Sekre 1

Kontan dimoun, me pa larzan ek keksoz materyel

KI LABIB I DIR? “Lanmour larzan i rasin tou lemal.”—1 Timote 6:10.

KI SA DEFI? Bann piblisiter i met presyon lo nou pour nou pa zanmen satisfe avek sa ki nou annan. Zot anvi ki nou pas tou letan dan travay pour ganny larzan pour depans lo bann keksoz ki nouvo, pli bon e pli gro. Nou kapab fasilman devlop lanmour pour larzan e vwar li konman en keksoz vreman enportan. Par kont, Labib i averti nou ki en dimoun ki kontan larzan pa pou zanmen satisfe. Lerwa Salomon ti ekrir: “En dimoun ki kontan larzan pa pou satisfe avek larzan, ni sa enn ki kontan larises avek reveni.”—Eklezyast 5:10.

KI OU KAPAB FER? Imit legzanp Zezi e aprann kontan dimoun plis ki keksoz materyel. Zezi ti pare pour perdi tou sa ki i ti annan, menm son lavi akoz i ti kontan dimoun. (Zan 15:13) I ti dir: “I annan plis lazwa pour donnen ki pour resevwar.” (Akt 20:35) Si nou fer li en labitid pour donn lezot nou letan ek resours, zot osi zot pou fer parey. Zezi ti dir: “Donnen e ou osi ou a gannyen.” (Lik 6:38) Bann ki tay deryer larzan ek keksoz materyel pe plonz zot dan larin ek maler. (1 Timote 6:9, 10) De lot kote, nou aprann vre kontantman kan nou demontre lanmour anver lezot, e lezot i demontre lanmour anver nou.

Akoz ou pa esey vwar si ou kapab senplifye ou lavi? Eski ou kapab diminyen lakantite keksoz ki ou annan oubyen ki ou pe mazinen pour aste? Si ou fer sa, ou pou remarke ki ou pou annan plis letan ek lenerzi pour bann keksoz pli enportan dan lavi, setadir pour ed lezot e pour servi Bondye, sa enn ki’n donn ou tou sa ki ou annan.—Matye 6:24; Akt 17:28.

[Portre lo paz 4]

“Donnen e ou osi ou a gannyen”