Hende Por Ta Satisfecho den Bida?

“Hende ku ta kontentu ku loke nan tin ta bira riku; hende riku ku ta mal kontentu ta bira pober.” ​—Benjamin Franklin.

HOPI hende a siña, na armonia ku e dicho ei, ku satisfakshon den bida no ta algu ku bo por kumpra. P’esei no ta nada straño ku den mundu ta parse difísil pa hende sinti nan satisfecho, ya ku mundu ta fomentá e deseo pa mas kos, pa yega na logronan mas grandi òf pa bo tin e bida ku otro hende ta disfrutá di dje. Un di e siguiente kosnan akí kisas a afektá bo?

• Hasidónan di propaganda ta bombardiá bo ku e mensahe ku pa bo sinti bo satisfecho bo tin ku kumpra djis un kos so mas.

• E kompetensia ku tin na trabou òf na skol ta pone bo midi bo balor na komparashon ku e logronan di otro hende.

• Hende no ta apresiá loke bo ta hasi pa nan.

• Bo amigunan ta hasi bo yalurs ku loke nan tin.

• Bo no ta haña kontesta riba e preguntanan básiko ku bo tin tokante bida.

En bista di e retonan ei, ta realmente posibel pa un hende ta satisfecho den bida? Apòstel Pablo a menshoná e “sekreto” di keda kontentu òf satisfecho den bida. Algun biaha e tabatin abundansia, i otro biahanan e tabatin skarsedat. E tabatin amigu ku a atmir’é, ma otronan ku a hasi bofon di dje. Sinembargo, el a bisa: “Mi a siña di ta kontentu den ki sirkunstansia ku mi haña mi aden.”​—Filipensenan 4:​11, 12.

Tin hende no konosé e sintimentu di satisfakshon den bida. E ta algu deskonosí pa nan, pasobra nunka nan no a dal paso pa logra esei. Pero manera Pablo a deklará, e ta algu ku nos por siña. Nos ta invitá bo pa konsiderá sinku sekreto ku Beibel, e Palabra di Dios, ta revelá pa bo por keda satisfecho den bida.