Sara si abungbi ti congrégation akpengba zo

“Na ngoi so ala bungbi, . . . zia ala sara aye so kue ti kpengba mba ti ala.”​—1 ACOR. 14:26.

1. Tongana ti so a fa na 1 aCorinthien chapitre 14, nda ti abungbi ti congrégation ayeke ti sara nyen?

 ‘SO TÂ pendere bungbi!’ A si na mo awe ti tene mara ti tënë tongaso na peko ti mbeni bungbi so a sara na Da ti Royaume? Peut-être a si na mo awe! Biani, bê ti e adö pëpe ti bâ so abungbi ti congrégation ayeke dë bê ti zo. Legeoko tongana ti ngoi ti akozo Chrétien, nda ti abungbi so e yeke sara laso ayeke ti kpengba na lege ti yingo azo kue so aga na bungbi ni. Na ya ti kozo mbeti so Paul atokua na aChrétien ti Corinthe, lo luti mingi na ndo ti ndani so e yeke sara abungbi. Na yâ ti chapitre 14 ni lo tene fani mingi so nda ti ambage nde nde ti bungbi ti congrégation ayeke gi oko. A yeke “ti kpengba congrégation.”​—Diko 1 aCorinthien 14:3, 12, 26. *

2. (a) Nyen la asara si abungbi ti congrégation ayeke kpengba zo? (b) Hundango tënë wa e yeke gbu li na ndo ni?

² E hinga so a yeke kozoni kue yingo ti Nzapa la asara si abungbi ti e akpengba zo. Ni la, lakue e yeke to nda ti abungbi ti congrégation na lege ti mbeni sambela so na yâ ni e yeke hunda Babâ ti e ti yayu Jéhovah ti iri tënë nzoni na ndo ti bungbi ni na lege ti yingo vulu ti lo. Me, e hinga so zo oko oko na yâ ti congrégation alingbi ti sara si bungbi ti congrégation akpengba zo. Tongaso, ambeni ye wa zo oko oko alingbi ti sara ti tene abungbi so e yeke sara yenga na yenga na Da ti Royaume aduti lakue mbeni ye so adë bê nga amû ngangu na zo na lege ti yingo?

3. Abungbi ti e ayeke biani kota ye?

³ Ti wara kiringo tënë ni, e yeke bâ ambeni ye so e yeke sara ka na ngoi ti abungbi ti e na so a lingbi azo so ayeke mû li ni agirisa ni pëpe. E yeke bâ nga tongana nyen azo kue na yâ ti congrégation alingbi ti sara si abungbi ti e akpengba azo kue so aga na bungbi ni. Tënë so ayeke kota mingi na lê ti e ngbanga ti so abungbi ti e ayeke ye so e yeke sara ni ti voro na Nzapa. Biani, ti gue na abungbi nga ti mû mbage dä ayeke ambeni kpengba ye so e yeke sara ti voro Jéhovah.​—Ps. 26:12; 111:1; És. 66:22, 23.

Bungbi so a zia na sese teti mandango Bible

4, 5. Nda ti bungbi ti Mandango Tour ti Ba Ndo ayeke nyen?

⁴ E kue e ye ti bâ nzoni mingi na lege ti bungbi  ti Mandango Tour ti Ba Ndo so e yeke sara ni yenga oko oko. Tongaso, ti hinga polele ndani so e yeke sara bungbi so, zia e kiri e dabe ti e na ndo ti ndani so e yeke manda Tour ti Ba Ndo nga na ambeni gbiango ye so andu a-article so e yeke manda.

⁵ Nda ti bungbi ti Mandango Tour ti Ba Ndo ayeke ti mû maboko na e ti manda Bible. Biani, na ngoi ti bungbi ti Mandango Tour ti Ba Ndo so e yeke sara yenga oko oko, a yeke “diko” Mbeti ti Nzapa, nga legeoko tongana ti ngoi ti Néhémie, a yeke “fa nda ni”.​—Néh. 8:8; És. 54:13.

6. (a) Gbiango ye wa a ga na ni na yâ ti Mandango Tour ti Ba Ndo? (b) Ti aversê so a sara na tere ni “diko”, a lingbi e hinga nyen na ndo ni?

⁶ Ndali ti so ayeke Bible la e yeke sara kusala na ni mingi, a ga na ambeni gbiango ye na yâ ti Mandango Tour ti Ba Ndo. Mingi ti aversê ti Bible so ayeke na yâ ti a-article ti mandango ni, a sara na tere ni “diko.” A wa e kue ti bâ aversê so na yâ ti Bible ti e wani tongana a yeke diko ni na ngoi ti bungbi ni (Kus. 17:11). Ngbanga ti nyen? Tongana e bâ wango ti Nzapa na yâ ti Bible ti e wani, a yeke ndu bê ti e mingi (aHéb. 4:12). Ni la, kozo si a diko mara ti aversê tongaso na kota go, a yeke nzoni ita so amû li ni azia ngoi na azo kue ti wara aversê ni na ti bâ ni legeoko na ngoi so a yeke diko ni.

A zia ngoi mingi na e ti fa tënë ti mabe ti e

7. Lege azi na e ti sara nyen na ngoi ti Mandango Tour ti Ba Ndo?

⁷ Mbeni gbiango ye nde ayeke nga dä so andu a-article ti mandango ni. Gbiango ye so andu yongo ti article ni. Na yâ ti angu so ahon ade ti ninga pëpe, a kiri na a-article ni nduru. Tongaso, na ngoi ti Mandango Tour ti Ba Ndo, a mû gi ngoi kete ndali ti dikongo aparagraphe, me a zia ngoi mingi ndali ti mungo acommentaire. Fadeso lege azi na azo mingi na yâ ti congrégation ti fa tënë ti mabe ti ala na gbele azo. Ala yeke sara ni na kiringo tënë na ahundango tënë so ayeke na gbe ti aparagraphe ni. Ala yeke fa tongana nyen ti sara ye alingbi na mbeni versê. Ala yeke fa na nduru tënë aye so asi so afa so a yeke na lege ti ndara ti sara ye alingbi na afango ye ti Bible wala tongana nyen ti sara kusala na afango ye ti Bible so na mbeni lege nde. A yeke nga nzoni ti mû mbeni ngoi ti sara tënë na ndo ti afoto.​—Diko Psaume 22:23; 35:18; 40:10.

8, 9. Kusala ti zo so ayeke mû li ni na Mandango Tour ti Ba Ndo ayeke ti sara nyen?

⁸ Ye oko, a yeke wara ngoi ti mû acommentaire nde nde tongaso gi tongana azo akiri tënë nduru nga zo so amû li ni na Mandango Tour ti Ba Ndo ni akpe ti sara tënë mingi. Me, nyen la alingbi ti mû maboko na ita so ayeke mû li ni ti bâ si acommentaire ti lo ahon ti aita ni pëpe tongaso si bungbi ni akpengba azo kue?

⁹ Ti wara kiringo tënë ni, zia e bâ mbeni tapande. Mandango Tour ti Ba Ndo so a sara ni nzoni ayeke tongana mbeni ndo so a lu apendere fleur dä. Legeoko tongana ti so a yeke wara afleur nde nde na ndo ni, na ngoi ti Mandango Tour ti Ba Ndo a yeke wara acommentaire nde nde. Nga tongana ti so konongo ti afleur ni nga na nzoroko ti ala ayeke nde nde, yongo ti acommentaire nga na lege so a tene na ni ayeke nde nde. Me zo so amû li ni na ngoi ti mandango ye ni, kusala ti lo ayeke so wa? Acommentaire so lo yeke mû ngoi na ngoi ayeke tongana akete kugbe so asigigi na popo ti afleur ni. Akugbe ni so ayeke mingi pëpe, me ala sara si ndo ni kue aduti pendere na afleur ni. Legeoko nga, a lingbi zo so amû li ni ahinga so kusala ti lo ayeke ti sara tënë ahon ndo ni pëpe, me lo yeke sara si acommentaire so aita amû ti gonda Jéhovah abungbi aga oko. Biani, tongana a bungbi oko acommentaire nde nde so aita amû nga na akete commentaire ti zo so amû li ni, acommentaire ni kue ayeke kpa mbeni pendere ndo so a lu afleur dä.

 “Zia e mû lakue na Nzapa sandaga ti gonda”

10. Akozo Chrétien abâ lani abungbi ti congrégation tongana nyen?

¹⁰ Tënë so Paul atene na ndo ti abungbi so aChrétien ayeke sara so a yeke wara ni na 1 aCorinthien 14:26-33 amû lege na e ti hinga tongana nyen akozo Chrétien ayeke sara ândö abungbi ti ala. Mbeni wandara ti Bible atene so mbeni ye so ayeke bâ lani polele na ngoi ti abungbi ti akozo Chrétien ayeke so “mingi ti azo ni ahinga so ala yeke na pasa nga a yeke ti ala ti sara mbeni ye ndali ti bungbi ni. Koli ayeke ga na bungbi gi ti duti ti mä tënë pëpe; lo ga ti wara gi ye pëpe me ti mû ye.” Biani, akozo Chrétien abâ lani abungbi ti congrégation tongana mbeni lege so azi na ala ti fa tënë ti mabe ti ala.​—aRom. 10:10.

11. (a) Nyen la ayeke mû maboko mingi ti tene abungbi ti congrégation akpengba zo? Ngbanga ti nyen? (b) Ti tene acommentaire ti e aga nzoni na ngoi ti abungbi, a lingbi e sara ye alingbi na awango wa? (Bâ kete tënë na gbe ni.)

¹¹ Ti fa tënë ti mabe ti e na ngoi ti abungbi ayeke “kpengba congrégation” mingi. Atâa e yeke gue na abungbi asara ngu oke awe, a  nzere lakue na e ti mä acommentaire ti aita ti e. Tongana mbeni mbakoro wala mbeni ita ti e so ayeke be-ta-zo amû mbeni commentaire so alondo na bê ti lo, a yeke ndu bê ti e mingi. Tongana mbeni ancien so abi bê ti lo na e amû na e mbeni wango ti ndara, e yeke yapu. Nga tere ti e anzere na ngoi so mbeni molenge amû commentaire na bê ti lo wani so afa so lo ndoye Jéhovah na bê ti lo kue. A yeke polele so na mungo acommentaire, e kue e yeke sara si abungbi ti congrégation akpengba zo. *

12. (a) Tapande ti Moïse na Jérémie afa na e nyen? (b) Sambela ayeke mû maboko na e tongana nyen ti mû acommentaire?

¹² Me ti azo so ayeke sara ka kamene mingi, a lingbi ti duti ngangu na ala ti kiri tënë. Tongana mo kue mo yeke tongaso, ti hinga so gi mo oko la ye so asi na mo pëpe, a yeke mû maboko na mo mingi. Ti tâ tënë ni, même awakua be-ta-zo ti Nzapa tongana Moïse na Jérémie atene lani so ala lingbi pëpe ti sara tënë na gbele azo (Ex. 4:10; Jér. 1:6). Ye oko, legeoko tongana ti so Jéhovah amû lani maboko na awakua ti lo so ti sepela lo na gbele ti azo, lo yeke mû ande maboko na mo ti mû na lo sandaga ti gonda. (Diko aHébreu 13:15.) Mo lingbi ti sara nyen ti wara mungo maboko ti Jéhovah si mo hon ndo ti mbeto ti mungo commentaire? Kozoni kue, leke bungbi ni nzoni. Na pekoni, kozo ti tene mo gue na Da ti Royaume, hunda Jéhovah na yâ ti sambela ti sara si mo duti na mbeto pëpe ti mû commentaire (aPhil. 4:6). Teti so ye so mo hunda ‘ague oko na ye so bê ti Jéhovah aye,’ hinga so lo yeke kiri tënë na sambela ti mo.​—1 Jean 5:14; aProv. 15:29.

Abungbi so ndani ayeke ti ‘kpengba azo,

ti wa ala nga ti dë bê ti ala’

13. (a) A yeke nzoni abungbi ti e asara nyen na ndo ti azo so aga na bungbi ni? (b) Hundango tënë wa abâ mbilimbili a-ancien?

¹³ Paul atene so mbeni kota raison so ndali ni a yeke sara abungbi ti congrégation ayeke ti ‘kpengba azo, ti wa ala nga ti dë bê ti ala’ so aga na bungbi ni (1 aCor. 14:3). * Laso na ngoi ti abungbi, tongana nyen a-ancien alingbi ti hinga biani so ambage so ala yeke sara akpengba aita nga adë bê ti ala? Ti wara kiringo tënë ni, zia e bâ bungbi so Jésus amû li ni dä kete na pekoni so a zingo lo na kuâ.

14. (a) Aye wa asi kozoni na bungbi so Jésus asara lani? (b) Ngbanga ti nyen a yeke na lege ni lani ti tene bê ti abazengele ni adë na ngoi so “Jésus aga nduru na ala, lo sara tënë na ala”?

¹⁴ Kozoni, bâ aye so asi kozoni na bungbi ni. Kozoni si a fâ Jésus, abazengele ti lo “azia lo, ala kpe” tâ gi tongana ti so a fa kozoni awe, ala “kpe, zo oko oko na lege ti da ti lo”. (Marc 14:50; Jean 16:32). Me na pekoni so a zingo lo na kuâ, Jésus atene na abazengele ti lo so bê ti ala ayeke na vundu ti gue na mbeni kpengba bungbi. * Ti sara ye alingbi na ni, “adisciple bale-oko na oko ague na Galilée na ndo ti hoto so Jésus afa ni ti tene ala gue awara lo dä.” Na ngoi so ala si kâ, “Jésus aga  nduru na ala, lo sara tënë na ala”. (Mat. 28:10, 16, 18). Tara ti bâ tongana nyen bê ti abazengele ni adë na ngoi so Jésus amû li ni ti sara ye so! Jésus asara lisoro na ndo ti nyen?

15. (a) Na ngoi ti bungbi so Jésus asara na adisciple ti lo, lo sara tënë na ndo ti aye wa? Nyen la lo sara pëpe? (b) Bungbi so asara nyen na ndo ti abazengele ni?

¹⁵ Jésus ato nda ni lo tene: “A mû na mbi komandema kue.” Na pekoni lo mû na ala mbeni kusala lo tene: “Ala gue, ala sara si azo . . . aga adisciple.” Na nda ni, lo dë bê ti ala lo tene: “Mbi yeke na tere ti ala” lakue (Mat. 28:18-20). Me mbeni ye ayeke dä so Jésus asara ni pëpe. Lo suku na abazengele ti lo pëpe. Lo mû nga pëpe ngoi ti bungbi ni so ti kasa ala wala ti kiri ti zia vundu na ndo ti vundu so ala yeke na ni na sarango tënë na ndo ti mabe ti ala so awoko na mbeni ngoi. Me Jésus asara mbeni ye so afa so lo na Babâ ti lo aye ala mingi na lege so lo mû na ala mbeni kota kusala. Sarango ye ti Jésus na mbage ti abazengele ni andu bê ti ala tongana nyen? Ala wara ngangu nga bê ti ala adë, ye so asara si ngoi kete na peko ti bungbi so, ala kiri ala “fa ye” nga ala “fa nzoni tënë”.​—Kus. 5:42.

16. Tongana nyen laso a-ancien ayeke mû tapande ti Jésus tongana ala yeke mû li ni na ngoi ti abungbi so ndani ayeke ti dë bê ti zo?

¹⁶ Na tapande ti Jésus, laso a-ancien abâ abungbi tongana mbeni lege so azi na ala ti fa na aita ti ala so Jéhovah aye azo ti lo mingi (aRom. 8:38, 39). Tongaso, tongana a-ancien ayeke na diskur wala mbeni ye na ngoi ti abungbi, ala yeke gi ti kpengba aita ti ala, me ti luti na ndo ti awokongo ti ala pëpe. Ala yeke kasa aita ti ala pëpe. Me, atënë ti ala ayeke fa so ala bâ aita ti ala tongana azo so aye Jéhovah nga so aye ti sara ye so ayeke na lege ni (1 aThes. 4:1, 9-12). Biani, ngoi na ngoi a-ancien alingbi ti bâ so a yeke nzoni ti mû wango na aita ti congrégation kue. Me tongana tënë ni abâ gi mbeni kete wungo ti azo, a yeke nzoni ti iri gi azo ni so ti mû wango na ala (aGal. 6:1; 2 Tim. 2:24-26). Na ngoi so a-ancien ayeke sara tënë na aita ti congrégation ni kue, ala yeke gi kozoni kue ti gonda ala (És. 32:2). Ala yeke sara kue ti tene tënë na mbeni lege so ayeke sara si na nda ti bungbi ni, azo kue so aga bê ti ala adë na ala wara ngangu.​—Mat. 11:28; Kus. 15:32.

Abungbi ti e ayeke dë bê ti zo

17. (a) Ngbanga ti nyen a yeke kota ye mingi laso ti tene abungbi ti e aduti ye so ayeke dë bê ti zo? (b) Nyen la mo wani mo lingbi ti sara ti tene abungbi akpengba zo? (Bâ encadré “Aye bale-oko ti sara si abungbi akpengba mo nga na amba ti mo.”)

¹⁷ Teti so dunia ti Satan ayeke sara ngangu na ndo ti azo mingi ahon ti kozo, a lingbi e bâ si abungbi ti congrégation aduti mbeni ye so adë bê ti azo kue (1 aThes. 5:11). Mbeni ita wali so lo na koli ti lo atirika na mbeni ngangu kpale teti angu mingi atene: “Tongana e yeke na yâ ti Da ti Royaume, a yeke mo bâ mo tene e yeke na yâ ti maboko ti Jéhovah. Na yâ ti angbonga so e yeke kâ, na popo ti aita ti e, a yeke mo bâ mo tene e mû aye so ane e e zia na ndo ti Jéhovah na ye so asara si e yeke na siriri ti bê.” (Ps. 55:23). Zia si azo kue so aga na bungbi abâ so ala wara ngangu nga bê ti ala adë. Ti sara si azo kue awara ngangu nga na dengo bê, a yeke nzoni e oko oko kue e ngbâ lakue ti sara si abungbi ti congrégation akpengba zo.

[Akete tënë na gbe ni]

Mo yeke kiri tënë tongana nyen?

• Ngbanga ti nyen abungbi ti e ayeke biani kota ye?

• Na lege wa acommentaire so a mû na ngoi ti abungbi ayeke kpengba congrégation”?

• E manda nyen na lege ti bungbi so Jésus asara na adisciple ti lo?

[Ahundango tënë ti manda na ye]

[Encadré/​Afoto na lembeti 26]

AYE BALE-OKO TI SARA SI ABUNGBI AKPENGBA MO NGA NA AMBA TI MO

Leke tere ti mo kozoni. Tongana mo manda kozoni aye so a yeke sara tënë na ndo ni na Da ti Royaume, abungbi ni ayeke nzere na mo mingi nga ayeke sara ye mingi na ndo ti mo.

Gue lakue na bungbi. Teti so a wa azo kue ti gue lakue na abungbi, tongana mo gue ayeke sara aye mingi.

Si na l’heure. Tongana mo duti kozoni si bungbi ni ato nda ni, mo yeke bungbi oko na aita ti he bia na ti mä sambela ti tongo nda ni. A yeke ambeni ye so e yeke sara ni ti voro na Jéhovah.

Ga na aye so a yeke manda na ngoi ti bungbi ni. Ga na Bible ti mo nga na ambeti so a yeke sara kusala na ni ti tene mo bi lê dä na ngoi so a yeke sara tënë na ndo ni tongaso si mo gbu nda ti ye ni nzoni.

Zia si mbeni ye agboto lê ti mo pëpe. Na tapande, diko amessage ti téléphone na peko ti bungbi me na ngoi ti bungbi pëpe. Na sarango tongaso, mo yeke zia aye oko oko na place ti ala.

Mû commentaire. Tongana azo mingi amû commentaire, atënë nde nde so ala yeke tene ti fa mabe ti ala ayeke mû ngangu na azo mingi.

Mû anduru commentaire. Sarango tongaso ayeke mû lege na azo mingi ti mû nga acommentaire.

Sara akusala so a mû na mo. Tongana mo yeke élève na Ekole ti Kusala ti aChrétien wala mo yeke na mbeni mbage na Bungbi ti Kusala, leke tere ti mo nzoni, tara tere ti mo kozoni nga gi ti kpe devoir so a mû na mo pëpe.

Gonda azo so amû mbage na bungbi ni. Azo so amû mbage wala amû acommentaire na bungbi ni, gonda ala ndali ti ngangu so ala sara.

Gi ti sara songo na azo. Ti bara azo nga ti sara alisoro so akpengba zo kozo na bungbi nga na pekoni ayeke sara nga si tere ti azo anzere na a yeke mbeni ye ti nzoni so ala wara ndali ti so ala ga.