Be Ikonyo e Miyo Chokruoge Mag Jokristo Obed Magero?
Be Ikonyo e Miyo Chokruoge Mag Jokristo Obed Magero?
‘Ka uchokore, weche duto mondo obed magero.’—1 KOR. 14:26.
1. Kaluwore gi 1 Jo Korintho 14, gima duong’ momiyo wabedo gi chokruoge mag Jokristo en ang’o?
‘CHOKRUOK ma kawuono ogera ndi!’ Be isewachoe weche kaka mago bang’ chokruok moro e Od Romo? Onge kiawa ni isewacho kamano! Kuom adier, chokruoge mag kanyakla miyowa jip, to mano ok kawwa gi wuoro. Mana kaka e kinde Jokristo mokwongo, gima duong’ momiyo wabedo gi chokruoge e kindewagi en tego jogo duto mobiro obed Jokristo motegno. Ne ane kaka jaote Paulo jiwo wach maduong’ momiyo itimo chokruoge mag Jokristo, e barupe mokwongo ne Jo-Korintho. E sula mar 14 duto, owacho nyadinwoya ni, moro ka moro kuom migepe e chokruoge mag kanyakla onego ochop wach moro achiel—‘mondo dongruok mar kanisa’ obedie.—Som 1 Jo Korintho 14:3, 12, 26. *
2. (a) En ang’o mamiyo chokruogewa bedo magero? (b) En penjo mane mwabiro nono?
2 Wang’eyo ni chokruogewa gero ji, nikech mokwongo tiktik roho mar Nyasaye ema chikogi. Omiyo, wachako chokruok ka chokruok gi lamo kwakwayo Wuonwa me polo Jehova mondo ogwedh chokruokwa kokalo kuom roho mare maler. Kata kamano, wang’eyo ni jokanyo duto mag kanyakla nigi gima ginyalo timo mondo gimi chokruok obed magero moloyo. Omiyo, gin okenge mage ma ng’ato ka ng’ato kuomwa nyalo kawo mondo wami chokruoge mitimo juma ka juma e Od Romo obed maduogo chuny, kendo majiwowa e wach Nyasaye?
3. Chokruoge mag Jokristo konyo nade?
3 Mondo wayud dwoko, wabiro nono weche moko mag migepe mitimo e chokruogewa, ma jogo matayogi onego oket e paro. Wabiro nono bende gima ji duto manie kanyakla nyalo timo e miyo chokruoge obed magero jogo duto mobiro. Mano en wach monego wanon ahinya nikech chokruogewa ler e wang’ Nyasaye. Kuom adier, dhi e chokruoge kendo chiwo paro gin yore mwalamogo Jehova.—Zab. 26:12; 111:1; Isa. 66:22, 23.
Chokruok ma Konyowa Puonjruok Muma
4, 5. Gima omiyo watimo Puonjruok mar Ohinga mar Jarito en ang’o?
4 Waduto wadwaro yudo ber chuth e Puonjruok mar Ohinga mar Jarito mitimo juma ka juma. Kuom mano, mondo wang’e malong’o gima omiyo watimo chokruogno, we wanon ane moko kuom lokruok ma osetim ne gaset mar Ohinga mar Jarito gi sula mag puonjruok manie iye.
5 Chakre gi gocho mokwongo mar puonjruok mar Mnara wa Mlinzi, ma Januar 15, 2008, nitie lokruok moro ma ne oket e ng’e gaset. Be ne inene? Ng’i ane adimba ng’e gaset mimako sani. Kanyo, e tiend picha mar ohinga, ibiro neno Muma moel. Picha ma ne oketno nyiso gima duong’ momiyo watimo Puonjruok mar Ohinga mar Jarito. En ni mondo wapuonjore Muma ka watiyo gi gasedni. Ee, e Puonjruok mar Ohinga mar Jarito mwatimo juma ka juma, ‘inyisowa tiend’ Wach Nyasaye, kendo mana kaka e kinde Nehemia, ‘ji winjo tiende.’—Neh. 8:8; Isa. 54:13.
6. (a) En lokruok mane ma ne otim ne Puonjruok mar Ohinga mar Jarito? (b) Ang’o monego oket e paro kuom ndiko moket ni, “som”?
6 Nikech Muma e buk maduong’ mwapuonjore, ne otim lokruok moro e Puonjruok mar Ohinga mar Jarito. Nitie ndiko moko moket ni “som.” Waduto ijiwowa ni wasom ei Mumbwa wawegi, sama isomo ndikogo e chokruok. (Tich 17:11) Nikech ang’o? Sama wasomo siem kata puonj ma Nyasaye chiwo ei Mumbwa wawegi, wayudo ber moloyo. (Hib. 4:12) Kuom mano, kapok osom ndikogo gi dwol maduong’, jalo matayo chokruogno onego omi ji duto thuolo mar elo ndikogo mondo giluw sama isomogi.
Thuolo Momedore mar Nyiso Yie Marwa
7. Wan gi thuolo mane sama itimo Puonjruok mar Ohinga mar Jarito?
7 Lokruok machielo ma ne otim ne sula mag puonjruok mar Ohinga mar Jarito, en borgi. E higini mosekalo machiegni, oseketgi macheko. Kuom mano, sama itimo Puonjruok mar Ohinga mar Jarito, itiyo gi seche manok e somo paragraf, kendo mano medo ji thuolo mar chiwo paro. Joma omedore e kanyakla koro nigi thuolo mar nyiso yie margi kuom chiwo dwoko mag penjo moket, kuom lero kaka ndiko moket nyalo tiyo e ngimawa, chiwo ranyisi machuok kuom gima osetimore manyiso rieko mar luwo puonj manie Muma, kata wuoyo kuom weche mamoko. Onego oti gi thuolo moko bende e wuoyo kuom piche mantie.—Som Zaburi 22:22; 35:18; 40:9.
8, 9. Ting’ mar jalo matayo Puonjruok mar Ohinga mar Jarito en ang’o?
8 Kata kamano, thuolo momedoreno mar chiwo paro biro konyo mana ka joma chiwo paro timo kamano e yo machuok, kendo ka jal matayo chokruogno ok wuo ahinya sama otayo Puonjruok mar Ohinga mar Jarito. Omiyo, ang’o manyalo konyo jalo matayo mondo kik okal tong’ mowinjore kuom thuolo mochiwogo pache owuon, koda mago michiwo gi jogo manie kanyakla, mondo omi chokruok obed magero ji duto?
9 Mondo wayud dwoko, non ane ranyisini. Puonjruok mar Ohinga mar Jarito ma ota maber chalo gi maupe mabeyo ma moro wang’. Mana kaka maupe mochan maber oting’o maupe mang’eny mopogore opogore, e kaka Puonjruok mar Ohinga mar Jarito oting’o paro mopogore opogore michiwo. To mana kaka maua ka maua nigi kido koda range mopogore, e kaka paro michiwo e chokruok bende opogore e borgi koda chalgi. Jalo matayo Ohinga mar Jarito to nigi ting’ mane? Paro matin mochiwo chalo gi oboke matin moket maber ei maupego. Obokego ok oket mondo ginenre moloyo maupego; kar mano gikonyo e miyo maupego duto onenre maber. Kamano bende, jalo matayo onego oket e paro ni ting’ne ok en wuoyo ahinya moloyo jomoko, to en mana jiwo paro matin e wi mago ma jo kanyakla osechiwo. Ee, sama paro mopogore opogore michiwo gi jo kanyakla gi paro matin migolo gi jalo matayo, oket kaachiel e yo maber, giloso weche mabeyo majiwo ji duto, mana kaka maupe mochan mabeyo lombo wang’.
“Wachiwuru Pile ni Nyasaye Misango ma En Pak”
10. Ere kaka Jokristo mokwongo ne neno chokruoge mag kanyakla?
10 Weche ma Paulo notiyogo e 1 Jo Korintho 14:26-33 e lero chokruoge mag Jokristo, konyowa ng’eyo kaka ne itayo chokruoge me kindego. Kowuoyo kuom ndikogo, jasomo moro manono Muma nondiko kama: “Gima kuom adier ne nenore moloyo e chokruok mar Kanisa machon, nyaka bed ni ne en ni, chiegni ji duto ne biro ka ging’eyo ni ne gin gi ting’ moro e chokruogno. Ng’ato ne ok bi mana ni mondo owinj awinja; ne ok obi mana mondo oyudi, to mondo ochiw bende.” Kuom adier, Jokristo mokwongo ne neno chokruoge mag kanyakla kaka thuolo mag nyiso yie margi.—Rumi 10:10.
11. (a) Ang’o makonyo e miyo chokruoge obed magero, to nikech ang’o? (b) Gin paro mage ma kwatiyogo to nyalo miyo wamed lony e dwoko mwachiwo? (Ne weche moler piny.)
11 Wuoyo ka wanyiso yie marwa e chokruok konyo ahinya e miyo ‘dongruok mar kanisa’ obedie. Kuom adier, ibiro yie ni kata obedo ni wasebedo kwadhi e chokruoge kuom higini adi, podi en gima morowa gadier winjo paro michiwo gi owete koda nyiminewa. Paro michiwo gi Jakristo wadwa moseti mosebedo kochung’ motegno mulo chunywa; bende wayudo jip sama jaduong’-kanyakla madewo chiwo paro makonyo; kendo wamor sama nyathi matin chiwo paro moro manyiso hera madier moherogo Jehova. Nenore maler ni, kuom chiwo paro, waduto wakonyo e miyo chokruoge mag Jokristo obed magero. *
12. (a) Ang’o mwanyalo puonjore kuom ranyisi mar Musa kod Jeremia? (b) Kwayo e lamo konyowa e yo mane korka chiwo paro?
12 Chiwo paro e kanyakla nyalo bedo matek ne jogo moluor. Kapo ni en kamano kuomi, ber ng’eyo ni chal ma intiere ni kuom ji mang’eny. Kuom adier, kata mana jotich Nyasaye kaka Musa koda Jeremia ne nigi luoro kendo ne gineno ni ok ginyal wuoyo e nyim ji. (Wuok 4:10; Yer. 1:6) Kata kamano, mana kaka Jehova nokonyo jotichne machon-go mondo gipake e nyim ji, Nyasaye biro konyi in bende mondo ichiwne misango ma en pak. (Som Jo Hibrania 13:15.) Ere kaka Jehova nyalo konyi loyo luoro ma in-go e chiwo paro? Mokwongo, ikri maber ne chokruoge. Kae to, kapok idhi e Od Romo, kwa Jehova e lamo to ahinya wuon mondo omiyi chir mar chiwo paro. (Fili. 4:6) Mano en kwayo mowinjore gi “kaka dwaro mare obet,” omiyo inyalo bedo gadier ni Jehova biro dwoko lamo mari.—1 Joh. 5:14; Nge. 15:29.
Chokruoge Gin mag ‘Gerowa, Jiwowa, Kendo Hoyowa’
13. (a) Chokruogewa onego okony nade jogo mobiro? (b) En penjo mane ma jodongo onego onon ahinya?
13 Paulo wacho ni gima duong’ momiyo wabedo gi chokruoge mag kanyakla en mondo ‘oger, ojiw, kendo oho’ jogo duto mobiro. * (1 Kor. 14:3) Ere kaka jodongo ma Jokristo kindegi onego one ni migepe ma gitimo e chokruok, jiwo chuny owete gi nyimine kendo hoyogi gadier? Mondo wayud dwoko, wa wane ane romo moro ma Yesu notayo matin nono bang’ chier mare.
14. (a) Gin weche mage ma ne otimore kane pok Yesu ochano bedo gi romo moro? (b) Ang’o momiyo nyaka bed ni chuny joote noduogo kane ‘Yesu obiro irgi,’ mowuoyo kodgi?
14 Mokwongo, non ane weche ma ne otelone romono. Matin kapok ne oneg Yesu, joote “noweye, mi giringo” kendo kaka ne oyudo osekor, ‘ne gike ng’ato ka ng’ato kar dalane.’ (Mari. 14:50; Joh. 16:32) Kae to bang’ chier mare, Yesu nogwelo jootene ma noyudo chunygi onyosore, mondo gibi e romo moro makende. * Omiyo, “jopuonjre apar gachielgo nodhiyo Galili, e godno ma ne Yesu ochikogi.” Kane gichopo, “Yesu nobiro irgi” mowuoyo kodgi. (Math. 28:10, 16, 18) Par ane kaka nyalo bedo ni chuny jootego ne oduogo kane Yesu okawo okang’ ma kamano! Yesu ne owuoyo kodgi kuom ang’o?
15. (a) Yesu nowuoyo kuom weche mage, to en ang’o ma ne ok owuoyoe? (b) Jootego nowinjo nade kuom kaka Yesu ne otimonegi e romono?
15 Yesu nochako gi lendo moro niya: “Teko duto e polo gi piny osemiya.” Kae to nomiyogi migawo kama: “Dhiuru utim ogendini duto jopuonjrena.” Gikone, nosingonegi kama: “An kodu ndalo duto.” (Math. 28:18-20) Kata kamano, be ifwenyo gima Yesu ne ok otimo? Ne ok obedo mager gi jootene; kata ne ok otiyo gi romono e keto kiawa kuom heragi kuome, kata paronegi nyawo ma ne gin-go kuom yie. Kar mano, Yesu nomiyogi migawo maduong’ konyisogo ni oherogi kendo ni Wuon mare bende oherogi. Jootego ne owinjo nade kuom kaka Yesu ne otimonegi? Mano ne ogerogi, mojiwogi, kendo hoyogi, mi kinde moko bang’ romono, ne gichako “puonjo kendo yalo” wach maber kendo.—Tich 5:42.
16. Ere kaka jodongo ma Jokristo kindegi nyalo luwo ranyisi mar Yesu sama gitayo chokruok maduogo chuny ji?
16 E luwo ranyisi mar Yesu, jodongo kindegi neno chokruoge kaka thuolo mag jiwo Jokristo wetegi mondo gibed gadier ni Jehova ohero joge. (Rumi 8:38, 39) Kuom mano, sama gitayo migepe ma gin-go e chokruok, jodongo onego ojiw ber mag owete, to ok nyawo maggi. Ok onego giket kiawa kuom kaka owete ohero Jehova. Kar mano, weche ma giwacho onego onyis ni gineno Jokristo wetegi kaka joma ohero Jehova kendo madwaro timo gima kare. (1 Thes. 4:1, 9-12) En adier ni nitie seche moko ma nyalo dwarore ni jodongo orie kanyakla duto kuom wach moro, kata kamano, kapo ni joma nok kende ema dwarore ni orie, ber rieyo mana jogo kar kendgi. (Gal. 6:1; 2 Tim. 2:24-26) Sama jodongo wuoyo gi kanyakla duto, gitemo pwoyo kanyakla ka timo kamano dwarore. (Isa. 32:2) Gitemo ahinya wuoyo e yo mamiyo e giko mar chokruok, ji duto yudo jing’o kendo chunygi duogo.—Math. 11:28; Tich 15:32.
Chokruogewa Gin Mahoyo Chuny
17. (a) Ang’o momiyo dwarore ahinya ni chokruogewa obed mahoyo chuny moloyo kinde moro amora? (b) In iwuon inyalo timo ang’o mondo imi chokruoge obed magero? (Ne sanduk mawacho ni, “Yore Apar mag Miyo Chokruoge Ogeri Kaachiel gi Jomoko.”)
17 Kaka piny manie bwo teko mar Satan medo bedo manyoso chuny ji, onego wane ni chokruogewa gin mahoyo chuny ji duto. (1 Thes. 5:11) Nyaminwa moro kaachiel gi chwore ma ne kedo gi tem moro mager higini moko mosekalo wacho niya: “Bedo e Od Romo ne miyo wachalo mana kaka joma Jehova oting’o e lwete. Kuom seche ma ne wan kanyo, ka olworwa gi owete gi nyimine ma Jokristo, ne wawinjo ni wanyalo keto ting’wa kuom Jehova, kendo ne wawinjo ka chunywa okuwe e okang’ moro.” (Zab. 55:22) Mad ji duto mabiro e chokruogewa owinj ni chokruok ojiwogi kendo ohoyogi kamano. Mondo wane ni biro bedo kamano, weuru mondo waduto wadhi nyime timo karwa mondo wakony e miyo chokruoge mag Jokristo obed magero.
[Weche moler piny]
^ par. 1 Muma nokoro ni mich moko ma ne nitie e chokruoge mag Jokristo mokwongo, ne dhi rumo. Kuom ranyisi, kindegi ok ‘wadhum’ kata “hulo wach.” (1 Kor. 13:8; 14:5) Kata kamano, weche ma ne Paulo ochiko konyowa ng’eyo malong’o kaka onego ota chokruoge mag Jokristo e kindewa.
^ par. 11 Mondo iyud weche momedore kuom kaka inyalo medo bedo molony kuom paro michiwo, ne Mnara wa Mlinzi, ma Septemba 1, 2003, ite mag 19-22.
^ par. 13 Konyiso pogruok ma nitie e kind “jiwo” kod “hoyo,” buk moro miluongo Vine’s Expository Dictionary of Old and New Testament Words lero ni, e dho Grik wach molok ni “hoyo” nyiso “dewo ng’ato e okang’ mamalo maok mana [jiwe] kende.”—Pim gi Johana 11:19.
^ par. 14 Nyalo bedo ni mano e kinde ma Paulo ne owuoyoe bang’e kowacho ni Yesu “nonenore ni owete moloyo piero apar abich.”—1 Kor. 15:6.
Inyalo Dwoko Nade?
• Chokruoge mag Jokristo konyo nade?
• Ang’o momiyo paro michiwo e chokruoge konyo e miyo ‘dongruok mar kanisa’ obedie?
• Ang’o mwanyalo puonjore kuom romo moro ma Yesu nobedogo gi jolupne?
[Penjo mag Puonjruok]
[Sanduk/Piche manie ite mag 22, 23]
YORE APAR MAG MIYO CHOKRUOGE OGERI KAACHIEL GI JOMOKO
Ikri motelo. Ka ipuonjori motelo weche mibiro non e Od Romo, chokruoge biro mori ahinya kendo ibiro yudo kony moloyo.
Dhi maok ibari. Nikech wabedo mamor sama jo mogwaro obiro e chokruok, bedoe mari bende en gimaber.
Chop chon. Ka ibet chon kapok chokruok ochakore, ibiro bedo gi thuolo mar wer kod winjo lamo michakogo program, ma bende gin yore mwalamogo Jehova.
Ting’ buge madwarore duto. Ting’ Mumbi koda buge mamoko mibiro tigo e chokruok mondo iluw kendo winjo malong’o weche mibiro non e chokruok.
Kik iwe gik moko ogal pachi. Kuom ranyisi, inyalo somo ote ma oorni e simo bang’ chokruok, to ok sama chokruok dhi nyime. Kuom timo kamano iketo wecheni iwuon kama giwinjorego.
Chiw paro. Sama ji mang’eny chiwo paro, mano jiwo ji mang’eny kendo gerogi nikech ji wuoyo kuom yie margi ka gigolo paro mopogore opogore.
Chiw paro machuok. Timo kamano, miyo ji mang’eny yudo thuolo mar chiwo paro.
Chop migepe momiyi. Ka in gi migawo e Skul mar Tij Nyasaye, kata e Chokruok mar Tijwa, ikri maber, tim ranyisi motelo kaka ibiro timo migawono, kendo tem matek mondo kik ibari e golo migawono.
Puo joma otimo migepe. Puo jogo duto motimo migepe kata mochiwo paro e chokruok kuom kindagi.
Mos ji. Moso ji gi mor kendo bedo gi mbaka magero ka chokruok pok ochakore koda bang’e, medo mor mwayudo kuom bedo e chokruok.