Komana Ninenu Mwaleñelaña Kupompa KwawakwaKristu Kwikaleña Kwakukolesha?

“Chimwapompaña, . . . ilenu yuma yejima kulonda mukoleshi akwenu.”—1 KOR. 14:26.

1. Kwesekeja namukanda wa 1 Akorinda kapetulu 14, muloñanyi waweni wutwekalilaña nakupompa kwawakwaKristu?

 ‘KUPOMPA kwadiña kwakukolesha nankashi!’ Mwahoshahu dehi mazu amuchidawa hanyima yakupompa Hetala daWanta? Chakadi nikujina mwatela mwayihoshahu dehi! Eñañi kupompa kwachipompelu kwatukoleshaña, nawa chumichi hichatuhayamishañaku. Neyi chichadiña mumpinji yawakwaKristu akusambila, muloña waweni wutwapompelaña makonu wekala wakukolesha wuspiritu wawantu ejima anenzi nakupompa. Talenu kapostolu Pawulu chakonkomweneniyi hamuloña waweni wakupompa kwawakwaKristu mumukanda windi watachi wasonekeleliyi Akorinda. Mukapetulu 14, kejima wahosheli nakufuntila-funtilahu nindi mpanji yejima  yahanañawu hakupompa yatela kwikala—‘yakukolesha nachu chipompelu.’—Tañenu 1 Akorinda 14:3, 12, 26. *

2. (a) Chumanyi chaleñelaña kupompa kwikaleña kwakutukolesha? (b) Lwihwinyi lutukuhanjekahu?

² Tweluka netu kupompa kwekalaña kwakukolesha, nawa kwakufumba, hamuloña waspiritu yaNzambi. Dichi, twatachikaña kupompa kudi kwejima kwachipompelu nakulomba kwakufuma hamuchima kudi Yehova, Tata yetu wamwiwulu, nawa twamulombaña netu yakiswili kupompa kwetu kuhitila muspiritu yindi yajila. Hela chochu, tweluka netu antu ejima amuchipompelu anateli kuleñela maprogiramu akupompa ekali akukolesha hama. Hanu dinu, njilanyi jitwatela kulondela hamuntu hamuntu kulonda kupompa kwamulungu nimulungu kwekalaña Hetala daWanta kutukolesheña chikupu kuspiritu?

3. Indi kupompa kwawakwaKristu kwalema ñahi?

³ Hakwila twakuli ilu lwihu, tukushinshika hambadi jakupompa kwetu jatela kwanukaña antu alombolaña kupompa. Tukudiza cheñi antu ejima muchipompelu chatela kuleñelawu kupompa kwikaleña kwakukolesha antu ejima enzaña nakupompa. Iyi nsañu yinatuzañaleshi chikupu muloña kupompa kwetu kwekala kwajila. Eñañi, kuya nakupompa nikwakulahu hiyuma yalema nankashi mukudifukula kwetu kudi Yehova.—Mas. 26:12; 111:1; Isa. 66:22, 23.

Kupompa Kwaloñeshawu Kulonda Tudizeña Bayibolu

4, 5. Muloñadi wutwekalilaña naKaposhi Kakutalila Kakudizamu?

⁴ Wonsu wetu twakeñaña kuhetelamu chikupu Mukudiza kwaKaposhi Kakutalila kwamulungu nimulungu. Dichi, hakwila twiluki chikupu muloña waweni wutwapompelaña, tushinshikenu hayuma yikwawu yinahimpiwu mumagazini yaKaposhi Kakutalila niyibaaba yakudizamu.

⁵ Kutachika nachibaaba chatachi chakudizamu chaKaposhi Kakutalila, kaJanuary 15, 2008, hewulu dakaposhi ashiluhu yuma yikwawu. Komana mwayimweni? Shinshikenu chachiwahi hewulu damagazini yimunakwati. Kwishina dakaposhi, mukumona hadi Bayibolu yakubakula. Iyi yuma yanabombeluhu yakonkomwenaña hamuloña wutwekalilaña naKaposhi Kakutalila Kakudizamu. Muloña twadizaña Bayibolu kuzatisha iyi magazini. Eñañi, Hakudiza kwaKaposhi Kakutalila kwamulungu nimulungu, Izu daNzambi ‘adilumbululaña,’ neyi chichadiña mumpinji yaNehemiya wakushankulu, kwekalaña ‘kulumbulula mwaya izu daNzambi.’—Nehe. 8:8; Isa. 54:13.

6. (a) Chumanyi chahimpiluwu haKaposhi Kakutalila Kakudizamu? (b) Yumanyi yitwatela kwanukaña kutalisha hansona jasonekawu nawu “tañenu”?

⁶ Chineli Bayibolu dimukanda waweni wutwadizaña, dichahimpililuwu Kaposhi Kakutalila Kakudizamu. Nsona jajivulu jatenañawu muyibaaba yakudizamu asonekañahu nawu “tañenu.” Wejima wetu anatuleji kulondela mumaBayibolu etu hakutaña iji nsona hampinji yakupompa. (Yil. 17:11) Muloñadi? Neyi tumona kufumba kwaNzambi muBayibolu yetu, chikutuleñela kutiyisha chikupu. (Heb. 4:12) Dichi, henohu nsona kanda ayitañi, wunakulombola kupompa watela kwinka antu adi mwizaza mpinji yakuwana nsona nakulondela chinakutañawu mavasi.

Anatwinki Mpinji Yeneni Yakumwekesha Chikuhwelelu Chetu

7. Mpinji yankahi yinatwinkuwu haKudiza Kaposhi Kakutalila?

⁷ Cheñi nawa kuleha kwayibaaba yaKaposhi Kakutalila kakudizamu niyena ayihimpa. Chayinu mpinji ayihihisha. Dichi, hampinji yaKudiza Kaposhi Kakutalila, mpinji yantesha yekalaña yakutaña maparakalafu ilaña mpinji yeneni yekalaña yakwakulahu. Ichi antu  amavulu muchipompelu akwikalaña nampinji yakumwekesha chikuhwelelu chawu kuhitila mukwakula malwihu asonekawu, kushimuna mutwatela kuzatishila nsona, nikushimuna chakutalilahu chachihi chinakumwekesha kulema kwakulondela nshimbi jamuBayibolu, hela njila jikwawu. Mwatela kwikalahu nampinji yakuhanjeka hanyevulu.—Tañenu Masamu 22:22; 35:18; 40:9.

8, 9. Mudimwinyi wukwetiyi mukwakulombola Kaposhi Kakutalila Kakudiza?

⁸ Hela chochu, iyi mpinji yanatushiluku yakwakulahu munjila yamboka-mboka yikwikalañaku neyi antu akulaña mukwihihisha nawa wunakulombola kupompa yabulaña kusweja kuhoshahu hampinji yaKudiza Kaposhi Kakutalila. Hanu dinu, chumanyi chikukwasha wunakulombola nianakwakulahu muchipompelu kwiluka mwakukumina kulonda kupompa kukolesheña antu ejima?

⁹ Hakwila nawu twakuli ilu lwihu, shinshikenu hanichi chakutalilahu. Kaposhi Kakutalila Kakudizamu kalombolañawu chiwahi kadi neyi chipuña chankenu chalumbanji. Kufwana chipuña chankenu cheneni chikweti nkenu jashiyashana, muKaposhi Kakutalila Kakudiza mwekalaña nsañu yamboka-mboka. Neyi chochambuka nkenu yinatuñiwu nachu  chipuña, jikwawu janyanya jikwawu jamaneni niwulombu washiyashana, dichi mazu akulañawu antu hakupompa ashiyashana mukuvula nimwayihoshelañawu. Indi nlomboli wukweti mudimwinyi? Mazu antesha abombelañahu mukwakulombola kazoku-kazoku adi neyi tunyitayi twantesha twabombelañawu kuchipuña chankenu. Itu tunyitayi hitwajikaña chipuña chejimaku; ilaña, twatuñaña chipuña nikuchikolesha. Chochimu, mukwakulombola watela kwiluka mudimu windi, bayi yaswejaña kuhoshahuku, ilaña watela kukumakeja mazu akushimeka anahoshiwu antu muchipompelu. Eñañi, neyi mazu akwakulawu antu adi muchipompelu nimazu antesha akuhoshayi wunakulombola ayikumakeja hamu chachiwahi, ekalaña neyi chipuña chankenu chalumbanji nawa azañaleshaña antu ejima adi mwizaza.

“Tumulambulenu Nzambi Mulambu Wakumuhameka Mafuku Ejima”

10. AkwaKristu akusambila amweneña ñahi kupompa kwachipompelu?

¹⁰ Mazu aPawulu alumbululayi kupompa kwawakwaKristu ekala ha 1 Akorinda 14:26-33 atukwashaña kwiluka chalombweleñawu iku kupompa muyaaka nkulakaji yatachi. Hakuhosha hanawa mavasi, kadizi waBayibolu wumu wasonekeli nindi: “Chuma chelukewa nankashi kutalisha hakupompa kwaChaachi yakushankulu chadiña chakwila nawu muntu wejima wenjileña kukupompa watoñojokeleña nindi wadiña nakukooleka nimudimu wakwakulahu. Iyala hayileña namuchima wakutiyilila nikutambwila hohuku; ilaña nikuhana.” Eñañi, akwaKristu akusambila amweneña kupompa kwachipompelu nawu diyi mpinji yakumwekesha chikuhwelelu chawu.—Rom. 10:10.

11. (a) Chumanyi chaleñelaña kupompa kwikaleña kwakukolesha chikupu, nawa muloñadi? (b) Tunateli kuyilaku ñahi hambidi mukwakulahu hakupompa?

¹¹ Kumwekesha chikuhwelelu chetu hakupompa kwaleñelaña ‘kukolesha nachu chipompelu.’ Munateli kwiteja nenu hela hanahiti yaaka yayivulu kufuma himwatachikili kuwanika kukupompa, chekala chachiwahi kutiyilila kumazu akulañawu amana kwetu niahela. Twazañalalaña neyi kashinakaji yakulahu, akwetu akakwitiya ashinshika; nawa chatukoleshaña neyi eluda wakamenaña yahosha mazu akukolesha; nawa twatumbaña chimwemweta hakanwa neyi mwana wanyanya yakulahu nakumwekesha chamukeñayi Yehova. Mwalala, kuhitila mukwakulahu, wejima wetu twaleñelaña kupompa kwawakwaKristu kwikaleña kwakukolesha.

12. (a) Chumanyi chitwatela kudizila kuchakutalilahu chaMosi niYeremiya? (b) Indi kulomba kwatukwashaña ñahi hakwakulahu?

¹² Hela chochu, antu atiyaña nsonyi, kwakulahu kunateli kuyikalila chikupu. Neyi mwatiyaña nsonyi, chikuyikwasha neyi mwiluka nenu iku kukala kwamwekanaña. Niambuña aNzambi ashinshika adi neyi Mosi niYeremiya ahosheli nawu hiyeluka kuhosha hakachi kawantuku. (Kwi. 4:10; Yere. 1:6) Ilaña, neyi chochayikwashiliyi Yehova ambuñindi akunyima kulonda amuhamekeña hakachi kawantu, Nzambi nateli kuyikwasha kulonda mumulambuleña mulambu wakumuhameka. (Tañenu Aheberu 13:15.) Munateli kutambwila ñahi wukwashi waYehova kulonda mumanishi woma wumwatiyaña hakwakulahu? Chatachi, mwatela kuloñesha chiwahi nsañu yimukudiza hakupompa. Kuhiñahu, henohu kanda muyi Kwitala daWanta, lombenu kudi  Yehova nawa mulejenu yayinki ñovu yakwakulahu. (Fwi. 4:6) Munateli kukuhwelela nenu Yehova wukutiya kulomba kwenu, muloña munakulomba “chuma chamwaya muchima windi.”—1 Yow. 5:14; Yish. 15:29.

Kupompa Kwashindamenaña ‘haKukolesha, Kukonkomwena, niKukundeja’

13. (a) Kupompa kwetu kwatela kukwashaña ñahi antu adi mwizaza? (b) Lwihwinyi lwalema lwatela kudihulawu aeluda?

¹³ Pawulu washimwini nindi kulema kwakupompa kwachipompelu kwekala ‘kwakukolesha, kukonkomwena, nikukundeja’ antu adi mwizaza. * (1 Kor. 14:3) Indi aeluda akwaKristu anateli kwila ñahi kulonda mpanji jahanañawu hakupompa jikaleña jakukolesha amana kwawu niahela nikuyikundeja? Hakwila twakuli ilu lwihu, tusambilenu kushinshika hakupompa kwalombweliyi Yesu hanyima yakusañuka kwindi.

14. (a) Yumanyi yamwekeni henohu kupompa kwaloñesheliyi Yesu kanda kwikaluku? (b) Muloñadi apostolu chazañaleluwu hampinji ‘yenjiliyi Yesu kudi wena nakuhosha nawu’?

¹⁴ Chatachi, talenu yuma yamwekeni henohu iku kupompa kanda. Henohu Yesu kanda amujahi, apostolu indi “amushiyili, atemukili,” nawa kwesekeja nachashimwinuwu dehi ‘ayipalañesheli wejima wenu, muntu nakwindi, muntu nakwindi.’ (Maku 14:50; Yow. 16:32) Kuhiñahu, chasañukiliyi, Yesu watambikili apostolu anyichima yayiwahi kwinza kukupompa kwadimena. * “Atumbanji ikumi nawumu hiyakuya kumpidi yakuÑaliliya yayikaniniyi Yesu.” Chashikiluwu, “Yesu hakwinza kudi wena, hakuhosha nawu.” (Mat. 28:10, 16, 18) Toñojokenu chazañaleluwu apostolu chelili Yesu yatachikiluhu kuhosha nawu! Yumanyi yahosheliyi Yesu?

15. (a) Nsañwinyi yahosheliyi Yesu, nawa yumanyi yabulili kuhoshayi? (b) Indi kuna kupompa kwakwashili ñahi apostolu?

¹⁵ Yesu wasambilili kubidika nindi: “Ñovu jamwiwulu nijahamaseki jejima anajinyinki.” Kuhiñahu wayinkeli mudimu nindi: “Dichi yenu mwakelishi atumbanji munyuza yejima.” Nkumininaku, wayikolesheli nindi: “Ami nidi nenu mafuku ejima.” (Mat. 28:18-20) Ilaña munamoni chuma chabulili kwila Yesu? Hayizuwilili apostolu induku; hela hakuna kupompa hajinokeli yililu yawu hela kuyileñela asweji kutiya nsonyi kuhitila mukuhosha hachuma chakoñeluwu chamwekesheli kuzeya kwachikuhwelelu chawuku. Ilaña, Yesu wayikolesheli nindi yena niTata yindi ayikeña nawa wayinkeli mudimu weneni. Indi mazu ahosheliyi Yesu akwashili ñahi apostolu indi? Ayikolesheli nikuyikonkomwena, nikuyikundeja nawa hanyima yakuna kupompa, atachikili cheñi ‘kuleja nikushimuna nsañu yayiwahi.’—Yil. 5:42.

16. Indi aeluda akwaKristu makonu embujolaña ñahi chakutalilahu chaYesu hakulombola kupompa kwakoleshaña antu?

¹⁶ Hakumwimbujola Yesu, aeluda makonu amonaña kupompa nawu himpinji yakukolesha akwawu akwakwitiya eluki Yehova chaswejayi kukeña antu jindi. (Rom. 8:38, 39) Dichi, mumpanji jahanañawu hakupompa, aeluda ahoshaña hayuma yayiwahi yakoñañawu ana kwawu, bayi hayiluwa yawuku. Hiyajinokaña yililu yawana kwawuku. Ilaña, mazu ahoshañawu amwekeshaña nawu, amonaña akwawu akakwitiya nawu amukeña Yehova nawa akeñaña kwila yuma yaloña. (1 Tesa. 4:1, 9-12) Hela chochu, aeluda mpinji yikwawu anateli kufumba chipompelu chejima, ilaña neyi antu antesha hohu diwu analuwañeshi, atela kuyifumbila kumbadi. (Ŋal. 6:1; 2 Tim. 2:24-26) Hakuhosha kuchipompelu chejima, aeluda afwilaña kuhosha mazu akuhameka neyi chinateleli. (Isa. 32:2) Afwilaña kuhosha munjila yakwila kupompa chikwamana,  antu ejima mwizaza akuzañalala nikukoleshewa.—Mat. 11:28; Yil. 15:32.

Kupompa Kwatukundejaña

17. (a) Muloñadi chichalemena nankashi kwila nawu kupompa kwetu kwikaleña kwakukundeja? (b) Chumanyi chimwatela kwila halwenu hakwila nawu kupompa kwikaleña kwakukolesha? (Talenu chikasha chinakwila nawu, “Njila Ikumi Jakulondela Kulonda Kupompa Kuyikolesheña Enu Niamakwawu.”)

¹⁷ Chineli kaayi kaSatana kanakusweja kutaminaku, twatela kushaku kashinshi kulonda kupompa kwetu kwawakwaKristu kukundejeña antu ejima. (1 Tesa. 5:11) Muhela womikili kweseka kweneni hamu nanfumwindi yaaka yakunyima wanukaña nindi: “Chinayileña Kwitala daWanta natiyileña neyi nidi mumakasa aYehova. Hamaora itwapompeleña, hamu nawana kwetu akwaKristu niahela, twatwesheleña kumbila yiteli yetu hadi Yehova, nawa kuwunda kwenzeleña munyichima yetu.” (Mas. 55:22) Tunakuhweleli netu antu ejima akwinzaña kukupompa kwetu akukoleshewaña nikuyikundeja. Hakwila nawu kupompa kwikaleña kwakukolesha, tutwalekuhu kuzata mudimu wutukweti hakwila kupompa kwawakwaKristu kwikaleña kwakukolesha.

[Tumazu twaheshina]

Mukwakula Nenudi?

• Indi kupompa kwawakwaKristu kwalema ñahi?

• Muloñadi kwakulahu hakupompa ‘chikwakoleshelaña chipompelu’?

• Yumanyi yitwatela kudizila kukupompa kwalombweliyi Yesu nawatumbanji twindi?

[Malwihu aKuzatisha haKudiza]

[Chikasha/Nyevulu yidi hefu 22]

NJILA IKUMI JAKULONDELA KULONDA KUPOMPA KUYIKOLESHEÑA ENU NIAMAKWAWU

Loñeshelenu chadimu. Neyi muloñeshela chadimu nsañu yimukudiza Kwitala daWanta, kupompa kukuyishika hamuchima chikupu nawa mukwanukaña nsañu yimukudiza.

Mwatela kupompaña mpinji yejima. Chineli antu amavulu neyi enza nakupompa akoleshaña antu anapompi, ninenu mukukolesha amakwawu neyi mwinza nakupompa.

Bayi mulabaku. Neyi mushika swayi henohu kupompa kanda kutachiki, munateli kwimbaku kamina kakwenzunwina nikulomba, yekala mbadi yakudifukula kwetu kudi Yehova.

Mwatela kusenda nyikanda yimukudizamu. Sendenu Bayibolu yenu ninyikanda yakuzatisha hakupompa kulonda mulondeleñamu nikwiluka nsañu yinakutañishawu.

Tondolwelenu yuma yahuwañeshaña. Chakutalilahu, mwatela kutaña nsañu yinayitemesheluwu haselufoni, neyi munediki dehi, bayi hampinji yakupompaku. Muniyi njila, mukuzatishaña chiwahi yuma yenu.

Akulenuhu. Neyi antu amavulu akulahu, mazu amboka-mboka akumwekesha chikuhwelela akoleshaña antu amavulu.

Akulenuhu mukwihihisha. Chaleñelaña antu amavulu kwikala nampinji yakwakulahu.

Hanenu mpanji yinayinkuwu. Hakwikala kadizi muShikola yaMudimu waTeokalatiki hela mukwakuhana mpanji haKupompa kwaMudimu, mwatela kuloñesha chachiwahi, kuhitulukamu chadimu, nawa bayi mukañanya kuhana mpanji yenuku.

Hamekenu akulahu niahana mpanji. Hamekenu chikupu ahana mpanji hakupompa hela akulahu.

Hanjekenu nawana kwetu. Kudimusha namuzañalu nikuhanjeka kwakuwahi henohu kupompa kanda nihanyima yakupompa kwaleñelaña kupompa kwikaleña kwakukolesha chikupu.