¿Reunionchö yanapakïkankiku?
¿Reunionchö yanapakïkankiku?
“Wauquicuna y panicuna, ellucayanqequicunacho [...] llapanpis allilla catsun marcäquiniquicunacho alli patsacashqa cayänequipaq.” (1 COR. 14:26.)
1. 1 Corintios 14 kaq capïtulochö ninqannöpis, ¿imapaqtaq reunionkunaman ëwantsik?
“¡KË REUNIONQA imanö shumaqmi këkushqa!” Llapantsikchi reunión usharinqanchö tsënö nirquntsik. Reunionnintsikkunaqa imëkachömi yanapamantsik. Unë cristiänokunatapis ëllukäyanqanmi Diosta más alli serviyänampaq yanapaq. 1 Corintios 14 kaq capïtulochömi reunionkunapaq atska kuti Pablu parlarnin kënö nin: “Creyicoq mayiquicunapaq mas probechoso caqllata” parlayanki (lei 1 Corintios 14:3, 12, 26). *
2. a) ¿Imanirtaq reunionkuna alläpa yanapamantsik? b) ¿Ima tapukïpa respuestantataq yachakushun?
2 Markäkïnintsik [yärakuynintsik] alli patsakashqa kanampaq o kushi kushi kanapaqmi, reunionkunachö santo espíritu yanapamantsik. Tsëmi reunionkunata qallantsik Jehoväpa santo espïritunta mañakur-raq. Pero reunionchö alli yachakunapaqqa, llapantsikmi yanapanakunantsik. Yachatsikuyänan Wayichö ëllukarninqa, ¿imakunataraq rurashwan huknintsik huknintsik yanapanakunapaq?
3. ¿Reunionkunaman ëwëqa imanirtaq alläpa preciso?
3 Kë tapukïpa respuestanta yachakunapaqqa, puntata rikärishun reunionkunata dirigeqkuna imata yarpäyänan kaqta. Tsëpitanam yachakushun llapan ëllukaqkuna imanö yanapakuyänampaq kaqtapis. Këkunata rurarqa, Jehoväta adoranqantsiktam rikätsikïkantsik. Awmi, reunionkunaman ëwë y tsëchö yanapakïqa Diosta adorëmi (Sal. 26:12; 111:1; Isa. 66:22, 23).
Bibliapita yachakunapaq reunión
4, 5. ¿Imapitataq yachakuntsik Täpakoq revistata estudiarnin?
4 Llapantsikmi Täpakoq revistapita yachakïta munantsik. Tsëmi alleq musyanantsik imarëkur kë reunionta patsätsiyämushqanta. Tsëpaqmi rikärishun reunionchö yachakunapaq artïculokuna kananqa hukläyana kayanqanta.
5 Täpakoq revistam yanapamantsik Bibliapita más yachakunapaq. Awmi, Nehemías kawanqan witsanchönöllam kë reunionchö kikin Bibliata leintsik y ima nita munanqantapis yachakuntsik (Neh. 8:8; Isa. 54:13).
6. a) ¿Imataq Täpakoq revistachö hukläya yarqamushqa? b) ¿Imataraq rurashwan huk texto lädonchö lei nishpa yuriptin?
6 Bibliapita yachakunantsik alläpa preciso kaptinmi, kananqa Täpakoqpita yachakunapaq tëmakunachö wakin textokunaqa lei nishpana yurin. Tsëmi reunión hora llapantsik Bibliantsikchö kë textokunata ashinantsik (Hech. 17:11). Tsëqa Diospa yachatsikïninmi shonquntsikman más chärinqa (Heb. 4:12). Tsëmi textokuna manaraq leikaptin, reunionta dirigeq wawqi shuyaranman textota llapan tariyänanta, tsënöpa leiyanqanta qatiyänampaq.
Masnam comentanapaq tiempo kan
7. ¿Imakunapitaraq comentashwan Täpakoqpita yachakur?
7 Hina Täpakoq revistachö yachakunapaq artïculokunaqa más wallkallanam kayan. Pärrafokunata ichik tiempollana leikaptinmi, llapantsik comentanapaq más tiempo kapamantsik. Tsëmi kananqa tiempo tinkunna congregacionchö atskaq wawqikuna y panikuna comentarionkunawan Jehoväman markäkuyanqanta rikätsikuyänampaq. Y kikin revistapitam comentariyanman, o texto ninqanta imanöpa ruranapaq kaqta, o experienciata ichikllata willakur Biblia ninqan alläpa preciso kanqantapis rikätsikuyanmanmi. Hina revistachö dibujokunapitapis comentariyanmanmi (lei Salmo 22:22 *; 35:18 *; 40:9 *).
8, 9. ¿Imakunataraq ruranman Täpakoqta dirigeq wawqi?
8 Täpakoq revistapita yachakunqantsikchö más atskaq comentayänampaqqa, wallka wallkallatam parlanantsik y dirigeq wawqipis manam alläpatsu parlanan. Reunionpita llapampis kushi kushi yarquyänampaq, ¿imataq yanapanqa dirigeq wawqita comentayämunqanman ichik ichik yapapärinampaq?
9 Huk igualatsikïwan kë tapukïta contestarishun. Täpakoqpita alli dirigïtaqa igualaratsishwan atska wëta watashqatanömi. Imanömi watashqa wëtachö atska wëtakuna kan, tsënöllam Täpakoqpita yachakunqantsikchöpis atska comentariokuna kan. Y imanömi wëtapis tukï color y ichikpis hatumpis kan, tsënöllam comentariokunapis atska o wallka y tukïläyapis kan. Y, ¿imawantaq dirigeq parlamunqanta igualaratsishwan? Pëpa parlakïninqa wëtapa wallkalla raprankunanömi kayan, tsë raprakunaqa manam más rikakänampaqtsu, sinöqa shumaqyätsinampaq y patsakänampaqmi. Dirigeqqa yarpänan alläpa mana parlanampaq kaqtam y wakinkuna comentayanqanman yapapärinampaq kaqllatam. Jehoväta alabarnin llapan comentayämunqanman dirigeq kaq más precïson kaqta ichik parlarinqanmi, reunionchö këkaqkunata yanapanqa.
“Llapan shonquntsicwan alabecushun Diosnintsicta”
10. ¿Imanötaq punta cristiänokuna rikäyaq congregacionchö reunionkunata?
10 1 Corintios 14:26-33 textochö Pablu ninqanmi, unë cristiänokuna reunionta imanöpis rurayanqanta musyanapaq yanapamantsik. Huk yachaq nunam kë versïculokunapaq këta qellqarqan: “Unë cristiänokuna ëllukar o gorikarga imallawampis yanapakïtam alläpa munëkuyaq. Manam pipis wiyakoqllatsu ëwaq, sinöqa chaskita munëwan y yanapakïta munëwanmi”. Rasumpëpam punta cristiänokunaqa reunionkunaman ëwayaq Diosta kuyayanqanta rikätsikuyänampaq (Rom. 10:10).
11. a) ¿Imataq yanapakun reunionkuna más alli kanampaq? b) ¿Imataq yanapamäshun comentariontsik más alli kanampaq? (Hawanchö ichisaq letrawan qellqashqata rikäri.)
11 Reunionkunachö Diosta kuyanqantsikta comentariontsikkunawan rikätsikurmi, ‘creyicoq mayintsiccunapaq mas probechoso caqllata’ rurëkantsik. Ëka watana reunionkunaman ëwëkarnimpis, allichi musyantsik cristiano mayintsikkuna comentayanqanta wiyar alläpa kushikunqantsikta. Alläpam kushikuntsik edäyashqana cristiana shonqupita patsë comentaptin, y mana tanteanqantsikkunata huk kuyakoq anciano rikätsikuptin, y Jehoväta pasëpa kuyanqanta rikätsikur wambrakuna comentayaptimpis. Llapantsik comentashqaqa reunionkuna yanapamänata alleqmi musyantsik. *
12. a) ¿Jeremias y Moises rurayanqampita imatataq yachakuntsik? b) ¿Imanötaq yanapamantsik Jehoväman mañakunqantsik?
12 Wakimpaqqa mantsakoq kayaptinmi, reunionkunachö comentëqa alläpa sasa o aja. Mantsakoq karqa, wakinkunapis tsënö kayanqanta yarpë. Diospa unë sirveqninkuna Moiseswan Jeremïaspis atskaq nunachö parlëtaqa mantsapakuyarqanmi (Éxo. 4:10; Jer. 1:6). Imanömi pëkunatapis Jehová yanaparqan atska nunakunachö alabayänampaq, tsënöllam qamtapis yanapashunki reunionkunachö comentarnin alabanëkipaq (lei Hebreus 13:15). Mana mantsapakushpa comentanëkipaq y Dios yanapashunëkipaq, ¿imatataq rurankiman? Tsëpaqqa, reunionpaqmi alleq preparakunëki. Tsëpitana reunionman manaraq ëwar, comentanëkipaq Jehoväman mañakunëki (Fili. 4:6). “Pe munashqanno” mañakïkarqa, markäkunëkim yanapashunëkiman (1 Juan 5:14; Pro. 15:29).
Kushitsikoq y yanapakoq reunionkuna
13. a) ¿Reunionkuna imachötaq wawqikunata y panikunata yanapanman? b) ¿Imatataq anciänokuna yachatsikurnin rikäyänan?
13 Reunionkuna kushitsikunqanta y markäkïnintsik más patsakänampaq yanapakunqantam Pabluqa willakurqan (1 Cor. 14:3). * Anciänokunaqa rikäyänanmi yachatsikur parlayanqan llakishqakunata kushiratsinqanta y yanapakunqanta. Tsëta musyanapaqmi, Jesus wanunqampita sharkaramur qateqninkunawan rurayanqan reunionchö imanöpis parlanqanta rikärishun.
14. a) ¿Imataq pasakurqan Jesus qateqninkunata huk reunionman manaraq qayatsiptin? b) ¿Imanir-raq Maestron parlapaptin qateqninkuna alläpa kushikuyarqan?
14 Tsë reunión manaraq kaptin imakunapis pasakunqanta puntata rikärishun. Jesusta manaraq wanutsiyaptinmi, Bibliachö willakunqannöpis “Jesusta japallanta jaqirïcurnin, llapan disipuluncuna qeshpir eucuyarqan” (Mar. 14:50; Juan 16:32). Wanurinqampita kawariramurninmi, qateqninkuna alläpa llakinashqa këkäyaptin huk especial reunionman invitarqan. * Tsënam ‘Jesuspa chunca juc (11) disipuluncunaqa Galilea marcaman eucuyarqan Jesus nishqanno tse jircacho tincuyänanpaq’. Chäriyaptinnam “quecayanqanman witïcur” Jesus pëkunata parlaparqan (Mat. 28:10, 16, 18). ¡Imanöraq kushikuyarqan Jesus parlapäriptin! Pero ¿imapitaraq parlaparqan?
15. a) ¿Huk reunionchö Jesus qateqninkunata ima nirqantaq, y imatataq rurarqantsu? b) ¿Tsë reunión Jesuspa qateqninkunata yanaparqantsuraq?
15 Kënö nirmi qateqninkunata Jesus parlapar qallarqan: “Diosmi churamashqa, sieluchopis y que patsachopis mandacunäpaq”. Tsëpitanam kënö nirqan: “Qamcunata[m] cachayaq jinantin nasioncunapa ewar, noqaman creyicuyänanpaq nunacunata willapäyänequipaq”. Y tsëpitanam kuyakïwan këta awnirqan: “Noqaqa qamcunawanmi quecashaq imecamayaqpis, asta que patsapa usheninyaq” (Mat. 28:18-20). Tanteankiku, ¿imatataq Jesus rurarqantsu? Manam qateqninkunata qayaparqantsu. Llakinashqatapis manam imanirtaq tsëta rurayarqunki nishpatsu tapurqan, ni manam markäkïninkuna ushakëkanqantatsu yarpätsirqan. Tsëpa rantinqa, Teytampa y kikimpa kuyakïnintam rikätsirqan alläpa precisaq rurëta rurayänampaq mandarnin. Jesus kënö ruranqan, ¿qateqninkunata yanaparqantsuraq? Awmi. Kushikuyarqanmi y markäkïninkunapis masmi sinchiyarqan, tsëmi tsë reunión pasakäriptin ‘cada junaq templuchopis y wayin wayin purirpis, willacur yachatsicuyaq alli willaquita Teyta Jesus Dios Acrashqan canqanta’ (Hech. 5:42).
16. Jesusnö kaqpis, ¿imatataq anciänokuna rurayänan reunionpita kushishqa yarqunapaq?
16 Kanampis, anciänokunaqa Jesusnömi cristiano mayinkunata reunionkunachö shumaq parlapäyan Jehoväpa kuyakïnimpita ni imapis mana rakinampaq (Rom. 8:38, 39). Tsëpaqqa, yachatsikuyanqan höram wawqinkuna y paninkuna allikunata rurayanqampita parlayan, y manam ichik mana alli rurayanqampitatsu parlayan. Hina manam ima rurayanqankunatapis mana allipaqtsu churayan. Y parlakïninkunawanmi rikätsikuyan pëkunapis Jehoväta alläpa kuyayanqanta y kawëninkunachö Pëpa munëninta rurëta munayanqanta (1 Tes. 4:1, 9-12). Pero congregacionchö imapis mana allinö kaptinqa, höraqa anciänokuna llapantam plataformapita parlapäriyan, pero huk ishkëlla imatapis rurariyaptinqa kikinkunallatam parlapäriyan (Gal. 6:1; 2 Tim. 2:24-26). Y llapan congregacionta parlaparqa, imëpis alli rurayanqampitam shumaq parlapäyan (Isa. 32:2). Hina markäkïnintsik más sinchiyänampaq y reunionpita kushishqa yarqunapaqmi, pëkunaqa tukïnöpa yanapamantsik (Mat. 11:28; Hech. 15:32).
Yanapamaqnintsik reunión
17. a) ¿Imanirtaq alläpa preciso reunionkunachö yanapakunantsik? b) ¿Imakunata rurartaq reunionkunachö yanapakunkiman? (Rikäri “Reunionkuna yanapamänapaq chunka yanapakïkuna” nishqan recuadrota.)
17 Satanaspa makinchö nunakunaqa más mana allim tikrakïkäyan, tsëmi reunionkunachöqa huknintsik huknintsik yanapanakunantsik, tsënöpa llapantsik kushishqa kanapaq (1 Tes. 5:11). Huk casada panin pasaq watakunachö qowanwan alläpa hipayarqan, tsëmi kënö willakun: “Yachatsikuyänan Wayichöqa llapan cristiano mayïkunawan karninmi, Jehoväpa kuyakïninta rikäyaq kayä. Problëmakunata lasaq qepitanö pëman churëkuyänäta musyarmi, alliyäriyaq kayä” (Sal. 55:22). Reunionman llapan shamoqkuna kushikuyänanta y markäkïninkuna más sinchiyänantam munantsik. Tsënö kanampaqqa, llapantsikmi reunionkunachö yanapanakunantsik.
[Päginapa ura kuchunchö willakïkuna]
^ par. 1 Unë cristiänokunapa reunionninkunachö tukï idiömata manana parlayänampaq y Diospa revelacionninta manana chaskiyänampaq kaqtam Pablu willakurqan (1 Cor. 13:8; 14:5). Pero ninqanqa yachatsimantsikmi kanan witsan reunionnintsikkunata imanö ruranapaqpis.
^ par. 7 Salmo 22:22: “Wawqïkunatam shutikipita willashaq; congregación chöpinchömi alabashqëki”.
^ par. 7 Salmo 35:18: “Hatun congregacionchömi alabashqëki, atska nunakuna rurinchömi alabashqëki”.
^ par. 7 Salmo 40:9: “Hatun congregacionchömi willakurqö alli kaq rurënikipita. ¡Rikë! Manam qallüta tsarätsu. Oh Jehová, tsëtaqa kikikipis allim musyanki”.
^ par. 11 Comentariontsik más alli kanampaqqa, yanapamäshun La Atalaya 1 de septiembre de 2003, 19 a 22 päginakuna ninqanmi.
^ par. 13 Griego idiömachö “shumaq parlëpaq”, y ‘yanapëpaqmi’ Diccionario expositivo de palabras del Antiguo y del Nuevo Testamento exhaustivo, de W. E. Vine nishqan, “shumaq parlëpitapis” más kuyakïwan parlë kanqanta nimantsik (igualaratsi Juan 11:19).
^ par. 14 Kë pasakunqampaq parlarqa itsa Pabluqa, nikarqan ‘pitsqa pachak creyicoqcunata’ yuripunqampaq (1 Cor. 15:6).
Yachakunqantsikta yarpärishun
• ¿Imanirtaq alläpa preciso reunionkunaqa?
• ¿Imanirtaq ‘creyicoq mayintsicpaq mas probechoso canman’ reunionkunachö comentanqantsik?
• ¿Jesus qateqninkunawan reunionta ruranqampita imatataq yachakuntsik?
[Yachakunapaq kaqpa tapukïninkuna]
[24 y 25 kaq päginakunachö recuadru y dibüjukuna]
REUNIONKUNA YANAPAMÄNAPAQ CHUNKA YANAPAKÏKUNA
Puntallapitana yachakï. Reunionkunachö yachakunapaq kaqta puntallapita wayichö yachakurqa, masmi yachakunki y shonqïkimampis masmi chanqa.
Reunionman imëpis ëwë. Reunionkunaman mana haqita ëwanqëkim wakinkunatapis yanapan.
Hörachö chäri. Manaraq reunión qallaptin tëkarnaqa, wakinwan juntom cantanki y qallanan oraciontapis wiyanki. Kë rurëkunaqa Jehoväta adorëmi.
Yachakunapaq kaq publicacionkunata apë. Bibliawan yachakunapaq kaq publicacionkuna makikichö kaptinqa, yachatsikayämunqantam qatinki, y tsëqa masmi yachakunki.
Ama huktaqa rurëtsu. Reunión höraqa ama celularnikipa mensäjenkunata leïtsu, tsëtaqa huk hörachö ruranëkipaq haqirï. Tsënöpam kikikipa rurënikikunata puntaman churëkankitsu.
Comentë. Atskaq comentayaptinqa wakinkunapis comentëta munariyanmi, y markäkïninkunapis masmi sinchiyan.
Ama alläpa atskataqa parlëtsu. Tsëmi, más atskaq comentayänampaq tiempo tinkunqa.
Ruranëkipaq niyäshunqëkita rurë. Yachatsikunapaq Diospa Escuëlanchö o Diospa Gobiernompita Yachatsikunapaq reunionchö imallachöpis yarqunëkipaq niyäshuptikiqa, alli ruranëkipaq puntallapitana preparakï, y manam puëdeshaqtsu nirqa haqiritsu.
Allim rurarqunki niri. Reunionchö comentaqkunata o imachöpis yarqoqkunata rurayämunqampita allim ruramurqunki niri.
Llapanwan reqinakï. Reunión manaraq qallariptin y ushariptin llapanta kuyakïwan saludar shumaq parlapäkïqa, alläpam kushitsikun y yanapakun.