Konsého 1

Jahayhu ñande rapichápe ha ani umi mbaʼerepy

MBAʼÉPA HEʼI LA BIBLIA: “Pe pláta rayhu niko opa mbaʼe vai rapo” (1 Timoteo 6:10, BNP).

PROVLÉMA: Umi propagánda ñanemboliga jajogua hag̃ua pe ipyahuvéva, iporãvéva térã tuichavéva. Mbaʼevete chupekuéra ñambaʼapótaramo koʼẽ mboyve guive pyhare peve japaga hag̃ua. Añetehápe pe pláta rayhu ikatu ñanemoñuhã ha upéi jaikóma jaheka tarovaite. La Biblia heʼi voi umi ipláta rayhúva arakaʼeve noñekontentamoʼãiha. Rréi Salomón heʼivaʼekue: “Pe ohayhúva pirapire nahyguatãmoʼãi arakaʼeve; ha upe ohayhúva imbaʼerepy, hetave katu oipota” (Eclesiastés 5:10, ÑÑB).

MBAʼÉPA IKATU JAJAPO: Jahayhuvaʼerã ñande rapichakuérape Jesús ojapo haguéicha. Haʼe ndoikoivaʼekue pláta rapykuéri. Upéicha rupi hekove jepe omeʼẽ umi hénte rehehápe (Juan 15:13). Haʼe heʼi: ‘Javyʼave ñameʼẽvo, oñemeʼẽ rangue ñandéve’ (Hechos 20:35). Jaiporúramo ñane tiémpo ha umi mbaʼe jarekóva ñande rapichakuéra rehehápe, haʼekuéra ojaposéta avei upéicha. Upévare Jesús heʼi: ‘Pendepojerákena pende rapichándi ha oñemyengoviáta peẽme’ (Lucas 6:38, NM). Añetehápe umi ohayhúva pe pláta arakaʼeve noñekontentái, ha upéicha rupi ohasa asy ha ndovyʼái (1 Timoteo 6:9, 10). Péro japorohayhúramo ha oĩrõ ñanderayhúva avei, javyʼaiterei.

Iporã jajepyʼamongeta ha ñañeporandu: “Mbaʼépa ajapokuaa ani hag̃ua amotenonde umi mbaʼerepy? Aikotevẽ piko opa mbaʼe arekóva? Añetehápepa ifálta chéve umi mbaʼe ajoguaséva?”. Jaiporu porãramo ñane tiémpo ha ñane mbaretekue ñamotenondéta umi mbaʼe iñimportantevéva: ñaipytyvõ ñande rapichápe ha ñamombaʼeguasu Ñandejárape, omeʼẽ haguére ñandéve opa mbaʼe (Mateo 6:24; Hechos 17:28).

[Nóta oĩva taʼanga ndive páhina 4]

‘Pendepojerákena pende rapichándi ha oñemyengoviáta peẽme’