Pe e Mafai Ona Lotomalie?

“O le lotomalie e mauʻoa ai tagata matitiva, a o le lē lotomalie e matitiva ai tagata mauʻoa.”—Benjamin Franklin.

E TUSA ai ma lenā alagāupu, ua iloa e le toʻatele e lē mafai ona faatau mai le lotomalie e pei o ni oloa. E lētioa a faigatā ona maua le lotomalie, i se lalolagi ua matuā uunaʻia ai le mauaina o le tele o mea, tulaga aloaʻia, po o le olaga manuia lea e maua e isi! Po o taaʻina oe i mea e pei ona taʻua i lalo?

• Ua saputu mai i faasalalauga le feʻau e faapea e maua le lotomalie pe a e faatauina ni oloa se tele.

• O tauvaga i le galuega po o le aʻoga ua uunaʻia ai oe e fai mea ia e faia e isi.

• Ua lē talisapaia e tagata mea e te faia mo i latou.

• E gugutu mai au uō e uiga i mea ua latou maua, ma ua e fuā ai.

• Ua lē maua se tali i au fesili tāua e uiga i le olaga.

Talu ai ua fesagaʻi ma nei luʻi, pe e mafai la ona lotomalie? Na taʻua e le aposetolo o Paulo le iloa “feagai ma le maʻona ma le matelāina.” O nisi taimi sa tele ana mea, ae o isi taimi ua leai. Sa viiviia o ia e ana uō, ae na ulagia e isi. Peitaʻi na ia faapea mai ‘ua aʻoaʻoina o ia, e tusa lava po o ā tulaga e oo iā te ia, ae ia lotomalie i mea ua ia maua.’—Filipi 4:11, 12.

E lē maua le lotomalie e i latou o ē e lē fia mauaina, ae na taʻua e Paulo e mafai ona aʻoaʻoina ia lotomalie. E matou te talosagaina oe e iloilo auala e lima ua taʻua i le Tusi Paia, e mafai ona maua ai le lotomalie.