Ita hola parte atu hametin malu iha reuniaun ka lae?
Ita hola parte atu hametin malu iha reuniaun ka lae?
“Wainhira imi halibur an hamutuk, . . . halo buat hotu neʼe atu harii.”—1 KOR 14:26.
1. Tuir 1 Korinto kapítulu 14, tanbasá mak reuniaun kristaun importante?
‘REUNIAUN neʼe halo haʼu sente laran-kmaan loos!’ Ita mós sente hanesan neʼe depois tuir tiha reuniaun iha Reuniaun-Fatin ka lae? Ami fiar katak ita mós sente ona hanesan neʼe! Sin, reuniaun kongregasaun nian mak buat ida neʼebé fó laran-manas ba ita hotu. Klaru katak hanesan iha tempu apóstolu sira, reuniaun kristaun mak fatin neʼebé ema hetan hanorin atu hametin sira-nia relasaun ho Maromak. Iha apóstolu Paulo nia karta primeiru ba ema kristaun iha Korintu, nia mós koʼalia kona-ba neʼe. Iha kapítulu 14, dala barak nia koʼalia katak parte ida-idak iha reuniaun kongregasaun nian bele ajuda atu “harii” ka hametin kongregasaun.—Lee 1 Korinto 14:3, 12, 26. *
2. (a) Saida mak ajuda sira neʼebé tuir reuniaun atu sente kmaan no hametin malu? (b) Ita sei koʼalia kona-ba pergunta saida?
2 Ita hatene katak ema sira neʼebé tuir reuniaun bele sente kmaan no hametin malu tanba Maromak haraik nia espíritu santu ba arranju neʼe. Tan neʼe, ita hahú reuniaun kongregasaun nian hodi halo orasaun ba Maromak Jeová, ita-nia Aman iha lalehan, hodi husu ho laran atu Maromak haraik bensaun ba ita-nia reuniaun liuhusi ninia espíritu santu. Maibé, ita mós hatene katak ema hotu iha kongregasaun laran bele hola parte hodi programa neʼebé halaʼo iha reuniaun bele hametin ita hotu. Entaun, saida deʼit mak ita ida-idak bele halo atu ita-nia reuniaun neʼebé halaʼo semana-semana iha Reuniaun-Fatin sempre fó kmaan no laran-manas mai ita?
3. Saida mak hatudu katak reuniaun kristaun importante?
3 Atu hatán pergunta neʼe, ita sei haree kona-ba parte balu husi ita-nia reuniaun sira, no saida mak irmaun sira neʼebé dirije reuniaun neʼe presiza hanoin-hetan. Ita mós sei koʼalia kona-ba oinsá mak ema hotu iha kongregasaun laran bele hola parte hodi reuniaun sai buat ida neʼebé bele harii ka hametin malu. Buat sira-neʼe mak informasaun neʼebé diʼak ba ita hotu atu hatene tanba ita-nia reuniaun mak tempu neʼebé santu. Loos duni, hodi tuir no hola parte iha reuniaun sira mak buat neʼebé importante iha ita-nia adorasaun ba Maromak Jeová.—Sal 26:12; 111:1; Isa 66:22, 23.
Reuniaun atu estuda Bíblia
4, 5. Tanbasá mak ita halaʼo reuniaun Estudu Livru Haklaken nian?
4 Ita hotu hakarak hetan buat diʼak husi Estudu Livru Haklaken neʼebé halaʼo semana-semana. Tan neʼe, atu komprende diʼak liután kona-ba tansá mak reuniaun ida-neʼe importante, mai ita hanoin kona-ba mudansa balu neʼebé ita hetan iha Livru Haklaken no lisaun sira neʼebé ita estuda.
5 Hahú husi 15 Janeiru 2008, Livru Haklaken neʼebé uza atu estuda, aumenta tan buat foun ida iha livru neʼe nia oin. Ita haree tiha ona ida-neʼe ka lae? Haree toʼok ba livru neʼebé ita kaer daudauk. Iha livru neʼe nia oin, iha pájina nia kraik ita bele haree Bíblia neʼebé nakloke hela. Buat foun neʼe hatudu kona-ba tansá mak ita halaʼo reuniaun atu estuda Livru Haklaken. Neʼe mak atu estuda Bíblia hodi uza livru neʼe. Sin, iha lisaun ida-idak neʼebé ita estuda semana-semana, esplika didiʼak kona-ba Bíblia. Ida-neʼe hanesan ho Neemias nia tempu, iha neʼebé amlulik sira “esplika didiʼak” Maromak nia Liafuan hodi halo povu sira komprende didiʼak “buat sira-neʼe katak sá”.—Neem 8:8; Isa 54:13.
6. (a) Mudansa saida mak ita hetan iha Estudu Livru Haklaken? (b) Saida mak ita presiza hanoin-hetan kona-ba eskritura neʼebé iha liafuan “lee”?
6 Tanba Bíblia mak livru neʼebé importante liu, tan neʼe iha mudansa ba estudu Livru Haklaken. Eskritura balu iha lisaun sira iha liafuan “lee”. Diʼak atu ita hotu haree tuir iha ita-nia Bíblia rasik kuandu ema ida lee eskritura sira-neʼe iha reuniaun. (Apos 17:11) Tanbasá? Kuandu ita haree Maromak nia konsellu iha ita-nia Bíblia rasik, ida-neʼe sei book makaʼas ita-nia laran. (Ebr 4:12) Tan neʼe, antes ema ida lee eskritura sira-neʼe ho lian makaʼas, irmaun neʼebé dirije reuniaun neʼe tenke fó tempu ba rona-naʼin atu sira buka-hetan eskritura hodi sira bele tuir.
Iha tempu barak liu atu hatudu sai ita-nia fiar
7. Ita iha oportunidade saida durante reuniaun Estudu Livru Haklaken nian?
7 Iha mudansa ida seluk ba lisaun sira iha ita-nia Livru Haklaken atu estuda. Agora lisaun sira badak liu tempu uluk. Nuneʼe, durante reuniaun Estudu Livru Haklaken nian, tempu neʼebé uza atu lee parágrafu sira sai badak liu no ida-neʼe fó tempu barak liu atu hatoʼo komentáriu. Agora ema barak liu iha oportunidade atu hatudu sai sira-nia fiar hodi hatán pergunta sira, hodi esplika oinsá mak ita bele uza eskritura sira iha ita-nia moris, hodi konta esperiénsia neʼebé badak kona-ba tansá mak matenek atu halo tuir Bíblia nia matadalan, ka kona-ba buat seluk tan. Diʼak mós atu uza tempu balu hodi koʼalia kona-ba dezeñu sira.—Lee Salmo 22:22; * 35:18; * 40:9. *
8, 9. Irmaun neʼebé dirije reuniaun Estudu Livru Haklaken nian iha knaar saida?
8 Maibé, atu ema hotu bele iha tempu atu fó komentáriu oioin, importante ba rona-naʼin atu fó komentáriu neʼebé badak no irmaun neʼebé dirije reuniaun neʼe la hatoʼo beibeik komentáriu durante Estudu Livru Haklaken nian. Tan neʼe, saida mak bele ajuda irmaun neʼebé dirije reuniaun neʼe atu tetu didiʼak ninia komentáriu no mós rona-naʼin sira-nian hodi nuneʼe reuniaun neʼe bele hametin ema hotu?
9 Atu hatán pergunta neʼe, hanoin toʼok kona-ba ai-knanoik tuirmai neʼe. Estudu Livru Haklaken neʼebé dirije ho didiʼak mak hanesan korrente husi fatuk-murak neʼebé haree kapás. Hanesan korrente tomak halo husi fatuk-murak oioin, nuneʼe mós ho komentáriu oioin iha Estudu Livru Haklaken nian. Hanesan fatuk-murak nia boot no kór la hanesan, nuneʼe mós komentáriu sira neʼebé hatoʼo iha reuniaun neʼe nia naruk no dalan atu hatoʼo la hanesan. Saida mak knaar husi irmaun neʼebé dirije estudu neʼe? Ninia komentáriu neʼebé nia hatoʼo dala ruma deʼit mak hanesan kabas neʼebé kesi metin fatuk-murak sira-neʼe hamutuk. Dala ruma kabas neʼe ita la haree hetan, maibé kabas neʼe importante hodi fatuk-murak sira-neʼe bele sai korrente ida. Nuneʼe mós, irmaun neʼebé dirije estudu presiza hanoin-hetan saida mak ninia knaar. Nia knaar mak laʼós atu domina hotu estuda neʼe, maibé atu hafurak liu komentáriu neʼebé rona-naʼin hatoʼo atu hahiʼi Maromak. Sin, kuandu kongregasaun hatoʼo komentáriu oioin, no irmaun neʼebé dirije aumenta komentáriu badak iha tempu loos, rezultadu mak estudu neʼe sei fó ksolok ba rona-naʼin hotu, hanesan korrente furak neʼebé fó ksolok ba ema.
“Ita hasaʼe nafatin sakrifísiu hahiʼi rohan-laek nian ba Maromak”
10. Oinsá mak ema kristaun iha tempu uluk nia haree kona-ba reuniaun kongregasaun nian?
10 Paulo nia liafuan kona-ba reuniaun kristaun nian neʼebé hakerek iha 1 Korinto 14:26-33, ajuda ita atu hatene oinsá mak dalan neʼebé ema kristaun iha apóstolu sira-nia tempu halaʼo sira-nia reuniaun. Matenek-naʼin ida kona-ba Bíblia fó komentáriu kona-ba eskritura neʼe hodi hatete: “Buat ida neʼebé importante kona-ba serimónia neʼebé halaʼo iha Igreja uluk nian mak ema hotu neʼebé bá tuir serimónia neʼe sente katak nia iha knaar espesiál no mós iha obrigasaun atu fahe hanoin ruma. Ema ida neʼebé tuir serimónia laʼós deʼit atu rona; nia tuir laʼós deʼit atu simu maibé atu fó.” Klaru katak ema kristaun iha tempu uluk haree reuniaun kongregasaun nian nuʼudar oportunidade atu hatudu sai sira-nia fiar.—Ebr 13:15.
11. (a) Saida mak bele ajuda kongregasaun atu hametin malu? Tanbasá? (b) Hodi halo tuir matadalan saida mak bele ajuda ita atu hadiʼa ita-nia komentáriu iha reuniaun sira? (Haree nota-rodapé.)
11 Kuandu ita hatudu sai ita-nia fiar iha reuniaun sira, ida-neʼe bele “harii” ka hametin kongregasaun. Maski ita foin tuir reuniaun ka tuir reuniaun ba tinan barak ona, ita hotu sente kontente tebes hodi rona ita-nia irmaun-irmán sira-nia komentáriu. Komentáriu husi maluk kristaun neʼebé laran-metin no idade ona book duni ita-nia laran; ita sente laran-manas kuandu rona katuas kongregasaun nian fó resposta neʼebé book ita-nia hanoin; no karik ita gosta tebes kuandu labarik kiʼik fó sai komentáriu badak neʼebé hatudu nia domin ba Maromak Jeová. Klaru katak liuhusi ita-nia komentáriu, ita hotu hola parte atu hametin malu iha ita-nia reuniaun kristaun. *
12. (a) Saida mak ita aprende husi Moisés no Jeremias nia ezemplu? (b) Oinsá mak orasaun bele ajuda ita atu fó komentáriu?
12 Maibé, karik sira neʼebé moedór sente katak susar atu fó komentáriu. Se Ita sente nuneʼe, diʼak atu hanoin-hetan katak ema seluk mós sente hanesan neʼe. Tuir loloos, Maromak nia atan sira neʼebé laran-metin hanesan Moisés no Jeremias mós sente katak susar ba sira atu koʼalia iha ema barak nia oin. (Êx 4:10; Jer 1:6) Maibé, hanesan Maromak Jeová ajuda ninia atan sira-neʼe atu hahiʼi nia iha ema barak nia oin, Maromak mós sei ajuda Ita atu hasaʼe sakrifísiu hahiʼi nian. (Lee Ebreu 13:15.) Oinsá mak Ita bele hetan Maromak Jeová nia ajuda hodi sai brani atu fó komentáriu? Ulukliu, prepara didiʼak ba reuniaun sira. Depois neʼe, antes Ita bá Reuniaun-Fatin, halo orasaun ba Maromak Jeová no husu nia liuliu atu fó aten-brani ba Ita hodi fó komentáriu. (Flp 4:6) Tanba buat neʼebé Ita husu ba Maromak Jeová mak “tuir nia hakarak”, Ita bele fiar duni katak nia sei hatán Ita-nia orasaun.—1 Joao 5:14; Prov 15:29.
Reuniaun sira mak atu ‘harii, fó aten-brani, no fó ksolok’
13. (a) Saida mak razaun importante atu tuir reuniaun sira? (b) Importante ba katuas sira atu hanoin kona-ba pergunta saida?
13 Paulo esplika katak razaun importante atu tuir reuniaun sira mak tanba reuniaun sira-neʼe bele ‘harii, fó aten-brani, no fó ksolok’ ba sira neʼebé tuir. * (1 Kor 14:3) Oinsá mak katuas kristaun sira ohin loron bele halaʼo sira-nia parte iha reuniaun sira iha dalan neʼebé fó kmaan no fó ksolok ba irmaun-irmán sira? Atu hatán pergunta neʼe, mai ita haree reuniaun neʼebé Jesus halaʼo lakleur depois nia moris hiʼas.
14. (a) Saida mak akontese antes Jesus halaʼo reuniaun ho ninia apóstolu sira? (b) Tanbasá mak apóstolu sira sente kmaan kuandu “Jesus hakbesik hodi koʼalia ba sira”?
14 Ulukliu, haree toʼok saida mak akontese antes Jesus halaʼo reuniaun neʼe. Kuandu ema kaer Jesus atu oho, apóstolu sira “halai hotu no husik nia mesak”, no hanesan Jesus hatete nanis, sira “namkari” ba sira ida-idak nia fatin. (Mc 14:50; Joao 16:32) Liutiha neʼe, depois Jesus moris hiʼas ona, nia konvida ninia apóstolu sira neʼebé laran-kraik hela atu tuir reuniaun espesiál ida. * Tan neʼe, apóstolu “sanulu-resin-ida neʼe laʼo ba Galileia, ba foho neʼebé uluk Jesus haruka sira”. Kuandu sira toʼo neʼebá, “Jesus hakbesik hodi koʼalia ba sira”. (Mt 28:10, 16, 18) Klaru katak apóstolu sira sente kmaan duni tanba hatene katak Jesus hakarak koʼalia ba sira! Iha tempu neʼebá Jesus koʼalia kona-ba saida deʼit?
15. (a) Jesus koʼalia deʼit kona-ba saida? Saida mak Jesus la halo? (b) Iha dalan saida mak reuniaun neʼe book Jesus nia apóstolu sira?
15 Jesus hahú hodi dehan: “Kbiit tomak iha lalehan no rai fó tiha ona mai haʼu.” Depois neʼe, nia fó knaar ida-neʼe ba sira: “Laʼo bá, hanorin nasaun hotu-hotu.” Ikusmai, nia fó kmaan ba sira hodi dehan: “Haʼu sei hela nafatin hamutuk ho imi.” (Mt 28:18-20) Maibé, haree toʼok saida mak Jesus la halo? Nia la hirus ninia apóstolu sira; nia la uza reuniaun neʼe atu hatudu katak nia duvida kona-ba sira-nia laran-metin no domin ba nia. No nia mós la halo sira laran-tun demais hodi koʼalia kona-ba sira-nia fiar neʼebé fraku ba tempu uitoan. Maibé Jesus fó-hanoin fali ba sira kona-ba nia domin no nia Aman nia domin hodi fó knaar neʼebé importante ba sira. Dalan neʼebé Jesus koʼalia ba apóstolu sira book sira-nia laran ka lae? Sin, ida-neʼe hametin, fó aten-brani, no fó ksolok ba sira no lakleur depois reuniaun neʼe sira komesa fali “hanorin no haklaken” kona-ba lia-foun diʼak.—Apos 5:42.
16. Oinsá mak katuas sira ohin loron banati-tuir Jesus hodi halaʼo reuniaun sira neʼebé fó kmaan ba ema?
16 Ohin loron katuas sira banati-tuir Jesus hodi halaʼo reuniaun sira iha dalan neʼebé bele book maluk kristaun atu fiar katak Maromak Jeová hadomi tebes ninia povu. (Rom 8:38, 39) Tan neʼe, kuandu katuas sira halaʼo sira-nia parte iha reuniaun, sira koʼalia buat neʼebé diʼak kona-ba irmaun sira, laʼós koʼalia kona-ba irmaun sira-nia fraku. Sira la duvida kona-ba irmaun sira-nia domin ba Maromak. Maibé, iha sira-nia parte iha reuniaun, katuas sira hakarak hatudu sai katak sira hafolin irmaun sira hotu nuʼudar ema neʼebé hadomi Maromak Jeová no neʼebé hakarak halo buat neʼebé loos. (1 Tes 4:1, 9-12) Maski dala ruma katuas sira presiza fó konsellu ba kongregasaun tomak, maibé se ema balu deʼit mak presiza konsellu ruma, katuas sira buka atu fó konsellu ba ema sira-neʼe iha tempu seluk kuandu mesak ho sira. (Gal 6:1; 2 Tim 2:24-26) Kuandu katuas sira hatoʼo diskursu ba kongregasaun tomak, baibain sira buka oportunidade atu gaba irmaun sira. (Isa 32:2) Sira hakaʼas an atu koʼalia iha dalan neʼebé halo sira neʼebé tuir reuniaun sente kmaan no iha forsa fali kuandu reuniaun ramata.—Mt 11:28; Apos 15:32.
Reuniaun sira fó ksolok ba ita
17. (a) Tanbasá mak importante liu agora atu halo ita-nia reuniaun sira sai fatin neʼebé fó ksolok ba ema hotu? (b) Oinsá mak ita ida-idak bele halo reuniaun kristaun sira sai fatin neʼebé hametin ita-nia fiar? (Haree kaixa “Dalan sanulu atu halo reuniaun sira sai fatin neʼebé hametin Ita no Ita-nia maluk.”)
17 Nuʼudar Satanás nia mundu neʼe sai aat ba beibeik, ita presiza hakaʼas an atu halo ita-nia reuniaun sira sai fatin neʼebé fó ksolok ba ema hotu. (1 Tes 5:11) Irmán ida ho nia laʼen neʼebé tahan terus ruma iha tinan balu liubá hanoin-hetan hodi hatete: “Kuandu ami tuir reuniaun sira iha Reuniaun-Fatin ami sente hanesan Maromak Jeová halibur ami iha nia liman laran. Durante ami iha neʼebá, ami hamutuk ho irmaun no irmán kristaun sira no ami sente katak ami bele fó ami-nia todan ba Maromak Jeová, no ida-neʼe halo ami sente dame iha laran.” (Sal 55:22) Ema hotu neʼebé tuir reuniaun sira mós bele sente laran-manas no ksolok hanesan esperiénsia neʼe. Entaun, mai ita hotu kontinua hakaʼas an atu hola parte hodi halo reuniaun kristaun sira sai fatin neʼebé hametin ita-nia fiar.
[Nota–rodapé]
^ par. 1 Bíblia fó-hatene nanis katak buat balu neʼebé halaʼo iha reuniaun kristaun iha apóstolu sira-nia tempu sei la kontinua atu halo tan. Porezemplu, ohin loron ita la “koʼalia lia oioin” ka “halo profesia”. (1 Kor 13:8; 14:5) Maski nuneʼe, Paulo nia liafuan bele ajuda ita atu hatene oinsá mak dalan atu halaʼo reuniaun kristaun ohin loron.
^ par. 7 Salmo 22:22: “Haʼu sei hanaʼi Ita-nia naran iha haʼu-nia maun-alin sira-nia leet; haʼu hahiʼi Ita iha Ita-nia povu nia leet.”
^ par. 7 Salmo 35:18: “Haʼu sei hanaʼi Ita iha Ita-nia povu barak nia leet; iha ema barak nia leet haʼu sei hahiʼi Ita.”
^ par. 7 Salmo 40:9: “Haʼu fó-hatene tiha lia-foun diʼak kona-ba buat neʼebé loos iha Ita-nia povu barak nia leet. Haree! Haʼu la taka netik haʼu-nia ibun. Oh, Jeová, Ita rasik hatene didiʼak kona-ba neʼe.”
^ par. 11 Atu hetan informasaun kona-ba oinsá mak ita bele hadiʼa ita-nia komentáriu iha reuniaun sira, haree Menara Pengawal, 1 September 2003, pájina 19-22.
^ par. 13 Kona-ba buat neʼebé la hanesan entre “fó aten-brani” no “fó ksolok”, livru Vineʼs Expository Dictionary of Old and New Testament Words esplika katak lia-gregu neʼebé tradús nuʼudar “fó ksolok”, mós inklui “fó kmaan hodi hatudu domin duké fó [aten-brani] deʼit.”—Kompara ho Joao 11:19.
^ par. 14 Karik Paulo koʼalia kona-ba reuniaun neʼe kuandu nia hatete katak Jesus “mosu ba maun-alin naʼin-atus lima resin”.—1 Kor 15:6.
Oinsá ita hatán?
• Saida mak hatudu katak reuniaun kristaun importante?
• Tanbasá mak komentáriu sira iha reuniaun bele “harii” ka hametin kongregasaun?
• Saida mak ita aprende husi reuniaun neʼebé Jesus halaʼo ho ninia dixípulu sira?
[Pergunta estudu nian]
[Kaixa/Dezeñu iha pájina 22]
DALAN SANULU ATU HALO REUNIAUN SIRA SAI FATIN NEʼEBÉ HAMETIN ITA NO ITA-NIA MALUK
Prepara nanis. Kuandu Ita prepara nanis informasaun sira neʼebé sei estuda iha Reuniaun-Fatin, Ita sei gosta liu reuniaun neʼe no buat neʼebé Ita estuda bele tama iha Ita-nia laran.
Tuir beibeik. Se ema barak tuir reuniaun, ida-neʼe sei fó laran-manas ba sira hotu neʼebé tuir. Tan neʼe importante ba Ita ida-idak atu tuir reuniaun hotu.
Toʼo sedu. Se Ita tuur uluk antes programa hahú, Ita bele hola parte atu kanta no rona ba orasaun atu loke reuniaun. Buat sira-neʼe mak parte husi ita-nia adorasaun ba Maromak Jeová.
Lori buat neʼebé Ita presiza. Lori Ita-nia Bíblia no livru sira neʼebé atu uza iha reuniaun hodi Ita bele tuir no komprende didiʼak buat neʼebé hatoʼo iha reuniaun.
Tau atensaun nafatin. Keta husik buat ruma atu dada Ita-nia atensaun. Porezemplu, diʼak atu lee Ita-nia mensajen depois reuniaun hotu, laʼós durante reuniaun. Hodi halo nuneʼe, Ita la halo buat neʼebé ladún importante iha oras reuniaun nian.
Hola parte. Hodi rona komentáriu barak neʼebé irmaun-irmán hatoʼo atu hatudu sai sira-nia fiar, ida-neʼe sei hametin no fo laran-manas liután ba ema hotu.
Fó komentáriu neʼebé badak. Ida-neʼe fó oportunidade barak liu ba ema seluk atu hatoʼo sira-nia komentáriu.
Kumpre Ita-nia knaar. Se Ita hetan knaar iha Eskola Serbisu Teokrátiku nian ka iha Reuniaun Serbisu nian, diʼak atu prepara didiʼak, halo treinu nanis, no hakaʼas an atu la husik buat ruma hapara Ita atu halaʼo Ita-nia knaar.
Gaba sira neʼebé hola parte iha reuniaun. Fó-hatene ba sira neʼebé iha parte iha reuniaun ka sira neʼebé fó komentáriu katak Ita hafolin tebes sira-nia hakaʼas-an.
Ransu malu. Fó kumprimentu ho laran-diʼak no koʼalia hodi hametin malu antes no depois reuniaun, ida-neʼe bele aumenta Ita-nia laran-ksolok no Ita sei hafolin liután buat diʼak neʼebé Ita hetan hodi tuir reuniaun sira.