Bo Ta Yuda Hasi Reunionnan Kristian Edifikante?

“Ora boso ta reuní, . . . laga tur kos wòrdu hasí pa edifikashon.”​—1 KOR. 14:26.

1. Segun 1 Korintionan kapítulo 14, kiko ta un di e metanan importante di reunionnan kristian?

‘E REUNION a animá mi!’ Siguramente bo tambe a yega di bisa algu similar despues di un reunion na Salòn di Reino. Sí, reunionnan di kongregashon ta un fuente di animashon. I esei no ta nada straño, pasobra meskos ku tabata e kaso den promé siglo, un meta importante di nos reunionnan djawe ta pa fortalesé tur presente den sentido spiritual. Tuma nota kon apòstel Pablo a hala atenshon na e meta spesífiko ei den su promé karta na e korintionan. Den kapítulo 14, el a mustra bes tras bes ku tur parti ku ta ser presentá na reunionnan kristian mester ta pa “edifikashon di e iglesia,” òf kongregashon.​—Lesa 1 Korintionan 14:​3, 12, 26. *

2. (a) Kiko ta hasi reunionnan kristian edifikante? (b) Ki pregunta nos lo konsiderá?

² Nos sa ku, na promé lugá, ta e spiritu santu di Dios ta hasi posibel ku reunionnan kristian ta edifikante. P’esei, semper nos ta kuminsá tur reunion di kongregashon ku un orashon sinsero pa pidi Yehova, nos Tata selestial, bendishoná nos reunion mediante su spiritu santu. Pero, nos ta konsiente tambe ku tur miembro di kongregashon por yuda hasi e reunionnan edifikante. Pues anto, kiko ta algun kos ku kada un di nos por hasi pa e reunionnan ku nos tin semanal na Salòn di Reino por ta un fuente di animashon i refreskamentu spiritual?

3. Dikon reunionnan kristian ta importante?

³ Pa kontestá e pregunta ei, nos lo analisá algun aspekto di nos reunionnan ku ta bon pa rumannan ku ta dirigí tene na mente. Ademas, nos lo konsiderá kon henter e kongregashon por yuda hasi e reunionnan edifikante. Esaki ta di sumo importansia pasobra nos reunionnan ta sagrado. Sí, asistensia i partisipashon na reunionnan kristian ta aspektonan importante di nos adorashon na Yehova.​—Sal. 26:12; 111:1; Isa. 66:​22, 23.

Un Reunion pa Studia Beibel

4, 5. Kiko ta e meta di e Estudio di Toren di Vigilansia?

⁴ Nos tur ke saka pleno benefisio for di nos estudio semanal di E Toren di Vigilansia. Pa  logra esei, nos tin ku komprondé bon kla kiko ta e meta prinsipal di e reunion ei. P’esei, laga nos repasá e motibu pakiko nos tin e Estudio di Toren di Vigilansia i algun kambio ku a ser hasí na e artíkulonan di estudio.

⁵ E motibu pakiko nos tin e Estudio di Toren di Vigilansia ta pa nos studia Beibel ku yudansa di e revista akí. Sí, tur siman, durante nos Estudio di Toren di Vigilansia, e Palabra di Dios ta ser ‘spliká’ di tal manera ku ‘tur hende por komprondé,’ meskos ku tabata e kaso den tempu di Nehemias.​—Neh. 8:8, BPK; Isa. 54:13.

6. (a) Ki kambio a ser hasí na e Estudio di Toren di Vigilansia? (b) Kiko nos mester tene bon na mente relashoná ku e tekstonan ku mester “lesa” na bos haltu?

⁶ Debí ku Beibel ta nos buki prinsipal di instrukshon, a bin un kambio den e Estudio di Toren di Vigilansia. Awor vários teksto bíbliko den e artíkulonan di estudio tin e palabra “lesa” nan dilanti. I nos tur ta ser animá pa durante e reunion nos sigui e lesamentu di e tekstonan ei den nos Beibel. (Echo. 17:11) Dikon? Pasobra ora nos mira Dios su konseho den nos mes Beibel, esaki ta hasi un impreshon mas profundo riba nos. (Heb. 4:12) P’esei, promé ku lesa e tekstonan ei na bos haltu, e ruman ku ta dirigí e reunion mester duna tur presente sufisiente tempu pa buska e tekstonan pa nan por sigui e lesamentu.

Mas Tempu pa Ekspresá Nos Fe

7. Ki oportunidat nos tin durante e Estudio di Toren di Vigilansia?

⁷ Un otro kambio tin di haber ku e largura di e artíkulonan di estudio. Den añanan resien, nan a bira mas kòrtiku. Pues, durante e Estudio di Toren di Vigilansia, ménos tempu ta bai na lesamentu di paragraf i tin mas tempu pa duna komentario. Mas persona por haña bùrt pa ekspresá nan fe públikamente. Por ehèmpel, nan por kontestá un pregunta riba un paragraf, mustra kon un teksto bíbliko ta apliká òf konta un eksperensia breve ku ta mustra pakiko ta sabí pa apliká prinsipionan bíbliko. Mester dediká tempu tambe na e plachinan.​—Lesa Salmo 22:22; 35:18; 40:9.

8, 9. Kiko ta e papel di e ruman ku ta dirigí e Estudio di Toren di Vigilansia?

⁸ Sinembargo, pa vários hende por duna komentario den e tempu èkstra ei, tur partisipante mester tene nan komentarionan breve, i esun ku ta dirigí e Estudio di Toren di Vigilansia tin ku dominá su mes pa no duna muchu komentario. P’esei, kiko por yuda e ruman ei haña un bon ekilibrio entre su komentarionan i esnan di e kongregashon pa e reunion por ta edifikante pa tur presente?

⁹ Konsiderá e siguiente ilustrashon. Nos por kompará un Estudio di Toren di Vigilansia bon dirigí ku un bunita bukèt di flor. Meskos ku un bukèt grandi ta konsistí di vários flor, e Estudio di Toren di Vigilansia ta konsistí di hopi komentario. Meskos ku e flornan den e bukèt tin diferente tamaño i koló, e komentarionan na reunion ta distinto; nan ta varia den largura i e manera ku nan ta wòrdu presentá. Awor kiko ta e papel di e ruman ku ta dirigí? Wèl, nos por kompará e komentarionan ku e ta duna de bes en kuando ku e bunita taki- i blachinan bèrdè ku hende ta agregá kuidadosamente na un bukèt. Nan no ta predominá. Mas bien, huntu ku e flornan, nan ta yuda forma e bukèt. Di mes manera, e konduktor mester tene bon na mente ku su komentarionan no mester predominá. Mas bien, nan mester komplementá e ekspreshonnan di alabansa di e kongregashon. Sí, ora kombiná e komentarionan di e kongregashon i e remarkenan breve i oportuno di esun ku ta dirigí, nan ta forma un bunita bukèt di palabra ku ta animá tur presente.

“Laga Nos Ofresé Kontinuamente un Sakrifisio di Alabansa na Dios”

10. Kon e kristiannan di promé siglo a konsiderá reunionnan di kongregashon?

¹⁰ E manera ku Pablo a deskribí e reunionnan kristian na 1 Korintionan 14:​26-33 ta  yuda nos komprondé kon nan tabata dirigí e reunionnan ei den promé siglo. Relashoná ku e versíkulonan ei, un eksperto riba tereno di Beibel a bisa lo siguiente: ‘Loke tabata realmente remarkabel di e reunionnan kristian di promé siglo ta ku kasi tur hende tabata sinti ku nan tin e obligashon i privilegio di kontribuí na e reunionnan. Ningun hende tabata bini djis pa skucha so; nan no tabata bini reunion pa risibí so sino pa duna tambe.’ Sí, e kristiannan di promé siglo a mira reunionnan di kongregashon komo un oportunidat pa ekspresá nan fe.​—Rom. 10:10.

11. (a) Kiko ta yuda hasi nos reunionnan edifikante, i dikon? (b) Ki sugerensianan por yuda nos mehorá nos komentarionan? (Mira nota na pia di página 31.)

¹¹ Ora nos ta ekspresá nos fe na reunion, nos ta yuda ‘edifiká e iglesia,’ esta e kongregashon. I sin duda, bo ta di akuerdo ku maske kuantu aña nos tin ta asistí na nos reunionnan, semper ta un goso pa skucha komentario di nos rumannan. Por ehèmpel, ta emoshonante pa skucha kontestanan sinsero di un ruman di edat ku ta fiel den e bèrdat. Ademas, ta un animashon pa tende un ansiano  bondadoso hasi un opservashon ku ta reflehá disernimentu; i nos no por evitá di smail ora un mucha spontáneamente ta duna un komentario ku ta ekspresá su amor sinsero pa Yehova. Pues ta bisto ku dunando komentario, nos tur ta yuda hasi nos reunionnan edifikante. *

12. (a) Kiko nos por siña for di e ehèmpel di Moisés i di Jeremias? (b) Kon orashon ta yuda nos duna komentario?

¹² Sinembargo, pa esnan ku ta tímido, kisas no ta fásil pa duna komentario. Si abo tin e problema ei, kòrda ku bo no ta e úniko. De echo, asta fiel sirbidónan di Dios, manera Moisés i Jeremias, a bisa ku nan no por papia den públiko. (Eks. 4:10; Jer. 1:6) Pero Yehova a yuda nan alab’é den públiko, i di mes manera, lo e yuda abo tambe ofresé sakrifisio di alabansa na dje. (Lesa Hebreonan 13:15.) Awor, kiko bo mester hasi pa Yehova yuda bo vense bo miedu di duna komentario? Pa kuminsá, prepará bon pa e reunionnan. I promé ku bo bai Salòn di Reino, hasi orashon pidi Yehova spesífikamente p’e duna bo kurashi pa duna komentario. (Fil. 4:6) I bo por tin sigur ku lo e kontestá bo orashon pasobra loke bo ta pidi ta “konforme su boluntat.”​—1 Juan 5:14; Pro. 15:29.

Reunionnan Ku Ta ‘Edifiká, Ekshortá i Konsolá’

13. (a) Ki efekto nos reunionnan mester tin riba esnan presente? (b) Ki pregunta ta spesialmente importante pa ansianonan?

¹³ Segun Pablo, un meta importante di reunionnan di kongregashon ta pa ‘edifiká, ekshortá [òf, “animá,” NW] i konsolá’ esnan presente. * (1 Kor. 14:3) Awor kiko ansianonan kristian tin ku hasi pa nan partinan por ta un animashon i konsuelo pa nan rumannan? Pa haña sa esei, laga nos konsiderá un reunion ku Hesus a dirigí djis despues di su resurekshon.

14. (a) Kiko a sosodé promé ku e reunion ku Hesus a konvoká? (b) Dikon e apòstelnan lo a sinti nan aliviá ora “Hesus a hala serka i a papia ku nan”?

¹⁴ Pa kuminsá, laga nos wak loke a sosodé promé ku e reunion. Djis promé ku Hesus a ser matá, su apòstelnan “a bandon’é i a hui bai,” i manera Hesus a profetisá, nan a ser “plamá, kada un pa su mes kas.” (Mar. 14:50; Juan 16:32) Anto despues ku Hesus a resusitá, el a invitá su apòstelnan, kendenan tabata desanimá, na un reunion spesial. * I “e diesun disipelnan” ei a aseptá e invitashon i “a sali bai Galilea, na e seru ku Hesus a indiká nan pa bai.” Ora nan a yega na e lugá, “Hesus a hala serka i a papia ku nan.” (Mat. 28:​10, 16, 18) Imaginá bo kon aliviá e apòstelnan mester a sinti nan ora ku Hesus a aserká nan i papia ku nan! Kiko Hesus a bisa nan?

15. (a) Kiko Hesus a konsiderá durante su reunion, pero kiko e no a hasi? (b) Kon e apòstelnan a sinti nan despues di e reunion ei?

¹⁵ Hesus a kuminsá su reunion ku e siguiente anunsio: “Tur outoridat a wòrdu duná na mi.” Despues, el a duna su disipelnan e asignashon pa ‘bai i hasi disipel.’ Finalmente, ku  kariño, el a primintí nan: “Mi ta ku boso semper.” (Mat. 28:​18-20) Bo a ripará kiko Hesus no a hasi? E no a reprendé su apòstelnan; e no a usa e reunion ei pa kuestioná nan motivashon ni pa rekordá nan riba e falta di fe ku nan a demostrá temporalmente i pone nan sinti nan mas kulpabel ainda. Al kontrario, Hesus a demostrá nan bon kla ku tantu é komo su Tata ta stima nan, pasobra el a enkargá nan ku un asignashon masha importante. Ki efekto Hesus su trato tabatin riba su apòstelnan? Esaki a edifiká, animá i konsolá nan asina tantu ku algun dia despues di e reunion ei, nan a bolbe kuminsá “siña hende i prediká” e bon notisia.​—Echo. 5:42.

16. Siguiendo e ehèmpel di Hesus, kiko e ansianonan tin ku hasi pa e reunionnan por ta un fuente di refreskamentu?

¹⁶ Meskos ku Hesus, ansianonan awe ta mira e reunionnan komo un oportunidat pa sigurá kompañeronan den fe ku Yehova ta stima su pueblo. (Rom. 8:​38, 39) P’esei, den nan partinan, ansianonan semper ta enfoká riba e bon kualidatnan di nan rumannan den fe i no riba nan debilidatnan. Nan no ta kuestioná motivashon di ningun ruman. Mas bien, nan palabranan ta mustra ku nan ta mira nan kompañeronan den fe komo personanan ku ta stima Yehova i ku ke hasi loke ta bon. (1 Tes. 4:​1, 9-12) Ta klaru ku, de bes en kuando, ansianonan tin ku duna konseho pa korigí e kongregashon en general riba un asuntu. Ma si ta solamente algun persona mester di konseho, ta mihó pa e ansianonan duna esei den privá. (Gal. 6:1; 2 Tim. 2:​24-26) I ora ansianonan ta papia ku henter e kongregashon, nan ta duna elogio ora ta oportuno. (Isa. 32:2) I nan ta hasi esfuerso pa papia di tal manera ku, ora reunion kaba, tur esnan ku tabata presente ta sinti nan refreská i animá.​—Mat. 11:28; Echo. 15:32.

Un Refugio

17. (a) Pakiko awor mas ku nunka ta importante pa nos reunionnan ta un fuente di konsuelo? (b) Kiko abo por hasi pa e reunionnan por ta edifikante? (Mira e kuadro “Dies Manera pa Hasi e Reunionnan Edifikante pa Bo Mes i pa Otronan.”)

¹⁷ Satanas su mundu ta birando mas i mas opresivo. P’esei, nos mester hasi sigur ku nos reunionnan ta un refugio, esta, un fuente di konsuelo pa tur hende. (1 Tes. 5:11) Un ruman muhé ku algun aña pasá a pasa den un prueba severo huntu ku su kasá a bisa: “Ora nos tabata na Salòn di Reino, den seno di nos rumannan den fe, nos a sinti Yehova su kuido tierno. Nos a sinti ku nos por a tira nos karga riba dje, i esei a yuda nos keda trankil.” (Sal. 55:22) Pues, nos ta deseá pa tur hende ku asistí na nos reunionnan sintí nan animá i konsolá. I pa hasi sigur ku esei ta e kaso, laga nos sigui hasi esfuerso pa nos reunionnan ta edifikante.

[Nota]

Kon Lo Bo Kontestá?

• Dikon reunionnan kristian ta importante?

• Dikon dunamentu di komentario na reunion ta yuda ‘edifiká’ e kongregashon?

• Kiko nos por siña for di un reunion ku Hesus tabatin ku su siguidónan?

[Preguntanan di Estudio]

[Kuadro/​Plachinan na página 30, 31]

DIES MANERA PA HASI E REUNIONNAN EDIFIKANTE PA BO MES I PA OTRONAN

Prepará di antemano. Si bo prepará e informashon ku nos lo studia na Salòn di Reino di antemano, e reunionnan lo bira mas interesante pa bo, i nan lo tin un efekto mas profundo riba bo.

Asistí na reunion regularmente. Nos tur ta sinti nos masha animá ora tin un bon asistensia. P’esei, bo presensia ta importante.

Yega na tempu. Si bo ta sintá promé ku reunion kuminsá, bo por partisipá den e kantika i orashon di apertura. Esakinan ta partinan importante di nos adorashon na Yehova.

Bini bon ekipá. Bini ku bo Beibel i e publikashonnan ku lo ser usá durante reunion. Asina bo por sigui e programa i komprondé e informashon mihó.

Evitá distraishon. Por ehèmpel, no lesa mensahenan elektróniko durante reunion. Lesa nan despues. Di e manera akí bo ta mantené kosnan privá na nan debido lugá.

Partisipá. Ora mas persona ta duna komentario, mas hende lo sinti nan fortalesí i animá pa e diferente ekspreshonnan di fe.

Duna komentario breve. Asina, mas hende por duna komentario.

Kumpli ku bo asignashonnan. Ora bo haña un asignashon pa partisipá den e Skol di Ministerio Teokrátiko òf den e Reunion di Sirbishi, prepará bon, train bo parti di antemano i hasi esfuerso pa kumpli ku bo asignashon.

Duna elogio. Laga esnan ku tabatin un parti den e programa òf ku a duna komentario sa kuantu bo a apresiá nan esfuerso.

Asosiá ku otro. Un saludo agradabel i kòmbersashon edifikante promé i despues di reunion ta hasi esakinan mas plasentero i probechoso pa tur presente.