Kinsweki ya 1

Zola Bantu, Kansi Mbongo mpi Kimvwama Ve

INKI BIBLIA KELONGAKA? “Kuzola mbongo mingi ke bendaka mambu ya mbi ya mutindu na mutindu.”​—1 Timoteo 6:10.

SAMBU NA NKI YO LENDA VANDA MPASI? Bantu ya kesalaka bapiblisite kepusaka beto na kusepela ve ti bima ya beto kele na yo. Bo kezolaka nde beto vanda bampika ya kisalu sambu beto zwa mbongo yina tasadisa beto na kusumba bima ya mpa, ya kuluta kitoko, mpi ya nene-nene. Mbongo kekusaka, mpi yo kele mpasi ve nde beto kuma kuzola yo. Kansi, Biblia kekebisa nde muntu yina kezolaka kimvwama tavandaka ve na kyese ata fyoti. Ntotila Salomo kusonikaka nde: “Muntu yina ke zolaka mbongo, yandi ta mona kiese ve na yo. Muntu yina ke zolaka kukuma mvwama, yandi ta zwa ve konso kima ya yandi ke zola.”​—Longi 5:9.

INKI NGE LENDA SALA? Landa mbandu ya Yezu, mpi longuka na kuzola bantu kuluta bima. Yezu kuyambulaka na luzolo yonso bima na yandi yonso​—ata luzingu na yandi—​sambu yandi vandaka kuzola bantu. (Yoane 15:13) Yandi tubaka nde: “Kiese ke vandaka mingi na kupesa, kansi na kubaka kiese ke vandaka fioti.” (Bisalu 20:35) Kana beto yedisa kikalulu ya kupesa bankaka ntangu mpi bima na beto, bantu tasala mpi mutindu mosi sambu na beto. Yezu kutubaka nde: “Beno pesa makabu na bantu ya nkaka, mpidina [bantu, NW] mpi ta pesa beno makabu.” (Luka 6:38) Bantu yina kelandaka na kusosa mbongo mpi bimvwama kekudipesaka mpasi. (1 Timoteo 6:9, 10) Na ndambu yankaka, kyese ya kyeleka kekatukaka na kuzola bankaka mpi kana bankaka kezola beto.

Sambu na nki ve kumeka na kukumisa luzingu na nge pete? Keti nge lenda fyotuna bima ya kinsuni ya nge kele na yo to yina ya nge kesosa kusumba? Kana nge sala yo, nge lenda mona nde nge tabikala ti ntangu mpi ngolo mingi sambu na kusala mambu ya kuluta mfunu na luzingu, disongidila kusadisa bantu mpi kusadila Nzambi, yina mepesaka nge bima yonso ya nge kele na yo.​—Matayo 6:24; Bisalu 17:28.

[Kifwanisu ya kele na lutiti 4]

“Beno pesa makabu na bantu ya nkaka, mpidina [bantu] mpi ta pesa beno makabu”