Kọ O Lọhọ re Ohwo O Wo Edẹro?

“Edẹro u re ru iyogbere họ edafe; ababọ-edẹro u re ru edafe họ iyogbere.” —Benjamin Franklin.

RỌWOKUGBE ẹme yena, ahwo buobu a vuhumu no inọ edẹro o rrọ oware nọ a rẹ rehọ ugho dẹ hẹ. Agbẹta nọ edẹro—iroro inọ onọ-me-wo u te k’omẹ—o rọ wọhọ oware nọ a rẹ sai wo t’obọ họ na evaọ akpọ nọ ọ vọ avọ isiuru kẹ ekwakwa ibuobu iwo, ikpeware ile, gbe isiuru kẹ eware nọ amọfa a be reawere rai! Kọ ejọ evaọ usu eware nọ e rrọ obotọ na i kpomahọ owhẹ no?

• Ahwo nọ a rẹ zẹ eware a rẹ vuẹ owhẹ inọ whọ tẹ dẹ oware jọ nọ a bi whowho na yọ who te ohwo no, yọ who wo evevọwẹ no.

• Oma-uhrowo evaọ oria iruo hayo obọ isukulu u re ru owhẹ gwọlọ rehọ eware nọ amọfa a wo hayo le t’obọ no rọ wawọ omara sọ who gine te ohwo.

• Ahwo a re dhesẹ ovuhumuo ho nọ who te ru oware kẹ ae.

• Egbẹnyusu ra a re ru owhẹ roro inọ dodokọ who wo eware nọ a wo.

• Whọ be ruẹ iyo kẹ enọ kpahe uzuazọ nọ i wuzou gaga nọ whọ be nọ họ.

Avọ ise-abọ nana nọ ma rẹriẹ ovao dhe, kọ o ginẹ lọhọ re ohwo o wo edẹro? Pọl ukọ na ọ ta ẹme kpahe “edidi” ọrọ epanọ onọ ohwo o wo o rẹ rọ dae ẹro. Evaọ etoke sa-sa, ọ reawere ọruẹriọ jẹ ruẹ ọbẹwẹ evaọ uzuazọ. Uzuazọ riẹ u je si egbẹnyusu riẹ urru gaga, rekọ amọfa a jẹ rehọ iẹe jijehwẹ. Dede na, ọ ta inọ ọ jọ ‘evaọ koware koware gbe uyero kpobi wuhrẹ edidi epanọ a rẹ rehọ ovao dhe ọruẹriọ hayo ọbẹwẹ.’—Ahwo Filipai 4:11, 12.

Re a wo edẹro yọ oware udidi kẹ ahwo nọ a re j’owọ epanọ a re ro woi hi, rekọ wọhọ epanọ Pọl ukọ na ọ ta na, a rẹ sai wuhrẹ edẹro. Ma zizie owhẹ inọ who se kpahe edidi hayo eware isoi jọ nọ Ebaibol na e fodẹ nọ i re fi obọ họ kẹ ohwo wuhrẹ edẹro.