Utuku ukolesha bakuabu mu bisangilu anyi?
Utuku ukolesha bakuabu mu bisangilu anyi?
‘Panuadisangisha, malu onso enjibue bua kunudiundisha.’—1 KOL. 14:26.
1. Bilondeshile 1 Kolinto nshapita wa 14, bisangilu bietu bidi ne tshipatshila kayi tshinene?
‘BISANGILU ebi mbingambuluishe bikole be!’ Bikadi bikufikileku bua kuamba nunku panyima pa bisangilu kampanda ku Nzubu wa Bukalenge anyi? Kakuyi mpata ukadiku muambe nanku. Bisangilu bia mu tshisumbu bitu bitukolesha bikole. Kabiena butukemesha bualu anu bu mu matuku a bena Kristo ba kumpala, tshipatshila tshinene tshia bisangilu bietu ntshia kukolesha ditabuja dia bantu bonso badi babuelamu. Tumone muvua mupostolo Paulo muleje patoke tshipatshila tshia bisangilu mu mukanda wende wa kumpala uvuaye mufundile bena Kolinto. Mu nshapita wa 14 mujima udi wambulula uleja mudi malu onso adi enzeka mu bisangilu mikale ne tshipatshila tshimue. Adi ne bua ‘kudiundisha ekeleziya.’—Bala 1 Kolinto 14:3, 12, 26. *
2. (a) Ntshinyi tshidi tshienzeja bua bisangilu bikale bikoleshangana? (b) Ndukonko kayi lutuakonkonona?
2 Tudi bamanye ne: nyuma wa Nzambi ke tshintu tshia kumpala tshidi tshienzeja bua bisangilu bikale bikoleshangana. Ke bualu kayi tudi tutuadija bisangilu bionso ne disambila, tulomba Yehowa Tatu wetu wa mu diulu ne muoyo mujima bua abeneshe bisangilu bietu ku diambuluisha dia nyuma wende. Kadi tudi bamanye ne: muntu yonso mu tshisumbu udi mua kuenza bua bisangilu bikale bikoleshangana. Nunku, mmalu kayi adi yonso wa kutudi ne bua kuenza bua bisangilu bidi bienzeka lumingu luonso mu Nzubu wetu wa Bukalenge bikale bitukolesha?
3. Bua tshinyi bisangilu bietu bidi ne mushinga?
3 Bua kuandamuna lukonko elu, netukonkonone amue malu adi enzeka mu bisangilu bietu adi badi babilombola kabayi mua kupua muoyo. Netukonkonone kabidi tshidi bena mu tshisumbu bonso mua kuenza bua bisangilu bikale bikolesha bantu bonso badi babuelamu. Tshiena-bualu etshi tshidi ne mushinga wa bungi kutudi bualu bisangilu bietu mbia tshijila. Kubuela mu bisangilu ne kuandamunamu mmalu a mushinga a mu ntendelelu wetu.—Mus. 26:12; 111:1; Yesh. 66:22, 23.
Tshisangilu tshidi tshituambuluisha bua kulonga Bible
4, 5. Dilonga dia Tshibumba tshia Nsentedi didi ne tshipatshila kayi?
4 Tuetu bonso tudi basue bua Dilonga dia Tshibumba tshia Nsentedi dia lumingu luonso dituambuluishe. Nunku bua kumvua tshipatshila tshinene tshia tshisangilu etshi, tuanji tukonkonone amue malu adi mashintuluke mu Tshibumba tshia Nsentedi ne mu biena-bualu bia kulonga.
5 Kubangishila ne Tshibumba tshia Nsentedi tshia kulonga tshia kumpala tshia mu dia 15/1/2008, mbazole tshintu kampanda tshia mushinga pa dibeji dia kumpala dia Tshibumba tshia Nsentedi tshia kulonga. Uvuaku mutshimone anyi? Tangila bimpe pa mutu pa tshibejibeji tshiudi natshi. Kuinshi kua tshibumba tshidibu bazole, neumone Bible mubulula. Bible eu udi uleja tshitudi tulongela Tshibumba tshia Nsentedi. Tshidi tshituambuluisha bua kulonga Bible. Nunku, mu Dilonga dia Tshibumba tshia Nsentedi dia ku lumingu badi “bumvuija” Dîyi dia Nzambi ne anu bu mu matuku a Nehemiya badi ‘badijinguluila’ bantu.—Neh. 8:8, MMV; Yesh. 54:13.
6. (a) Mmalu kayi adibu bashintulule mu Tshibumba tshia Nsentedi tshia kulonga? (b) Ntshinyi tshitudi ne bua kuvuluka pa bidi bitangila mvese idibu bafunde ne: “bala”?
6 Bu mudi Bible muikale mukanda wetu munene, bavua bashintulule amue malu mu Tshibumba tshia Nsentedi tshia kulonga. Kudi mvese ya bungi idibu bafunde ne: “bala.” Mbimpe tuetu bonso tulonde dibala dia mvese eyi mu Bible yetu. (Bien. 17:11) Bua tshinyi? Bidi bitamba kutulenga patudi tudimuena mibelu ya Nzambi mu Bible wetu. (Eb. 4:12) Ke bualu kayi kumpala kua kubala mvese ya nunku, muanetu udi ulombola tshisangilu udi ne bua kulekela bantu bapete mvese ayi bua balondeshe padibu benda bayibala.
Dîba dia bungi dia kuleja ditabuja dietu patoke
7. Tudi ne mushindu wa kuenza tshinyi mu Dilonga dia Tshibumba tshia Nsentedi?
7 Mbashintulule kabidi bule bua biena-bualu bia kulonga. Mbabipidije. Nunku dîba ditudi tulonga Tshibumba tshia Nsentedi, tudi tuangata dîba dikese bua kubala bikoso ne tushiya dia bungi bua kuandamuna. Mpindieu mu tshisumbu bantu ba bungi badi ne mushindu wa kuleja ditabuja diabu patoke padibu bandamuna lukonko ludi kuinshi, padibu bumvuija mvese, padibu balonda bualu budi buleja buimpe bua kulonda mibelu ya mu Bible peshi baleja ditabuja diabu mu mishindu mikuabu. Mulombodi udi kabidi mua kulomba bantu bua kumvuija bimfuanyi.—Bala Musambu wa 22:22; 35:18; 40:9.
8, 9. Mulombodi wa Dilonga dia Tshibumba tshia Nsentedi udi ne mudimu kayi?
8 Tshidibi bua kupeta dîba dia bungi dia kufila mandamuna mashilashilangane, muntu yonso udi ne bua kuandamuna mu mêyi makese ne udi ulombola kena ne bua kupita kuakula malu a bungi to. Nunku, ntshinyi tshidi mua kuambuluisha mulombodi bua kumanya tshia kuenza pankatshi pa malu adiye wamba ne mandamuna a bena mu tshisumbu bua bisangilu bikoleshe bantu bonso?
9 Bua kuandamuna, tuangate tshilejilu. Dilonga dia Tshibumba tshia Nsentedi didi dilombola bimpe didi anu bu tshisumbu tshia bilongo tshidi tshimpe kumona. Anu bu mudi tshisumbu tshia bilongo tshienza ne bilongo bishilashilangane ke mudi Dilonga dia Tshibumba tshia Nsentedi dienza ne mandamuna a bungi mashilashilangane. Anu bu mudi bilongo bidi bienza tshisumbu bishilangane ku bunene ne ku mubidi, ke mudi kabidi mandamuna atudi tufila mu bisangilu mashilangane ku bule ne ku mushindu wa kuafila. Kadi mulombodi udi ne mudimu kayi? Malu makese adiye wamba adi anu bu mabeji mabishi adibu basakidila bua kulengeja tshisumbu tshia bilongo. Mabeji aa kaena a bungi to, kadi adi ambuluisha bua kuakaja ne kutuangaja tshisumbu tshia bilongo. Bia muomumue, mulombodi udi ne bua kumanya ne: mudimu wende ki ngua kuakula bia bungi to, kadi ngua kusakidila malu ku adi bena mu tshisumbu bandamuna bua kujikula ditabuja diabu patoke. Patudi tusangisha mandamuna adi bena mu tshisumbu bafila ne tumalu tukese tudi mulombodi wamba padibi bikengela, bidi bienza anu bu tshisumbu tshia bilongo tshimpe kumona tshidi tshiambuluisha bena mu tshisumbu bonso.
‘Tufilefile kudi Nzambi mulambu wa kumutumbisha nawu’
10. Mmunyi muvua bena Kristo ba kumpala bamona bisangilu bia tshisumbu?
10 Mushindu udi Paulo wakula bua bisangilu mu 1 Kolinto 14:26-33 udi uleja muvua bisangilu bia bena Kristo ba kumpala bienzeka. Mumanyi mukuabu wa malu a mu Bible wakamba bua mvese eyi ne: “Tshintu tshia mushinga mukole bua ekeleziya wa kumpala tshivua tshia ne: muntu yonso uvua uluamu mumanye ne: uvua ne diakalenga ne dibanza dia kuenzamu bualu kampanda. Muntu kavua uluamu anu bua kuteleja patupu, kadi uvua ulua bua kupeta tshintu kampanda ne kupeshangana pende.” Bushuwa, bena Kristo ba kumpala bavua bamona bisangilu bia tshisumbu bu mushindu wa kujikulabu ditabuja diabu.—Lomo 10:10.
11. (a) Ntshinyi tshitu tshiambuluisha bikole bua bisangilu bikale bikoleshangana? Bua tshinyi? (b) Tudi ne bua kuenza malu kayi bua kulengeja mandamuna etu? (Tangila note kuinshi kua dibeji.)
11 Kujikula ditabuja dietu mu bisangilu kudi kuambuluisha bikole bua ‘kudiundisha ekeleziya.’ Kakuyi mpata, tudi mua kuamba ne: nansha bituikala tukadi babuele mu bisangilu matuku a bungi anyi makese, tudi anu ne disanka dia kuteleja mandamuna a bana betu. Diandamuna dia muanetu wa lulamatu ukadi mukulakaje didi ditulenga ku muoyo. Tudi tukola ku muoyo patudi tuteleja bualu bua mushinga budi mukulu kampanda wandamuna. Tudi tusanka ne tutua mimuemue padi muana mukese ufila diandamuna didi dileja mudiye munange Yehowa. Nunku, patudi tuetu bonso tuandamuna mu bisangilu tudi tuenza bua bikale bikoleshangana. *
12. (a) Tshilejilu tshia Mose ne tshia Yelemiya tshidi tshitulongesha tshinyi? (b) Mmushindu kayi udi disambila mua kuambuluisha bua kuandamuna mu bisangilu?
12 Kuandamuna kudi mua kukolela bantu batu ne bundu. Pikalabi nanku buebe wewe, bidi mua kukuambuluisha bua kumanya ne: kuena nkayebe to. Nansha batendeledi ba Nzambi bu mudi Mose ne Yelemiya bakaleja muvuabu kabayi mua kuakula munkatshi mua bantu to. (Ekes. 4:10; Yel. 1:6) Kadi anu muvua Yehowa mubambuluishe bua kumutumbisha munkatshi mua bantu, neakuambuluishe pebe bua kufila mulambu wa kumutumbisha nawu (Bala Ebelu 13:15.) Mmunyi mudi Yehowa mua kukuambuluisha bua kutantamena buôwa buebe bua kuandamuna? Tshia kumpala ikala udilongolola bimpe bua bisangilu. Pashishe kumpala kua kuya ku Nzubu wa Bukalenge, sambila Yehowa ne mulomba bua akupeshe dikima dia kuandamuna. (Filip. 4:6) Bu muudi ulomba tshintu tshidi tshimvuangana ne ‘disua diende,’ ikala mujadike ne: neandamune disambila diebe.—1 Yone 5:14; Nsu. 15:29.
Bisangilu bidi ‘bidiundisha, bisamba ne bikolesha’
13. (a) Ntshinyi tshidi bisangilu ne bua kuenzela bantu badi babuelamu? (b) Ndukonko kayi ludi ne mushinga bua bakulu?
13 Paulo udi uleja ne: tshipatshila tshinene tshia bisangilu bia tshisumbu ntshia ‘kudiundisha, kusamba ne kukolesha’ badi babuelamu. * (1 Kol. 14:3) Mmunyi mudi bakulu bena Kristo mua kujadika bikala midimu idibu benza mu bisangilu ikolesha ne isamba bana babu bena Kristo? Bua kuandamuna tukonkonone tshisangilu tshivua Yezu muenze panyima pa dibika diende ku lufu.
14. (a) Mmalu kayi avua menzeke kumpala kua tshisangilu tshivua Yezu muenze? (b) Bua tshinyi bapostolo bavua ne bua kuikala bumvue disulakana pavua ‘Yezu mulue kudibu ne muakule nabu’?
14 Tuanji tumone malu avua menzeke kumpala kua tshisangilu atshi. Kumpaka kua kushipabu Yezu, bapostolo ‘bakamushiya, bakanyema’ ne anu mukavuabu bamanyishe ‘bakabamuangalaja, muntu kuende muntu kuende.’ (Mâko 14:50; Yone 16:32) Pashishe pakabikaye, wakabikila bapostolo bende bakavua batekete ku muoyo abu bua kubuelabu mu tshisangilu tshia pa buatshi. * ‘Bayidi dikumi ne umue bakaya mu Galela, ku mukuna wakabambila Yezu.’ Pakafikabu, ‘Yezu wakalua kudibu, wakakula nabu.’ (Mat. 28:10, 16, 18) Ela meji muvua bapostolo bumvue disulakana pavua Yezu mulue kudibu ne muakule nabu. Ntshinyi tshivua Yezu mubambile?
15. (a) Mmalu kayi avua Yezu muakule? Kadi mmalu kayi avuaye kayi muakule? (b) Mmunyi muvua tshisangilu atshi tshiambuluishe bapostolo?
15 Yezu wakatuadija ne kubambila ne: “Bakumana kumpa bukokeshi buonso.” Pashishe wakabapesha mudimu wamba ne: ‘Ndayi bienu, nuvuije bantu bayidi.’ Ndekelu wa bionso wakabajadikila ne: ‘Ndi nenu matuku onso.’ (Mat. 28:18-20) Kadi nudi bamone tshivua Yezu kayi muenze anyi? Kavua mutandishe bapostolo bende anyi kavua mubambile muvuabu ne meji mabi peshi muvuabu benze bibi bua muvuabu bapange ditabuja bua musangu muipi. Kadi Yezu wakabajadikila muvua yeye ne Tatuende babanange ke kubapeshaye mudimu munene. Mmunyi muvua malu avua Yezu muenze mambuluishe bapostolo bende? Malu aa akabakolesha ne kubasamba, ke bualu kayi mutantshi mukese pashishe bakavua kabidi ‘bayisha bantu ne babambila lumu luimpe.’—Bien. 5:42.
16. Mmunyi mudi bakulu bidikija Yezu lelu padibu balombola bisangilu bua kukolesha bena mu tshisumbu?
16 Bakulu badi bidikija Yezu lelu bualu badi bamona bisangilu bu mushindu muimpe wa kujadikila bena Kristo nabu bua dinanga didi nadi Yehowa bua bantu bende. (Lomo 8:38, 39) Ke bualu kayi padibu balongesha mu bisangilu, badi batamba kuimanyina pa malu mimpe adi bana babu benza, ki mpa mateketa abu to. Kabena belela bana babu meji mabi to, kadi malu adibu bamba adi aleja ne: badi bamona bena Kristo nabu bu bantu badi banange Yehowa ne basue kuenza malu mimpe. (1 Tes. 4:1, 9-12) Kudi imue misangu idi bakulu ne bua kufila mibelu kudi tshisumbu tshijima, kadi bikala anu bantu bakese ke badi dijinga ne mibelu ayi, badi bayipesha anu bantu badi bayikengela. (Gal. 6:1; 2 Tim. 2:24-26) Padibu bakula kumpala kua tshisumbu tshijima, bakulu badi bajinga kuela bantu kalumbandi dîba dionso didiku mushindu. (Yesh. 32:2) Badi baditatshisha bua kuakula mu mushindu muimpe bua ne: ku ndekelu kua bisangilu bantu bonso badiumvue ne bukole ne bakankamijibue.—Mat. 11:28; Bien. 15:32.
Bisangilu bietu bidi bitukolesha
17. (a) Bua tshinyi bidi ne mushinga nangananga lelu bua bisangilu bietu bikale bitukolesha? (b) Ntshinyi tshiudi mua kuenza bua bisangilu bietu bikale bikoleshangana? (Tangila kazubu kadi kamba ne: “Malu dikumi a kuenza bua bisangilu bikukoleshe wewe ne bantu bakuabu.”)
17 Bu mudi bulongolodi bua Satana buenda anu bunyanguka, tudi ne bua kuenza bua ne: bisangilu bietu bikale muaba utudi tupetela bukole. (1 Tes. 5:11) Muanetu mukuabu wa bakaji ne bayende bavua bepete lutatu lukole bidimu bia bungi kumpala udi wamba ne: “Kuikala ku Nzubu wa Bukalenge kuvua anu bu kuikala mu maboko a Yehowa. Mêba onso atuvua tuenzaku munkatshi mua bena Kristo netu, avua atuambuluisha bua kuteka bujitu buetu pambidi pa Yehowa ne tuvua tupeta ndambu wa ditalala dia munda ne dia mu lungenyi.” (Mus. 55:22) Tudi tujinga bua ne: bantu bonso badi babuela mu bisangilu bietu badiumvue pabu ne: badi bakoleshibua ne basambibua. Bua kushindika ne: nebikale nunku, tuenzayi muetu muonso bua bisangilu bietu bikale bikolesha bantu bonso.
[Mêyi adi kuinshi]
^ tshik. 1 Bavua baleje ne: amue malu avua enzeka mu bisangilu bia bena Kristo ba kumpala avua ne bua kujika. Tshilejilu, katutshiena ‘tuakula miakulu’ anyi tuamba ‘mayisha a tshiprofete.’ (1 Kol. 13:8; 14:5) Nansha nanku, mibelu ya Paulo idi ituleja patoke mudi bisangilu bietu ne bua kuenzeka lelu.
^ tshik. 11 Bua kumanya tshia kuenza bua kulengeja mandamuna etu mu bisangilu, tangila Tshibumba tshia Nsentedi tshia mu dia 1/9/2003, dibeji 19-22.
^ tshik. 13 Mukanda mukuabu udi wakula bua dishilangana didi pankatshi pa ‘kusamba’ ne ‘kukolesha’ wamba ne: “Muaku wa mu tshiena Greke udibu bakudimune ne: ‘kusamba’ udi uleja ‘dinanga divule kupita [kukolesha].’”—Vine’s Expository Dictionary of Old and New Testament Words; tangila Yone 11:19.
^ tshik. 14 Tshisangilu etshi tshidi mua kuikala tshivua Paulo mulue kuakula bualu buatshi pakambaye ne: Yezu “wakamueneka kudi bantu batambe nkama itanu tshikondo tshimue.”—1 Kol. 15:6.
Newandamune munyi?
• Bua tshinyi bisangilu bietu bia bena Kristo bidi ne mushinga?
• Bua tshinyi mandamuna adibu bafila mu bisangilu adi ambuluisha bua ‘kudiundisha ekeleziya’?
• Ntshinyi tshitudi mua kulongela ku tshisangilu tshivua Yezu muenze ne bayidi bende?
[Nkonko ya dilonga]
[Kazubu/Bimfuanyi mu mabeji 22, 23]
MALU DIKUMI A KUENZA BUA BISANGILU BIKUKOLESHE WEWE NE BANTU BAKUABU
Ikala udilongolola kumpala. Paudi udianjila kulonga malu atualonga ku Nzubu wa Bukalenge, bisangilu nebikusankishe ne nebikuambuluishe bikole.
Ikala ubuelamu pa tshibidilu. Padi bantu ba bungi babuela mu bisangilu bidi bikolesha bantu bonso badimu, nunku dibuela diebe didi ne mushinga wa bungi.
Ikala ufika kumpala kua dîba. Wewe mumane kusomba padi bisangilu bituadija, udi mua kuimba musambu wa kumpala ne kuteleja disambila bualu mmalu a mushinga a mu ntendelelu wetu.
Ambula mikanda yonso ya kulonga. Ikala ulua ne Bible webe ne mikanda itualonga mu bisangilu bua wikale ulondesha malu adibu balongesha ne uumvue bimpe.
Epuka ditanaji. Tshilejilu, kuikadi ubala mesaje a mu telefone munkatshi mua bisangilu to, ikala windila padi bisangilu bijika. Dîba adi udi uteka malu ebe pa muaba wawu.
Ikala wandamuna. Padi bantu bavule baleja ditabuja diabu patoke padibu bandamuna, bidi bikolesha bantu ba bungi ne bibakankamija.
Ikala wandamuna mu mêyi makese. Padi bantu bafila mandamuna mipi, bidi bipesha bantu ba bungi mushindu wa kuandamuna pabu.
Ikala wenza midimu idibu bakupesha. Paudi ne mudimu mu Kalasa ka mudimu wa Nzambi anyi mu Tshisangilu tshia mudimu, ikala udilongola bimpe, wambulula kumpala kua dîba ne udienzeja bua kuyenza ne kubenga kupumbisha.
Ikala wela bakuabu kalumbandi. Ikala wambila bantu bonso bavua benze mudimu mu bisangilu anyi bandamune muuvua muanyishe malu avuabu bambe.
Ikala uyukila ne bantu. Kuelangana muoyo ne kuyukila malu adi akolesha kumpala kua bisangilu ne padibi bijika kudi kupetesha bantu badi babuelamu disanka ne kubakolesha.
