Ngsebeched el Kiei el Dmeu a Rengud er Aike el Ngar Ngii er Kid?

“A chebuul el chad el ungilbesul er a rengul aike el ngar ngii er ngii a mo merau, e ngike el merau el di ngesonges er a rengul aike el ngar ngii er ngii a mo chebuul.”​—Aikang a tekingel a Benjamin Franklin.

SEL dolatk er tia el tekoi e ngsebeched el mesang a klemerang er ngii, a rebetok el chad a mla suubii el kmo a ungilbesul el uldesuel a chad a diak el sebechel el mochar el ua klalo el domechar er a stoang. Me a ungilbesul el uldesuel a chad, el mera el ngar er a rengul a chad el diak el ultuil er a urungulel a chad el soal el mengudel a betok el kloklel, me a lechub e ngmo osiik a ngarbab el deruchall, me a lechub e ngmeruul er a klengar er ngii el oltirakl er a deuil a rengrir a rebebil! Me a ker a kmo, chouaika el omeruul ngmla mengesuseu er kau el mo meruul?

• A rechad el meruul a siasing el kirel a oterullel a klalo a mengesuseu er kid el mo omdasu el kmo sel docherar a lmuut el ta er a klalo e ngmo uchul a deuil a rengud e mo ungilbesul er a rengud er aike el ngar ngii er kid.

• A klaisichai er a chelsel a ureor me a dirrek el skuul a mengesuseu er kid el mo melasem a tekoi el mo mengaisichai er a rebebil.

• Ngdiak a omereng el saul er a rechad el kirel aike el tekoi el doruul el kirir.

• A resechelid a meruul er kid el mo mechechei er tir el kirel aike el ngar ngii er tir.

• Aike el kerim el kirel a klengar a diak el sebechel el monger.

Ngmera el sebechel el mo ungilbesul a rengud el kirel aike el ngar ngii er kid, a lsekum e kede mo chelebangel a chouaika el omelsemai? A apostol Paulus a milsaod el kirel ‘aike el ungilbesul’ er a rengud el tekoi. Ngmla er ngii a taem el lekiliei el mle merau el chad el betok a kloklel, e dirrek el mla er ngii a taem e ngkmal mle chebuul el diak a ngerang er ngii. A resechelil a chilat er ngii engdi a rebebil a uluucharm er ngii. Me nguaisei, engdi ngii a dilu el kmo, ak “kmla mesuub el mo ungilbesul er ngak” aike el ngar ngii er ngak.​—Filipi 4:​11, 12.

A dekiei el ungilbesul er a rengud aike el ngar ngii er kid a blekeradel el berrotel er a osengir tirke el diak lolasem el osiik er ngii, engdi a Paulus a millekoi el kmo, ngsebeched el mesuub el mo medengelii. Chelechang e me bo dosaod a eim el berrotel el tekoi el kirel a blekeradel el kiei el ungilbesul a klengar er kid, el llechukl er a Tekingel a Dios el Biblia.