Tieħu Sehem f’li Tagħmel il-Laqgħat Kristjani Inkuraġġanti?
Tieħu Sehem f’li Tagħmel il-Laqgħat Kristjani Inkuraġġanti?
“Meta tiltaqgħu flimkien, . . . ħa jsir kollox biex tibnu lil xulxin.”—1 KOR. 14:26.
1. Skont l-1 Korintin kapitlu 14, x’inhi mira importanti tal-laqgħat Kristjani?
‘X’LAQGĦA inkuraġġanti kellna!’ Ġieli esprimejt sentimenti simili wara li attendejt xi laqgħa fis-Sala tas-Saltna? Bla dubju li iva! Il-laqgħat tal-kongregazzjoni huma tassew sors taʼ inkuraġġiment, imma dan mhuwiex sorprendenti. Wara kollox, bħal fi żmien il-Kristjani tal-bidu, mira importanti tal-laqgħat tagħna llum hi biex isaħħu spiritwalment lil dawk kollha fl-attendenza. Innota kif l-appostlu Pawlu jenfasizza din il-mira speċifika tal-laqgħat Kristjani fl-ewwel ittra tiegħu lill-Korintin. F’kapitlu 14, darba wara l-oħra jistqarr li kull taħdita li tingħata fil-laqgħat tal-kongregazzjoni għandu jkollha l-istess mira—“biex tinbena l-kongregazzjoni.”—Aqra l-1 Korintin 14:3, 12, 26. a
2. (a) Laqgħat li jibnu huma r-riżultat taʼ xiex? (b) Liema mistoqsija se nikkunsidraw?
2 Aħna nagħrfu li laqgħat li jibnu, jew li jedifikaw, l-ewwel u qabel kollox huma r-riżultat tal-influwenza tal-ispirtu t’Alla. Għalhekk, nibdew kull laqgħa tal-kongregazzjoni b’talba mill-qalb lil Ġeħova, u fiha nitolbu lil Missierna tas-sema biex ibierek il-laqgħa tagħna permezz tal-ispirtu qaddis tiegħu. Xorta waħda, aħna nafu li l-membri kollha tal-kongregazzjoni jistaʼ jkollhom sehem f’li jagħmlu l-programmi tal-laqgħat inkuraġġanti kemm jistaʼ jkun. Għalhekk, liema huma ftit mill-passi li nistgħu nieħdu personalment biex nagħmlu ċert li l-laqgħat taʼ kull ġimgħa li jkollna fis-Sala tas-Saltna tagħna jkunu dejjem sors taʼ serħan u inkuraġġiment spiritwali?
3. Kemm huma importanti l-laqgħat Kristjani?
3 Biex inwieġbu, se neżaminaw xi aspetti tal-laqgħat tagħna li dawk li jikkonduċuhom għandhom iżommu f’moħħhom. Se nikkunsidraw ukoll kif dawk kollha fil-kongregazzjoni jistgħu jieħdu sehem f’li jagħmlu l-laqgħat okkażjonijiet li jsaħħu lil dawk kollha li jattendu. Dan is-suġġett hu taʼ interess kbir għalina għax il-laqgħat tagħna huma sagri. Tabilħaqq, l-attendenza u l-parteċipazzjoni tagħna fil-laqgħat huma aspetti importanti tal-qima tagħna lil Ġeħova.—Salm 26:12; 111:1; Is. 66:22, 23.
Laqgħa Disinjata għall-Istudju tal-Bibbja
4, 5. X’inhu l-għan tal-Istudju tat-Torri tal-Għassa?
4 Ilkoll kemm aħna rridu nibbenefikaw bis-sħiħ mill-Istudju tat-Torri tal-Għassa taʼ kull ġimgħa. Għaldaqstant, biex nifhmu ċar l-għan prinċipali taʼ din il-laqgħa, ejja nirrivedu ftit mill-aġġustamenti li saru fir-rivista tat-Torri tal-Għassa u l-artikli għall-istudju.
5 B’seħħ mill-ewwel edizzjoni għall-istudju fil-ħarġa tat-Torri tal-Għassa tal-15 taʼ Jannar, 2008, ġie inkluż dettall sinifikanti fuq il-qoxra taʼ quddiem. Innotajtu? Ħares sew lejn il-qoxra tar-rivista li għandek f’idejk. Hemmhekk, fin-naħa t’isfel quddiem it-torri, se tara Bibbja miftuħa. Dan l-aspett ġdid jenfasizza r-raġuni għala għandna l-Istudju tat-Torri tal-Għassa. Hi biex nistudjaw il-Bibbja bl-għajnuna taʼ din ir-rivista. Iva, fl-Istudju tat-Torri tal-Għassa li jkollna kull ġimgħa, il-Kelma t’Alla qed tiġi “spjegata sew,” u bħal fi żmien Neħemija tal-qedem, qed tiġi “mfissra.”—Neħ. 8:8; Is. 54:13.
6. (a) Liema aġġustament sar fl-Istudju tat-Torri tal-Għassa? (b) X’għandna nżommu f’moħħna rigward l-iskritturi li jkollhom miktub “aqra”?
6 Peress li l-Bibbja hi l-ktieb prinċipali tagħna, sar aġġustament fl-Istudju tat-Torri tal-Għassa. Diversi skritturi ċitati fl-artikli għall-istudju huma mmarkati bil-kelma “aqra.” Ilkoll kemm aħna inkuraġġiti biex insegwu l-qari taʼ dawn l-iskritturi waqt il-laqgħa, billi nużaw il-kopja tagħna stess tal-Bibbja. (Atti 17:11) Għala? Meta naraw il-pariri t’Alla fil-Bibbja tagħna stess, jagħmlu impatt akbar fuqna. (Ebr. 4:12) Għalhekk, qabel ma jinqraw dawn l-iskritturi, dak li jikkonduċi l-laqgħa għandu jagħti biżżejjed ħin lil dawk kollha fl-attendenza biex ifittxu dawn l-iskritturi u biex isegwu hekk kif jinqraw il-versi.
Iktar Ħin Disponibbli Biex Nesprimu l-Fidi Tagħna
7. Liema opportunità għandna waqt l-Istudju tat-Torri tal-Għassa?
7 Aġġustament ieħor fl-artikli għall-istudju tat-Torri tal-Għassa għandu x’jaqsam mat-tul tagħhom. Fi snin reċenti, huma iqsar. B’hekk, matul l-Istudju tat-Torri tal-Għassa, qed jintuża inqas ħin għall-qari tal-paragrafi filwaqt li iktar ħin hu disponibbli biex jingħataw il-kummenti. Issa iktar uħud fil-kongregazzjoni għandhom opportunità jesprimu pubblikament il-fidi tagħhom billi jwieġbu xi mistoqsija stampata, japplikaw xi skrittura, jirrakkontaw xi esperjenza qasira li turi kemm hu għaqli li nsegwu l-prinċipji Bibliċi, jew b’modi oħrajn. Għandu jintuża ftit mill-ħin ukoll biex jiġu diskussi l-istampi.—Aqra Salm 22:22; 35:18; 40:9.
8, 9. X’inhu l-irwol taʼ dak li jikkonduċi l-Istudju tat-Torri tal-Għassa?
8 Madankollu, il-ħin miżjud biex ikun hemm diversi kummenti se jkun disponibbli biss jekk dawk li jieħdu sehem iwieġbu fil-qosor u dak li jikkonduċi l-laqgħa jżomm lura milli hu nnifsu jikkummenta spiss waqt l-Istudju tat-Torri tal-Għassa. Allura, x’jistaʼ jgħin lill-ħu li jikkonduċi jsib il-bilanċ xieraq bejn il-kummenti tiegħu u dawk li jingħataw mill-kongregazzjoni sabiex il-laqgħa tibni lil kulħadd?
9 Biex inwieġbu, ejja nikkunsidraw tixbiha. Studju tat-Torri tal-Għassa li hu mmexxi sew hu bħal bukkett fjuri li jpaxxi l-għajn. Sewwasew bħalma bukkett kbir hu magħmul minn ħafna fjuri individwali, hekk ukoll Studju tat-Torri tal-Għassa hu magħmul minn ħafna kummenti differenti. U sewwasew bħalma l-fjuri individwali f’bukkett ivarjaw fid-daqs u l-kulur, hekk ukoll il-kummenti matul il-laqgħa jvarjaw fit-tul u fil-mod kif jingħataw. U x’inhu l-irwol taʼ dak li jikkonduċi? Il-kummenti tiegħu taʼ kultant huma bħall-ftit weraq li jiġu miżjudin b’attenzjoni mal-bukkett. Dawn il-weraq ma jiddominawx; minflok, iservu biex jagħtu forma lill-bukkett u biex jgħaqqdu kollox flimkien. B’mod simili, dak li jikkonduċi jrid iżomm f’moħħu li l-irwol tiegħu mhuwiex li jitkellem ħafna hu, imma li jikkumplimenta l-espressjonijiet taʼ tifħir taʼ dawk fil-kongregazzjoni. Iva, meta l-ħafna kummenti differenti li jingħataw mill-kongregazzjoni u l-ftit kummenti xierqa li jagħmel dak li jikkonduċi jitpoġġew flimkien bis-sengħa, jifformaw bukkett mill-isbaħ taʼ kliem li dawk kollha fl-attendenza se jitgħaxxqu bih.
“Ħa Noffru Dejjem Sagrifiċċju taʼ Tifħir lil Alla”
10. Il-Kristjani tal-bidu kif qiesu l-laqgħat tal-kongregazzjoni?
10 Id-deskrizzjoni taʼ Pawlu tal-laqgħat Kristjani li tinsab fl-1 Korintin 14:26-33 tgħinna nifhmu aħjar kif dawn il-laqgħat kienu jitmexxew fl-ewwel seklu. Rigward dawn il-versi, wieħed studjuż tal-Bibbja jikteb: “L-iktar ħaġa li tispikka dwar quddiesa tal-bidu żgur li kienet li kważi kulħadd kien iħossu kemm privileġġat kif ukoll obbligat li jikkontribwixxi xi ħaġa għaliha. Raġel ma kienx imur bl-unika intenzjoni li joqgħod jismaʼ; ma kienx imur biss biex jirċievi imma wkoll biex jagħti.” Tabilħaqq, il-Kristjani tal-bidu kienu jqisu l-laqgħat tal-kongregazzjoni bħala opportunitajiet biex jesprimu l-fidi tagħhom.—Rum. 10:10.
11. (a) X’jikkontribwixxi bil-kbir għal laqgħat inkuraġġanti, u għala? (b) Liema suġġerimenti nistgħu napplikaw biex intejbu l-kummenti tagħna fil-laqgħat? (Ara n-nota taʼ taħt.)
11 Meta nesprimu l-fidi tagħna fil-laqgħat nikkontribwixxu bil-kbir biex “tinbena l-kongregazzjoni.” Żgur li taqbel li ilna kemm ilna nattendu l-laqgħat, nibqgħu nieħdu gost nisimgħu l-kummenti li jagħmlu ħutna. Aħna nitqanqlu minn tweġiba mill-qalb taʼ xi sieħeb fit-twemmin imdaħħal fiż-żmien u leali; inħossuna inkuraġġiti minn xi osservazzjoni għaqlija li jagħmel anzjan li juri interess; u ma nistgħux ma nitbissmux meta xi tifel joħroġ b’xi kumment spontanju li jesprimi mħabba ġenwina għal Ġeħova. B’mod ċar, billi nikkummentaw, ilkoll kemm aħna nieħdu sehem f’li nagħmlu l-laqgħat Kristjani inkuraġġanti. b
12. (a) X’nistgħu nitgħallmu mill-eżempji taʼ Mosè u Ġeremija? (b) It-talb liema rwol għandu f’li nikkummentaw?
12 Però, jistaʼ jkun verament taʼ sfida għal dawk li huma mistħijin biex jikkummentaw. Jekk dan hu minnu fil-każ tiegħek, jistaʼ jkun t’għajnuna jekk tiftakar li s-sitwazzjoni tiegħek hija komuni. Fil-fatt, anki qaddejja leali t’Alla bħal Mosè u Ġeremija esprimew nuqqas taʼ fiduċja fl-abbiltà tagħhom li jitkellmu fil-pubbliku. (Eżo. 4:10; Ġer. 1:6) Madankollu, sewwasew bħalma Ġeħova għen lil dawk il-qaddejja tal-qedem biex ifaħħruh pubblikament, Alla se jgħinek toffri sagrifiċċji taʼ tifħir. (Aqra Ebrej 13:15.) Kif tistaʼ tirċievi l-għajnuna taʼ Ġeħova f’li tegħleb il-biżaʼ tiegħek li tikkummenta? L-ewwel, ipprepara sew għal-laqgħa. Imbagħad, qabel ma tmur is-Sala tas-Saltna, itlob lil Ġeħova u staqsih b’mod speċifiku ħalli jagħtik il-kuraġġ biex tikkummenta. (Flp. 4:6) Int tkun qed titlob għal xi ħaġa li hi “skond ir-rieda tiegħu,” allura tistaʼ tkun fiduċjuż li Ġeħova se jwieġeb it-talb tiegħek.—1 Ġw. 5:14; Prov. 15:29.
Laqgħat li l-Għan Tagħhom Hu li ‘Jibnu, Jinkuraġġixxu, u Jfarrġu’
13. (a) Liema effett għandu jkollhom il-laqgħat tagħna fuq dawk fl-attendenza? (b) Liema mistoqsija hi importanti b’mod speċjali għall-anzjani?
13 Pawlu jgħid li skop importanti tal-laqgħat tal-kongregazzjoni hu li ‘jibnu, jinkuraġġixxu, u jfarrġu’ lil dawk fl-attendenza. c (1 Kor. 14:3) L-anzjani Kristjani llum kif jistgħu jagħmlu ċert li t-taħditiet tagħhom tabilħaqq jibnu u jfarrġu lil ħuthom? Biex inwieġbu, ejja nikkunsidraw laqgħa li kkonduċa Ġesù ftit wara l-irxoxt tiegħu.
14. (a) Liema ġrajjiet seħħew qabel laqgħa li ppjana Ġesù? (b) L-appostli għala żgur ħassewhom mistriħin meta “Ġesù resaq lejhom” u kellimhom?
14 L-ewwel, innota l-ġrajjiet li seħħew qabel din il-laqgħa. Ftit qabel ma Ġesù ġie maqtul, l-appostli “abbandunawh u ħarbu,” u bħalma kien imbassar, ‘xterdu kull wieħed lejn daru.’ (Mk. 14:50; Ġw. 16:32) Imbagħad, wara l-irxoxt tiegħu, Ġesù stieden lill-appostli tiegħu li kellhom qalbhom sewda biex jattendu laqgħa speċjali. d Bi tweġiba, “il-ħdax-il dixxiplu marru fil-Galilija lejn il-muntanja fejn Ġesù kien ftiehem biex jiltaqaʼ magħhom.” Meta waslu, “Ġesù resaq lejhom” u kellimhom. (Mt. 28:10, 16, 18) Immaġina kemm ħassewhom mistriħin l-appostli meta Ġesù ħa l-inizjattiva! Ġesù xi ddiskuta?
15. (a) Ġesù liema suġġetti kkunsidra, imma x’ma semmiex? (b) Dik il-laqgħa kif effettwat lill-appostli?
15 Ġesù beda billi għamel avviż: “Lili ngħatat kull awtorità.” Imbagħad tahom inkarigu: “Għalhekk, morru u agħmlu dixxipli.” Fl-aħħar, tahom din l-assiguranza mill-qalb: “Jien magħkom il-jiem kollha.” (Mt. 28:18-20) Imma nnotajt x’m’għamilx Ġesù? Ma ċanfarx lill-appostli tiegħu; lanqas ma uża dik il-laqgħa biex jiddubita mill-motivi tagħhom jew biex iġegħelhom iħossuhom iktar ħatjin billi joqgħod jirreferi għan-nuqqas taʼ fidi mumentanja tagħhom. Minflok, Ġesù reġaʼ assigurahom mill-imħabba tiegħu u taʼ Missieru billi fdahom b’inkarigu importanti. Il-mod kif Ġesù ffaċċja s-sitwazzjoni kif effettwa lill-appostli? Tant ħassewhom mibnijin, inkuraġġiti, u mfarrġin li ftit taż-żmien wara dik il-laqgħa għal darb’oħra kienu qed “jgħallmu u jxandru . . . l-aħbar tajba.”—Atti 5:42.
16. L-anzjani Kristjani llum kif jimitaw l-eżempju taʼ Ġesù f’li jikkonduċu laqgħat li huma sors taʼ serħan?
16 L-anzjani llum jimitaw lil Ġesù billi jqisu l-laqgħat bħala opportunitajiet biex jassiguraw lil sħabhom fit-twemmin mill-imħabba li ma tonqos qatt li Ġeħova għandu għall-poplu tiegħu. (Rum. 8:38, 39) Għalhekk, fit-taħditiet tagħhom, l-anzjani jiffokaw fuq it-tajjeb taʼ ħuthom, mhux fuq in-nuqqasijiet tagħhom. Ma jiddubitawx mill-motivi taʼ ħuthom. Minflok, l-espressjonijiet tagħhom jikxfu li jqisu lil sħabhom fit-twemmin bħala individwi li jħobbu lil Ġeħova u li jridu jagħmlu s-sewwa. (1 Tess. 4:1, 9-12) M’għandniex xi ngħidu, l-anzjani kultant ikollhom jikkoreġu lill-kongregazzjoni inġenerali, imma jekk ftit individwi biss għandhom bżonn jiġu aġġustati mill-ġdid, ġeneralment ikun aħjar li parir bħal dan jingħata f’konversazzjoni privata maʼ dawk involuti. (Gal. 6:1; 2 Tim. 2:24-26) Meta jindirizzaw lill-kongregazzjoni sħiħa, il-mira tal-anzjani hi li jagħtu tifħir fejn ikun xieraq. (Is. 32:2) Jistinkaw biex jitkellmu b’tali mod li fi tmiem il-laqgħa, dawk kollha fl-attendenza jħossuhom rifreskati u msaħħin.—Mt. 11:28; Atti 15:32.
Post taʼ Kenn
17. (a) Għala huwa importanti iktar minn qatt qabel li l-laqgħat tagħna jkunu post taʼ kenn? (b) X’tistaʼ tagħmel personalment biex tagħmel il-laqgħat iktar inkuraġġanti? (Ara l-kaxxa “Għaxar Modi Kif Tagħmel il-Laqgħat Inkuraġġanti Għalik u Għal Oħrajn.”)
17 Hekk kif id-dinja taʼ Satana ssir iktar u iktar oppressiva, irridu nagħmlu żgur li l-laqgħat Kristjani tagħna jkunu post taʼ kenn—sors taʼ faraġ għal kulħadd. (1 Tess. 5:11) Oħt li flimkien maʼ żewġha kampat maʼ prova iebsa ftit tas-snin ilu tiftakar: “Fis-Sala tas-Saltna konna nħossuna qisna qegħdin fl-idejn teneri taʼ Ġeħova. Matul is-sigħat li konna nkunu hemm, imdawrin minn ħutna l-Kristjani, konna nħossu li stajna nitfgħu t-tagħbija tagħna fuq Ġeħova, u esperjenzajna ċerta kalma ġewwinija.” (Salm 55:22) Jalla dawk kollha li jattendu l-laqgħat tagħna jħossuhom bl-istess mod inkuraġġiti u mfarrġin. Biex nagħmlu ċert li dan ikun minnu, ejja nkomplu nagħtu sehemna f’li nagħmlu l-laqgħat Kristjani inkuraġġanti.
[Noti taʼ taħt]
a Kien imbassar li xi aspetti tal-laqgħat Kristjani tal-ewwel seklu kienu se jieqfu. Pereżempju, m’għadniex ‘nitkellmu bl-ilsna’ jew ‘nipprofetizzaw.’ (1 Kor. 13:8; 14:5) Minkejja dan, l-istruzzjonijiet taʼ Pawlu jgħinuna nifhmu aħjar kif il-laqgħat Kristjani għandhom jitmexxew illum.
b Għal xi suġġerimenti dwar kif nistgħu ntejbu l-kummenti tagħna fil-laqgħat, ara It-Torri tal-Għassa tal-1 taʼ Settembru, 2003, paġni 19-22.
c Rigward id-differenza bejn “tinkuraġġixxi” u “tfarraġ,” Vine’s Expository Dictionary of Old and New Testament Words jispjega li l-kelma Griega tradotta “tfarraġ” tfisser “grad iktar taʼ tenerezza mill-[inkuraġġiment].”—Qabbel Ġwanni 11:19.
d Din forsi kienet l-okkażjoni li Pawlu rrefera għaliha iktar tard meta qal li Ġesù “deher lil iktar minn ħames mitt ħu.”—1 Kor. 15:6.
Int Kif Twieġeb?
• Kemm huma importanti l-laqgħat Kristjani?
• Il-kummenti li jingħataw fil-laqgħat għala jikkontribwixxu “biex tinbena l-kongregazzjoni”?
• X’nistgħu nitgħallmu minn laqgħa li kkonduċa Ġesù mas-segwaċi tiegħu?
[Mistoqsijiet taʼ Studju]
[Kaxxa/Stampi f’paġna 22,23]
GĦAXAR MODI KIF TAGĦMEL IL-LAQGĦAT INKURAĠĠANTI GĦALIK U GĦAL OĦRAJN
Ipprepara bil-quddiem. Meta tistudja bil-quddiem il-materjal li se jiġi diskuss fis-Sala tas-Saltna, il-laqgħat se ssibhom iktar interessanti u se jħallu effett akbar fuqek.
Attendi regolarment. Ladarba attendenza tajba hi iktar inkuraġġanti għal kull min hu preżenti, il-preżenza tiegħek tagħmel differenza.
Asal fil-ħin. Jekk tkun bilqiegħda f’postok qabel ma jibda l-programm, tkun tistaʼ tieħu sehem fl-għanja u t-talba tal-ftuħ, li jagħmlu parti mill-qima tagħna lil Ġeħova.
Ejja armat tajjeb. Ġib il-Bibbja tiegħek u l-pubblikazzjonijiet li nużaw matul il-laqgħat sabiex tkun tistaʼ ssegwi u tifhem aħjar dak li jkun qed jintqal.
Evita l-aljenazzjonijiet. Pereżempju, aqra l-messaġġi tal-mobile wara l-laqgħa u mhux waqt li tkun għaddejja. B’hekk, iżżomm l-affarijiet persunali fil-post xieraq tagħhom.
Ipparteċipa. Meta iktar nies jagħmlu kummenti, iktar uħud iħossuhom inkuraġġiti u msaħħin mill-espressjonijiet differenti tal-fidi.
Żomm il-kummenti qosra. Dan jagħti opportunità lil kemm jistaʼ jkun nies biex jieħdu sehem f’li jikkummentaw.
Wettaq l-inkarigi. Bħala student fl-Iskola tal-Ministeru Teokratiku jew bħala parteċipant fil-Laqgħa tas-Servizz, ipprepara sew, ipprattika bil-quddiem, u agħmel ħiltek biex ma tikkanċellax l-inkarigi tiegħek.
Faħħar lil dawk li jieħdu sehem. Għid lil dawk li jkollhom sehem fil-laqgħa jew li jikkummentaw kemm huma apprezzati l-isforzi tagħhom.
Assoċja. Tislim mill-qalb u konversazzjoni li tibni qabel u wara l-laqgħat iżidu ħafna mal-ferħ u l-benefiċċji li niksbu meta nkunu preżenti.