Kristian Inkhâwmte Chu Mi Siam Ṭha Thei Tak I Nihtîr Em?
Kristian Inkhâwmte Chu Mi Siam Ṭha Thei Tak I Nihtîr Em?
“In rawn inkhâwmin . . . engkim siam ṭhatna tûrin tih ni rawh se.”—1 KOR. 14:26.
1. Korinth thawn khat bung 14-nain a sawi dânin, Kristian inkhâwmnain a tum pawimawh tak chu eng nge ni?
‘KAN inkhâwm chuan min va tichakin, min va siam ṭha tak êm!’ Kingdom Hall-a i inkhâwm hnuah chutiang deuh thu i sawi chhuak tawh ngai em? I sawi chhuak ngai tawh ngei ang! Kohhran inkhâwmte chu min tichaktu a ni tak zet a; mahse, chu chu mak kan ti hran lo. Kristian hmasate hun laia mi ang bawkin tûn laia kan inkhâwmnate thiltum chu a tel zawng zawngte thlarau lama tihchak hi a ni si a. Tirhkoh Paula’n Korinth khuaa mite hnênah a lehkha thawn hmasa zâwkah Kristian inkhâwmte thiltum chu chiang takin a târ lang a ni. Bung 14-ah chuan kohhran inkhâwmnaa thusawi zawng zawngin tum thuhmun neih a ngaihzia a sawi nawn fo a ni—“kohhranho siamṭhatna” chu.—1 Korinth 14:3, 12, 26 chhiar rawh. *
2. (a) Mi siam ṭha thei tak inkhâwmte kan neih theih chhan chu eng nge ni? (b) Eng zawhna nge kan ngaihtuah ang?
2 Mi siam ṭha thei, a nih loh leh min tichak thei inkhâwmte kan neih theih chhan chu Pathian thlarau vâng a ni ber a. Chuvângin, kohhran inkhâwm apiang chu Pathian Jehova hnêna a thlarau hmanga malsâwm dîl ṭawngṭainain kan ṭan ṭhîn. Chuti chung pawhin, kohhrana mi mal tinte chuan inkhâwmte chu mi siam ṭha thei tak nihtîr tûrin chanvo an nei ṭheuh tih kan hria a ni. Chuti chu, Kingdom Hall-a chawlhkâr tina kan neih inkhâwmte chu thlarau lama min tithathotu leh min fuihtu nihtîr tûrin a mi mal takin eng nge kan tih theih?
3. Kristian inkhâwmte chu eng anga pawimawh nge ni?
3 A chhânna hmu tûrin, inkhâwm kaihruaitute’n rilrua an vawn reng tûr kan inkhâwmna hmêlhmang ṭhenkhat kan bih chiang ang a. Tin, inkhâwm zawng zawngte tichaktu inkhâwmna nei tûra kohhran puma kan tih theihte chu kan ngaihtuah bawk ang. Kan inkhâwmte hi inkhâwmna thianghlim a nih avângin, he thu hi kan ngaihven hle a ni. Inkhâwmnaa tel leh a chhânnate pêk chu Pathian Jehova kan biakna pêng pawimawh tak a ni si a.—Sâm 26:12; 111:1; Is. 66:22, 23.
Bible Zirna Tûra Siam Inkhâwm Chu
4, 5. Vênnainsâng Zirna-in a tum chu eng nge ni?
4 Chawlhkâr tina kan neih Vênnainsâng Zirna chu hlâwkpui tak zet kan duh ṭheuh va. Chuvângin, chu inkhâwmin a tum ber kan hriat fiah theih nân, Vênnainsâng Zirna leh zir tûr thuziakte thlâk danglam a nih dân ṭhenkhat i lo ennawn ang u.
5 Vênnainsâng Zirna kan neih chhan chu, chu mi hmanga Bible zir nân a ni a. Chawlhkâr tina Vênnainsâng Zirna kan neihah chuan, Pathian Thu chu ‘a awmzia hrilhfiah’ a ni a, hmân lai Nehemia hun lai ang bawka “hriat chiantîr zêl” kan ni.—Neh. 8:8; Is. 54:13.
6. (a) Vênnainsâng Zirna-ah eng nge siam rem a nih? (b) “Chhiar rawh” tih chungchângah eng nge kan hriat reng ang?
6 Bible hi kan lehkhabu hman ber a nih avângin, Vênnainsâng Zirna-ah thil siam rem a awm a. Zir tûr thuziaka Bible châng târ lan engemaw zât chu “chhiar rawh” tia chhinchhiah a ni. Chûng Bible châng chhiar tûra tihte chu mahni Bible ngei aṭanga lo en ve tûra fuih ṭheuh kan ni. (Tirh. 17:11) Engvângin nge? Pathian min fuihnate mahni Bible aṭang ngeia kan hmuh hian kan rilru a khawih bîk ṭhîn a. (Heb. 4:12) Chuvângin, a kaihruaitu chuan Bible chângte chhiar a nih hmain ngaithlatute’n an Bible an lo keu va, an lo en ve theih nân hun mamawh tâwk a pe tûr a ni.
Rinna Sawi Chhuah Theihna Hun Tam Zâwk Kan Nei
7. Vênnainsâng Zirna kan neih chhûngin eng tihna hun remchâng nge kan neih?
7 Vênnainsâng zir tûr thuziaka thil siam rem dang leh chu thuziakte a tawi ta zâwk hi a ni a. Chuvângin, Vênnainsâng Zirna neih chhûngin paragraph chhiar nâna hun tlêm zâwk hman a ni a, chhân nân hun tam zâwk kan neih phah a ni. Kohhrana mi tam zâwkte chuan zawhna chhut chhuah tlang taka chhân nân te, Bible chângte nunpui dân tûr sawi nân te, Bible thu bulte zawm a finthlâkzia târ langtu thiltawn tawi sawi nân te, a nih loh leh kawng danga rinna sawi chhuah nân te hun remchâng an nei tawh a ni. Lem târ lante sawi nân hun pek bawk tûr a ni ang.—Sâm 22:22; 35:18; 40:9 chhiar rawh.
8, 9. Vênnainsâng Zirna kaihruaitu mawhphurhna chu eng nge ni?
8 Amaherawhchu, a chhângtute’n tawifel taka an chhân a, a kaihruaitu pawhin Vênnainsâng Zirna a kaihhruai laia a ṭawng tuitam lutuk loh chauhvin chutiang chhânna chi hrang hrang pêk theihna hun a awm thei ang. Chuti chu, a kaihruaitu tân inkhâwm hi a tel zawng zawng tâna mi siam ṭha thei tak a nih theih nân ngaithlatute chhânna pêk leh ama thusawi chu inbûk tâwktîr tûrin engin nge ani chu ṭanpui ang?
9 A chhân nân, entîrna pakhat i lo ngaihtuah ang u. Ṭha taka kaihhruai Vênnainsâng Zirna chu mit la tak pangpâr khawi ang hi a ni a. Pangpâr khawi lian tak chu pangpâr chi hrang tam tak hmanga khawi a nih angin, Vênnainsâng Zirna hi chhânna chi hrang tam tak hmanga neih a ni. Pangpâr khawi zînga tel pangpârte lenzâwng leh rawng a inan loh ang bawkin, chhânna pêkte seizâwng leh pêk dân pawh a inang lo thluah a ni. A nih leh, a kaihruaitu tih tûr chu eng nge ni ta ang? A châng chânga a thusawite chu pangpâr khawia fîmkhur taka an thiah tel ṭhin hnah hring ang a ni. Chûng hnah hringte chu a ber a ni lo va; pangpâr khawi timawitu leh tifamkimtu mai a ni zâwk. Chutiang bawkin, a kaihruaitu chu a ṭawngtu ber ni lovin, kohhrana mite’n faka inthawina an hlante tifamkimtu a ni tih a inhriat a ngai a ni. Ni e, kohhranin chhânna chi hrang hrang a pêkte leh a kaihruaituin tawi têa ngaih dân a sawite thiam taka a inrem khâwm hian, chu chu inkhâwma tel zawng zawngte mit la tak pangpâr khawi mawi tak ang a lo ni ta ṭhîn a ni.
“Faka Inthawina Hi Pathian Hnênah I Hlân Fo Vang U”
10. Kristian hmasate chuan kohhran inkhâwmte chu engtin nge an thlîr?
10 Paula’n Kristian inkhâwm chungchâng a sawina 1 Korinth 14:26-33 chuan kum zabi khatnaa inkhâwmte kaihhruai a nih dân hriatthiamna min pe a. He Bible châng chungchâng hi sawiin, Bible lama mi thiam pakhat chuan: “Kohhran din tirh lama inkhâwm dân chhinchhiah tlâk tak chu inkhâwma lo tel zawng zawngte’n thawh ve theihna chanvo leh mawhphurhna nei nia inhriatna an nei hi a ni a. Mi chu ngaithla tûr ngawr ngawrin a inkhâwm lo; dawng tûr mai ni lovin pe chhuak tûr pawhin a inkhâwm a ni,” tiin a sawi. Kristian hmasate chuan kohhran inkhâwmte chu rinna târ lan theihna hun remchâng angin an thlîr a ni tih a chiang hle.—Rom 10:10.
11. (a) Engin nge inkhâwmna chu mi siam ṭha thei tak nihtîr a, engvângin nge? (b) Eng rawtnate nunpuinain nge inkhâwmnaa kan chhânna pêk chu tiṭha lehzual ang? (Footnote en rawh.)
11 Inkhâwmnaa rinna sawi chhuahna chuan “kohhranho siamṭhatna” nasa takin a awmtîr a. Kum eng zâta rei pawh lo inkhâwm tawh ṭhîn mah ila, kan unaute chhânna pêk ngaihthlâk chu a hlimawm hle tih i pawm ngei ang. Kan unau tar tawh rinawm takte pêk chhânna hian kan rilru a khawih hle a; mite ngaihsak tak upa-in chhânna ṭha tak a pêk chuan min tichak bawk a; tin, naupangte’n Pathian Jehova an hmangaihzia târ langtu chhânna an pêk hian hlim lo thei kan ni lo bawk. Chhânna kan pêk hian Kristian inkhâwm chu mi siam ṭha thei tak kan nihtîr a ni tih a chiang hle. *
12. (a) Mosia leh Jeremia te thiltawn aṭangin eng nge kan zir theih? (b) Chhânna pêkna kawngah ṭawngṭainain engtin nge min ṭanpui theih?
12 Mahse, mi zakzumte tân chuan chhânna pêk chu thil awmsam a ni hauh lo. Chutiang mi i nih chuan, nangmah ang mi tam tak an awm ve tih hriat chu a ṭangkai thei ang. A nihna takah chuan, Mosia leh Jeremia ang Pathian chhiahhlawh rinawmte pawhin vântlâng hmaa thu sawi tûra tling lo an intihzia chu an sawi chhuak a ni. (Ex. 4:10; Jer. 1:6) Chuti chung pawhin, Pathian Jehova chuan anni chu vântlâng hmaa amah fak tûra a ṭanpui ang bawkin, faka inthawina a hnêna hlân tûrin nang pawh a ṭanpui ang che. (Hebrai 13:15 chhiar rawh.) Chhânna pêk i hlauhna hneh tûrin engtin nge Jehova ṭanpuina i dawn theih? A hmasa berin, inkhâwm atân ṭha takin inbuatsaih ang che. Tichuan, Kingdom Hall-a i kal hmain, chhânna pakhat tal pe thei tûra huaisenna dîlin Pathian hnênah ṭawngṭai rawh. (Phil. 4:6) Chu chu ‘a duhzâwng ang’ a nih avângin, a chhâng ngei dâwn che tih ring tlat ang che.—1 Joh. 5:14; Thuf. 15:29.
‘Siam Ṭha, Fuih, leh Thlamuantu’ Tûr Inkhâwmte
13. (a) Kan inkhâwmte hian inkhâwma lo telte chungah eng ang nghawng nge nei tûr a nih? (b) Eng zawhna nge upate chuan a bîk taka an ngaihven?
13 Paula chuan kohhran inkhâwmin a tum pawimawh tak chu inkhâwmnaa telte ‘siam ṭhat, fuih, leh thlamuan’ a ni tih a sawi a. * (1 Kor. 14:3) Engtin nge tûn laia Kristian upate chuan inkhâwma an chanvo chante’n an unaute a siam ṭhain, a thlamuan tih an chian theih? A chhânna hriat nân, a thawhleh hnu lawka Isua kaihhruai inkhâwm pakhat chu i lo ngaihtuah ang u.
14. (a) Isua’n tirhkohte inkhâwm tûra a koh hmain eng thil nge thleng? (b) Engvângin nge ‘Isua an hnêna a lo kal a, a va biak’ khân tirhkohte chu an rilru a hahdam?
14 Chu inkhâwm an neih hmaa thilthlengte chu lo en ta phawt ila. Isua a thih hma lawk chuan tirhkohte chuan “amah chu an thlahthlam a, an tlân bo ta vek a,” sawi lâwk ang ngeiin, ‘mahni in ṭheuhvah an darh ta vek’ a ni. (Mk. 14:50; Joh. 16:32) Tichuan, a thawhleh hnuah, Isua chuan tirhkoh lunghnual takte chu inkhâwm tûrin a ko hlawm a ni. * A kohna chu chhâng lêtin, “zirtîr sâwm leh pakhatte chu Galili ramah, Isuan tlâng a ruatsakah chuan an kal a.” An va thlen chuan “Isua chu an hnênah a lo kal a, anniho chu a bia a. (Mt. 28:10, 16, 18) Isua’n chutianga hma a lâk avânga tirhkohte rilru hahdam tâk dân tûr chu han ngaihtuah teh! Isua’n eng thu nge a sawipui?
15. (a) Eng thu nge Isua’n a sawipui a, eng nge a sawipui loh? (b) Chu inkhâwmna chuan tirhkohte chu engtin nge a nghawng?
15 Isua chuan he thu hi a puang ṭan a: “Lei leh vâna thuneihna zawng zawng ka hnênah pêk a ni tawh,” tiin. Tichuan he hna thawh tûr hi a pe a ni: “Chutichuan kal ula, . . . mi zirtîrahte siam ula,” tiin. A tâwpah chuan heti hian tiam kamna thu duhawm tak a sawi leh a ni: “Kei kumkhuain . . . in hnênah ka awm zêl ang,” tiin. (Mt. 28:18-20) Mahse, Isua thil tih loh chu i lo hria em? A tirhkohte a hau lo va; an inkhâwmna chu an rilru put hmang zawh fiah nân emaw, rei lo te chhûng rinna lama an chauh avânga an inthiam lohna tihzualsak nân emaw a hmang lo. Chu ai mahin, hna thawh tûr pawimawh tak pein, amah leh a Pa hmangaihna tiam nawn nân a hmang zâwk a ni. Isua hma lâk dân chuan tirhkohte chu engtin nge a nghawng? Chu inkhâwm zawhah anni chu nasa taka siam ṭhat, fuih, leh thlamuana an awm avângin, ‘chanchin ṭha zirtîr leh hrilhin’ an awm leh ta a ni.—Tirh. 5:42, Baptist Mid-Missions’ Translation.
16. Tûn laia Kristian upate chuan mi tihahdam thei inkhâwmte kaihhruaina kawngah engtin nge Isua an entawn?
16 Isua entawnin, tûn laia upate chuan inkhâwmte chu a mite chunga Pathian Jehova hmangaihna dai ngai lo tiam nawn theihna hun remchâng angin an thlîr a ni. (Rom 8:38, 39) Chuvângin, inkhâwmnaa chanvo an neih hian upate chuan an unaute chak lohna ni lovin, an chakna laite an thlûr zâwk a. An unaute rilru put hmang chu an ringhlel lo. An thusawite chuan an unaute chu Pathian Jehova hmangaih a, thil dik ti duhtu anga an thlîrzia a târ lang zâwk a ni. (1 Thes. 4:1, 9-12) Upate tân kohhrana mite siam ṭha thei tûr zilhna thu sawi a ngaih châng a awm thei ngei mai; mahse, chutianga zilh ngai chu mi tlêm tê chauh an nih chuan, a mi mala inbiak huna zilhna pêk chu a ṭha deuh ber ṭhîn. (Gal. 6:1; 2 Tim. 2:24-26) Kohhran chhûnga mi zawng zawng hnêna thu an sawi hian, upate chuan a âwm hun apianga fakna thusawi chu an tum a. (Is. 32:2) Inkhâwm bân hnua inkhâwm zawng zawngte tihahdam tûr leh tichak thei tûr zâwnga thusawi chu an tum ṭâng ṭâng a ni.—Mt. 11:28; Tirh. 15:32.
Hmun Him A Ni
17. (a) Kan inkhâwmte thlamuanna hnâr nihtîr chu engvângin nge tûn hma zawng aia a pawimawh lehzual? (b) Inkhâwmte chu mi siam ṭha thei tak nihtîr tûrin a mi malin eng nge i tih theih? (“Mahni leh Mi Dangte Tâna Inkhâwmte Mi Siam Ṭha Thei Tak Nihtîr Dân” tih bâwm chu en rawh.)
17 Setana khawvêlin mite a awpbeh zual sauh lai hian, kan Kristian inkhâwmna chu hmun him—mi tinte tâna thlamuanna hnâr—kan nihtîr a ngai a ni. (1 Thes. 5:11) Kum engemaw zât kal taa a pasal nêna fiahna khirh tak paltlangtu unaunu pakhat chuan: “Kingdom Hall-a awm chu min ngaihsaktu Pathian Jehova’n min chelh ta ang mai hi a ni a. Chuta kan awm chhûnga kan Kristian unaute hual vêla kan awm hian kan ritphurh chu Jehova chunga nghat thei niin kan inhria a, chhûng lama thlamuanna nasa tak kan nei a ni,” tiin a sawi. (Sâm 55:22) Kan inkhâwmnaa lo tel zawng zawngte pawh hi chutiang bawka fuih leh thlamuan ni hlawm rawh se. Chutiang nihtîr ngei tûr chuan, Kristian inkhâwmte mi siam ṭha thei tak a nih theih nâna kan tih tûr ṭheuh chu i ti zêl ang u. (w10-E 10/15)
Engtin Nge Kan Chhân Ang?
• Kristian inkhâwmte chu eng ang taka pawimawh nge ni?
• Engvângin nge inkhâwmnaa chhânna pêkte chuan “kohhranho siamṭhatna” a ṭanpui?
• Isua’n a hnungzuitute nêna inkhâwmna a kaihhruai dân aṭangin eng nge kan zir theih?
[Footnote-te]
^ par. 1 Kum zabi khatnaa Kristian inkhâwmna hmêlhmang ṭhenkhat chu a tâwp dâwn tih a sawi lâwk a. Entîr nân, “ṭawng hriat lohte” emaw, “thu hrilh[hlâwk]nate,” chu kan nei tawh lo. (1 Kor. 13:8; 14:5) Chutiang chu ni mah se, Paula kaihhruaina pêk chuan tûn laia Kristian inkhâwmte kaihhruai a nih dân tûr min hriat thiamtîr a ni.
^ par. 11 Inkhâwmnaa chhânna pêk ṭhat lehzual theih dân rawtna chu Vênnainsâng, September 1, 2003 (English) chhuak, phêk 19-22 chu en rawh.
^ par. 13 “Fuih” leh “thlamuan” tia lehlin Grik thu malte inan lohna chungchângah Vine’s Expository Dictionary of Old Testament Words chuan “thlamuan” tia lehlin thu mal hian “[fuih] tih aiin lainatna a keng tam zâwk” tih a târ lang a ni.—Johana 11:19 nên khaikhin rawh.
^ par. 14 Hei hi a hnua Paula’n Isua chu “mi zanga aia tam hnênah a inlâr” a tih ṭum a ni ngei ang.—1 Kor. 15:6.
[Zirlai Atâna Zawhnate]
[Phêk 30, 31-naa bâwm/milemte]
MAHNI LEH MI DANGTE TANA INKHAWMTE MI SIAM ṬHA THEI TAK NIHTIR DAN
Inpuahchah lâwk rawh. Kingdom Hall-a thu zir tûrte i lo zir lâwk hian, inkhâwmte chu i tuipui lehzual ang a, i rilruah a châm lehzual ang.
Inkhâwm ziah rawh. Inkhâwm ṭhathnem chu a tel zawng zawngte tichaktu a nih avângin, i tel leh tel loh hian kawngro a su a ni.
A hun takah thleng rawh. Inkhâwm ṭan hmaa i ṭhut fel chuan Pathian Jehova kan biakna pêng a hawnna hla leh ṭawngṭainaah i tel thei ang.
Inthuam ṭha rawh. Thusawite i lo en a, i hriatthiam lehzual nân i Bible leh inkhâwmnaa hman tûr thu leh hla chhuah(te) chu rawn keng rawh.
Rilru lâk pênna pumpelh rawh. Entîr nân, SMS thu thawnte chu inkhâwm lai ni lovin, inkhâwm bânah chhiar rawh. Chutiang chuan mi mal thil chu a hmun tûr dik takah i dah a ni ang.
Chhânnate pe rawh. Chhânna pêk tam a nih hian, rinna thusawi chhuah chi hrang hrangte chuan mi tam zâwkte chu a fuihin, a siam ṭha ang.
Tawi fel takin chhâng rawh. Hei hian mite chu chhân theihna hun remchâng a pe tam lehzual ang.
I chanvo dawn chu hlen rawh. Theocratic Rawngbâwlna School-a tel emaw, Rawngbâwlna Inkhâwma chanvo nei emaw i nih chuan ṭha takin inpuahchah la, tihchhinna nei ang che; tin, i chanvo dawn chu hlen tum hrâm rawh.
Chanvo neite leh chhângtute chu fak rawh. Inkhâwma chanvo neite leh chhânna petute hnênah an ṭan lâkna i ngaihsânzia hrilh rawh.
Unaute kâwm rawh. Inkhâwm hma leh bân hnua ngilnei taka inchibaina leh mi siam ṭha thei inbiakna chuan inkhâwma telna aṭanga hmuh theih hlimna leh hlâwkna chu a tizual ang.