Yu e teki prati na den Kresten konmakandra so taki trawan kan kisi deki-ati?
Yu e teki prati na den Kresten konmakandra so taki trawan kan kisi deki-ati?
„Te unu e kon makandra, dan . . . meki ala sani feni presi na wan fasi di e gi trawan tranga.”—1 KOR. 14:26.
1. Soleki fa 1 Korentesma kapitel 14 e sori, dan san na wan prenspari marki fu den Kresten konmakandra?
’A KONMAKANDRA disi gi mi deki-ati trutru!’ Oiti yu taki so wan sani baka di yu komoto fu wan konmakandra na a Kownukondre zaal? A no de fu taki dati yu taki a sani dati. Den gemeente konmakandra e gi wi deki-ati trutru, ma dati no e fruwondru wi. Fu taki en leti, neleki fa a ben de na ini a ten fu den fosi Kresten, na so wan fu den prenspari marki fu den konmakandra fu wi na ini a ten disi, na fu tranga a bribi fu ala sma di e kon na den. Luku san na apostel Paulus ben taki fu a sani disi na ini a fosi brifi di a ben skrifi gi den Korentesma. Na ini kapitel 14, a e taki difrenti leisi dati ibri pisi fu a konmakandra musu abi a srefi marki, èn dati na fu „gi a gemeente tranga”.—Leisi 1 Korentesma 14:3, 12, 26. *
2. (a) Fa a du kon taki den konmakandra e gi wi deki-ati? (b) Na sortu aksi wi sa poti prakseri?
2 Wi e frustan taki te wi e kisi deki-ati na den konmakandra, dan na a fosi presi dati e kon fu di na a santa yeye fu Gado e tiri den konmakandra. Fu dati ede, na a bigin fu ibri konmakandra wan brada e begi nanga en heri ati, èn na ini a begi dati a e aksi wi hemel Tata, Yehovah, fu blesi a konmakandra fu wi nanga yepi fu en santa yeye. Ma wi sabi taki ibri memre fu a gemeente kan abi wan prati na den konmakandra, so taki ala sma kan kisi deki-ati. Sobun, san na wan tu sani di ibriwan fu wi kan du fu sorgu taki den alawiki konmakandra di e hori na ini a Kownukondre zaal e tranga wi bribi èn e gi wi deki-ati ala ten?
3. O prenspari den Kresten konmakandra de?
3 Fu kisi piki tapu na aksi dati, dan wi o luku wan tu sani di den wan di e teki fesi na a konmakandra musu hori na prakseri. Wi o luku tu fa a heri gemeente kan yepi fu sorgu taki ala den sma di de na den konmakandra e kisi deki-ati. A tori disi de tumusi prenspari gi wi fu di den konmakandra fu wi santa. A no de fu taki dati wi e go na den konmakandra èn wi e teki prati na den, fu di dati na prenspari pisi fu na anbegi fu wi.—Ps. 26:12; 111:1; Yes. 66:22, 23.
Wan konmakandra di seti fu studeri Bijbel
4, 5. San na a marki fu a Waktitoren-studie?
4 Wi alamala wani kisi wini dorodoro fu na alawiki Waktitoren-studie fu wi. Fu frustan krin san na a moro prenspari marki fu a konmakandra dati, dan meki wi luku wan tu fu den kenki di tyari kon na A Waktitoren èn na ini den studie-artikel.
5 Bigin nanga a fosi Waktitoren nanga studie-artikel fu 15 yanuari 2008, wan prenspari nyun sani poti na a fesisei kafti. Yu si a sani dati? Luku a fesisei kafti fu a tijdschrift di yu e hori na ini yu anu. Na ondrosei fu a toren yu o si wan Bijbel di opo. A nyun sani dati e sori krin fu san ede wi e hori a Waktitoren-studie. Na fu studeri Bijbel nanga yepi fu a tijdschrift disi. Iya, na a alawiki Waktitoren-studie fu wi, Gado Wortu e ’tyari kon na krin’, neleki fa dati ben e pasa na ini a ten fu Nehemia. Boiti dati, a Wortu disi e „fruklari” tu gi wi, so taki wi e kon sabi „san a wani taki”.—Neh. 8:8; Yes. 54:13.
6. (a) Sortu kenki tyari kon na ini a Waktitoren-studie? (b) San wi musu hori na prakseri te a abi fu du nanga den tekst pe a wortu „leisi” skrifi?
6 Fu di Bijbel na a moro prenspari buku di wi e gebroiki, meki wan kenki tyari kon na ini a Waktitoren-studie. Na wan tu Bijbeltekst na ini den studie-artikel, a wortu „leisi” skrifi. Te den Bijbeltekst disi e leisi na a konmakandra, dan wi alamala e kisi a deki-ati fu leisi den tu na ini wi eigi Bijbel (Tori. 17:11). Fu san ede? Te wi e leisi a rai fu Gado na ini wi eigi Bijbel, dan dati abi moro krakti na wi tapu (Hebr. 4:12). Fu dati ede, fosi wan sma bigin leisi den tekst disi gi a gemeente, dan a brada di e hori a Waktitoren-studie musu gi ala sma nofo ten fu suku den tekst, so taki den kan leisi den tu na ini den eigi Bijbel.
Wi abi moro ten fu sori taki wi abi bribi
7. Sortu okasi wi abi te a Waktitoren-studie e hori?
7 Ete wan kenki tyari kon na ini den studie-artikel fu A Waktitoren. Na ini den yari di pasa, den kon moro syatu. Sobun, fu di a no e teki so furu ten moro fu leisi den paragraaf na a Waktitoren-studie, meki wi abi moro ten fu gi piki. Now moro sma na ini a gemeente abi na okasi fu gi piki tapu aksi di skrifi na ini a studie-artikel, noso fu sori fa wan Bijbeltekst e fiti na ini a tori. Boiti dati, den kan fruteri wan syatu ondrofenitori di e sori fu san ede a de wan koni sani fu hori wisrefi na Bijbel gronprakseri, noso den kan gi piki na wan tra fasi. Na so den sma disi kan sori a bribi fu den. Den kan gebroiki pikinso ten tu fu taki fu den prenki na ini na artikel.—Leisi Psalm 22:23; 35:18; 40:10.
8, 9. Sortu frantwortu a brada di e hori a Waktitoren-studie abi?
8 Ma fu man abi moro ten so taki sma kan gi difrenti sortu piki, dan a de fanowdu taki wi e gi syatu piki èn taki a brada di e hori a Waktitoren-studie no e taki furu na a studie. Sobun, san kan yepi a brada disi fu hori a studie na so wan fasi taki ala sma e kisi deki-ati fu a konmakandra?
9 Fu piki na aksi disi, wi o luku wan agersitori. Wan Waktitoren-studie di e hori bun, de leki wan bosu bromki di moi srefisrefi. Neleki fa difrenti sortu bromki seti na ini a bosu, na so sma e gi furu difrenti sortu piki na a Waktitoren-studie. Boiti dati, son bromki pikin ma trawan fu den bigi, èn den alamala abi wan tra kloru. Na so a de tu taki son sma e gi syatu piki na den konmakandra, aladi trawan e gi langa piki. Boiti dati, ala sma e gi piki na wan tra fasi. Sortu frantwortu a brada di e hori a studie abi? Den wanwan leisi te a e taki wan sani fu a studie-artikel, de neleki den wanwan grun taki di seti na ini a bosu bromki. Aladi a bosu bromki disi no abi furu grun taki, toku den taki disi e yepi fu meki a bosu kon moi. Na so a de tu, taki a brada di e hori a studie musu hori na prakseri taki ensrefi no musu taki furu, ma a musu taki wan sani soso te dati fiti. Iya, neleki fa sma e prisiri fu si wan moi bosi bromki, na so a gemeente o prisiri fu den someni difrenti piki di sma e gi èn fu den wanwan sani di a brada e taki.
„Meki wi gi Gado wan srakti ofrandi fu prèise ala ten”
10. Fa den fosi Kresten ben e si den gemeente konmakandra?
10 Den sani di Paulus ben skrifi fu den Kresten konmakandra na 1 Korentesma 14:26-33, e meki wi kon sabi fa den konmakandra disi ben e hori na ini a fosi yarihondro. Wan Bijbel sabiman ben skrifi fu den vers disi: „Wan trutru moi sani fu a fasi fa den konmakandra ben e hori fosi, na taki pikinmoro ala sma di ben e kon na den konmakandra ben e si en leki wan grani nanga wan plekti fu teki prati na a konmakandra. Wan sma no ben e kon soso fu arki. A no ben kon tu soso fu kisi wini, ma fu gi trawan deki-ati.” Iya, den fosi Kresten ben e si den gemeente konmakandra leki okasi fu sori taki den ben abi bribi.—Rom. 10:10.
11. (a) San e meki taki sma e kisi deki-ati na den konmakandra, èn fu san ede dati de so? (b) Sortu rai kan yepi wi fu gi moro bun piki na den konmakandra? (Luku san skrifi na a marki na ondrosei fu a bladzijde.)
11 Te wi e sori taki wi abi bribi te wi de na den konmakandra, dan dati e „gi a gemeente tranga” trutru. A no de fu taki dati yu e agri taki awansi omeni yari wi e go na den konmakandra, toku ala ten a e gi wi prisiri trutru fu arki den piki di wi brada nanga sisa e gi. A e naki wi ati fu yere fa wan owru brada noso sisa e gi piki nanga en heri ati, èn wi e firi bun te wan lobi-ati owruman e taki wan moi sani di e gi wi deki-ati. Boiti dati, a e gi fu lafu te wi e yere a piki di wan pikin gi fu ensrefi, èn di e sori taki a lobi Yehovah trutru. Iya, te wi alamala e gi piki, dan wi e yepi fu sorgu taki trawan e kisi deki-ati na den Kresten konmakandra. *
12. (a) San wi kan leri fu na eksempre fu Moses nanga Yeremia? (b) Fa begi kan yepi wi fu gi piki na den konmakandra?
12 Ma son leisi a no makriki srefisrefi gi den wan di e syensyen fu gi piki na den konmakandra. Efu na so a de nanga yu, dan kande a sa de wan yepi te yu e hori na prakseri taki a no yu wawan abi a problema dati. Fu taki en leti, srefi Moses nanga Yeremia di ben e dini Yehovah nanga den heri ati, ben feni taki den no ben man taki bun na fesi sma (Ex. 4:10; Yer. 1:6). Ma neleki fa Yehovah ben yepi den owruten futuboi dati so taki den ben kan prèise en na fesi sma, na so A o yepi yu tu fu gi en srakti-ofrandi fu prèise. (Leisi Hebrewsma 13:15.) San yu kan du so taki Yehovah e yepi yu fu no frede fu gi piki na den konmakandra? A fosi sani di yu kan du, na fu sreka bun gi a konmakandra. Wan tra sani di yu kan du, na taki fosi yu go na a Kownukondre zaal, begi Yehovah èn aksi en fu gi yu deki-ati fu gi piki (Fil. 4:6). Fu di yu e aksi wan sani di e kruderi nanga „a wani fu en”, meki yu kan de seiker taki Yehovah o piki a begi fu yu.—1 Yoh. 5:14; Odo 15:29.
Konmakandra di e hori fu ’gi wi tranga, fu gi wi deki-ati, èn fu trowstu wi’
13. (a) Sortu krakti den konmakandra fu wi musu abi tapu den sma di de drape? (b) Sortu aksi prenspari spesrutu gi owruman?
13 Paulus ben taki dati wan prenspari marki fu den konmakandra na fu ’gi wi tranga, fu gi wi deki-ati, èn fu trowstu wi’ (1 Kor. 14:3). * Fa Kresten owruman na ini a ten disi kan sorgu taki den pisi di den e hori na den konmakandra, trutru e gi den brada nanga sisa fu den deki-ati èn e trowstu den? Fu piki na aksi dati, dan wi o luku wan konmakandra di Yesus ben hori syatu baka di a kisi wan opobaka.
14. (a) Sortu sani ben pasa bifo Yesus ben hori wan konmakandra nanga den apostel fu en? (b) Fu san ede den apostel ben musu fu breiti di ’Yesus kon moro krosibei, èn a taki nanga den’?
14 Luku fosi san ben pasa bifo a konmakandra dati ben hori. Syatu bifo sma ben kiri Yesus, den apostel ben „lon gowe libi en” èn soleki fa Bijbel ben taki na fesi, den ’alamala ben panya go na den eigi oso’ (Mark. 14:50; Yoh. 16:32). Baka di Yesus kisi wan opobaka, a gi den apostel fu en di ben e firi brokosaka, a kari fu kon na wan spesrutu konmakandra. * Den erfu disipel gi yesi na a kari dati, èn ’den go na Galilea na a bergi pe Yesus ben meki mofo nanga den’. Di den doro drape, dan ’Yesus kon moro krosibei, èn a taki nanga den’ (Mat. 28:10, 16, 18). Yu kan frustan taki den apostel ben musu fu breiti di Yesus fosi bigin taki nanga den! Fu sortu sani Yesus ben taki?
15. (a) Fu sortu sani Yesus ben taki, ma san a no du? (b) Sortu krakti a konmakandra dati ben abi tapu den apostel?
15 A fosi sani di Yesus taigi den na a sani disi: „Mi kisi ala makti na ini hemel èn na grontapu.” Baka dati a gi den a komando disi: ’Fu dati ede, go èn meki sma tron disipel.’ Leki lasti, a gi den a moi dyaranti disi: „Mi sa de nanga unu ala dei” (Mat. 28:18-20). Ma yu si san Yesus no ben du? A no ben piri-ai gi den apostel fu en, èn a no ben e teki a konmakandra dati leki wan okasi fu krutu den, noso fu meki den firi moro syen taki a bribi fu den ben swaki wan syatu pisi ten. Na presi fu dati, Yesus gi den wan prenspari wroko fu du, èn na so a gi den a dyaranti taki en nanga en Tata lobi den. Sortu krakti dati ben abi tapu den apostel? Den ben kisi so furu tranga, deki-ati, nanga trowstu taki syatu baka a konmakandra dati den ben e ’gi sma leri baka èn den ben e fruteri sma a bun nyunsu’.—Tori. 5:42.
16. Fa Kresten owruman na ini a ten disi e hori konmakandra di e gi trawan deki-ati, neleki fa Yesus ben e du dati?
16 Neleki Yesus, den owruman na ini a ten disi e si den konmakandra leki okasi fu gi den brada nanga sisa fu den a dyaranti taki Yehovah lobi a pipel fu en trutru (Rom. 8:38, 39). Fu dati ede, te den owruman e hori den pisi fu den na a konmakandra, dan den no e poti prakseri na den swakifasi fu den brada nanga sisa, ma den e poti prakseri na den bun fasi fu den. Den no e suku fu krutu den brada nanga sisa. Na presi fu dati, den sani di den e taki e sori taki den e si den Kresten brada nanga sisa leki sma di lobi Yehovah èn leki sma di wani du san bun (1 Tes. 4:1, 9-12). A no de fu taki dati son leisi a kan de fanowdu taki den owruman e gi a heri gemeente piri-ai, ma efu na wan tu sma nomo musu kenki a fasi fa den e tyari densrefi, dan a moro bun te den e taki aparti nanga den sma dati fu gi den a piri-ai di den musu kisi (Gal. 6:1; 2 Tim. 2:24-26). Te den owruman e taki nanga a heri gemeente, dan den e suku okasi fu prèise den sma te dati fiti (Yes. 32:2). Den e du muiti fu taki na so wan fasi taki na a kaba fu a konmakandra ala sma drape kisi krakti nanga deki-ati.—Mat. 11:28; Tori. 15:32.
Den konmakandra e trowstu wi
17. (a) Fu san ede a de moro prenspari now taki den konmakandra fu wi e trowstu wi? (b) San yu kan du fu sorgu taki den konmakandra e gi sma deki-ati? (Luku a faki „Tin sani di yu kan du fu sorgu taki den konmakandra e gi yu nanga trawan deki-ati”.)
17 Fu di a grontapu fu Satan e kwinsi wi moro nanga moro, meki wi musu sorgu taki den Kresten konmakandra e trowstu wi alamala (1 Tes. 5:11). Wan tu yari pasa, wan sisa nanga en masra ben kisi hebi tesi. Den e memre disi ete: „Te wi ben de na a Kownukondre zaal, dan wi ben e firi taki Yehovah ben e sorgu wi na wan lobi-ati fasi. Na den yuru di wi ben de drape, wi Kresten brada nanga sisa ben de na wi lontu, èn wi ben e firi taki wi ben man poti wi hebi na tapu Yehovah. A sani dati ben gi wi wan korostu firi” (Ps. 55:22). Meki a de so tu taki ala sma di e kon na den konmakandra fu wi e kisi deki-ati nanga trowstu. Fu sorgu taki a sani disi pasa, dan meki wi teki prati na den Kresten konmakandra so taki trawan kan kisi deki-ati.
[Futuwortu]
^ paragraaf 1 Bijbel ben taki na fesi dati son prenspari sani di ben e pasa na den Kresten konmakandra fu a fosi yarihondro, no ben o pasa moro. Fu eksempre, wi no e „taki na ini tra tongo” moro èn wi no e „taki profeititori” moro (1 Kor. 13:8; 14:5). Ma aladi dati de so, toku den rai fu Paulus e yepi wi fu frustan fa den Kresten konmakandra musu hori na ini a ten disi.
^ paragraaf 11 Efu yu wani sabi san yu kan du fu gi moro bun piki na den konmakandra, dan luku A Waktitoren fu 1 september 2003, bladzijde 19-22.
^ paragraaf 13 Te a abi fu du nanga a difrenti na mindri a wortu „deki-ati” nanga „trowstu”, dan wan wortubuku e taki dati a Griki wortu di vertaal nanga „trowstu” e sori taki te „wan sma e trowstu wan trawan, dan a e du dati nanga moro switifasi leki te a ben o gi a sma deki-ati nomo”.—Luku Yohanes 11:19; Vine’s Expository Dictionary of Old and New Testament Words.
^ paragraaf 14 Kande disi ben de na okasi di Paulus ben taki fu en bakaten, di a taki dati Yesus „sori ensrefi na moro leki feifi hondro brada”.—1 Kor. 15:6.
San yu ben sa piki?
• O prenspari den Kresten konmakandra de?
• Fu san ede den piki di sma e gi na den konmakandra e yepi fu „gi a gemeente tranga”?
• San wi kan leri fu a konmakandra di Yesus ben hori nanga den bakaman fu en?
[Aksi fu a tori disi]
[Faki/Prenki na tapu bladzijde 22, 23]
TIN SANI DI YU KAN DU FU SORGU TAKI DEN KONMAKANDRA E GI YU NANGA TRAWAN DEKI-ATI
Sreka na fesi. Te yu e studeri den sani na fesi di wi o taki fu den na a Kownukondre zaal, dan yu o poti moro prakseri na a konmakandra, èn a konmakandra o abi moro krakti na yu tapu.
Go doronomo. Fu di ala sma e kisi deki-ati te furu sma de na konmakandra, meki a bun te yu e tan go na den konmakandra.
Doro biten. Te e yu sidon kaba fosi a programa bigin, dan yu o man singi a fosi singi èn yu o man arki a fosi begi. Den sani disi na wan pisi fu na anbegi fu Yehovah.
Tyari den sani di yu abi fanowdu. Tyari yu Bijbel nanga den publikâsi di yu o abi fanowdu na a konmakandra, so taki yu kan leisi tu san e tyari kon na fesi èn so taki yu kan frustan den tori dati moro bun.
No meki sani puru yu prakseri. Fu eksempre, no leisi boskopu tapu yu cellulair te konmakandra e hori. Na so yu no e gi pasi taki den afersi fu yu e puru yu prakseri na a konmakandra.
Teki prati. Te moro sma e gi piki, dan moro sma e kisi deki-ati fu den difrenti fasi fa sma e sori taki den abi bribi.
Gi syatu piki. Na so fasi moro sma e kisi na okasi fu gi piki.
Hori den prati di yu kisi. Efu yu de tapu a Theokrasia Diniwroko-skoro, noso efu yu e teki prati na a Diniwroko Konmakandra, dan sreka bun, oefen na fesi, èn du tranga muiti fu hori a prati fu yu.
Prèise den sma di teki prati. Taigi den sma di ben abi wan prati na a konmakandra noso den wan di ben gi piki, taki trutru yu e warderi den muiti di den meki.
Abi demakandra nanga trawan. Taki trawan odi na wan switi fasi bifo èn baka den konmakandra, èn taki nanga den fu sani di e gi den deki-ati. Na so den sa prisiri fu de na den konmakandra, èn den sa kisi wini tu fu den.