E Tu Akamaroiroi Toou i te Au Uipaanga Kerititiano?

“Kia putuputu kotou ra . . . E rave i te au mea katoa kia tupu te meitaki.”—1 KORI. 14:26.

1. Kia tau kia 1 Korinetia pene 14, eaa te akakoroanga puapinga no te au uipaanga Kerititiano?

‘E UIPAANGA akamaroiroi anga tikai tera!’ I tuatua akapera ana ainei koe i muri ake i te aere anga ki te uipaanga i te Are Uipaanga Patireia? Kare ekoko e kua pera ana koe! Kare i te mea poitirere e e akamatutu anga tikai te au uipaanga putuputuanga. Mei te tuatau rai o te au Kerititiano mua, te akakoroanga puapinga no ta tatou au uipaanga i teia tuatau, te akaketaketa anga i te katoatoa i te pae vaerua, tei tae mai. Akara e akapeea te apotetoro ko Paulo te akataka anga i te akakoroanga tikai no te au uipaanga Kerititiano i roto i tana reta mua ki to Korinetia. I te pene 14, kua taiku putuputu aia i te au tuanga tataki tai kia aiteite te akakoronga te ka orongaia i te au uipaanga putuputuanga​—“kia tupu te meitaki i te ekalesia,” me kore ei akamaroiroi anga i te putuputuanga.​—E tatau ia 1 Korinetia 14:3, 12, 26. *

2. (a) Eaa te ka tupu no te au uipaanga akamaroiroi anga? (e) Eaa te uianga ka akamanako tatou?

² Kua kite tatou e kua tupu te au uipaanga akamaroiroi anga no te akakeuanga a te vaerua  o te Atua. No reira, ka akamata tatou i te au uipaanga putuputuanga na te pure ngakau tae anga kia Iehova te patianga ki to tatou Metua i te rangi kia akameitaki mai i ta tatou uipaanga na roto i tona vaerua tapu. Kua kite ra tatou e ka rauka i te au mema putuputuanga kia akariro i te au porokaramu uipaanga ei akamaroiroi anga. Eaa tetai au takainga ka rave tatou kia papu e te akaaereia ra te uipaanga i te au epeptoma i te Are Uipaanga Patireia ma te oraora e te akamatutu anga i te pae vaerua?

3. Mei teaa ra te puapinga o te au uipaanga Kerititiano?

³ Te pauanga, ka akara meitaki tatou i tetai au tuanga o ta tatou au uipaanga kia akamaara te aronga e akaaere ra i te apii. Ka akamanako katoa tatou e akapeea te putuputuanga katoa te akariro anga kia oraora te au uipaanga no te katoatoa tei tae mai. E tumu manako maata teia kia tatou, no te mea e au akaputuputuanga tapu ta tatou au uipaanga. Tika rai, e au tuanga puapinga te aere anga e te piri anga ki roto i te au uipaanga no ta tatou akamorianga ia Iehova.​—Sala. 26:12; 111:1; Isa. 66:22, 23.

Uipaanga no te Apiianga i te Pipiria

4, 5. Eaa te akakoroanga o te Apii Punanga Tiaki?

⁴ Ka inangaro tatou katoatoa kia puapinga tikaiia mei ta tatou Apii Punanga Tiaki o te epetoma. No reira, kia marama meitaki i te akakoroanga maata o taua uipaanga ra, ka akamanako akaou tatou i tetai o te au tauianga tei raveia no te makatini Te Punanga Tiaki e te au atikara apii.

⁵ Akamataanga mei te tuanga apii mua o Te Punanga Tiaki o te itiu o Tianuare 15, 2008, kua kapitiia atu tetai akakiteanga puapinga i te kapi mua. Kite ana ainei koe i te reira? Akara meitaki i te kapi mua o te makatini e mou ra koe. I raro mai i te punanga, ka kite koe i te Pipiria e tuera ra. Ko taua tuanga tei kapitiia mai te akakite maira i te tumu i rauka ai ia tatou te Apii Punanga Tiaki. Kia apii i te Pipiria ma te tauturu a teia makatini. Ae, i ko i ta tatou Apii Punanga Tiaki o te epetoma kua riro te Tuatua a te Atua ei “akakite i te ariteanga,” e mei te tuatau rai o Nehemia i taito, kua “kite akera ratou i tei tatauia ra.”​—Nehe. 8:8; Isa. 54:13.

6. (a) Eaa te tauianga tei raveia no te Apii Punanga Tiaki? (e) Eaa te ka tau i te akamanako no runga i te au irava “e tatau ia”?

⁶ I te mea e ko te Pipiria ta tatou puka apii tikai, kua raveia tetai tauianga no te Apii Punanga Tiaki. Kua akatakaia tetai au irava o te au atikara apii, “e tatau ia.” Te akamaroiroiia nei tatou kia aru i te tatau anga o teia au irava i te tuatau o te uipaanga, te akara anga ki roto i ta tatou uaorai Pipiria. (Anga. 17:11) No teaa ra? Me kite tatou i te akoanga a te Atua i roto i ta tatou uaorai Pipiria, ka akakeu maata te reira ia tatou. (Ebe. 4:12) No reira, i mua ake ka tatau maataia ai taua au irava ra, ka tau te taeake akaaere o te uipaanga kia oronga i tetai taime no te katoatoa kia akara i teia au irava e kia aru me tatauia.

Maata te Taime i te Akakite i to Tatou Akarongo

7. Eaa te ka rauka ia tatou i te tuatau o te Apii Punanga Tiaki?

⁷ Tetai tauianga ke no te au atikara apii Punanga Tiaki ko te roa o te atikara. Te au mataiti i topa, kua poto mai te au atikara. No reira, te tuatau o te Apii Punanga Tiaki, kua iti mai te taime tatau i te au parakarapa e e maata atu te taime no te paupau anga. Teianei, e maata i roto i te putuputuanga ka rauka i te akakite i to ratou akarongo na te paupau anga i te uianga i neneiia, te taangaanga anga i te irava, e te akakite anga i tetai tupuanga poto ua te akaari maira i te tu pakari no te aru anga i te au kaveinga Pipiria, me kore na roto i tetai au mataara ke. Akapou katoa i tetai taime no te uriuri anga i te au tutu.​—E tatau ia Salamo 22:22; 35:18; 40:9.

8, 9. Eaa te tuanga a te taeake akaaere o te Apii Punanga Tiaki?

⁸ Inara, ka rauka taua au taime va ra no te oronga i te au pauanga tukeke, me akapoto  mai te aronga paupau i te pauanga e me kare te taeake akaaere o te uipaanga e pau putuputu mai i te tuatau o te Apii Punanga Tiaki. No reira, eaa te ka tauturu i te taeake akaaere kia akono tau i tana ka tuatua mai e ta te putuputuanga ka pau atu, kia riro te uipaanga ei akamaroiroi anga no te katoatoa?

⁹ Te pauanga, e akamanako i tetai akatutuanga. Te Apii Punanga Tiaki tei akaaere meitakiia, mei te ruru tiare rai e manea me akaraia atu. Mei te ruru tiare mamaata tei akamaneaia ki te au tiare tukeke, mei te reira rai te Apii Punanga Tiaki me maata te au paupau anga tukeke. Mei te au tiare tukeke te tu e te kara i roto i te ruru tiare, tukeke rai te tu e orongaia ra te au paupau anga i te tuatau o te uipaanga. Eaa te tuanga a te taeake akaaere? Tana au pauanga i tetai au taime mei tetai au rau matie tei monomono meitakiia ki roto i te ruru tiare. Kare ko te au raurau te mea maata atu; mari ra, tana angaanga ei akamanea e ei akaruru i te katoaanga. Mei te reira katoa, ka anoanoia te taeake akaaere kia akamaara i tana tuanga, kia kore e pau putuputu mai, inara kia akameitaki atu i te au tuatua akapaapaa anga e orongaia maira  e te putuputuanga. Ae, me maata te au pauanga tukeke a te putuputuanga, e tetai au tuatua tau a te taeake akaaere, me akanoo kapitiia ma te tu karape, ka riro ei au tuatua manea tikai te ka akamareka i te katoatoa.

‘Apai Tatou i te Atinga, i te Akameitaki i te Atua’

10. Eaa te manako o te au Kerititiano mua no te au uipaanga putuputuanga?

¹⁰ Ka tauturu ta Paulo akatakaanga no te au uipaanga Kerititiano i roto ia 1 Korinetia 14:26-33 ia tatou kia marama e akapeea taua au uipaanga te akaaereia anga i te anere mataiti mua. Te tuatua anga no runga i teia au irava, kua tata tetai tangata apii Pipiria e: “Tei matauia i te kite no runga i te angaanga a te Ekaretia mua, koia oki e aere mai ana te maataanga ma te manako e e tikaanga e e apainga tana kia oronga atu i tetai tauturu. Kare te tangata e aere mai ana ma te akakoroanga kia akarongo ua; kua aere mai aia kare kia rauka tana mari ra kia oronga atu.” Tika rai, kua manako te au Kerititiano mua i te au uipaanga putuputuanga ei au atianga no te akakite i to ratou akarongo.​—Roma 10:10.

11. (a) Eaa te tauturu maata ra i te akamaroiroi anga i te au uipaanga, e no teaa ra? (e) Eaa te au manako ka taangaangaia ei akameitaki mai i ta tatou au paupau anga i te au uipaanga? (Akara i te tataanga i raro ake.)

¹¹ Te akakiteanga i to tatou akarongo i te au uipaanga ka riro ei tauturu maata i te akamaroiroi anga i te putuputuanga. Papu ka ariki koe e noatu eaa te roa e aere ana tatou ki te au uipaanga, e mea mareka tikai i te akarongo ki te au paupau anga a te au taeake e te au tuaine. E akakeuia ana tatou e te pauanga ngakau tae a tetai taeake pakarikari akarongo mou; e akamaroiroiia ana tatou i te tu marama meitaki o tetai tangata pakari aroa; e ka katakata tatou me akarongo atu i tetai tamaiti e paupau ra i te akaari i te inangaro tikai no Iehova. Taka ua ra, e na te paupau anga, te piri katoatoa ra tatou i te akamaroiroi i te au uipaanga Kerititiano. *

12. (a) Eaa te apiianga ka rauka mai mei te akaraanga o Mose e Ieremia? (e) Eaa te tuanga angaanga a te pure no te paupau anga?

¹² E ngata tikai no te aronga akama i te paupau. Me ko toou tu ia, e mea meitaki i te akamaara e kare toou turanga i tuke. E tika rai, kua akakite tetai nga tavini akarongo mou o te Atua ko Mose e Ieremia i to raua tukatau kore i te tuatua i te ngai tangata. (Exo. 4:10; Iere. 1:6) Inara, mei ta Iehova rai i tauturu ana i te au tavini taito kia akapaapaa iaia i te ngai tangata, ka tauturu a Iehova ia koe kia oronga i te au atinga akapaapaa. (E tatau ia Ebera 13:15.) Akapeea e rauka ai ia koe ta Iehova tauturu kia autu i te mataku no te paupau anga? Mea mua, akapapa meitaki no te uipaanga. E oti, mua ake ka aere ei ki te Are Uipaanga Patireia, pure kia Iehova te pati tikai anga kia oronga mai i te tu mataku kore kia oronga i tetai pauanga. (Phili. 4:6) Te pati ra koe i tetai mea “i tau iaia ra,” no reira ka rauka ia koe te irinaki e ka pau mai a Iehova i taau pure.​—1 Ioa. 5:14; Mase. 15:29.

Au Uipaanga kia Akamaroiroi, ‘kia Akamatutu, e kia Akarekareka’

13. (a) Eaa te akakeuanga te ka tupu ki te aronga tei tae mai ki ta tatou uipaanga? (e) Eaa te uianga puapinga tikai ki te aronga pakari?

¹³ Kua akakite a Paulo i tetai akakoroanga puapinga no te au uipaanga putuputuanga,  kia akamaroiroi, ‘kia akamatutu, e kia akarekareka’ i te aronga tei tae mai. * (1 Kori. 14:3) Akapeea te aronga pakari Kerititiano i teia tuatau te akapapuanga te akamaroiroi ra e te akarekareka ra ta ratou tuanga o te uipaanga i to ratou au taeake e te au tuaine? Te pauanga, ka akamanako tatou i tetai uipaanga ta Iesu i rave i muri ua ake tona akatuia anga.

14. (a) Eaa te au tupuanga i mua ake i tetai uipaanga ta Iesu i akanoo? (e) Eaa te au apotetoro i mataora ai te ‘akavaitata mai anga a Iesu’ e kua tuatua atu kia ratou?

¹⁴ Mea mua, e akara i te au tupuanga i mua ake i taua uipaanga ra. I mua ua ake te tamateia anga a Iesu, “kua akaruke iora [te au apotetoro] katoa iaia, oro atura,” e mei tei totouia, kua ‘pueurikiriki ke atu ratou, te tangata ki tona uaorai kainga.’ (Mare. 14:50; Ioa. 16:32) I muri ake i tona akatuia anga, kua pati a Iesu i tana au apotetoro maromaroa kia tae atu ki tetai uipaanga puapinga tikai. * Te ariu mai anga, kua “aere atura te au pipi tino ngauru ma tai ra ki Galilea, i tetai maunga ta Iesu i tuatua mai kia ratou.” Te tae anga ratou “kua akavaitata mairā Iesu” e kua tuatua atu kia ratou. (Mata. 28:10, 16, 18) Akamanako ana i te mataora o te au apotetoro te rave anga a Iesu i te takainga mua! Eaa ta Iesu i uriuri?

15. (a) Eaa te au tumu manako ta Iesu i uriuri kia ratou, eaa ra tana kare i uriuri? (e) Akapeea taua uipaanga te akakeu anga i te au apotetoro?

¹⁵ Kua akamata a Iesu na te akakiteanga e: ‘Ko te mana katoa, kua tukuia mai, tei iaku anake.’ E oti kua oronga aia i tetai angaanga na ratou: ‘Ka aere, e akariro i to te pa enua katoa ei pipi.’ I te openga iora, kua oronga aia i te akapapuanga aroa e: “Tei vaitata ua ra au ia kotou.” (Mata. 28:18-20) Te kite ra koe eaa ta Iesu kare i rave? Kare aia i ako ana i tana au apotetoro; kare katoa aia i taangaanga ana i taua uipaanga ei akaekoko i to ratou akakoroanga me kore te akamaata atu i to ratou manako kinokino na te taiku anga i to ratou akarongo paruparu poto ua. Mari ra, kua akapapu atu a Iesu i to raua aroa ko tona Metua kia ratou na te oronga anga tetai angaanga puapinga. Akapeea ta Iesu tuatua i te akakeuanga i te au apotetoro? Kua akamaroiroiia, akamatutuia, e kua akarekarekaia ratou, e i tetai taime i muri ake i taua uipaanga ra, kua ‘apii atu e kua tuatua’ akaou ratou i te tuatua meitaki.​—Anga. 5:42.

16. Akapeea te aronga pakari Kerititiano i teia tuatau me aru i te akaraanga o Iesu te akaaere anga i te au uipaanga kia riro ei akaoraora anga?

¹⁶ Te aru anga ia Iesu, e akamanako te aronga pakari i teia tuatau i te au uipaanga ei au atianga no te akapapu anga ki te au taeake i to Iehova aroa mou no tona iti tangata. (Roma 8:38, 39) No reira, i roto i ta ratou au tuanga no te uipaanga, e akara te aronga pakari i te maroiroi o te au taeake, kare i to ratou tu paruparu. Kare ratou e akaekoko i te au akakoroanga o to ratou taeake. Kareka ra, ka akaari mai ta ratou tuatua e te manako ra ratou i to ratou taeake ei aronga tataki tai e inangaro ra ia Iehova e te anoano ra i te rave i te mea tika. (1 Tesa. 4:1, 9-12) E tika rai, ka anoanoia te aronga pakari i tetai taime i te oronga i te akoanga ei akatikatika i te putuputuanga, inara me ko tetai pae ua kia akatikatikaia, e meitaki atu i te oronga i taua akoanga ko ratou ua e te aronga ka o mai. (Gala. 6:1; 2 Timo. 2:24-26) Me tuatua ki te putuputuanga katoa, e tauta te aronga pakari i te oronga i te akameitakianga i te au taime ka tau. (Isa. 32:2) E tauta ratou i te tuatua na roto i te tu e me oti te uipaanga kua oraora e kua mataora te katoatoa.​—Mata. 11:28; Anga. 15:32.

 Ngai Akapumaana Anga

17. (a) Eaa i puapinga maata ai kia riro ta tatou uipaanga ei ngai akapumaana anga? (e) Eaa taau ka rave kia riro te au uipaanga ei akamaroiroi anga? (Akara i te pia “Tai Ngauru Mataara kia Riro te Au Uipaanga ei Akamaroiroi Anga Noou e Tetai Ke.”)

¹⁷ I te ao o Satani e kino atura, ka anoanoia tatou kia akapapu e e ngai akapumaana anga ta tatou au akaputuputu anga Kerititiano no te katoatoa. (1 Tesa. 5:11) Kua maara i tetai tuaine e tana tane te akakoromakianga raua i tetai tumatetenga tetai au mataiti i topa: “Kua riro te tuatau i te Are Uipaanga Patireia mei te mea e te mou ra to Iehova nga rima aroa ia maua. I te au ora ia maua i reira, takapiniia e te au taeake e te au tuaine Kerititiano, kua kite maua e ka rauka ia maua i te tuku i ta maua apainga kia Iehova, e kua kite tikai maua i te tu ngakau maru.” (Sala. 55:22) Kia kite mai te katoatoa tei tae mai ki ta tatou uipaanga te akamatutuanga e te akarekarekaanga. Ei akapapu anga e ka tupu teia, e rave ua rai tatou i ta tatou tuanga kia riro te au uipaanga Kerititiano ei akamaroiroi anga.

[Au Tataanga Rikiriki i Raro]

Akapeea Koe me Pau?

• Mei teaa ra te puapinga o te au uipaanga Kerititiano?

• Eaa ra te au paupau anga i te au uipaanga i riro ei ei akamaroiroi anga i te putuputuanga?

• Eaa te apiianga ta tatou i kite mai mei tetai uipaanga ta Iesu i rave ma tana au pipi?

[Au Uianga Apii]

[Pia/​Au Tutu i te kapi 22, 23]

TAI NGAURU MATAARA KIA RIRO TE AU UIPAANGA EI AKAMAROIROI ANGA NOOU E TETAI KE

Akapapa vave. Me apii vave koe te ka uriuriia i te Are Uipaanga Patireia, ka mataora e ka akakeu maataia koe e te au uipaanga.

Aere putuputu. I te mea ka akamatutu meitakiia te katoatoa tei tae mai, ka riro toou tae anga ei mea puapinga.

Tae vave. Me te noo ra koe i mua ake ka akamata ai te porokaramu, ka piri atu koe ki te imene anga mua e te pure, e tuanga no ta tatou akamorianga ia Iehova.

Aere mai kia papa meitaki. Apai mai i taau Pipiria e te (au) puka ka taangaangaia i te tuatau o te uipaanga kia aru e kia mou meitaki ia koe te au mea ka uriuriia.

Kopae te au tamanamanata. Ei akaraanga, tatau i te au tuatua i runga i taau tereponi apaipai i muri ake, eiaa i te tuatau o te uipaanga. Na roto i taua tu, te tuku ra koe i taau uaorai angaanga ki tona ngai tau tikai.

Paupau. Me maata te ka paupau, e maata ka akamatutuia e ka akamaroiroiia e te au tuatua tukeke no te akarongo.

Kia poto taau paupau anga. E atianga teia no te maataanga kia paupau mai.

Rave i te au apainga. Ei aronga apiipii no te Apii Orometua Teokaratiki me kore te Uipaanga Tavini Anga, akapapa meitaki, apiipii vave, e e tauta pakari eiaa e akakore i taau au apainga.

Akameitaki atu i te au taeake. Akakite atu i toou rekareka no te tautaanga a te aronga e tuanga ta ratou me kore no te paupau i te uipaanga.

Taokotai atu. Ka riro te aravei e te pukapuka akamaroiroi anga i mua ake e i muri ake i te au uipaanga, ei akamaata atu i te mataora e te puapinga no te tae anga ki reira.