Eski i posib pour ganny kontantman?

“Kontantman i fer en zonm pov ris, me en zonm ris ki napa kontantman i pov.”—Benjamin Franklin.

AN ARMONI avek sa proverb, bokou dimoun i realize ki kontantman pa kapab ganny aste parey konmisyon. I pa drol alor ki i paret difisil pour nou annan satisfaksyon oubyen kontant nou avek sa ki nou annan dan en lemonn ki fer dimoun devlop sa lanvi pour ganny plis keksoz materyel, plis sikse oubyen annan menm stil lavi ki lezot! Eski ou’n deza eksperyans okenn sa bann sityasyon swivan?

• Ou ganny bonbarde avek bann piblisite ki ou pou ganny satisfaksyon si ou kontinyen aste keksoz.

• Konpetisyon dan travay oubyen dan lekol i fer ou krwar ki ou annan valer selman si ou fer tou sa ki lezot i kapab fer.

• Dimoun pa demontre lapresyasyon pour sa ki ou fer pour zot.

• Ou bann zanmi i fer ou zalou sa ki zot annan.

• Bann kestyon enportan ki ou annan lo lavi pa ankor ganny reponn.

Eski i vreman posib pour nou kontant nou avek sa ki nou annan malgre nou fer fas avek sa bann sityasyon? Zapot Pol ti refer avek “sekre pour kontant li” avek sa ki i ti annan. Parfwa i ti viv dan labondans e parfwa dan lamizer. I ti ganny admire par son bann zanmi, me ganny monke avek lezot. Me kantmenm sa i ti dir, mon’n “aprann kontant mwan dan nenport sirkonstans.”—Nou ki’n met an italik; Filipyen 4:11, 12, New International Version.

Kontantman i en sekre pour bann ki pa’n zanmen pran sa pa pour satisfe avek sa ki zot annan, me parey Pol ti dir, nou kapab aprann konman pour ganny kontantman. Aprezan, nou envit ou pour vwar senk sekre ki trouve dan Labib lo konman ou kapab aprann kontant ou avek sa ki ou annan.