitapwa kya

Kutōtelapo Leza Nyeke na Nyeke”

10. Lelo Bene Kidishitu babajinji bādi bamona kupwila namani?

¹⁰ Binenwa bya Polo bitala pa kupwila kwa Bwine Kidishitu bidi mu 1 Kodinda 14:26-33 bituyukija muswelo wādi wendejibwa  kupwila mu myaka katwa kabajinji. Mubandaudi umo wa Bible wisambila pa ano mavese na kulemba amba: “Kintu kimo kya kwanwa i amba, mu mingilo ya mu Kipwilo kibajinjibajinji, kubwipi muntu ne muntu wādi wimona bu udi na dyese ne kiselwa kya kulonga’mo kintu kampanda. Mwana-mulume kādipo wiya’tu na mutyima wa kwivwana bitupu; kādipo wiila enka kupebwa bitupu, ino i ne mwanda wa kupāna.” Bine, Bene Kidishitu babajinji bādi bamona kupwila bu mukenga wa kulombola lwitabijo lwabo.​—Loma 10:10.

11. (a) Le i bika bikwashanga bininge kupwila kwikale kutamija, ne mwanda waka? (b) Lelo i madingi’ka a kulonda aketukwasha tulumbulule malondololo etu ku kupwila? (Tala kunshi kwa dyani.)

¹¹ Kulombola lwitabijo lwetu ku kupwila kukwashanga bininge ku ‘kutamija kipwilo.’ Bine, nobe ubwanya kwitabija amba nansha shi ketudi batanwe ku kupwila myaka mivule namani, tusangelanga nyeke kwivwana malondololo a batutu ne bakaka. Tuteñwanga na malondololo atamba ku mutyima a mununu, mwanetu wa kikōkeji; a mwanda kampanda wa tunangu unena mukulumpe  witūtele mutyima; kadi ketubulwangapo kumungamunga shi mwana mutyetye walondolola bintu bilombola amba uswele Yehova bya binebine. I kimweke patōka amba, batwe bonso twelanga kuboko ku kwitamija mu kupwila kwa Bwine Kidishitu potuleta malondololo. *

12. (a) Le i ñeni’ka yotukokeja kuboila ku kimfwa kya Mosesa ne Yelemia? (b) Lelo milombelo ikokeja kukwasha namani pa kuleta malondololo?

¹² Boba badi na bumvu bwa kulondolola bakokeja bine kukolelwa. Shi nobe wivwananga bumvu, vuluka amba kudipo bunka. I bine, nansha ke bengidi ba Leza ba kikōkeji pamo bwa Mosesa ne Yelemia bāmwene amba kebabwanyapo kunena kumeso a bantu bavule. (Div. 4:10; Yel. 1:6) Inoko, monka mwākwashishe Yehova Leza bano bengidi ba pa kala bamutumbije kumeso a bantu, ukakukwasha nobe wele kwadi kitapwa kya mitendelo. (Tanga Bahebelu 13:15.) Lelo i muswelo’ka ukokeja kukukwasha Yehova unekenye moyo wa kulondolola? Dibajinji, ikala uteakanya kupwila biyampe. Ebiya, kumeso kwa kwenda ku Njibo ya Bulopwe, fwena Yehova mu milombelo ne kumuzenza akupe bukankamane bwa kulondolola. (Fid. 4:6) Kumulomba kino i kwendele “monka muswidile mutyima wandi,” pa kino ukokeja kukulupila amba Yehova ukalondolola milombelo yobe.​—1 Yoa. 5:14; Nk. 15:29.

Kupwila Kukwasha ku ‘Kutamija, Kufundija, ne Kusenga’

13. (a) Lelo kupwila kwetu kufwaninwe kukwasha namani boba batanwa’ko? (b) Le i kipangujo’ka kya kamweno mpata kitala bakulumpe?

¹³ Polo unena amba kupwila kwa pa kipwilo kudi na kitungo kya ‘kutamija, kufundija, ne kusenga’ boba batanwa’ko. * (1 Kod. 14:3) Lelo bakulumpe Bene Kidishitu bakokeja kuyuka namani dyalelo amba bipindi byobapityija ku kupwila bitamijanga batutu ne bakaka ku mushipiditu ne kwibasenga? Pa kulondolola ku kino, tubandaulei kupwila kwāendeje Yesu kupwa’tu kwa kusanguka.

14. (a) Lelo i binkumenkume’ka byālongekele kumeso kwa kwibunga kwāteakenye Yesu? (b) I kika kinenenwa amba ‘Yesu pa kufwena ko badi kaebanena,’ batumibwa bākankamikilwe?

¹⁴ Dibajinji, tala bidi binkumenkume byābadikile kuno kwibunga. Kitatyi kityetye kumeso kwa Yesu kwipaibwa, batumibwa “bamushia, ke banyema ne kunyema,” kadi enka mokyālailwe, bākusakene na “kusansana wa kwabo, wa kwabo.” (Mako 14:50; Yoa. 16:32) Penepo, Yesu pa kupwa kusanguka, wānena batumibwa bādi batyumukwe mutyima kukebunga mu muswelo wa pa bula. * Ebiya “bāna-babwanga dikumi ne umo baendele konka ku Ngadilea ku lūlu kwēbalaīle.” Abo pa kufika’ko, ‘Yesu wafwena ko badi kaebanena.’ (Mat. 28:10, 16, 18) Fwatakanya’po mwākankamikilwe batumibwa pa uno mulangwe wākwete Yesu! Lelo Yesu wānene bika?

15. (a) Le i myanda’ka yēsambile’po Yesu, ino kesambilepo bika? (b) Lelo kuno kubungakana kwātengele batumibwa namani?

 ¹⁵ Yesu wāshilwile kwibasapwila amba: “Lupusa lonsololo napebwa’lo.” Kupwa wēbanena amba: “Endai nanshi mukafundijei . . . bantu nabo ke bāna-babwanga.” Ku mfulo, wēbakulupija na kyanga amba: “Ami nami kadi, ngidi nenu mafuku onso nyeke.” (Mat. 28:18-20) Ino le ubamone kintu kekyālongelepo Yesu? Kātopekelepo batumibwa bandi; nansha kutwelela pa kuno kubungakana mwanda wa kutatana kukanina kwabo kwa mutyima nansha kwibamwekeja bu babipya-mambo na kwisambila pa bukōkekōke bwa lwitabijo lwabo bwa kitatyi kityetye. Inoko, Yesu wēbakulupije amba aye ne Shandi bebaswele pa kwibapa uno mwingilo mukatampe. Lelo mwisambilo wa Yesu wātengele namani batumibwa? Bātamijibwe, bakankamana, ne kusengibwa. Pa kino, kitatyi kityetye’tu pa kupwa kuno kwibunga, bāendele monka ‘kufundija ne kusapula’ myanda miyampe.​—Bil. 5:42.

16. Lelo dyalelo bakulumpe Bene Kidishitu beulanga namani kimfwa kya Yesu pobendeja kupwila amba kwikale bu nsulo ya kutūkijibwa mutyima?

¹⁶ Dyalelo, bakulumpe beulanga Yesu na kumona kupwila bu mikenga ya kukulupija banababo betabije amba Yehova uswele bantu bandi nyeke. (Loma 8:38, 39) O mwanda, pobapityija bipindi ku kupwila, bakulumpe bemaninanga pa biyampe bilonga banababo, ke pa bukōkekōke bwabopo. Kebatatanangapo kukanina kwa mutyima wa banababo. Inoko, binenwa byabo bilombolanga amba bamwene banababo bu bantu baswele Yehova ne amba basenswe kulonga byoloke. (1 Tes. 4:1, 9-12) Shako, kyaba kimo bakokeja kumona’mba bifwaninwe kuleta madingi kampanda ku kipwilo kyonso, inoko, shi i bantu batyetye basakilwa kololwa, bikalanga biyampe kwisambila pa bunka na boba bene batalwa na mwanda. (Ngat. 6:1; 2 Tem. 2:24-26) Kitatyi kyobesamba kumeso a kipwilo kyonso, bakulumpe bafwaninwe kulonga bukomo bwa kwikitendela ponso pokilomba kulonga namino. (Is. 32:2) Bakalonga buninge bwa kwisamba mu muswelo muyampe amba ku mfulo kwa kupwila, bonso batenwe’ko batūkijibwe mutyima ne kukomejibwa.​—Mat. 11:28; Bil. 15:32.

Kifuko kya Mutyima-Ntenke

17. (a) Mwanda waka pano po pene pasakilwa kupwila kwetu kwikale bu kifuko kya mutyima-ntenke? (b) Lelo i bika byokokeja nobe kulonga mwanda wa kwitamija ku kupwila? (Tala kapango kanena amba, “Miswelo Dikumi ya Kwitamija Abe Mwine ne Bakwenu ku Kupwila.”)

¹⁷ Pano penda pavudija ntanda ya Satana mitabakano, tusaka kupwila kwetu kwa Bwine Kidishitu kwikale bu kifuko kya mutyima-ntenke​—nsulo ya busengi ku bonso. (1 Tes. 5:11) Kaka umo, pamo ne mulumyandi, pa kupwa kulwa na matompo mu myaka mivule, uvuluka amba: “Kwenda ku Njibo ya Bulopwe kwadi pamo bwa kulelwa mu makasa a Yehova. Mu mansaa otwadi tutanwa’ko, tujokolokelwe na batutu ne bakaka Bene Kidishitu, twadi twiivwana amba tubwanya kwela kiselwa kyetu padi Yehova, ne kino kyadi kitupa ndoe mu mutyima mu ludingo kampanda.” (Mit. 55:22) I biyampe bonso batanwa ku kupwila kwetu nabo bakankamikwe ne kusengwa uno muswelo. Pa kufikila’po, twendelelei kwitamija potutanwa ku kupwila kwetu kwa Bwine Kidishitu.

[Kunshi kwa dyani]

Usa Kulondolola Namani?

• Le i kika kinenenwa amba kupwila kudi na kamweno?

• Mwanda waka kulondolola ku kupwila ‘kutamija kipwilo’?

• Lelo i ñeni’ka yotukokeja kuboila ku kwibunga kwa bana ba bwanga kwāendeje Yesu?

[Bipangujo bya Kifundwa]

[Tupango/​Bifwatulo pa paje 26]

MISWELO DIKUMI YA KWITAMIJA ABE MWINE NE BAKWENU KU KUPWILA

Witeakanye kumeso kwa kitatyi. Shi wifunda kumeso kwa kitatyi myanda ikabandaulwa ku Njibo ya Bulopwe, ukalonda biyampe kupwila ne pa mfulo ne kuvuluka bipita’ko.

Tanwa’ko kitatyi ne kitatyi. Buvule bwa batanwa ku kupwila bukankamikanga bonso badi’ko, kubadila’mo ne abe.

Fika pa kitatyi. Shi ushikate kala kumeso kwa mpangiko kushilula, nobe ukemba lwimbo lubajinji ne kulonda milombelo, nabyo bibadilwa mu butōtyi botutōta Yehova.

Sela bingidilwa byonso. Sela Bible obe ne mabuku akengidijibwa ku kupwila mwa kulondela ne kukwata byobya bikabandaulwa’ko.

Leka kupuakanibwa. Kimfwa, tanga misapu ya ku telefone pa kupwa kupwila, ke mu kupwilapo. Nabya ukatūla myanda ya abe mwine pa kifuko kyayo.

Londolola. Kitatyi kyolondolola bininge, bavule bakankamikwanga ne kūbakwa na binenwa bya lwitabijo.

Londolola mu kīpi. Kino kikapa bavule kyaba kya kulondolola.

Pityija bipindi. Pobakupa bipindi ku Masomo a Mwingilo wa Kiteokratike nansha ku Kupwila kwa Mingilo, witeakanye senene, pituluka’mo kumeso kwa kitatyi, ne kokabulwa kukalonga bipindi byobe.

Fwija’ko boba bapityija bipindi. Lombola boba bapityija bipindi ku kupwila nansha balondolola’ko muswelo otendela bukomo bobalonga.

Loeja kipwano. Kwiimuna ne misambo yūbaka kumeso ne kupwa kwa kupwila kubwejanga nsangaji ne byabuyabuya.