¿Yanapankichu congregacionpi huñunakuy kallpanchaq kananpaq?

‘Huñunakuspaykichikqa [. . .] llapallantayá ruraychik iñiqkuna espiritupi wiñanankupaq.’ (1 COR. 14:26.)

1. Corintopi congregacionman punta cartasqanpa 14 capitulonpi nisqanman hina, ¿imapaqmi huñunakuyqa?

“¡MAYNA allin hinaspa kallpanchakuq huñunakuymi!” Yaqa llapanchikchá chaynata nirqanchik Salonpi huñunakuy tukuyta. Huñunakuykunaqa kallpanchawanchikmi. Manamá admirakunapaqchu, punta cristianokunapa tiemponpi hinam huñunakuyqa rurakun cristianokuna iñiyninkupi aswan allin kanankupaq. Chayna kasqanmantam Pablo qawachirqa Corintopi congregacionman punta cartasqanpi. 14 capitulopim achka kutita qawachin huñunakuypi rurakusqanqa iñiyninkupi ‘wawqe-panikuna wiñanankupaq’ kasqanta (leey 1 Corintios 14:3, 12, 26). *

2. a) ¿Imanasqataq huñunakuykunaqa kallpanchawanchik? b) ¿Ima tapukuytam contestasun?

² Yachanchikmi espiritunwan Dios yanapawaptinchik huñunakuykuna kallpanchawasqanchikta hinaspa yanapawasqanchiktapas.  Chaymi sapa kuti qallarinchik chuya espiritunwan Dios yanapawananchikpaq mañakuspa. Ichaqa yachanchikmi huñunakuy aswan allin kananpaq congregacionpi llapanchik yanapakuy atisqanchikta. ¿Imakunatam sapakama rurachwan Salonninchikpi sapa semana huñunakuyninchik, iñiyninchikpi haykapipas kallpanchawananchikpaq hinaspa yanapawananchikpaq?

3. ¿Imanasqam huñunakuyninchikkunaqa ancha allin?

³ Kay tapukuyta kutichinapaqmi, qawasun huñunakuyninchikkuna imayna kananmanta dirigiqkuna wakinta yuyarinankumanta. Chaynataq qawasun imaynatam congregacionpi llapallanchik yanapakuchwan lliw hamuqkuna kallpanchasqa kanankupaq. Kaymanta yachayqa ancha allinmi, huñunakuyninchik ancha respetanapaq kasqanrayku, chayman riywan chaypi rimariypas Jehová Dios yupaychasqanchikpa partenmi (Sal. 26:12; 111:1; Isa. 66:22, 23).

Bibliata estudianapaq huñunakuymi

4, 5. ¿Imapaqtaq Llaqta Cuidaq Revistamanta Estudioqa?

⁴ Lliwmi yanapachikuyta munanchik Llaqta Cuidaq Revistamanta Estudiowanqa. Chaypaqmi allinta entiendenanchik sapa semana chay huñunakuy imapaq kasqanmanta. Chaypaq yuyarisun Llaqta Cuidaq revistapi hinaspa estudianapaq yachachikuykuna imakunapi cambiasqanta.

⁵ Huñunakuypi estudianapaq kaq revistapa qaranpim kunanqa rikurin huk ancha allin dibujo (Ayacucho quechuapim qallariyninpi lloqsimurqa 15 de enero 2009 watapi). ¿Cuentata qokurqankichu? Allinta qaway hapisqayki revistapa qaranta. Torrepa urayninpim kachkan kichasqa huk Biblia, chaymi qawachin Llaqta Cuidaq Revistamanta Estudiota imanasqa rurasqanchikta: chayqa revistapa yanapakuyninwan Bibliata estudianapaqmi. Nehemiaspa tiemponpi hinam, sapa semana kay huñunakuypi Bibliamanta explicawanchik hinaspa entiendenapaq ima ninanta yachachiwanchik (Neh. 8:8; Isa. 54:13).

6. a) ¿Ima cambiom karqa Llaqta Cuidaq revistapi estudianapaq yachachikuyninkunapi? b) ¿Imatam rurananchik wakin textokunapa waqtanpi leey niq palabra rikurimuptin?

⁶ Puntata servichikunanchik libroqa Bibliam, chaymi Llaqta Cuidaq revistapi estudianapaq yachachikuykunapi huk cambio rurakurqa: kunanqa wakin textokunapa waqtanpim leey niq palabra rikurimun. Llapanchikmi kallpanchasqa kachkanchik huñunakuypi chay textokunata Biblianchikpi leenapaq (Hech. 17:11). ¿Imanasqa? Diospa consejonkunata Biblianchikpi qawaptinchikmi sonqonchikman astawan chayan (Heb. 4:12). Chaymi kay estudiota dirigiqqa, chay textokunata manaraq leekuchkaptin tiempota qonan tarinankupaq hinaspa Bibliankupi leenankupaqpas.

Aswan tiempom kachkan iñisqanchikmanta rimanapaq

7. ¿Imapaqmi kunanqa tiempo kachkan Llaqta Cuidaq Revistamanta Estudiopi?

⁷ Chay revistapi estudianapaq parrafonkunapas kunanqa menosllañam. Chaymi menos tiempopi leekuptin, aswan tiempo kachkan lliw rimananchikpaq. Kunanqa aswan achka iñiqmasinchikkunam atinmanku huñunakuypi rimariyta. Ejemplopaq, contestanmankum chaypi qellqasqa tarikuqmanta, ninmankutaq huk textota imayna kasukunamanta hinaspa Bibliapa nisqan kasukuy ancha allin kasqanmanta experienciatapas. Chaynataq tiempom kanan dibujokunamanta rimanapaq (leey Salmo 22:22 hinaspa 35:18).

8, 9. ¿Imatam ruranan Llaqta Cuidaq Revistamanta Estudiota dirigiq?

⁸ Chay tiempotam allinta servichikusun  huñunakuqkunapa rimasqanku pisilla kaptin hinaspa Llaqta Cuidaq Revistamanta Estudio dirigiqpas sapa kuti mana rimaptillan. ¿Imataq dirigiqta yanapanqa huñunakuqkunapa rimasqankuman faltasqallanta completananpaq, chaynapi huñunakuy lliwta kallpanchananpaq?

⁹ Kay tapukuyta kutichisun huk rikchanachiywan. Allin dirigisqa Llaqta Cuidaq Revistamanta Estudioqa tupanmanmi suma-sumaq ramo waytawan. Imaynam chay ramopiqa achkallaña waytakuna kanman, chaynam chay Estudiopipas achkallaña rimanku. Imaynam waytakunapas mana chaynallachu sayayninpiwan colorninpiqa, chaynam mana chaynallachu hayka hinaspa imayna rimasqankupas. ¿Imawantaq tupachichwan wakillanpi dirigiqpa rimasqanta? Wakillanpi rimasqanmi tupanman chay ramoman churasqanku kallmachakunaman, chaytaqa cuidadowanmi churanku aswan sumaq kananpaq manam chay parte aswan rikusqa kananpaqchu. Yachachiqqa kaytam yuyarinan: rimasqanqa manam iñiqkunapa rimasqankumanta aswan achkachu kanan, rimananqa yachachikuyta  completanallanpaqmi. Tukuy rikchaq rimarisqankuman allin hinaspa pisillata rimaspa dirigiq completaptinmi, huñunakuyqa suma-sumaqllaña kanqa hinaspa iñiqkunatapas kallpanchanqa.

“Ofrendata qochkaq hinayá” haykapipas rimasun

10. ¿Imaynatam punta cristianokuna huñunakuykunata qawarqaku?

¹⁰ Pablopa 1 Corintios 14:26-33 versiculokunapi nisqanmi, yanapawanchik punta pachak watapi huñunakuy imayna kasqanmanta astawan entiendenapaq. Bibliamanta ancha yachayniyoq runam chay textomanta nirqa: “Punta cristianokunapa huñunakuyninkupiqa lliwchá ancha favorecesqa hinaspa obligasqa tarikurqaku huñunakuy aswan allin kananpaq imallatapas ruranankupaq. Manam pipas riqchu uyarinallanpaqqa, aswanqa chaskinanpaq hinaspa qonanpaqmi”. Punta cristianokunaqa yacharqakum iñisqankuta qawachinankupaq chay huñunakuykuna kasqanta (Rom. 10:10, NM).

11. a) ¿Imataq anchata yanapan huñunakuyninchikkuna kallpanchaq kananpaq, hinaspa imanasqa? b) ¿Imakunam yanapawasunchik huñunakuypi rimasqanchik aswan allin kananpaq? (Qawariy willakuyta.)

¹¹ Iñiyninchikta huñunakuypi qawachispanchikqa anchatam yanapanchik “wawqe-panikuna” iñiyninkupi wiñanankupaq. Hayka wataña huñunakuykunaman rispanchikpas iñiqmasinchikkunapa rimasqankuta uyarispam hinalla kusikunchik. Kusichiwanchikmi yuyaq cristianapa tapukuyta kutichisqan, kallpanchawanchiktaq kuyakuq ancianopa yachaywan rimarisqan hinaspa asiypas venceykuwanchikmi huk warmacha imam kaqta rimarispan Diosta ancha kuyasqanta qawachiptin. Rimarispanchikqa llapallanchikmi yanapanchik huñunakuyninchik kallpanchaq kananpaq. *

12. a) ¿Imatam yachanchik Moisespa hinaspa Jeremiaspa ejemplonkumanta? b) ¿Imaynatam mañakuyqa yanapawanchik huñunakuypi rimananchikpaq?

¹² Penqakuqkunapaqqa ancha sasam kanman huñunakuypi rimariyqa. Chayna pasasuptikiqa yuyariy, manam qamllatachu chayqa pasasunki. Diosta kasukuq Moiseswan Jeremiaspas reqsikurqakum runakunapa qayllanpi rimayta manchakusqankuta (Exo. 4:10; Jer. 1:6). Imaynam paykunata Dios yanaparqa hukkunapa qayllanpi rimanankupaq, chaynam yanapasunki rimaspa alabanaykipaq (leey Hebreos 13:15). ¿Imatam rurawaq Diospa yanapayninwan mana manchakuspa rimanaykipaq? Puntataqa huñunakuypaq allinta preparakuy. Chaymanta, manaraq Huñunakunanchik Salonman richkaspa Diosta mañakuy kallpata qosuptiki rimarinaykipaq (Fili. 4:6). “Paypa munasqanman hina” mañakusqayki kasqanraykum, seguro kawaq uyarisunaykimanta (1 Juan 5:14; Pro. 15:29).

Huñunakuymi wiñachiwanchik, kallpanchawanchik hinaspa consuelawanchik

13. a) ¿Imaynam tarikunanku huñunakuypi kaqkunaqa? b) ¿Ima allin tapukuytam ancianokunaqa rurakunanku?

¹³ Pablom willawanchik huñunakuykunaqa hamuqkunata wiñachiq, kallpanchaq  hinaspa consuelaq kasqanta (1 Cor. 14:3). * ¿Imaynatam ancianokuna seguro kanmanku rimasqankuwan iñiqmasinkuta kallpanchasqankumantawan consuelasqankumanta? Kaymanta yachanapaqmi allin kanqa Jesuspa kawsarimusqan qepallata huñunakuy rurasqanmanta yachay.

14. a) ¿Imakunam pasarqa huñunakuyman Jesus manaraq invitachkaptin? b) ¿Imanasqataq apostolkunaqa kusikurqaku paykunaman Jesus “asuykuspan” rimapayaptin?

¹⁴ Puntataqa piensay chay huñunakuy manaraq apakuchkaptin imakuna pasasqanpi. Jesusta manaraq wañuchichkaptinkum apostolkunaqa “sapallanta saqeruspa ayqekurqaku” hinaspa Bibliapa willakusqanman hina wasinkuman ‘sapakama cheqerurqaku’ (Mar. 14:50; Juan 16:32). Wañukusqanmanta kawsarimuspanmi, hukmanyasqa apostolninkunata Jesusqa ancha allin huñunakuyman invitarqa. * Chaymi 11 “discipulonkuna rirqaku Jesuspa kamachisqan Galilea lawpi moqoman”. Chayaruptinkum ‘Jesusqa paykunaman asuykuspan’ rimapayarqa (Mat. 28:10, 16, 18). ¡Maynatachá kusikurqaku paykunata Jesus rimapayayta qallaykuptinqa! ¿Imamantam Yachachiqninku rimarqa?

15. a) ¿Imatam Jesusqa huñunakusqankupi nirqa, hinaspa imatam mana rurarqachu? b) ¿Imaynam chay huñunakuywanqa apostolkuna tarikurqaku?

¹⁵ Jesusmi qatiqninkunawan rimayta qallarirqa kaynata nispan: “Diosmi qowarqa tukuy atiyta”. Hinaspanmi kamachirqa: “Llapallan nacionpi runakunaman rispayá willamuychik qatiqniykunaña kanankupaq”, nispa. Tukuyninpim kuyakuywan kaynata nirqa: “Sapa punchawmi ñoqaqa qamkunawan kasaq”, nispa (Mat. 28:18-20). ¿Cuentata qokurqankichu Jesuspa imata mana rurasqanmanta? Qatiqninkunataqa manam qaqcharqachu. Manataq nirqachu imanasqa chay rurasqankumanta nitaq iñiyninkupi huk tiempo hukmanyasqa kasqankumantapas. Ichaqa Taytanwan kuska kuyasqankutam qawachirqa huk llamkayta ruranankupaq kamachispan. ¿Imaynam apostolkuna chayna nisqanwan tarikurqaku? Paykunaqa wiñachisqa, kallpanchasqa hinaspa consuelasqam karqaku, chaymi chay huñunakusqanku qepallata kaqmanta allin noticiamanta ‘willakurqaku’ hinaspa ‘yachachirqaku’ (Hech. 5:42).

16. ¿Imatam ancianokunaqa Jesusta qatipakuspanku rurananku huñunakuykuna kallpanchaq kananpaq?

¹⁶ Ancianokunam kunanpas Jesusta qatipakuspanku, iñiqmasinkunaman huñunakuykunapi qawachinku Diospa kuyakuyninmanta mana pipas rakinanta (Rom. 8:38, 39). Chaymi yachachispankuqa iñiqkunapa allin rurasqankumanta rimanku manam imapas pantasqankumantachu. Manataqmi imanasqa chayna rurasqankumantaqa ninkuchu. Aswanqa Jehová Dios kuyasqankutawan paypa munaynin ruray munasqankumantam qawachinku (1 Tes. 4:1, 9-12). Wakinpim ancianokunaqa congregacionta correginankupaq consejota qonanku kanqa, ichaqa huk-iskaylla consejana kaptinqa allinmi sapallankupi chay rurayqa (Gal. 6:1; 2 Tim. 2:24-26). Congregacionpi kaqkunata ancianokuna rimapayaspankuqa, kallpanchakunkum imapas allin kaqmanta alabanankupaq (Isa. 32:2). Chayna rurasqankuwanmi huñunakuy tukuyta chaypi tarikuqkunaqa kallpanchasqa hinaspa  consuelasqa kanku (Mat. 11:28; Hech. 15:32).

Hawkayayta tarinapaqmi

17. a) ¿Imanasqam kunan ima tiempomantapas aswan kallpanchakunanchik huñunakuyninchikkuna hawkayay qoq kananpaq? b) ¿Imatam rurawaq huñunakuykuna kallpanchaq kananpaq? (Qawariy kayna niq recuadrota “Huñunakuykuna lliwta kallpanchananpaq chunka ruraykuna”.)

¹⁷ Satanaspa munaychakusqan aswan mana allin kaptinmi, kallpanchakunanchik huñunakuyninchikpi hawkayaytawan consuelota llapallanku tarinankupaq (1 Tes. 5:11). Qosanwan kuska hatun sasachakuyta pasaq huk cristianam yuyarispan nin: “Huñunakunanchik Salonpim iñiqmasinchikkunawan kaspayku cuentata qokurqaniku Diospa kuyakuywan cuidawasqankutawan preocupasqa kasqaykuta Diosman qonaykumanta, chaymi hawkayachiwaqku”, nispa (Sal. 55:22). Munanchikmi chayna kallpanchasqa hinaspa consuelasqa huñunakuyman lliw hamuqkuna tarikunankuta. Huñunakuyninchik chayna kallpanchaq kananpaqqa lliwmi yanapakunanchik.

[Willakuykuna]

¿Imatam niwaq?

• ¿Mayna allintaq huñunakuyninchikkunaqa?

• ¿Imanasqam huñunakuypi rimarisqanchikkuna cristianokunapa iñiyninta ‘wiñachin’?

• ¿Imatam yachachwan qatiqninkunawan Jesuspa huñunakuy rurasqanmanta?

[Kay yachachikuypa tapukuyninkuna]

[22 hinaspa 23 kaq paginakunapi dibujokuna hinaspa recuadro]

HUÑUNAKUYKUNA LLIWTA KALLPANCHANANPAQ CHUNKA RURAYKUNA

Ñawpaqmantaraq preparakuy. Salonpi estudiananchik qellqanchikkunata wasikipi estudiaptikiqa, huñunakuykunam qampaq aswan allin kanqa hinaspa manam chayllaqa qonqankichu.

Ama faltakuychu. Huñunakuyman achka riptinkuqa lliwmi kallpanchasqa tarikunku, risqaykiqa ancha allinmi.

Ama tardeyaychu. Huñunakuy manaraq qallarichkaptin tiyanaykipiña kaspaqa atinkim hukkunawan qallariyninpi takiyta hinaspa mañakuytapas, chaykunata rurayqa Jehová Dios yupaychasqanchikpa partenmi.

Huñunakuypi servichikuna qellqakunata apay. Bibliayki hinaspa chay huñunakuypaq qellqaykikuna kaptinqa, atinkim yachachimusqanta kikiki qawayta chaynataq aswan allin entiendeyta.

Atiendey. Huñunakuypiqa ama leeychu celularnikiman chayamuq willakuykunataqa. Huk tiempopi chaytaqa leey. Chaynapim yachanki kikikipa kaqkunata haykapi rurayta.

Rimariy. Iñisqankuta qawachinankupaq achka rimaptinkuqa, aswan achkam kallpanchasqa hinaspa consuelasqa tarikunku.

Pisillata rimay. Chaynapim achka rimanqaku.

Ruranaykiwan cumpliy. Diosmanta Yachachinapaq Escuelapaq discursota otaq demostracionta ruranaykipaq nisuptiki chaynataq Diosta Servinapaq Huñunakuypaq qosuptikipas allinta preparakuy, ensayay hinaspa kallpanchakuy cumplinaykipaq.

Alabay rimaqkunata. Yachachiqkunata, demostracion ruraqkunata hinaspa rimariqkunata niy agradecesqa kasqaykita.

Hamuqkunawan rimay. Huñunakuy manaraq qallarichkaptin chaynataq tukuruptin kuyakuywan saludasqanchikwan kallpanchaq kaqkunamanta rimasqanchikmi astawan kusichiwanchik hinaspa yanapawanchik.